Ebrœ̂ 1:2 - Kálara Zyɛ̌m Edwán é mpʉ̌n

² No ó, é mpʉ esie e mbi jɔʼ yi, lé mu ó kunokuno le epyal ɨ, nye mu ka lwib e bɨna ga ó, cwɨɨ é Mwan we. Mwan we ó nye a kɛʼ ó, nye óbi bɨsa bibyɛh. É zi we ó Zyɛm a cye mosi mɨmɛh ɛ.

Kálar Nzyɛ̌m : Ejwán é Sáá

² Ɨ́ yɨ̂ʼ jɔʼ mpʉ mélú mé mpóʼo sí yɨ̂ʼ mû lɨ́ ekɔ́a yɨ́, nye mû kǎ lwib e mɨná gá ó, cɨɨ ɨ́ nzɨ̌ Mwân wé. Nye ó waá Nzyɛ̌m á kɛʼ ó, nye ónʉa bílíʼé bí sí yɨ̂ʼ bíbyɛ̂h nyá. Nzyɛ̌m á kuho kʉ́ e sí ndu e l'ekomlǒ sá yɨ́yɛ̂h dí tɨ̂ʼ yɨ́ ó, ɨ́ nzɨ̌ nyé.

Ebrœ̂ 1:2 ပူးပေါင်းရင်းမြစ်များ

1 Korɛnt 8:6

é mbea ga wina, bɨna ga bé ó njɨ e Zyɛm ngwar, waa ndɨ Sɔŋ ga wina ɛ. Nye ó b'a cye sa yiyɛh. Bɨtiʼ ga bina, byé ekʉ dwɛʼ ó njɨ nye e nye. Yé nteme, yé ó njɨ Tî ngwar, Yesʉs-Krɨst. Sa yiyɛh, yé a cyeŋɔ ó, é zi we. Bɨna bé etiʼe ga ó, é zi we.

Yʉanes 1:3

Zyɛm a cye sa yiyɛh ó, é zi mo Lwib. Abe e yʉʉ sɔʼɔ yé a syɛɛ, Lwib abe.

Yʉanes 1:14

Lwib a be ó si byɛl mʉr. Nye a si tiʼe paʼra ga wina. Bɨh bɨ bee moncɛnba me, moncɛnba mo Etiʼe e Mwan mo Zyɛm. Nye a duho boo Sɔŋ we ó, nye mu bɛa be lwɨŋla e ncwɨncwɨa e l'ocyecye mo Zyɛm.

1 Pyɛr 1:20

Zyɛm Sɔŋ a be ó si bɛa gʉa ó, Krɨst ójɛna mobyaʼ maa, taare é jɔʼ kʉ e si, byé a baapa cyeŋɔ ɛ. Nye ze nyin é jɔʼ yi, é l'esie e mbi jɔʼ yiʼ ó, é l'efu lɨn.

Mataos 28:18

Yesʉs ntɔʼ dihle nko bé a be e. Nye e be ó: «Mɨ bi nkul mojwɨ̀ʼa mo kʉ ndwe e maa mo si nwaʼ nyiwɛh.

Yʉanes 13:3

Yesʉs nye mʉr tɨʼ a be lé egʉa ó, nye a duho ó, boo Zyɛm, gʉa nteme ó, nye óbula, to boo Zyɛm. Nye a gʉa nteme ó, Sɔŋ we a be si gba sa yiyɛh é jwɨ̀ʼa ye e.

Mataos 17:5

Mpʉ nye a be, nye dina lé elwib ɨ, dwine é nge-ngɨ-nge ze buuro be. Ompʉn, bé ka joʼo ó, nuu twii lé eduho é mɨnkur tʉŋlʉ, lé elɛɛ ó: «Nwaʼ, nye ó mwan kpɛl wam. Me ekʉ mɨɨla e nye. Joʼa ga nye.»

Ebrœ̂ 11:3

É zi buʼo, yé ó bɨna lé egʉa ga ó, Zyɛm ó b'a cye kʉ e si e lwib ye e. No ó, sa yiyɛh lé enyin ɨ, yé a duho ó, é yaa ndɨ anyin ɨ.

Rôm 8:17

Yé be ó, bɨna ga mu ó bwan mo Zyɛm nɛʼɛ, kʉ gʉa ó, bɨna ó ngo bi ga monkɛʼ mo Zyɛm, jala e nkɔb ga wina. Bɨna bé óbi ga me ó, é zyɛŋa ga wina boo Krɨst. ǃBɨna ga e boo nɔɔ, bé óbe si sia e mɨtuu mɨmpwar nɛʼɛ, bɨna bé óbi ga nteme kum, é zyɛŋa ga wina boo nɔɔ.

