Kolosi 3:5 - Kálar Nzyɛ̌m : Ejwán é Sáá

⁵ Sá dí ɨ́ bɨ̌n, yaá dí eduho ɨ́ sí yɨ̂ʼ yɨ́, jʉ́ʼóó gá yê. Yé ó dí: bimolá, bisyɛ́ɛla bi dí edulo mpîr ɨ́ nyʉ̂l bí, gwɨ́má ékœkœb bʉ́bá, gwɨ́má ésâ bísâ bi dí ɨ́ bébe bí, le nzɔ́ɔ́ bísâ. Ebě, mʉr dí e yé nyá, nye ó jwɨʼ gwár e gwár e waá dí edwě yɨŋayɨ̌ nzyɛ̌m kûm nyá.

Kálara Zyɛ̌m Edwán é mpʉ̌n

⁵ Bɨfum bɨ nyʉl bin ndɨ eduho é si nwaʼ ɛ, teʼla ga bye. Yé ó ndɨ: elœʼ nyʉl é zi bɨduo, elama fwon lé edu njɨ bɨjyɛʼ, empime, esa bɨgwɨma bɨ ebebe, ecen mih é bɨsa byoonkan. (Ebe, mʉr ndɨ ecen mih é bɨsa byoonkan ɨ, nye ó asiila ba e waa lé edwiibɨ bɨbaŋabaŋa bɨdweʼle e!)

Kolosi 3:5 ပူးပေါင်းရင်းမြစ်များ

Rôm 8:13

Bɨ́n dú njwɨr myâ gá wɨ́ná nó, go ó, eswie, lé ójala e bɨ̌n. Bɨ́n lélé nkûl e nzɨ̌ Sísǐm mé Nzyɛ̌m, ntɔ̂ʼ jʉ̂ bísyɛ́ɛla bi nyʉ̂l bipúno nó, lɛ́ɛ́, bɨ̌n bɨ́ tiʼe!

Galásia 5:24

Bʉr o dí egúmo e Krîst bá, bé á si jʉ̂ njwɨr myâ gá wɨ́ná. Bisyɛ́ɛla bí ébébe wé á gwɨ̂gwɨm bí, byé akǎ báʼǎ be. Bé ó mpʉ̌ sá lɛ́ɛ́, bɨ́ jʉ̂ njwɨr waá, lɨ́ ebomlo wé e binzâŋ, bɨ́nɔɔ byé ɨ́ kolôs kʉ́.

Rôm 6:13

Abîr gá bitíl ményʉ́l bín ó, byé díʼee bisá bɨ́n ósâ syóm e tɨ̂ʼ bí. Syóm, wé ámû jaá nʉa bítíl ményʉ́l bín byaá, wê nzě sâ mísyóm e tɨ̂. Bɨ̌n bé ó bʉr o b'á nyɛɛ dwe, nzě kǎ pah bá. Tímláá gá Nzyɛ̌m bɨ̌n bʉr o tɨ̂, ti e bitíl ményʉ́l bín. Byé díʼee bɨ̌n bisá bɨ́n ótó sâ ótîtyěl o bísyɛ́ɛla e byé bí.

1 Pyɛr 2:11

Mě jɨʼlá e bɨ̌n, osó bâm ó, bɨ̌n díʼee mpʉ̌ sá lɛ́ɛ́, bɨ̌n bé ó milaa-nkpǎʼ, nkʉ̂ mpʉ ójwóo dí ɨ́ mesí mé sí yɨ̂ʼ bá. Ɨ́ nzɨ̌ nyaá ó bɨ́n ngá tí bísá bʉ̂r ó sí yɨ̂ʼ dí egwɨ̂m bí yɨ́. Bisâ byaá ó dí elwímla e misísǐm mín.

