Yʉanes 15:16 - Kálar Nzyɛ̌m : Ejwán é Sáá

¹⁶ Ntʉ bɨ́n á pɛ̂h me. Mɛm ó b'á twâr bɨ̌n. Me ó b'á lómo bɨ̌n ó, bɨ̌n tôʼ, tó gúmo mpúmó. Mpumó nyaá ódǐ njʉ̌m dǐ e njʉ̌m dǐ. Nó ó Sɔ́ŋ wǎm ngá dwe bɨ́n sá yɨ́yɛ̂h bɨ́n ngá gwâm, lɨ́ ejɨʼla e né, pɨr e díé lâm yɨ́.

Kálara Zyɛ̌m Edwán é mpʉ̌n

¹⁶ Ntʉʼ bɨn bé a pɛh me. Mɛm ó b'a pɛh bɨn. Me ó b'a lomo bɨn ó, bɨn toʼ, to gumo mpumo. Mpumo waa ódi njʉmdia e njʉmdia. No ó, Sɔŋ wam ódwe bɨn sa yiyɛh bɨn bé ódî le ejaʼ nye, pere e die lam ɨ.

Yʉanes 15:16 ပူးပေါင်းရင်းမြစ်များ

Yʉanes 15:19

Yé bé bɨ̌n bé á be ó bʉr ó sí yɨ̂ʼ nó, lɛ́ɛ́, bʉr ó sí, bé lɨ́ ekpɛl bɨ́n, ebě, bɨ̌n bé á gwa be ó mbi bʉ̂r wɔ́ɔ́. Sâ gwár, me á be ɨ́ twâr bɨ́n, pɛʼ bɨ́n ɨ́ sɔ́má bʉ̂r ó sí yɨ̂, ó bɨ̌n ayɨ́ kǎ gúmo e sí yɨ̂. Sɨ́ǎ yaá ó bʉ̂r ó sí yɨ̂ʼ mû sí bene bɨ́n yɨ́.

Éfɛsɔs 2:10

Mɨná gá bé ó bʉr ó Nzyɛ̌m á sâ e mebó mé nye mʉr tɨ̂ʼ bá. Nye á komlo mɨná gá ɨ́ nzɨ̌ mé Yésʉs-Krîst ó, mɨná díʼee gá bʉr o dí esâ nyé bisyɛ́ɛla bimpâ bá. Nzyɛ̌m mʉr tɨ̂ʼ ó b'á boo tíʼe ɨ́ lémé wé ó, mɨná sâʼ gá nye byǎ.

Lʉkas 6:13

Nó ɨ́ jɔ̌ʼ mɛ́n wé á lɔ́ma yɨ́, nye ntɔ̂ʼ jébe ómpʉ́n bé, ntɔ̂ʼ twâr bʉ́ʉ́. Bím nyé á twâr yɨ́, bʉr kám le obá. Nye ntɔ̂ʼ jɨ̂jebe bé ó, bʉr o mílʉ́mlʉ́ bé.

Galásia 1:15

Sâ gwár, Nzyɛ̌m á ka bee embɨa ɨ́ páʼ wé ó, nye sâʼ me mpam. Nó ó nyé á jébe me, me dína ɨ́ mo mé áyo, lɨ́ esú lé éséa nyé syɛ́ɛ́ yé yɨ́. Nye á bee embɨa ɨ́ páʼ wé ntémé ó, nye lɛ̂ʼlaa me Mwân wé, le elómo mé ó, me túnaa Mbɨambɨa Lɔ́ɔ́ wé ɨ́ bikúl bíswîh. Le nyé á lɛ̂ʼle me Mwân wé, le mé ntɔ̂ʼ á nkɛ́ɛ, tô. Me á bé adî mʉ̂r ó, nye dwêʼ me metwɨ́ɨ́.

1 Yʉanes 4:19

Nó ó, mɨná gá bɨɛ mû ó lɨ́ ekpɛla gá ó, ebě, nye á si nyɛɛ kpɛl mɨná gâ.

Mɨlʉmlʉ 22:14

Nó nyé á lɛ́ɛ e me ó: “Nzyɛ̌m bimpám bíná á boo twâr go ó, go gʉ́ŋaa gwɨ́má yé, ó go béyɨɨ waá dí Tîtyěl Mʉr nyá, ó go jóʼaa nye lɨ́ elwib e num wé nye mʉr tɨ̂.