Yʉanes 3:16

«Zyɛm a be ó si bul laŋle kpɛl bʉr o si nwa. Ebe no ó nye a ntɨh Etiʼe e Mwan le ó, waa nyiwɛh ójyɛʼ taa buʼo boo nye e, aka dim. Nye biʼe tiʼ molu mo mpoʼ mɨmɛh.

Mataos 26:63

Yesʉs a kʉ ka di ó njɨ é titil. No ó njwɨɨ opara a ze lɛɛ e nye ó: «Me egwii go mofoo é die mo Zyɛm ndɨ kublakubla ɛ, ó go lɛŋɨ bɨh nkʉ go ó Lœma mulo mo Zyɛm le Mwan mo Zyɛm.»

Mataos 21:38

To kœb ó, mbea bé a bee mwan we waa lé eze e, bé ntɔʼ lɛɛla paʼra wɔɔ ó: “Mbe ga: modila mo mʉr peme ó ma ze nɨ! Bɨna jʉʼo ga nye! Bɨh nkʉʼ nʉa bɨliʼ mo sɔŋ we nye a ngbaa bi ɨ.”

Ebrœ̂ 5:8

Dam be mpʉ nye a be Mwan mo Zyɛm ɨ, nye a be ó si jwɨʼ esa Zyɛm Sɔŋ mojoʼo, jwɨʼ jwɨʼɨ. Nye a jwɨʼ esa nye mojoʼo maa ó, é mɨtuu nye a jaʼra e mye e.

Éfɛsɔs 1:10

Jwɨʼ ye yaa, yé a ka ze gwihɔ ó, pie bɨjɔʼ byé a jala le etaare laa ɛ, byé a si sil lé elaa. Zyɛm a bɛa tiʼe é leme we ó, bɨsa ndɨ é jobo e l'ejyoo le ebantɛn ɨ, bé e byaa bɨ si nwa, bibyɛh, byé ejala le efwal ó, é jwɨ̀ʼa mo mʉr ngwar, Krɨst.

Ebrœ̂ 7:3

Yé abe e mʉr ndɨ egʉa sɔŋ nkʉ nyɔŋ mo Mɛlkisedɛk. Abe e mʉr a be e nkul eláa ntan ye. Mʉr, nye agʉa mpʉ Mɛlkisedɛk a byɛl ɨ, agʉa nteme nkʉ nye a si ka dwè. É paʼ waa, nye enwɨɨla ó e Mwan mo Zyɛm. Nye ó é dia para ye njʉmdia e njʉmdia.

Ebrœ̂ 2:3

Bɨna bɛɛ, bé a be ó si joʼo ga mpaŋla tiʼ lé elaa mpaŋla beengles bé a cenɔ ɛ. Mʉr a taare cen mpaŋla waa ɛ, a be ó Da Yesʉs nye mʉr tɨ. Nteme, bʉr o b'a taare joʼo mpaŋla tiʼ waa ɛ, bé ó b'a lɛɛ e bɨna ga ó, nye ó mpaŋla ndɨ e modile e. ǃBɨna si pyeh ga mpaŋla waa nɛʼɛ, wáa mbi bɨna bé óka syɛhle ga mo Zyɛm ɨ?

Ebrœ̂ 1:5

Zyɛm, nye apa lɛɛ e engles ngwar ó: «Go ó me mwan. Mɛm, mɨ bya go muh.» Nye nteme, nye apa lɛɛ, tiibe e nuu engles ó: «Mɛm, me ó nye sɔŋ. Nye ó mwan wam.»

Éfɛsɔs 3:9

Nye a dwe me syɛɛ nteme ó, me pɛʼla lwib odim nye a bɛa fol ɨ, pyɛl ye é myɛn. Molu pihe, Zyɛm, waa a cye bɨsa bibyɛh ɛ, a be ó si taare fol jwɨʼ ye yaa.

Galásia 4:4

Yé ntɔʼ ka pyal é mbɨambɨa jɔʼ Zyɛm a bɛa cyel ɨ. É jɔʼ yaa ó nye a ntɨh Mwan we, ó nye ntaʼ, ze byɛl é mo mo nuu mʉma. Mwan waa a be ó é monkara mo mɛra motie.