1 Korɛnt 6:18

Syɛ́hláá gá esâ bímolá. Myúú mísyóm bʉ̂r dí esɨsâ mí, myé sísyɛ́ɛ́lɨ́ ó, ɨ́ mʉ̌r kʉ̌l. Tó kœb ó, ɨ́ jɔʼ mʉ̂r sá bímolá yɨ́, nyě sá syóm waá ó, ɨ́ nkǒ pâʼ nyʉ́l nyé nye mʉr tɨ̂.

Éfɛsɔs 4:19

Ɨ́ sɔ́ɔlʉ pɨ̂ʼ wɔ́ɔ́, bɨ́ swâhle mímbi mébébé mɨ́mɛ̂h lɨ́ esâ. Bé lɨ́ esâ bímolá nzam le ekomo. Bé sá ntémé ó, bisyɛ́ɛla bi dí edulo mpîr ɨ́ nyʉ̂l bí, abe e njɨ.

2 Korɛnt 12:21

Sá dí esâ ó, me kpɛ́yɨɨ ebáʼǎ nze gʉ̂ʼ kwá nyɨ́n yɨ́, yé ó, ebě, Nzyɛ̌m wǎm ámû jaá gbâ mé sôn ɨ́ nyʉ̂l ɨ́ míh mɨ́n. Me ámû jaá sɔ́ma ɨ́ lɔ̌b buobuo bʉr o b'á sâ syóm mélú mé épíhe bá. Mé óbee ó, bé apǎ dwira míléme nó, me ámû jɨ, ebě, bé agwâʼ ésâ bísyɛ́ɛla bi dí edulo mpîr ɨ́ nyʉ̂l bí. Bɨ́ɛ ntémé njɨ lɨ́ etô dóló le elœʼ ményʉ̂l ɨ́ nzɨ̌ bijoó, le esâ bímolá nzam le ekomo, jwɨʼ gwár e gwár e mpʉ bé á boo sɨsâ yɨ́.

Mɨngwiha 21:8

Baábʉ́bʉ́á bɨ́ɛ, bé le ohááden, bʉr o dí e milémé mébomo, ojʉ̂l o bʉ̂r, osyɛ̂l o bímolá, oleme ti e baá o dí edwe bíkpɛʼkpɛ̂ʼ bí ónzyɛ̌m kûm bá, ndu e baányâ-mikóo bɨ́bɛ̂h, bɨ́ɛ, bé ójaá kœb ódiá wɔ́ɔ́ ó, njɨ ɨ́ bɨ́ siʼe. Yé ó lwɨ́ŋlá e siʼe ti e pir. Yé ɨ́ buú díʼa. Tɨ̂ʼ ó bʉ̂r dí edwe éswie embá yɨ́.»

Rôm 7:23

Tó kœb ó, mě beé ɨ́ nyʉ̂l nyǎm ó, yé e lʉ́ʉ́ étié e dí elwímla le etié e dí eduho ɨ́ bijwɨʼ bí lémé wâm lɨ́. Nkul syóm dí ɨ́ me wɨ́, wé ó dí entaa ócwóó wâm, nzě liŋ mé túʼǎ syóm dí me ɨ́ nyʉ̂l wɨ́.

Mataos 15:19

Ebě, bibɨ́bla bíjwɨʼ bíbyɛ̂h, byé duho ó ɨ́ léme. Byé ó dí: ejwɨ́ɨ́ é bʉ̂r, medyɛ̂n, bimolá, díbe, eyalǎ lɔ̌b mɨ́ɔɔ́ gǒ mʉr lɨ́ onzyɛ́h ónzyɛ́h, le melwɨ́ɨ.

Mɨngwiha 22:15

Nó ó, ompyê, oleme, osyɛ̂l o bímolá, ojʉ̂l o bʉ̂r, baá o dí edwe bíkpɛʼkpɛ̂ʼ bí ónzyɛ̌m kûm bá, le baányâ-bibɛr bɨ́ɛ, bé ódwoowǒ kʉ̌l.

