Kolosi 3:1 - Kálar Nzyɛ̌m : Ejwán é Sáá

¹ Yé bé yê tyeetye ó, bɨ̌n e Krîst, bé á be ó sí duho lɨ́ eswie, báʼǎ bǐ twiʼ nó, sáŋáá gá bé ebi bísâ bi dí ɨ́ jʉ́o kʉ́ bí. Byé ó, ɨ́ gúmó Krîst dí ɨ́ mbó éjʉ́m mé Nzyɛ̌m yɨ́.

Kálara Zyɛ̌m Edwán é mpʉ̌n

¹ Ebe no, é mpʉ bɨn e boo Krɨst mu ó si pɛ̀hɔ é mofoo e, gʉŋa ga ó, bɨn bé ejala le esaa bɨsa ndɨ é jobo kʉ ɨ. Byé ó é gumo Krɨst lé edi é mbo ejʉm mo Zyɛm ɨ.

Kolosi 3:1 ပူးပေါင်းရင်းမြစ်များ

Rôm 8:6

Yé bé njwɨr myâ gá wɨ́ná, wé lɨ́ epalwo mʉ̂r ɨ́ léme nó, eswie ó ngá jala e mʉr waá. Ɨ́ jɔ̌ʼ Sísǐm mé Nzyɛ̌m dí edi mʉ̂r ɨ́ léme yɨ́, mʉr waá óbǐ mpǎŋ twiʼ. Lémé wé, wé ólóno ɨ́ mepyɛbla.

Mataos 6:33

Sá ésôʼ, tááráá ésáa gá enî ɨ́ Mpóʼo nyé, le etiʼe lɨ́ otîtyěl wé. Byaá byúú bɨ́n ká jɨ̌ nɨ̌, Nzyɛ̌m ólóŋlo bɨ́n byǎ.

2 Korɛnt 4:18

Ebě, bɨ̌h bé agbâ míléme ɨ́ bisá bi dí enyɨ̂n bí. Bɨ̌h gbá myé ó, ɨ́ bisá bi dí anyɨ̂n bí, ebě, byaá bi dí enyɨ̂n bí, byé lɨ́ elaǎ mpʉ̌ ngúl mpáá. Tó kœb ó, byaá bi dí anyɨ̂n bí bíɛ ó dí edǐ njʉ̌m dǐ e njʉ̌m dǐ.

Kolosi 3:2

Bisyɛ́ɛla bi dí epálwo bɨ́n ɨ́ miléme bí, byé díʼee njɨ byaá bí jʉ́o kʉ́, abe byaá bí sí yɨ̂.

Mataos 6:20

Máʼáá gá okúm le ogbaa wɨ́n ɨ́ jʉ́o kʉ́, gúmó óswôʼ le myámnkɛ̂l dí andáma bísɔ̂ʼ, mindíblʉ̌ abʉ̂ mébê, díbe yɨ́.

Ebrœ̂ 12:2

Míh gá mɨ́ná, mé dwɛ́ʼɛɛ sɔ̂ʼ njɨ Yésʉs, ebě, nye ó b'á kar nzɨ̌ búʼó. Nye ntémé ó b'á swâhle nye. Nye á kam ó, nye síaa e mitúú, nye tyélɔɔ ɨ́ lɨ́ kʉ́, jʉ́ŋɔɔ. Nye á si pyêh sôn mʉ̂r dí ebɛb ɨ́ mbi éswie laá nyɨ́. Nye á kam ó, nye dwêʼ nó ó, nye nkʉ̂ bi bísʉhʉʉ̌ Nzyɛ̌m á boo komo nye bí. Ɨ́ báánâ, nye mû ó ɨ́ mbó éjʉ́m mé Nzyɛ̌m Sɔ́ŋ ɨ́ mecwɨ́ɨ́ mé jwɨ́ɨ.