Mɨlʉmlʉ 10:36

Bɨn bé egʉa lɔɔ Zyɛm a ntɨh bwa b'Ɨzraɛl ɨ. Mbɨambɨa Lɔɔ waa, wé ó wi: Zyɛm óbula gba mʉr motala é leme ó, dumo e Yesʉs-Krɨst, ndɨ Tî bʉr bɨbɛh ɛ.

Yʉanes 15:15

Me a taare jebe bɨn ó, osyɛl o mosa bam. No ó, me aŋa ka sa no, ebe, syɛl mosa, nye agʉa sa masa we lé esa ɛ. Me mu ó lé ejebe bɨn ó, ofo bam, ebe, mɨ gwih bɨn sa yiyɛh me a joʼo boo Sɔŋ wam ɨ.

Yʉ̂d 1:18

Bé a lɛɛ e bɨn ó: «É l'esie e mbi jɔʼ yi, yé óbe ó e bʉr o pyeh, baa lé ekpɛl kœʼ ebò e cyen lé edu mpʉ bɨgwɨma byɔɔ ndɨ ɨ.»

Rôm 1:4

É nko paʼ mo Sisim we ndɨ ti ɨ, nye a si jwɨrɔ ó «Mwan mo Zyɛm» e bwaʼbwaʼ nkul ebe pɛ̀ha foo: Tî ga wina Yesʉs-Krɨst.

Mɨlʉmlʉ 2:17

“Zyɛm a lɛɛ ó: ‘É molu mé ófuʼla ɛ, me ólomlo bʉr bɨbɛh Mbɨambɨa Sisim. Nye óbe ó, é be. Bwa o bʉba le bwa o bʉrʉm bɨn, bé ógwih mɨlɔb myam. Mɨsoho min, myé óbee mɨfela bɨsɔʼɔ. Mɨnjʉ̌m min, myé ójɨm bɨlima.

Yʉanes 17:2

ebe, go a si dwe nye nkul ejwɨʼ bʉr bɨbɛh. Nye e nkul edwe bʉr o go a ntɨh nye e, tiʼ molu mo mpoʼ mɨmɛh.

Yʉanes 16:15

Sa yiyɛh Sɔŋ wam ndɨ e ye e, yé ó sa yam. Ebe no, me a lɛɛ e bɨn ó nɛɛ: Mbɨambɨa Sisim ólɛɛ bɨn mɨlɔb lé etiibe e me e.»

Markus 12:6

«No ó mʉr ngwar e ngwar mʉr peme a ka liʼ e nye é mobo e, a be ó njɨ mwan we, nye a be é bul kpɛl ɨ. No ó nye a fuo ka lomo mwan we waa boo osyɛl o mosa baa. Nye ó: “Diŋa ó, osyɛl o mosa bam, bé e nkul edwaabe yɛɛ mwan wam.”

Markus 1:1

Etɛɛrɨ e Mbɨambɨa Lɔɔ lé etiibe e Yesʉs-Krɨst, [Mwan mo Zyɛm] ɨ.

2 Pyɛr 3:3

Sa efoʼ, gʉa mɛr ga sa yi: é jɔʼ esie e mbi jɔʼ yi, lé óbe kunokuno le epyal ɨ, bʉr, bé óbe lé ekœʼ ebò e cyen mpʉ bɨgwɨma byɔɔ lé etine be e. Bé óbe ó bʉr o pyeh,

Ebrœ̂ 1:8

Sa gwar, nye a lɛɛ, tiibe e Mwan we ó: «Zyɛm ɛ! Go ó lé edi é dia taʼa yo njʉmdia e njʉmdia. Go ejwɨʼ bʉr bo é l'ocyecye.

Ebrœ̂ 9:26

Nkʉ Krɨst a be ó be, be lé edwe Zyɛm nyʉl we zɔʼ e zɔʼ tɔɔ motwina nɛʼɛ, mpa nye a be ó si bee tuu zɔʼ e zɔʼ, duho é l'etɛɛrɨ e si nwaʼ ɛ. To kœb ó, nye a kʉ ka nyin é si nwaʼ ó njɨ é jɔʼ gwar e gwar é kpɔŋ. Yé a be ó é jɔʼ esie e mbi jɔʼ yi, lé a pyal bɨna ga ɛ. Nye ze kɛha nyʉl we, lé epɛʼ bʉr bɨbaa Zyɛm a niʼe be é lɔb mɨsyem myɔɔ é jɔʼ gwar é bɨjɔʼ bibyɛh.

