۱-یُوحنّا 5:20 - پنجابی نواں عہد نامہ نظرثانی شدہ چھپائی

²⁰ تے ایہہ وی جاننے آں پئی خُدا دا پُتر آگیا اے۔ تے اوس سانُوں سمجھ دِتّی اے۔ تاں جو اوہنوں جیہڑا اصلی اے جانئے۔ تے اسی اوہدے وِچ۔ جیہڑا اصلی اے یعنی اوہدے پُتر یِسُوع مسِیح وِچ آں۔ اصلی خُدا تے ہمیشہ دی زِندگی ایہی اے۔

۱-یُوحنّا 5:20 ပူးပေါင်းရင်းမြစ်များ

متّی 13:11

اوس اوہناں نُوں جواب دِتّا تے آکھیا۔ اسمان دی بادشاہی دے بھیتاں نُوں جان لینا تُہانوں بخشیا گیا اے۔ پر ایہناں نُوں ایہہ بخشیا نئیں گیا۔

لُوقا 21:15

ایس لئی پئی مَیں تُہانوں اجیہی زبان تے حِکمت دیاں گا جِہدے اگّے تُہاڈے وَیری نا بول سکن نا کھلو سکن۔

لُوقا 24:45

تَد اوس اوہناں دا ذہن کھول دِتّا۔ پئی کِتاباں نُوں سمجھ لین۔

یُوحنّا 1:18

خُدا نُوں کدی کِسے نئیں ڈِٹّھا پر اِکلَوتے پُتر نیں جیہڑا باپ دی گدّ وِچ اے اوہنوں ظاہر کِیتا۔

یُوحنّا 10:30

مَیں تے باپ اِک آں۔

یُوحنّا 14:20

اوس دِن تُسی جانو گے پئی مَیں اپنے باپ وِچ آں تے تُسی میرے وِچ تے مَیں تُہاڈے وِچ۔

یُوحنّا 14:23

یِسُوع اوہنوں جواب دِتّا جے کوئی مَینُوں پیار کر دا اے اوہ میرے کلام نُوں مَنّے گا۔ تے میرا باپ اوہنوں پیار کرے گا۔ تے اسی اوہدے کول آواں گے تے اوہدے نال رہاں گے۔

یُوحنّا 14:6

یِسُوع اوہنوں آکھیا مَیں ای راہ تے سچیائی تے زِندگی آں۔ میرے بِناں کوئی باپ دے کول نئیں آؤندا۔

یُوحنّا 14:9

یِسُوع اوہنوں آکھیا اَے فِلپُّس مَیں اینے چِر دا تُہاڈے نال آں تے تُوں مَینُوں نئیں جان دا؟ جِس مَینُوں ویکھیا اے اوس باپ نُوں ویکھ لیا اے۔ تے تُوں کِیویں آکھنا ایں پئی باپ سانُوں وکھال؟

یُوحنّا 15:4

تُسی میرے وِچ رہو تے مَیں تُہاڈے وِچ۔ جیویں ٹہنی جِنّاں چِر انگور دے بُوٹے وِچ نا رہے۔ آپے پَھل نئیں لیا سکدی ایسے طرح تُسی پَھل نئیں لیا سکدے۔ جِنّاں چِر میرے وِچ نا رہو۔

یُوحنّا 17:14

مَیں اوہناں نُوں تیرا کلام دِتّا اے تے دُنیا اوہناں نال وَیر رکھیا کیوں جو اوہ دُنیا دے نئیں جیویں مَیں دُنیا دا نئیں آں۔

یُوحنّا 17:25

اے سَچّے مُنصف باپ دُنیا تینُوں نئیں جانیا پر مَیں تینُوں جانیا۔ تے اوہناں جانیا پئی تُوں مَینُوں گھلّیا۔

یُوحنّا 17:3

تے سدا دی زِندگی ایہہ اے پئی اوہ تینُوں جانن جیہڑا اکلّا سَچّا خُدا ایں تے نالے یِسُوع مسِیح نُوں جِہنُوں تُوں گھلّیا اے۔