Lʉkas 12:33

Bɛ́máá gá mebi mɨ́n. Súʼáá gá baántéʼenteʼe o bʉ̂r. Laraa gá mimpɨ́ʼ bímɔnɨ́ mi dí aswɨ́ɨ mí. Máʼáá gá okúm le ogbaa wɨ́n ɨ́ jʉ́o kʉ́, gúmó byé ngá be, adîm yɨ́, ebě, mindíblʉ̌, myé abe e nkul ekúnwo e tɨ̂. Oswôʼ ntémé, ajʉ́a byê.

Ebrœ̂ 1:3

Nye ó dí e mentyɛnwa ndu e kûm mé Nzyɛ̌m. Nye ó dí gulo dí elɛ̂ʼlě mpʉ̌ Nzyɛ̌m mʉr tɨ̂ʼ dí yɨ́ nyá. Nyě baʼlé sá yɨ́yɛ̂h ó, ɨ́ nzɨ̌ lwǐb yé, dí e nkul yɨ́. Nye á si sîl ekomlo nzɨ̌ epubo bʉ̂r misyóm myɔ́ɔ́. Nye nzě bɨ́nɔɔ ɨ́ jʉ́o kʉ́, tó di sí ɨ́ mbó éjʉ́m mé Nzyɛ̌m kûm nɨ́nɨ́ɨ́.

Lʉkas 22:69

Damá jóʼo nó, mě lɛ́ɛ́ bɨ́n ó: táare ɨ́ báánâ, Mwân mé Mʉr ódi ndîndǐl ɨ́ mbó éjʉ́m mé Nzyɛ̌m nkul nyɨnyɛ̂h.»

Kolosi 2:20

Bɨ̌n e Krîst, bé á si dwe eswie empwár. Sá tɨ̂ʼ ó mílɛ́ʼlá bʉ̂r ó sí yɨ̂ʼ dí ekûhlo mí, dí abe lɨ́ ekǎ jwɨ́ɨ bɨ́n yɨ́. Ɨ́ tɨ̂ʼ, mʉ̌r sá akǎ dû mémpéné mé dí eduho ɨ́ milɛ́ʼlá myaá má, nkʉ̂ báʼǎ tiʼě mpʉ̌ sá lɛ́ɛ́, bɨ̌n gúmó ó e sí yɨ̂.

Ebrœ̂ 8:1

Lʉ́ ékǎn e bísá bɨ́h dí elɛ́ɛ bɨ́n bí, wé ó wɨ̂: mɨná gá bé ó e mbi njwɨ́ɨ opara waá. Nye ó ndîndǐl ɨ́ jʉ́o kʉ́ ɨ́ mbó éjʉ́m mé Nzyɛ̌m Sɔ́ŋ nkul nyɨnyɛ̂h.

Rôm 8:34

Nzé óláa mɨ́ná gá bibaa bí ébébe, le edwe mɨ́ná gá bintɨ́ʼá? Abe e mʉr! Yésʉs-Krîst á si dwe, búra e mɨná gâ. Yé abě njɨ nó. Nye á si pah, duho lɨ́ odwe, tó di ɨ́ mecwɨ́ɨ́, ɨ́ mbó éjʉ́m mé Nzyɛ̌m Sɔ́ŋ. Nye ó mʉr nkɔ̌m, waá dí ekamle e mɨná gá nyá.

Ebrœ̂ 10:12

Tó kœb ó, Krîst nyɨɛ á si dwe wé ndwéá ngwár ɨ́ kpɔ́ŋ lɨ́ edwih mísyóm lɨ́ esú é bíjɔʼ bíbyɛ̂h. Nye nzě tó di sí ɨ́ mbó éjʉ́m mé Nzyɛ̌m.

Mataos 26:64

Yésʉs ntɔ̂ʼ yala e né ó: «Yé ó go mʉr tɨ̂ʼ dí sí lɛ́ɛ̌ nɨ̌. Me lɨ́ elɛ́ɛ bɨ́n, táare ɨ́ báánâ, bɨ̌n bé óbee Mwân mé Mʉr, ndîndǐl ɨ́ páʼ mbó éjʉ́m mé Nzyɛ̌m nkul nyɨnyɛ̂h. Bɨ̌n bé óbee nyé lɨ́ enze, témé dwiné.»