Yʉanes 3:25

Bé dina tina nɛʼɛ, bʉʉ ompʉn mo Yʉanes ze taare lé edo, bé e nuu Yʉden é mbi bé lé ejala le epuba mobebe e.

Mataos 3:17

Pie tɨ, nye ntɔʼ joʼo twii lé eduho é jobo kʉ, lé elɛɛ ó: «Nwaʼ, nye ó mwan kpɛl wam. Sʉhʉ yam yiyɛh, yé ó é nye.»

Mataos 13:39

Mʉr dɔm mo mʉr peme a ze bè bɨka ndɨ abe e mpi ɨ, nye ó Njwɨɨ moleme. Mya mɨngol wɛɛ, wé ó dweʼle, sa lé elɛʼle esie e mbi jɔʼ yiʼ ɨ. Bʉr ô ze é mɨngol ɨ, bɛɛ, bé ó beengles.

Markus 12:7

«No ó osyɛl o mosa baa, bé a ze lɛɛla paʼra wɔɔ ó: “Mbe ga: modila mo mʉr peme ó ma ze nɨ! Ncʉʼ ga! Bɨna jʉʼo ga nye! Bɨliʼ mo sɔŋ we nye a ngbaa bi ɨ, byé nkʉʼ fuʼla mopoʼ ga mɨna.”

Yʉanes 1:10

Lwib a be ó é si nwa. Zyɛm a cye si waa ó, é zi we. To kœb ó, bʉr o ndɨ egumo e si nwaʼ bɛɛ, bé a baadweʼe nye.

Yʉanes 5:26

ebe, jwɨʼ gwar e gwar é mbi Zyɛm Sɔŋ ndɨ e tiʼ njʉmdia é nye mʉr tɨʼ tʉŋlʉ ɨ, no nteme ó nye a sa ó, Mwan mo Zyɛm diʼe e tiʼ yaa ɛ.

Yʉanes 5:27

Nye nteme a si ntɛŋ Mwan we nkul mojwɨ̀ʼa ndɨ ó, nye tiʼa bʉr mɨlɔb ɨ, ebe, nyɛɛ ó ndɨ Mwan mo Mʉr.

Yʉanes 9:29

Bɨh bé egʉa ó, Zyɛm a be ó si lwib e Moyiz. Sa gwar, waa nɨ, bɨh bé agʉa nko nye a duho e.»

1 Korɛnt 2:7

Bɨh bé eyeʼle bʉr ó, ocyoo mo Zyɛm. Wé a taare be ó é lwib odim, sa Zyɛm a bɛa fol ɨ. Nye l'apa cye kʉ e si, nye a bɛa bà jwɨʼ ó, nye dwe ó bɨna ga ocyoo waa ndwe e kum tɨ.

Ebrœ̂ 3:6

To kœb ó, Krɨst nyɛɛ a si cyelɔ é dia Mwan a jala le edi lʉ mbɛr bʉr waa ɛ. Mbɛr bʉr waa, wé ejoʼo nteme ó e nye. ǃƗ mɨleme ga mina si loŋlo e mbɛla, le ekʉ gʉa sa bɨna lé ebuʼla ga, abaawe sɔʼɔ e bʉr nɛʼɛ, bɨna ga ó ndɨ bʉr o mbɛr bʉr we waa.

Ebrœ̂ 4:14

Bɨna ga mu ó e njwɨɨ opara ndɨ lʉ sa yiyɛh ɛ: Yesʉs, Mwan mo Zyɛm. É mpʉ yé ndɨ no e, bɨna toʼ ga dolo lé emɛʼle buʼo ga yina. Nye a be ó si ntaa jobo e l'ejyoo le ebantɛn, lé ebula to di é jobo kʉ.

Ebrœ̂ 7:28

Motie mo Zyɛm, mé a kʉ cyel é dia njwɨɨ opara ó, bʉr o b'a be é cyɛʼ ɛ. No ó, pie motie maa, Zyɛm ze de mɨnkɛla, nye mʉr tɨʼ ze cyel Mwan we é dia njwɨɨ opara. Mwan we ó b'a kumo é l'ombɨmbɨa é mɨpaʼ mimyɛh, ó nye sea nye syɛɛ opara yaa njʉmdia e njʉmdia.

Yʉanes 13:32

[ǃƗ kum mo Zyɛm si nyin é Mwan mo Mʉr nɛʼɛ, gʉŋa ga ó,] Zyɛm nteme ódwe Mwan we kum é nye mʉr tɨ. No nteme ó nye muno ze dwe nye kum ɨ.