Rôm 1:14 - Kálar Nzyɛ̌m : Ejwán é Sáá

¹⁴ Me ó lɨ́ bi ó, me túnaa Mbɨambɨa Lɔ́ɔ kwá bʉr ó lwǐb grɛ̂k, le kwá bʉr o bílwǐb biswîh. Me túnaa wé kwá ogwɨ́a o mékaná, le kwá bigʉʼlʉgʉ́.

Kálara Zyɛ̌m Edwán é mpʉ̌n

¹⁴ Empomo e syɛɛ lam, lé ó, me lɛŋɨ Mbɨambɨa Lɔɔ boo bʉr o lwib grɛk bé e bʉr o bɨlwib bɨfih. Me lɛŋɨ we boo ogwɨa be okalara, ndwe e mɨmiʼ.

Rôm 1:14 ပူးပေါင်းရင်းမြစ်များ

Kolosi 3:11

Ɨ́ twiʼ dwân yaá, adû gá bwá mímbɔ́ʼ bâ: Nyâʼ, nye ó Yúden; nyâʼ nyɨɛ, mʉr Grɛ̂s. Nyâʼ, nye ó tíʼá mpʉ́n; nyâʼ nyɨɛ, nyé abě tíʼá mpʉ́n. Nyâʼ, nye ó ayogoyogo. Nyâʼ, nye ó mʉr dí edweŋɔɔ nzóʼ nyá. Nyâʼ, nye ó túʼǎ; nyâʼ nyɨɛ, nye ó nzyɛh. Ebě, Krîst ó dí lʉ̂ sá yɨ́yɛ̂h. Sá yɨ́yɛ̂h, yé dyɛ́ʼwó ó e né.

Mɨlʉmlʉ 9:15

Nó ó Tî Yésʉs á lɛ́ɛ e né ó: «Tóʼ, ebě, me á si twâr mʉ̌r nɨ̌. Lɔ́ɔ́ wâm, wé ótó lɛ́ɔɔ kwá byúú bíkûl bi bʉ̂r ó, ɨ́ nzɨ̌ nyé. Nye ólɛ́ɛ ntémé ojwɨ́ɨ́ bɔ́ɔ́ wǎ, bé e bʉr o b'Ɨ́zraɛ̂l.

Mɨlʉmlʉ 22:21

Nó ó Tî Yésʉs á ka lɛ́ɛ e me ó: “Tóʼ, ebě, me múo nzě tyen gó lɨ́ ejaa, ɨ́ nko bʉ̂r o dí abe óYúden bá di yɨ́.”»

Rôm 12:16

Diʼee gá twíí páʼ nyɨ́n. Asâ gá enkɛ́ɛ́ é nyʉ̂l. Séáá gá mbǐ syɛ́ɛ́ yɨ́yɛ̂h, yé damá bě mbi syɛ́ɛ́ dí aláŋɔɔ ɨ́ nkɔb yɨ́. Ajwɨʼ gá ó, bɨ̌n ó dí ocwóó.

2 Korɛnt 11:19

Ebě, bɨ̌n, mipɨpɨ́ʼ, bɨ̌n bé lɨ́ ekam édûhwo bígʉʼlʉgʉ́.

Rôm 16:19

Bʉr bɨ́bɛ̂h, bé lɨ́ egʉ́ǎ mpʉ bɨ́n dí esâ Tî Yésʉs mejóʼo yɨ́. Nó ó, me lɨ́ ebuú soho ɨ́ lɔ̌b wɨ́n. Mě kpɛl ntémé ó, bɨ̌n díʼee le ocwóó, lɨ́ esú ó, bɨ̌n sâʼ embɨa. Nó ó, ɨ́ nkǒ pâʼ ébébe, anyamlě sâ gá lê!

Rôm 13:8

Adi gá nyʉ́ʉ́ mʉ̂r e mpʉ́lá. Damá jóʼo nó, bɨ̌n bé yɨ́ɛ ó e mpʉ́lá bɨ́n jálá le ejɨjána nyɨ́. Nye ó kpɛ̌l páʼ nyɨ́n. Mʉr dí ekpɛl mʉ̂r njoo yé nyá, nyɨ́ baʼle métié mé Nzyɛ̌m mɨ́mɛ̂h.

Rôm 8:12

Bɨ́ɔɔ́ bâm! Okɛ́l bâm! Yé bé nó wá, go ó, mɨná gá bé e mpʉ́lá nɨ́nɨ́ɨ́. Sâ gwár, nyé abe mpʉ́lá ɨ́ nkǒ páʼ njwɨr myâ gá wɨ́ná. Nó ó, yé ajɨ ó, mɨná dúʼoo gá njwɨr myâ waá.

Rôm 1:22

Bé damá nkʉ́na ó, bé ó ocwóó, nkúná bé kǎ tó sûʼla ó bigʉʼlʉgʉ́.

Títos 3:3

Ebě, mɨná gá bɨɛ á nyɛɛ be ó nó: bigʉʼlʉgʉ́, baajóʼo-mélɨ́, sí dîm. Mɨná bé á didi gá ó, bitúʼǎ bígwɨ́má mimbi mimbi. Mɨná bé á títíʼe gá ó, lɨ́ esâ bʉ̂r ebébe é léme le nzwíí. Bɨ́ɛ ntémé lɨ́ esíe bɨ́ná gâ. Mɨná bɨɛ ntémé, bé á si nwimla páʼ gá nyɨ́ná.

2 Timotɛ 2:10

Mě dúhwó mítúú mímyɛ̂h ó, lɨ́ esú é bʉ̂r Nzyɛ̌m á twâr bá. Nye á twâr bé ó, bé bíʼee twiʼ, ti e kûm dí edǐ njʉ̌m dǐ e njʉ̌m dǐ nyɨ́, ɨ́ nzɨ̌ mé Yésʉs-Krîst.