Jacques 4:1

Bitɔm e melwímla dí esyɛ́ɛlɨ páʼ nyɨ́n bí, byé duhǒ nkoó? Byé duho ó, ɨ́ bigwɨ́má bɨ́n dí e byé jɔʼ yɨ́yɛ̂h ɨ́ menyʉ́l mɨ́n bí.

1 Korɛnt 6:13

Bé lɨ́lɛ́ɛ́ ntémé ó: «Mede, mê tɨ̂ʼ ó, lɨ́ esú é mo. Mo ntémé, lɨ́ esú é méde.» Yé ó nó. Sâ gwár, Nzyɛ̌m ógbah bíbyɛ̂h, ebě, nyʉ̂l mʉr, nyé abe ó, nye díʼee lœʼá ɨ́ nzɨ̌ bijoó. Nye tɨ̂ʼ ó, lɨ́ esú lé éséa e Tî Yésʉs syɛ́ɛ́. Tî Yésʉs, ntémé, nye tɨ̂ʼ ó, lɨ́ esú é ményʉ́l gá mɨ́ná.

Rôm 6:6

Mɨná bé lɨ́ egʉ́a gá ó, ɨ́ jɔʼ bé á jʉ̂ Yésʉs-Krîst, lɨ́ ebomlo nyé e binzâŋ, le ebɨ́nɔɔ nyé ɨ́ kolôs kʉ́ yɨ́, Nzyɛ̌m á si bomlo metum me myâ gá mɨ́ná tɨ̂ʼ ntémé ɨ́ kolôs gwár yaá. Nye á sâ nó ó lɨ́ esú lé éteʼle nyʉ̂l dí egwɨ̂m mísyóm nyɨ́, le ntémé ó, mɨná ayɨ́ kǎ báʼǎ di gá bitúʼǎ lɨ́ esâ mísyóm myaá.

Ebrœ̂ 13:4

Bʉr, bé ɨ́ jala le edwe mímbɛ́á mí bʉ̂r dúu. Syɛ́ɛla mpîr, yé ajala le esyɛ́ɛlɨ̌ súm mímbɛ́á mí bʉ̂r dí esyɛŋa yɨ́. Gʉ́ŋáá gá ó, Nzyɛ̌m ótíʼe ósyɛ̂l o médyɛ̂n, bé le osyɛ̂l o bímolá milɔ̌b.

Ebrœ̂ 12:16

Gwá di gá le ocwóó. Mʉr asâ bímolá. Mʉ̌r sá asâ nkěh ɨ́ nkǒ páʼ mílɔ̌b mé Nzyɛ̌m ɨ́ mpʉ̌ Esô á sâ yɨ́. Nye á si dwɛ́na dǐ tʉ́l yé, dwe ntwóm, lɨ́ esyɛ́ɛla yé lɨ́ esú lé énʉa mâ kǎr méde!

1 Tesalonika 4:3

Ebě, sá Nzyɛ̌m dí ekpɛl yɨ́, yé ó, bɨ̌n díʼee bʉr o dí egúmo e né bá. Ebe nó, syɛ́hláá gá esâ bímolá.

1 Korɛnt 5:1

Bʉr bé lɨ́ ejóʼo bé lɨ́ elɛ́ɛ ɨ́ gúmó yɨ́yɛ̂h ó, yé e bimolá ɨ́ sɔ́má yɨ́n, bimolá sâ bínwérédé, byaá óhááden dí abe lɨ́ esâ bí. Nyʉ́ʉ́ mʉ̂r ɨ́ sɔ́má yɨ́n, nye lɨ́ ebánǎ tiʼe e myaá sɔ́ŋ.

Rôm 7:5

Jɔʼ yɨ́yɛ̂h mɨ́ná bé á dû gá njwɨr myâ wɨ́ná yɨ́, metié mé Nzyɛ̌m, mé á si dwe bibɨ́bla bígwɨ́má bíná nkul, byé ntɔ̂ʼ sâ ó, bisyɛ́ɛla mɨ́ná bé á tʉtô le esâ gá bí, byé dâʼraa eswie ɨ́ menyʉ́l gá mɨ́ná.