2 Timotɛ 2:2

Lɛ́ʼlá wɨ́wɛ̂h gó á jóʼo me lɨ́ edwě buobuo oboʼlo wɨ́, pɛ́hɛ́ɛ́ bʉ̂r o jálá le ebúʼlɔɔ bá, go e lɛ́ɛ́ bé wǎ. Bé bʉr o tɨ̂ʼ ósûʼla ó, bʉr o ngá tô le elɛ́ɛ bʉ́ʉ́ bʉ̂r wǎ bá.

Yʉanes 13:18

«Mé alwib ɨ́ lɔ̌b wɨ́n, bɨ̌n óbɛ̂h, njɨ mʉr ngwár. Me lɨ́ egʉ́a baá mé á twâr bá. Twárá mé á twárɔɔ nyɨ́haá mʉ̂r wɨ́, wé á be ɨ́ jala, lɨ́ esú ó, péh Mékaná mé Nzyɛ̌m, yé díraa. Ebě, yê cɛmá ó: Mʉr dí ede méde mâm nyá, nyɨ́ dwira e me.

Yʉanes 6:70

Yésʉs, nye e bé ó: «Ntʉ mɛ̂m mʉr tɨ̂ʼ á twâr bɨ̌n kám le obá ɛ́? Damá jóʼo nó, nyʉ́ʉ́ mʉ̂r ɨ́ sɔ́má yɨ́n, nyě le eleme.»

1 Pyɛr 3:15

Díʼéé gá e tiŋé ɨ́ miléme ó, bɨ̌n bé ódwě Krîst kûm, ebe nyé dí Tî wɨ́n yɨ́. Diʼee gá ntémé ɨ́ cǎr ó, bɨ̌n gwâ yala mʉ̂r nyɨnyɛ̂h ngá dî bɨ́n tíá, dumo e sá dí egbâ bɨ́n mpûʼla ɨ́ léme yɨ́.

1 Yʉanes 4:10

Kpɛ̌l mpâ ó yɨ̂: yé abe yaá mɨ́ná dí elɛ̂ʼle gá Nzyɛ̌m yɨ́. Yé ó yaá nyɨ́ɛ á lɛ̂ʼle mɨná gá yɨ́, ebě, nye á si ntɨh mɨná gá Mwân wé. Nye ó mʉr á búra le syóm wɨ́ná nyá. Nye ntémé ó b'á leʼe nkpaa mé Nzyɛ̌m.

Mɨlʉmlʉ 1:24

Nó ó bʉ̂r ó gwɨ́hlá bɨ́bɛ̂h, bé á jɨʼla e Nzyɛ̌m, lɛ́ɔɔ ó: «Dâ ɛ̌, go ó dí egʉ́a mílémé mí bʉ̂r bɨ́bɛ̂h. Lɛ́ʼláá bɨ́h ɨ́ sɔ́má bʉ̂r obá bâ, waá gó á pɛ̂h nyá.

1 Pyɛr 3:2

Ebě, ojʉ́m bɨ́n, bé óbeě mpʉ bɨ́n dí ejóʼǒ Nzyɛ̌m bʉ́á, le edû kʉ̌ tyen dí e medile wɨ́ yɨ́.

Rôm 15:4

Yé á cɛmɔɔ nó ó, lɨ́ esú lé écɨ̂l mɨ́ná gâ, jwɨʼ gwár e gwár e mpʉ̌ sá yɨ́yɛ̂h, yé á cɛmɔɔ ɨ́ Mekaná mé Nzyɛ̌m yɨ́. Mekaná mé, mé lɨ́ ecɨ̂l mɨ́ná gâ, ó milémé gá míná nkʉ̂ lóno ɨ́ mpûʼla. Myé lʉ́lónó ɨ́ mpûʼla ó, ɨ́ lɔ̌b nkûl mékaná mé dí egbâ mɨ́ná gá ɨ́ miléme nyɨ́, le bíhwó mɨ́ná dí esâ gá nyɨ́.

Mɨlʉmlʉ 9:15

Nó ó Tî Yésʉs á lɛ́ɛ e né ó: «Tóʼ, ebě, me á si twâr mʉ̌r nɨ̌. Lɔ́ɔ́ wâm, wé ótó lɛ́ɔɔ kwá byúú bíkûl bi bʉ̂r ó, ɨ́ nzɨ̌ nyé. Nye ólɛ́ɛ ntémé ojwɨ́ɨ́ bɔ́ɔ́ wǎ, bé e bʉr o b'Ɨ́zraɛ̂l.