یُوحنّا 20:28

تُوما اوہنوں آکھیا اے میرے خُداوند اے میرے خُدا۔

یُوحنّا 8:42

یِسُوع اوہناں نُوں آکھیا جے خُدا تُہاڈا باپ ہوندا تے تُسی مَینُوں پیار کر دے۔ کیوں جو مَیں خُدا توں نِکلیا تے آیا آں۔ تے مَیں آپ توں نئیں آیا آں پر اوس مَینُوں گھلّیا۔

اعمال 20:28

تُسی اپنی اوس سارے اِجّڑ دی خبرداری کرو۔ جِہدا پاک رُوح نے تُہانوں نِگہبان بنایا۔ پئی خُدا دی کلِیسیا نُوں چارو جِہنُوں اوس اپنے ای لہو نال مُل لیا۔

رُومِیوں 9:5

بزُرگ اوہناں دے نیں۔ نالے مسِیح جِسم ولّوں اوہناں وِچوں ہویا جیہڑا سبھناں توں اُچّا خُدا سدا توڑی مُبارک اے آمِین۔

۱-کُرِنتھِیوں 1:30

پر تُسی اوہدے ولّوں یِسُوع مسِیح وِچ ہو جیہڑا ساڈے لئی خُدا ولّوں حِکمت ہویا یعنی راستبازی تے پاکیزگی تے مُکتی۔

۲-کُرِنتھِیوں 4:6

ایس لئی پئی خُدا ای اے جِس آکھیا پئی ہنیرے وِچوں نُور چمکے تے اوہو ای ساڈیاں دِلاں وِچ چمکیا۔ تاں جو خُدا دے جلال دی پچھان دا نُور یِسُوع مسِیح دے چِہرے توں چمکارا مارے۔

۲-کُرِنتھِیوں 5:17

ایس لئی جے کوئی مسِیح وِچ اے۔ تے اوہ نواں مخلُوق اے پرانیاں شیواں جاندِیاں رہیاں۔ ویکھو اوہ نَوِیاں ہوگِئیاں۔

اِفسِیوں 3:18

ساریاں پاک لوکاں سَنے چنگی طرح معلُوم کر سکو۔ پئی اوہدی چوڑائی تے لمبائی تے اُچیائی تے ڈونگھیائی کِنی اے۔

فِلِپّیوں 3:9

تے مَیں اوہدے وِچ لَبّھاں تے میرے کول اپنی اوہ راست بازی نا ہوئے جیہڑی شریعت ولّوں اے۔ پر اوہ جیہڑی مسِیح اُتّے اِیمان رکھن دے سببّوں اے پئی اوہ راستبازی جیہڑی خُدا ولّوں اِیمان دی راہِیں مِلدی اے۔

۱-تِیمُتِھیُس 3:16

ایہدے وِچ شک نئیں پئی دِینداری دا بھید وَڈا اے یعنی اوہ جیہڑا جِسم وِچ ظاہر ہویا۔ تے رُوح وِچ راستباز مِتھیا گیا۔ تے فرِشتیاں وِچ وکھالی دِتّا۔ غیر قوماں وِچ اوہدی منادی ہوئی دُنیا وِچ مَنّیا گیا۔ تے جلال وِچ اُتانہہ چُکیا گیا۔

طِطُس 2:13

تے اوس مُبارک آس یعنی اپنے بزُرگ خُدا تے نجات دین والے یِسُوع مسِیح دے جلال دے ظاہر ہون دی اُڈِیک وِچ رہئے۔

عِبرانیوں 1:8

پر پُتر دی بابت آکھدا اے پئی اے خُدا تیرا تخت سدا تِیکر رہے گا۔ تے تیرے راج دا ڈنڈا سچیائی دا ڈنڈا اے۔

۱-یُوحنّا 2:23

جیہڑا پُتر توں مُکّر دا اے۔ اوہدے کول باپ وی نئیں۔ جیہڑا پُتر نُوں مَندا اے۔ اوہدے کول باپ وی اے۔

۱-یُوحنّا 2:24

جیہڑی گلّ تُساں مُڈھوں سُنی اے اوہ ای تُہاڈے وِچ رہے تے جیہڑی گلّ مُڈھوں تُساں سُنی اے جے اوہ تُہاڈے وِچ رہے۔ تے تُسی وی پُتر تے باپ وِچ رہو گے۔

