1 Korintus 1:9 - Perjanjian Baru Bahasa Melayu Maluku Utara

⁹ Tuhan Allah mo biking itu samua karna Dia itu setia. Dia yang pangge pa ngoni, supaya ngoni bole hidup satu hati deng Dia pe Anak Yesus Kristus, torang pe Tuhan.

1 Korintus 1:9 ပူးပေါင်းရင်းမြစ်များ

Matius 24:35

Langit deng bumi mo abis, tapi Kita pe kata-kata akan tetap ada sampe slama-lamanya.”

Yohanes 17:21

Bapa, Kita minta supaya dorang itu jadi satu hati satu deng yang laeng, sama deng Kita lagi jadi satu deng Bapa kong Bapa jadi satu deng Kita. Kita minta dorang jadi satu hati satu deng yang laeng supaya dorang lagi jadi satu deng Torang. Kita minta bagitu supaya kalu torang samua jadi satu, samua orang di dunia ini jadi percaya, Bapa yang utus pa Kita.

Roma 11:17

Tapi orang Yahudi yang tara percaya pa Yesus Kristus, dorang itu sama deng cabang-cabang yang dapa potong dari pohong zaitun yang ada tanam di kobong. Kong orang yang bukang Yahudi, kalu dorang percaya pa Yesus Kristus, dong itu sama deng cabang-cabang dari pohong zaitun yang batumbu sandiri kong tuang kobong datang potong cabang-cabang itu turus kase malakat di pohong zaitun yang ada tanam di kobong itu. Deng bagitu, cabang dari pohong yang batumbu sandiri dapa hidup dari pohong yang ada tanam di kobong itu. Cabang itu sama deng ngoni orang yang bukang Yahudi, ngoni ini yang so percaya, jadi ngoni so tarima Tuhan Allah pe janji yang dulu Dia so kase pa orang Yahudi.

Roma 8:28

Torang tau ini: sapa saja yang sayang pa Tuhan Allah deng so dapa pangge la iko Dia pe mau, apa saja yang jadi pa dorang, mo bae ka, tara bae ka, torang tau, Tuhan Allah mo biking samua itu untuk dorang pe bae.

Roma 8:30

Kong dorang yang Tuhan Allah so pili dari dulu itu, Dia pangge pa dorang jadi Dia pe umat. Dorang itu, Tuhan Allah biking jadi orang yang tara sala pa Dia pe muka. Kong nanti dorang itu mo dapa puji deng hormat sama-sama deng Dia.

Roma 9:24

Kong orang-orang itu bukang cuma torang orang Yahudi saja tapi orang yang bukang Yahudi lagi.

1 Korintus 1:30

Barang, Tuhan Allah sandiri yang buka jalang untuk ngoni, supaya ngoni bole percaya pa Kristus Yesus. Deng bagitu, torang bole tau Tuhan Allah pe rencana yang bijaksana untuk kase slamat pa manusia. Yesus Kristus itu yang biking torang jadi orang yang tara sala pa Tuhan Allah pe muka deng yang biking torang jadi Dia pe umat, deng Yesus me yang tebus torang pe dosa-dosa.

1 Korintus 10:13

Tiap kali ngoni dapa coba untuk biking dosa, ngoni musti inga, samua manusia jaga dapa cobaan macam bagitu. Tapi Tuhan Allah salalu setia deng Dia pe janji pa ngoni, jadi Dia tara akan kase biar ngoni dapa cobaan yang lebe dari yang ngoni mampo tanggung. Waktu ngoni dapa cobaan, Dia akan kase jalang kaluar, supaya ngoni mampo tahang mangada cobaan itu.

1 Korintus 10:16

Waktu torang iko perjamuan, torang minum anggur dari cawan kong bilang tarimakasi pa Tuhan. Deng torang minum anggur itu, itu pe arti, Tuhan Allah so biking torang jadi satu deng Yesus Kristus pe dara yang tatumpa di kayu salib. Kong waktu torang pela-pela roti kong makang, itu pe arti, Tuhan Allah so biking torang jadi satu deng Yesus Kristus pe badan yang tapaku di kayu salib.