Mataos 21:22

Nó sá yɨ́yɛ̂h bɨ́n ngá dî e búʼó yɨ́, bɨ̌n óbi yê.»

2 Timotɛ 1:11

Mbɨambɨa Lɔ́ɔ waá ó mé dí etúno wɨ̂, ebě, Nzyɛ̌m á si tyêl me ɨ́ dǐ lɛ́a lɔ́ɔ wé, le yaá mʉ̂r milʉ́mlʉ́ wé, le yaá lɛ̂ʼla.

1 Korɛnt 10:11

Bé á bɔma e bisyɛ́ɛla byaá ó, lɨ́ ecɨ̂l bʉ̂r. Bʉ́ʉ́ bʉ̂r nzě cɛma byé ɨ́ Mekaná mé Nzyɛ̌m ó, mɨná líʼɨɨ gá le epahle byê. Yé ó lɨ́ esú ó, mɨná gʉ́ŋaa gá sá mɨ́ná jálá le esyɛ̂hle gá yɨ́, mɨná gá bɨɛ, bʉr o dí ebeě mpʉ sí yɨ̂ʼ mû lɨ́ ekumo lɨ́ eswéhlɨ́ yɨ́ bá.

Rôm 9:21

Mel mempɨ̌, nyě e nkul esâ sá nyé kpɛ̂l yɨ́ e deʼé lé. Nye óbɛ̌m pɛ̂ʼ búʼ déʼé bipéh bíbá, nʉa wɨ̂ʼ pâʼ, sâ mpǎŋ daala e tɨ̂ʼ le ojɔɔ́; nʉa gúú pâʼ nɛ́ɛ: sâ yʉ́ʉ́ sá daala yé óbibiŋɔɔ dʉ́ó lɨ́lɛ̂h yɨ́.

Jacques 3:18

Bʉr o dí egbâ mépyɛbla páʼ bʉ̂r e bʉr bá, bé sá nó ó e miléme mi dí ɨ́ mepyɛbla mí. Sá dí eduho ɨ́ bʉr baá yɨ́, yé ó bisyɛ́ɛla bi dí tîtyěl ɨ́ míh mé Nzyɛ̌m bí.

Ebrœ̂ 11:4

Búʼó mé Ábɛl ó b'á sâ ó, nye dwêʼ Nzyɛ̌m mpǎŋ ndwéá, laa waá mé Kayɨ̂n. Nzyɛ̌m á si sêʼle nye ɨ́ lɔ̌b búʼó yé, le elɛ́ɛ ó, nye ó tîtyěl mʉr, le ekam ntémé ndwéá wé. Ɨ́ búʼó yé, Ábɛl dína ó lɨ́ elwib e mɨná gâ, damá jóʼo ó, nyɨ́ dwe.

Títos 1:5

Ɨ́ mpʉ mé á líʼe go náǎ ɨ́ tíhé Krɛ̂t yɨ́, yé á be ó, go nkʉ̂ swâhlě syɛ́ɛ́ yé á buʼo gʉ̂ʼ yɨ́. Syɛ́ɛ́ yaá, yé á be ó, go pɛ́hɛɛ otyɛ̂b bé ésôʼ ó Mbɛ̌r-Nzyɛ̌m, tyêl bé bínkana e bínkana byɛ̂h, lɨ́ esâ mpʉ mé á líʼe go etié yɨ́.

Kolosi 1:6

Mbɨambɨa Lɔ́ɔ, wé lɨ́ emyɛma le etɨ́e bʉ̂r metum medwân ó, ɨ́ sí yɨ́yɛ̂h mpʉ wé dí esâ ɨ́ sɔ́má yɨ́n, táare ɨ́ jɔʼ ésôʼ bɨ́n á nyɛɛ jóʼo wé yɨ́. Bɨ̌n bé á be ó sí jóʼo bʉ̂r lɨ́ elwǐb lɔ̌b mpâm mé Nzyɛ̌m. Bɨ̌n bé á si gwa kʉ jɨ̂ʼ le egʉ́a lɨ́ otyeetye sá nyé dí yɨ́.

Rôm 1:5

Nzyɛ̌m á si cwɨ́a e bɨ̌h ɨ́ nzɨ̌ mé Yésʉs-Krîst, le etyêl bɨ́h bʉr o mílʉ́mlʉ́ bé, lɨ́ esú é bíkúl bíbyɛ̂h, ó byé dyéʼee koo e né, le esâ nyé mejóʼo. Nye á sâ bɨ̌h syɛ́ɛla yaá ó, lɨ́ esú lé édwe díé é Mwân wé kûm.

