Filipi 2:12 - Kálar Nzyɛ̌m : Ejwán é Sáá

¹² Nó, osó bâm ɛ̌, bɨ̌n bé á be ó sí sâ Nzyɛ̌m mejóʼo ɨ́ jɔʼ mɨ́ná bé á be gá gúmo gwár yɨ́. Nó ɨ́ báánâ, ɨ́ mpʉ mé dí akǎ be kwá nyɨ́n yɨ́, bɨ̌n bé ɨ́ jala le etô dóló le esâ nó. Nzyɛ̌m, nyɨ́ tiʼ bɨ́n. Nó, séáá gá e bʉ́á le osâʼsâʼ lɨ́ esú ó, bɨ̌n dúʼoo kʉ̌ tyen waá.

Kálara Zyɛ̌m Edwán é mpʉ̌n

¹² No ó, obɨɔ o kpɛl bam aa! Bɨn bé a be ó si sa Zyɛm mojoʼo é jɔʼ bɨna bé a be ga gumo gwar ɨ. No ó, banana, é mpʉ me mu é nko paʼ fih, aka be bɨn ye e, bɨn bé ejala le eto dolo lé esa no. Zyɛm, nyi tiʼ bɨn. No ó, sea ga e bʉa e mosaʼ é l'efu ó, bɨn kœʼœ ebò e cyen laa.

Filipi 2:12 ပူးပေါင်းရင်းမြစ်များ

1 Korɛnt 15:58

Bɨ́ɔɔ́ le okɛ́l bâm mé dí ekpɛl bá, tyɛ́bɨ́ɨ́ gá mekʉ̌ sí ɨ́ sɨ́ŋ. Kʉ́ buú séa gá syɛ́ɛ́ mé Tî Yésʉs ɨ́ jɔʼ yɨ́yɛ̂h. Gʉ́ŋáá gá ó, syɛ́ɛ́ bɨ́n dí eséa Tî Yésʉs yɨ́, yé ákóʼó dwě ntuʼ.

Ebrœ̂ 4:11

Nó mɨná gbâʼ gá nkul lɨ́ esú lé énî ɨ́ gúmó bʉ̂r dí egbala yɨ́. Gwá di gá le ocwóó, ó mʉ̌r sá asâ ébɨ̌h e Nzyɛ̌m, nkʉ̂ duma sí mpʉ bímpám gá bíná byé á duma yɨ́.

1 Pyɛr 2:11

Mě jɨʼlá e bɨ̌n, osó bâm ó, bɨ̌n díʼee mpʉ̌ sá lɛ́ɛ́, bɨ̌n bé ó milaa-nkpǎʼ, nkʉ̂ mpʉ ójwóo dí ɨ́ mesí mé sí yɨ̂ʼ bá. Ɨ́ nzɨ̌ nyaá ó bɨ́n ngá tí bísá bʉ̂r ó sí yɨ̂ʼ dí egwɨ̂m bí yɨ́. Bisâ byaá ó dí elwímla e misísǐm mín.

Mataos 11:29

Níʼéé gá ɨ́ jwɨ́ɨ́ yâm. Bɨ̌n a jóʼló métwɨ́ɨ́ mâm, ebě, me ɨ́ talǎ njwɨr le embɨa é léme. Bɨ̌n nkʉ̂ bi égbalá.

Filipi 1:27

Sâ gwár, dúʼóó gá kʉ̌ tyen dí ejala e bʉr o dí ebúʼlǎ Mbɨambɨa Lɔ́ɔ́ mé Krîst bá wɨ́. Bɨ́n sá nó wá, me ókpɛl éjóʼǒ lɔ́ɔ́ búʼó yɨ́n ó, bɨ̌n dína ó ɨ́ mpúhlá e nzɨ̌ Sísǐm ngwár. Bɨ̌n bé lɨ́ egbâ nkûl lɨ́ edi e léme ngwár, le etye ɨ́ nzɨ̌ búʼó mpʉ̌ Mbɨambɨa Lɔ́ɔ dí elɛ̂ʼle yɨ́. Mě damá nze, nzě bee bɨ́n, nkʉ̂ ntémé di wâ, me ójóʼo yɨ́ɛ lɔ́ɔ́ tɨ̂.