2 Korintus 1:18

Kita tara bagitu, sudara-sudara! Itu sama deng Tuhan Allah, yang pe janji pa torang tara perna beruba. Bagitu lagi deng torang, kata-kata yang tong so bilang pa ngoni, tara perna beruba.

Galatia 1:15

Tapi Tuhan Allah yang so pili pa kita waktu kita masi ada di kita pe mama pe dalam puru. Kong di waktu yang Dia so tentukan, Dia pangge pa kita jadi Dia pe utusan yang orang sebut rasul. Dia pangge pa kita bagitu, karna Dia pe bae pa kita.

Galatia 2:20

Jadi, skarang kita hidup tara iko kita pe kekuatan sandiri lagi, tapi Yesus Kristus yang hidup deng berkuasa pa kita pe diri. Kong selama kita hidup di dunia skarang ini, kita hidup cuma deng percaya saja pa Anak Allah. Dia yang so sayang pa kita deng yang so serakan Dia pe diri mati untuk kita.

Efesus 3:6

Tuhan Allah pe rencana itu bagini: ngoni orang-orang yang bukang Yahudi akan percaya Kabar Bae tentang Yesus Kristus, jadi ngoni me bole sama-sama deng orang-orang Yahudi jadi Dia pe ana-ana yang tarima samua yang Tuhan Allah so janji. Ngoni orang bukang Yahudi deng torang orang Yahudi so jadi satu sama deng jadi satu badan. Kong torang samua itu mo dapa yang Tuhan Allah janji pa torang yang so percaya pa Kristus Yesus.

Kolose 1:24

Skarang ini kita pe hati sanang saja, karna siksa yang kita dapa waktu kase tau Kabar Bae tentang Yesus Kristus, itu untuk ngoni pe bae. Siksa itu memang musti kita rasa, karna kita karja untuk Yesus Kristus. Deng kalu kita dapa siksa, itu sama saja deng kita ambe bagian dalam siksa yang Yesus Kristus rasa untuk tolong Dia pe jemaat. Jemaat itu sama deng Dia pe badan sandiri.

1 Tesalonika 2:12

Itu, torang kase smangat deng kase kuat ngoni pe hati supaya ngoni pe hidup pantas untuk orang yang iko pa Tuhan Allah. Tuhan Allah pangge pa ngoni la jadi Dia pe umat yang Dia berkuasa sebagai Raja, kong ngoni nanti dapa puji deng hormat sama-sama deng Dia.

2 Tesalonika 2:14

Tuhan Allah memang mau bagitu, jadi Dia pangge pa ngoni supaya dapa slamat waktu torang kase tau pa ngoni Kabar Bae tentang Yesus Kristus. Deng bagitu, ngoni bole rasa Yesus Kristus pe bae deng nanti dapa puji deng hormat sama-sama deng Dia, torang pe Tuhan.

2 Tesalonika 3:3

Tuhan Allah itu setia. Dia mo kase kuat ngoni pe hati deng jaga pa ngoni dari yang jahat.

2 Timotius 1:9

Tuhan Allah yang so kase slamat pa torang dari dosa-dosa deng Dia pangge pa torang untuk jadi Dia pe umat sandiri la hidup deng hati bersi. Dia biking samua itu bukang karna torang ada biking yang bae, tapi karna Tuhan Allah pe mau deng karna Dia pe hati bae pa manusia. Memang, dari dulu waktu Tuhan Allah bolong biking dunia ini, Dia so sayang pa torang, jadi Tuhan Allah biking rencana Kristus Yesus datang di dunia.

2 Timotius 2:13

Tapi biar torang tara setia, Dia tetap setia, karna samua yang Dia so janji tara mungkin Dia tara biking.”

Titus 1:2

Kita ajar pa orang-orang yang percaya itu, supaya dorang bole baharap deng yakin, dorang bole dapa hidup deng Tuhan Allah slama-lamanya, sama deng Tuhan Allah so janji. Karna waktu Tuhan Allah bolong biking dunia ini, Dia so janji kamuka, Dia mo kase hidup slama-lamanya pa orang-orang yang percaya pa Dia. Dia pe janji itu pasti jadi, karna Tuhan Allah tara perna bafoya.