Éfɛsɔs 4:10

Mʉr á sulo ɨ́ sí yɨ̂ʼ nyá, nye ntémé ó b'á bére, laǎ jʉ́o, le ejwoo le baántɛ́n. Táare ɨ́ tyé yaá, nzě kumo ɨ́ gúmó yɨ́yɛ̂h, nye ó ngá jwɨ́ɨ̌ sá yɨ́yɛ̂h.)

Markus 14:62

Yésʉs ntɔ̂ʼ yala e né ó: «Me ó nye. Bɨ̌n bé óbee Mwân mé Mʉr, ndîndǐl ɨ́ páʼ mbó éjʉ́m mé Nzyɛ̌m nkul nyɨnyɛ̂h. Bɨ̌n bé óbee nyé lɨ́ enze, témé dwiné.»

Ebrœ̂ 1:13

Nzyɛ̌m á bé alɛ́ɛ ɨ́ lʉ́ʉ́ dʉ́o, dumo e nyʉ́ʉ́ éngeles wé ó: Diʼee sí wâ, ɨ́ mbó éjʉ́m wâm. Bónáá ɨ́ puuu náǎ, tó pyâl ɨ́ jɔʼ mé ósâ óntɨ̂m le obɨn bô ó, bé díʼee tyélátyéla mékʉ̌ yô yɨ́.

Mɨlʉmlʉ 2:34

Ntʉ̌ David mʉr tɨ̂ʼ á bére kʉ́. Nye á lɛ́ɛ ó: : Dâ Nzyɛ̌m á lɛ́ɛ e Tî wǎm ó: “Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ,

Lʉkas 20:42

Ebě, David mʉr tɨ̂, nye lɨ́ elɛ́ɛ lɨ́ oSâm ó:: Dâ Nzyɛ̌m á lɛ́ɛ e Tî wǎm ó: “Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ,:

Markus 16:19

[Jɔ̌ʼ Tî Yésʉs á sil elwib e bé nó yɨ́, Nzyɛ̌m nzě nʉa nyé, tô e né ɨ́ jʉ́o kʉ́, tó dil nyé ɨ́ mbó éjʉ́m wé.

Markus 12:36

Ebě, David mʉr tɨ̂, e nzɨ̌ Sísǐm mé Nzyɛ̌m, á si kʉ lɛ́ɛ ó: ‘Dâ Nzyɛ̌m á lɛ́ɛ e Tî wǎm ó: Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ, tó pyâl ɨ́ jɔʼ mé ósâ óntɨ̂m le obɨn bô ó, bé díʼee sí mebo mô yɨ́.’”

1 Pyɛr 3:22

Yésʉs waá á si bɨ́nɔɔ ɨ́ jʉ́o kʉ́. Nye mû ó lɨ́ mbó éjʉ́m mé Nzyɛ̌m Sɔ́ŋ, gúmó nyé dí ejwɨ́ɨ bééngeles, le misísǐm mi dí e jwɨ́ɨ le myaá mi dí e nkul mí yɨ́. Byé á si gbáŋɔɔ ɨ́ jwɨ́ɨ́ yé.

Mɨlʉmlʉ 7:55

Mpʉ̌ Étiene á be, nye mû lwɨ́ŋlá e Sísǐm mé Nzyɛ̌m yɨ́, nye nzě bɨ̂n mîh kʉ́, nzě bee méntyɛnwa mé Nzyɛ̌m, bee ntémé Yésʉs lɨ́ etyɛ̂b tîtyěl ɨ́ mbó éjʉ́m mé Nzyɛ̌m.

Mataos 22:44

Dâ Nzyɛ̌m á lɛ́ɛ e Tî wǎm ó: “Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ, tó pyâl ɨ́ jɔʼ mé ósâ óntɨ̂m le obɨn bô ó, bé díʼee sí mebo mô yɨ́.”

Éfɛsɔs 5:22

Bɨ̌n bʉbá, sáʼ gá mejóʼo le ojʉ́m bɨ́n mpʉ bɨ́n dí esâ Tî Yésʉs mejóʼo yɨ́.