Rôm 1:29

Bé lɨ́ eswâhle bísyɛ́ɛla bíbyɛ̂h bi dí egbah métié bí. Byé ó dí: jélé, gwɨ́má bísá byé onkán, ebébe é léme, nzwíí, ntaa sʉ́ŋa, ejwɨ́ɨ́ é bʉ̂r, gwɨ́má égœ́a e bʉr, mikóo, sɛ́á mépɨʼ mé ébébe, mesyɛ́ɛla.

Rôm 1:26

Sá tɨ̂ʼ ó Nzyɛ̌m á bîr ó, bé sâʼ bisyɛ́ɛla bí ésɔ́m bé á kʉ bu gwɨ̂m bí yɨ́. Bʉbá bɨ́ɛ beně mbi bé á komlɔɔ ó, bé sɨ̂saʼ wɨ́. Líʼɔɔ̌ mpǎŋ syɛ́ɛla yaá, nzě lœʼ ményʉ́l mɔ́ɔ́ ó e bisyɛ́ɛla bi dí ajala e mbǐ kwɨmlá wɔ́ɔ́ bí.

1 Tesalonika 4:5

Njʉ̂m nyɨɛ díʼee e mʉmá wé waá, abe ɨ́ tíná bígwɨ́má mébomo mpʉ mínjéʼe-Nzyɛ̌m dí esɨsâ yɨ́.

1 Korɛnt 6:11

Nó ntémé ó, bʉ́ʉ́ bʉ̂r ó sɔ́má yɨ́n, bé á be yɨ́! Sâ gwár, bɨ̌n bé á si sohlɔɔ, pubɔɔ, le edweŋɔɔ nkâm ɨ́ míh mé Nzyɛ̌m ɨ́ díé mé Tî Yésʉs-Krîst, cɨɨ e nzɨ̌ Sísǐm mé Nzyɛ̌m gá wɨ́ná.

Kolosi 2:11

Ɨ́ mpúhlá nyɨ́n e Krîst, bɨ̌n bé á si tíʼɔɔ mpʉ́n dí eduho kwá mé Krîst nyɨ́. Mpʉ́n nyaá ó dí elɛ̂ʼle ó, bɨ̌n bɨ́ dwǐh njwɨr myâ gá wɨ́ná. Bɨ̌n bé á bé atíʼɔɔ mpʉ́n mpʉ bʉ́ʉ́ bʉ̂r dí etîtiʼɔɔ yɨ́.

1 Timotɛ 6:10

Ebě, enkpɔɔ é mɔnɨ́, lé ó etín é bísá bí ébébe bíbyɛ̂h. Tó kœb ó, bʉ́ʉ́ bʉ̂r ó sɔ́má gá yɨ́ná, bé á be ɨ́ nyɛɛ́ bûʼlǎ Nzyɛ̌m, bé ntɔ̂ʼ kǎ lʉ́ŋa ɨ́ bɨ́ bígwɨ́má. Bɨ́ dîm. Bé mû ó sí dyɛ̂l ɨ́ nzɨ̌ swîh. Nó ɨ́ báánâ, bɨ́haá, bé mû ó sí dulo mítúú ɨ́ buo buo ɨ́ menyʉ́l mɔ́ɔ́.

Ebrœ̂ 13:5

Mʉ̌r sá alâʼ nyʉ̂l nyé lɨ́ enkpɔɔ é mɔnɨ́. Sohaa gá bím bísá bɨ́n dí ebi bí, ebě, Nzyɛ̌m á lɛ́ɛ ó: «Mé abe e nkul ejɨha gô, nkʉ̂ líʼe gó ɨ́ ntɛ̂ʼ.»