1 Korintus 13:3 - Perjanjian Baru Bahasa Melayu Maluku Utara

³ Biar lagi kita kase barbage samua yang kita punya pa orang susa, deng biar lagi kita serakan kita pe diri untuk dapa bakar karna iko pa Tuhan Yesus, tapi kalu kita tara sayang pa orang laeng, samua itu tarada dia pe guna untuk kita.

1 Korintus 13:3 ပူးပေါင်းရင်းမြစ်များ

Matius 23:5

Samua yang dorang biking, dorang biking cuma supaya orang puji pa dorang. Macam deng dong pe pangika kapala deng tangan, yang dong tulis isi Kitab Suci kong dong biking kase lebar-lebar. Turus, dorang pe juba pe banang-banang me dong biking kase lebe panjang supaya orang tau kata, dong iko pa Tuhan deng bae.

Lukas 18:22

Pe dengar itu, Yesus bilang, “Tapi masi ada satu yang ngana bolong biking. Ngana jual samua ngana pe harta kong kase bage-bage doi itu pa orang-orang miskin. Kalu ngana biking bagitu, ngana dapa harta di sorga. Abis itu, kamari suda la iko pa Kita.”

Lukas 18:28

Turus Petrus bilang, “Torang ini so kase tinggal samua yang torang punya kong so iko pa Guru.”

Lukas 19:8

Tapi Zakheus badiri kong bilang pa Tuhan Yesus, “Bapa, Kita mo kase stenga dari kita punya pa orang yang tarada apa-apa. Deng kalu ada orang yang kita so perna kase ruci, kita mo kase pulang pa dorang ampa kali lipa.”

Yohanes 12:43

Barang, pemimpin-pemimpin agama Yahudi lebe suka manusia puji deng hormat pa dorang daripada Tuhan Allah yang puji deng hormat.

Yohanes 13:37

Petrus bilang pa Yesus, “Tuhan, bikiapa kong skarang kita bolong bole mo iko pa Tuhan? Kita so siap mati untuk Tuhan.”

Yohanes 15:13

Sayang yang paling basar itu, kalu orang siap mati untuk dia pe tamang-tamang supaya dia pe tamang-tamang bole hidup.

Yohanes 6:63

Manusia tara mungkin mo dapa hidup deng Tuhan Allah slama-lamanya pake dia pe usaha sandiri, cuma Roh Kudus yang bole biking manusia hidup deng Tuhan Allah slama-lamanya. Samua kata-kata yang Kita bilang pa ngoni, pe asal dari Roh Kudus, kong kata-kata itu lagi yang kase hidup deng Tuhan Allah slama-lamanya.

Kisah Para Rasul 21:13

Tapi Paulus bilang pa torang, “Bikiapa kong ngoni manangis? Ngoni bagini biking kita pe hati tamba barát. Kita siap pigi di Yerusalem biar apa saja yang mo jadi pa kita di situ. Kita so siap, bukang cuma mo dapa ika saja, tapi kita me so siap mati karna kase tau tentang Tuhan Yesus.”

Galatia 5:26

Deng tara usa suda torang jadi pangbasombong, tara usa suda torang baku pancing mara, kong tara usa suda torang baku mangiri.

Filipi 2:3

Jang ngoni biking satu barang cuma untuk kase sanang ngoni pe diri sandiri, atau supaya ngoni dapa puji. Tapi lebe bae, ngoni hidup tara basombong. Yang satu musti anggap yang laeng lebe penting dari dia pe diri.

1 Timotius 4:8

Ambe conto, kalu torang lati torang pe badan supaya kuat, itu bagus, tapi dia pe guna cuma sadiki. Tapi kalu torang lati torang pe diri untuk biking Tuhan Allah pe mau, dia pe guna banya skali. Kalu lati torang pe diri bagitu, pasti ada berkat untuk torang pe hidup skarang di dunia ini deng nanti waktu torang hidup ulang.

Ibrani 13:9

Jang ngoni iko ajaran-ajaran yang tara butul yang bole biking ngoni jadi sesat. Barang, kalu iko aturan tentang makanang yang halal deng haram, tarada dia pe guna untuk biking ngoni jadi sempurna pa Tuhan Allah pe muka. Cuma Tuhan Allah pe sayang deng pe bae yang bisa biking ngoni pe percaya pa Tuhan jadi kuat.