۱-یُوحنّا 2:6

جیہڑا ایہہ آکھدا اے۔ پئی مَیں اوہدے وِچ رہنا آں۔ تے اوہنوں اوسے طرح ٹُرناں چاہیدا اے۔ جیویں اوہ ٹُردا ہوندا سی۔

۱-یُوحنّا 4:14

تے اساں ویکھ لیا اے تے گواہی دینے آں پئی باپ پُتر نُوں دُنیا دا نجات دین والا ہون واسطے گھلّیا۔

۱-یُوحنّا 4:16

جیہڑی مُحبّت خُدا دی ساڈے نال اے اوہنوں اساں جانیا اے تے اوہدے اُتّے ساڈا اِیمان اے۔ خُدا مُحبّت اے۔ تے جیہڑا مُحبّت وِچ رہندا اے اوہ خُدا وِچ رہندا اے۔ تے خُدا اوہدے وِچ رہندا اے۔

۱-یُوحنّا 4:2

خُدا دے رُوح نُوں تُسی ایس طرح پچھان سکدے ہو۔ پئی جیہڑی رُوح اِقرار کر دی اے پئی یِسُوع مسِیح جِسم وِچ ہو کے آیا اوہ خُدا ولّوں اے۔

۱-یُوحنّا 5:1

جِہدا اِیمان اے۔ پئی یِسُوع ای مسِیح اے۔ اوہ خُدا توں جمّیا اے۔ تے جیہڑا کوئی جمان والے نال مُحبّت کر دا اے۔ اوہ اوہدے جمّیاں نال وی مُحبّت کر دا اے۔

۱-یُوحنّا 5:15

تے جے اسی جاننے آں پئی جو کُجھ اساں منگیا اے اوہ ساڈی سُندا اے۔ تے ایہہ وی جاننے آں پئی جو کُجھ اساں اوہدے کولوں منگیا اے اساں لَبّھ لیا اے۔

۱-یُوحنّا 5:18

اسی جاننے آں پئی جیہڑا خُدا توں جمّیا اے اوہ گُناہ نئیں کر دا سگوں اوہدی راکھی اوہ کر دا اے۔ جیہڑا خُدا توں جمّیا اے۔ تے اوہ شریر اوہنوں نئیں چھوندا۔

۱-یُوحنّا 5:5

اوس بندے دے سِوا جِہدا اِیمان اے پئی یِسُوع خُدا دا پُتر اے۔ دُنیا نُوں جتن والا کون اے؟

مُکاشفہ 15:3

تے اوہ خُدا دے بندے مُوسیٰ دا گِیت تے لیلے دا گِیت گا گا کے آکھدے سن پئی اَے خُداوند خُدا قادرِ مُطلق! تیرے کمّ وڈّے تے اچرج نیں اَے ہمیشہ دے بادشاہ! تیریاں راہاں راست تے ٹھیک نیں۔

مُکاشفہ 19:11

فیر مَیں اسمان نُوں کُھلا ہویا ویکھیا۔ تے کِیہ ویکھنا آں پئی اِک چِٹّا گھوڑا اے۔ تے اوہدے اُتّے اِک سوار اے جیہڑا سَچّا تے برحق اکھواؤندا اے۔ تے اوہ راستی دے نال انصاف تے لڑائی کر دا اے۔

مُکاشفہ 3:14

تے لَودِیکیہ دی کلِیسیا دے فرِشتے نُوں ایہہ لِکھ پئی جیہڑا آمِین تے سَچّا تے برحق گواہ تے خُدا دی خلقت دا مُڈھ اے اوہ ایہہ آکھدا اے پئی۔

مُکاشفہ 3:7

تے فِلَدِلفیہ دی کلِیسیا دے فرِشتے نُوں ایہہ لِکھ پئی۔ جیہڑا قُدُّوس تے سَچّا اے تے داؤد دی کُنجی اوہدے کول اے جِہدے کھولے ہوئے نُوں کوئی بند نئیں کر دا تے بند کِیتے ہوئے نُوں کوئی کھولدا نئیں۔ اوہ ایہہ آکھدا اے۔

مُکاشفہ 6:10

تے اوہ اُچّی اُچّی آکھن لگِیاں پئی اَے مالک قُدُّوس تے سَچّے تُوں کد تِیکر انصاف نا کریں گا تے زمین دے رہن والیاں توں ساڈے خُون دا بدلہ نا لَویں گا؟