Mɨlʉmlʉ 10:41

Abe yɨ́ɛ bʉr bɨ́bɛ̂h. Nye á jaa pyâl ó, njɨ kwá nyɨ́h, bʉ̌r Nzyɛ̌m á boo twâr bá. Bɨ̌h bɨɛ ó dí oboʼlo bé, ebě, bɨ̌h le onɔ́ɔ́ ó b'á pûhla mebô lɨ́ ede méde le menyoʼ píe jɔ̌ʼ Nzyɛ̌m á pɛh nye, dwih nyé lɨ́ odwe yɨ́.

1 Timotɛ 2:7

Nzyɛ̌m nzě tyêl mé ɨ́ bidǐ bibá: yaá lɛ́a lɔ́ɔ wé, ti e yaá mʉ̂r milʉ́mlʉ́ wé. (Mě lɛ́ɛ́ ó, otyeetye; mé alɛ́ɛ bíbɛr.) Me ó lɛ̂ʼla lɨ́ esú é bʉ̂r o dí abe óYúden bá, lɨ́ edwe bé metwɨ́ɨ́ ɨ́ nzɨ̌ búʼó yɨ́ná, le otyeetye mé Nzyɛ̌m.

Kolosi 1:23

Bɨ́n ótô dóló le edyɛ̂ʼwo e Tî Yésʉs, le etyɛ̂b mekʉ̌ sí ɨ́ sɨ́ŋ nó, go ó, milémé mín, myé odi ɨ́ puuu. Mʉr apɨ́ŋla gâ! Mʉ̌r sá abîr ó, bé sâʼ ó, bɨ̌n léhee, nkʉ̂ sóŋlǒ Mbɨambɨa Lɔ́ɔ bɨ́n á jóʼo wɨ́. Mbɨambɨa Lɔ́ɔ waá, wé mû lɨ́ etúnɔɔ ó, ɨ́ sí yɨ́yɛ̂h, ɨ́ páʼ bʉ̂r bɨ́bɛ̂h dí sí jʉ́o bá. Mɛm Pɔ̂l á tyélɔɔ ɨ́ syɛ́ɛ́ ó, me lɛ́yɨɨ bʉr wǎ.

Rôm 1:13

Bɨ́ɔɔ́ bâm! Okɛ́l bâm! Mě kpɛl ó, bɨ̌n gʉ́ŋaa ó, ɨ́ bijɔʼ ɨ́ buo buo, me á be ó le jwɨʼ ó, me ónzě bee bɨ́n. Me á jaa bʉbɔma sɔ̂ʼ ó, njɨ e mingamla. Sâ gwár, me ónze yɨ́ɛ lɨ́ esú lé énzě séǎ Nzyɛ̌m syɛ́ɛ́ ɨ́ sɔ́má yɨ́n. Me á gwɨ̂m ó, syɛ́ɛ́ yâm, yé gúmaa ntémé mpumó kwá nyɨ́n ɨ́ mpʉ yé á gúmo mpumó ɨ́ mʉ́ʉ́ mésí méswîh yɨ́.

Mɨlʉmlʉ 1:8

Bɨ̌n bé óbi nkûl ɨ́ jɔ̌ʼ Sísǐm mé Nzyɛ̌m ngá sulo bɨ́n ɨ́ menyʉ̂l yɨ́. Nó ó bɨ́n ngá boʼlo mílɔ̌b myâm, táare ɨ́ Yerʉ́zalɛm, le ɨ́ mekwár mé sí Yʉ́da mɨ́mɛ̂h, ndu e maá mé sí Samarî, tó pyâl ɨ́ medumo mé sí mɨ́mɛ̂h yɨ́.»

Mataos 7:7

«Gwámáá gâ, bɨ̌n nkʉ̂ bi. Sáŋáá gâ, bɨ̌n nkʉ̂ bee. Kwáʼláá gá ebê, lé nkʉ̂ dibɔɔ bɨ́n.

Yʉanes 15:5

«Me ó dí etín é raisin. Bɨ̌n bɨɛ bé ó milɔ́ɔ́ mí tɨ̂. Mʉr dí ɨ́ mpúhlá e me nyá ó dí egúmo mpúmó menkû menkû, ebě, mé bé abe tɨ̂ʼ nó, bɨ̌n bé abe e nkul esâ yʉ́ʉ́ mpǎŋ sɔ̂ʼ.