2 Korɛnt 10:12

Yé díʼee abá kúnwo ɨ́ páʼ wâm ó, me lɛ́yɨɨ ó, bɨ̌h e bʉr o dí esêʼle bé bʉr o tɨ̂ʼ bá, bé ó mityé. Damá jóʼo nó, bʉr o dí esêʼle bé bʉr o tɨ̂ʼ ónɨ̌, bé abá be e pɨʼ, ebě, bé nʉǎ jwɨʼ ó e bé bʉr o tɨ̂ʼ lɨ́ esú lé égʉ́ǎ bím bé mû lɨ́ ejaa kʉ́ yɨ́.

1 Korɛnt 14:16

Gó ódwě Nzyɛ̌m kûm ɨ́ lwǐb ayogoyogo nó, mʉr dína apǎ ntaǎ tyé mpʉ́n nyá, nye ákóʼó lɛ́ɛ «Amɛn», ebě, nzé ójóʼǒ sá gô lɛ́ɛ́ yɨ́?

1 Korɛnt 14:11

Mé bé ajóʼǒ lwǐb bé dí elwib e me yɨ́ nó, go ó, mʉr dí elwib e me ɨ́ lwǐb yaá nyá, nye me ó mpʉ mʉ̂r ayogoyogo. Mɛm ntémé nyɨɛ mpʉ mʉ̂r ayogoyogo.

1 Korɛnt 3:18

Mʉ̌r sá alêh. Mʉ̂r ɨ́ sɔ́má yɨ́n sí láa ó, nye ó twóó ɨ́ nkǒ páʼ bísá bí jɔʼ yɨ̂ʼ nó, nye nyɛ́ɛ dǐ gʉ̌. Nyé okǎ bi ócwóó ómpâ ɨ́ jɔʼ yaá.

1 Korɛnt 2:13

Bɨ̌h dwé bɨ́n ó, milɛ́ʼlá myaá. Bɨ̌h bé alwib e mekǎn mé ócwóó ó sí yɨ̂, njɨ e mekǎn Sísǐm mé Nzyɛ̌m dí edwe bɨ́h má. Nó yaá ó bɨ́h dí ekala bɨ́n milɛ́ʼlá Sísǐm mé Nzyɛ̌m dí enyɛɛ́ dwe bɨ́h mí yɨ́. Sísǐm waá ntémé ó dí edwe bɨ́h mekǎn bɨ́h jálá le elwib má.

Rôm 11:25

Bɨ́ɔɔ́ bâm! Okɛ́l bâm! Mě kpɛl ó, bɨ̌n gʉ́ŋaa lwǐb ódîm yɨ̂ʼ ɨ́ pébébé. Bɨ̌n ámû jwɨʼ ó, bɨ̌n bé ó ocwóó. Lwǐb ódîm yaá, yé ó: bʉ́ʉ́ bʉ̂r ɨ́ kúl bʉ̂r o b'Ɨ́zraɛ̂l, bé e miléme mi dí ɨ́ buú lele lɨ́ ejóʼo mi. Milémé myɔ́ɔ́, myé óbe ɨ́ lele lɨ́ ejóʼo ó, tó kumo ɨ́ jɔʼ tólɔ́ɔ obûʼla o dí abe óYúden bá, ókumǒ bím Nzyɛ̌m á boo tíʼe ɨ́ lémé wé ó, nyě dwé ó bé twǐʼ njʉ̌m dǐ yɨ́.

Mɨlʉmlʉ 28:4

Jɔʼ bʉ̂r ó kwár nyaá, bé á bee ejwɨ̂l ɨ́ tyěl ɨ́ mbó wé yɨ́, bé ó: «Mʉr nyâʼ kʉ́ bě tyeetye ó njʉ̂l bʉr. Damá jóʼǒ mpʉ nyé bé sí pʉʼa ɨ́ mâŋ abe e búhó yɨ́, Otîtyěl-mé-Nzyɛ̌m, wé akam ó, nye tíʼaa.»

Mɨlʉmlʉ 28:2

Bʉr ó tíhé waá, bé á lwilwib ó, lwǐb bɨ́h bɨɛ á be ajóʼo yɨ́. Bé á si bu cwɨ́a e bɨ̌h. Jɔʼ mpíé á be lɨ́ enwɨ́ɨ, ejwóo mɛ̂r bɨ́h yɨ́, bé á si sâ ebéʼé é siʼe ɨ́ gúmó bɨ́h á be yɨ́, le ebaʼle bɨ́h bɨ́bɛ̂h.

Lʉkas 10:21

Ɨ́ jɔʼ yaá, Sísǐm mé Nzyɛ̌m nzě lóŋlǒ lémé mé Yésʉs e bisʉhʉʉ. Nó nyé á lɛ́ɛ ó: «Dâ, me lɨ́ edwe gó kûm, gua, Njwɨ́ɨ kʉ́ e sí, ebě, go á si lɛ̂ʼle bʉr o dí mpʉ bwá ó ntwǒm bá, bisá gó á sol ocwóó ndu e l'ogwɨ́a ó sí yɨ̂ʼ bí. Dâ ɛ̌, yé ó nó! Ebě, go á boo bi bísʉhʉʉ ɨ́ lémé gô ó, yé sáŋɔɔ nó.

Mataos 11:25

Jɔʼ yaá ó Yésʉs á nze lɛ́ɛ ó: «Dâ, me lɨ́ edwe gó kûm, gua Njwɨ́ɨ kʉ́ e sí, ebě, go á si lɛ̂ʼle bʉr o dí mpʉ bwá ó ntwǒm bá bisá gó á sol ocwóó le ogwɨ́a ó sí yɨ̂ʼ bí.