Ibrani 10:23

Mari suda torang tetap pegang kuat torang pe percaya pa Yesus yang torang so akui itu, Dia itu torang pe tampa baharap. Barang, Tuhan Allah itu setia, Dia pasti biking samua yang Dia so janji pa torang.

Ibrani 11:11

Turus karna Abraham pe percaya itu, dia bisa dapa ana cucu dari dia pe bini Sara, padahal Sara itu tara bisa dapa ana, baru dong dua laki bini itu so tua skali. Dorang dua bisa dapa ana, barang Abraham percaya Tuhan Allah itu setia, deng pasti Dia mo biking apa yang Dia so janji, untuk mo kase turunan pa dorang dua.

Ibrani 2:17

Kong karna Dia mo tolong pa torang yang jadi Dia pe sudara, Tuhan Allah musti biking Yesus jadi sama persis deng torang manusia. Deng karna Yesus so rasa samua yang torang so rasa, Dia bole kase tunju Dia pe rasa kasiang pa torang manusia, sampe bole kase Dia pe diri mati untuk tebus torang pe dosa-dosa. Deng Dia mati itu, Yesus jadi Imam Basar yang setia pa Tuhan Allah supaya torang deng Tuhan Allah pe hubungan jadi bae ulang.

Ibrani 3:1

Sudara-sudara yang so jadi Tuhan Allah pe umat, yang so dapa pangge untuk hidup sama-sama deng Dia di sorga, coba ngoni pikir bae-bae tentang Yesus Kristus yang torang so percaya. Dia itu Tuhan Allah pe Utusan deng Dia lagi Imam Basar, karna Dia biking sampe torang manusia deng Tuhan Allah pe hubungan bisa jadi bae ulang.

Ibrani 3:14

Barang, kalu torang tetap pegang turus apa yang torang so percaya dari pertama sampe waktu dunia ini kiamat, torang akan dapa bagian dari samua yang ada pa Yesus Kristus.

Ibrani 6:18

Jadi ada dua hal yang tara perna beruba: pertama, Tuhan Allah pe janji, deng kedua, Dia pe sumpa. Barang, Tuhan Allah tara perna bafoya. Kong karna itu, torang yang cari slamat pa Dia, torang pe hati jadi kuat kong torang bole percaya deng yakin, tong akan tarima samua yang Tuhan Allah so janji pa torang.

1 Petrus 5:10

Tapi siksa yang ngoni rasa itu cuma sementara saja. Nanti Tuhan Allah sandiri yang mo kase bae-bae ngoni pe keadaan, kase kuat ngoni pe hati, kase kuat ngoni pe percaya, deng biking ngoni tetap percaya pa Dia. Dia itu suda Tuhan Allah yang kase Dia pe bae pa manusia, yang so pangge pa ngoni untuk percaya pa Yesus Kristus, kong ngoni mo rasa Dia pe kuasa yang luar biasa untuk slama-lamanya.

1 Yohanes 1:3

Skarang torang kase tau pa ngoni apa yang torang so lia deng so dengar dari Dia, supaya ngoni deng torang bole hidup satu hati, deng bagitu torang samua bole hidup satu hati deng torang pe Bapa, Tuhan Allah deng Dia pe Anak Yesus Kristus.

1 Yohanes 1:7

Tapi kalu torang hidup di tarang, sama deng Tuhan Allah ada di tarang, pasti torang so hidup satu hati satu deng yang laeng. Dia kase bersi pa torang dari torang pe dosa samua, karna Yesus, Dia pe Anak so mati di kayu salib.

1 Yohanes 4:13

Tuhan Allah so kase Dia pe Roh pa torang supaya torang bole tau, Tuhan Allah tetap ada di torang pe hati, kong torang tetap jadi satu hati deng Dia.

Wahyu 19:11

Abis itu kita lia sorga tabuka, kong kage ada kuda puti satu di situ. Turus di kuda itu ada yang dudu, Dia pe nama ‘Yang setia deng Yang butul’. Dia itu adil waktu adili, deng waktu baku prang.