2 Pyɛr 3:18

Tóʼ gá dóló le egwɨ́e ɨ́ mpam mé Tî gá wɨ́ná Yésʉs-Krîst, dí ntémé Tiʼbʉr gá wɨ́ná nyá. Bɨ̌n e gwɨ́é ntémé, ebě, bɨ̌n bɨ́ gʉ́a nyé ɨ́ pébébé. Nye omér ó dí ejala e kûm, táare ɨ́ jɔʼ yɨ̂, tó kumo ɨ́ twǐʼ njʉ̌m dǐ. Amɛn.

Ebrœ̂ 5:9

Píe mitúú myé myaá ó nyé á ka be, nye mû lwɨ́ŋlá ɨ́ nkʉ́ŋ wé yɨ́. Nye á be ó, nye mû sá ngá kǎ dwe bʉ̂r twǐʼ njʉ̌m dǐ yɨ́. Bʉr bɨ́bɛ̂h ngá sâ nyé mejóʼo bá, bé óbǐ twiʼ yaá.

2 Timotɛ 2:10

Mě dúhwó mítúú mímyɛ̂h ó, lɨ́ esú é bʉ̂r Nzyɛ̌m á twâr bá. Nye á twâr bé ó, bé bíʼee twiʼ, ti e kûm dí edǐ njʉ̌m dǐ e njʉ̌m dǐ nyɨ́, ɨ́ nzɨ̌ mé Yésʉs-Krîst.

Ebrœ̂ 4:1

Nzyɛ̌m á líʼe nkɛ̌ʼ e mɨná gá ó, nye ódib nzɨ́ egbalá lɨ́ esú gá lɨ́ná. Sâ gwár, gwá di gá le ocwóó, lɨ́ ekpɛ́ɛ ó, mʉr ngwár ɨ́ sɔ́má yɨ́n ámû sû myɛ́na maá, nye ntɔ̂ʼ akǎ nî lɨ́ egbalá laá.

Ebrœ̂ 12:1

Ɨ́ páʼ gá wɨ́ná, mɨná gá bé ó tʉ́ŋlʉ̌ bʉr baá. Bé lɨ́ ebɔma mɨ́ná gá ɨ́ nká, lɨ́ eboʼlo mílɔ̌b mé Nzyɛ̌m. Nó ó, mɨná líʼaa gá mimbeʼ médile mímyɛ̂h le syóm dí ekwable mɨ́ná gá wɨ́ wɨ́wɛ̂h. Mɨná sâʼ gá bíhwó lɨ́ eswim míkám, tó pyâl ɨ́ súm Nzyɛ̌m á lyáŋle njɨ ésíé é kám yɨ́.

Filipi 4:1

Bɨ́ɔɔ́ bâm le okɛ́l bâm mé dí ekpɛl bá, me lɨ́ ebuú gwɨ̂m ébáʼǎ bee bɨ́n. Bɨ̌n ó dí edwe mé bisʉhʉʉ ɨ́ buo buo ɨ́ léme. Bɨ̌n ó ngá sâ ó, Nzyɛ̌m dwêʼ me myɛ́na, mpʉ̌ káráá dúu. Tyɛ́bɨ́ɨ́ gá mekʉ̌ sí ɨ́ sɨ́ŋ ɨ́ nzɨ̌ Tî Yésʉs dí etɨ́e bɨ́n nyɨ́.

Rôm 2:7

Bâʼ bʉ̂r, bé sáá ó kûm, le dúu le twiʼ dí asíesie yɨ́. Bé lɨ́ edûhwǒ sɔ́ɔlʉ waá e bíhwó, lɨ́ esâ mímpaŋ bísyɛ́ɛla. Bé ó baá Nzyɛ̌m ngá dwě twǐʼ njʉ̌m dǐ bá.

1 Tesalonika 1:3

Ɨ́ minjɨʼla bɨ́h dí ejɨʼla e waá dí Nzyɛ̌m gá wɨ́ná, waá dí ntémé Sɔ́ŋ gá wɨ́ná nyá mí, bɨ̌h bé lɨ́ esímsǎ syɛ́ɛ́ bɨ́n á séa ɨ́ lɔ̌b búʼó yɨ́n yɨ́. Yé á be ó, ɨ́ kpɛ̌l bɨ́n dí ekpɛ̌l Nzyɛ̌m yɨ́. Bɨ̌h símsá ntémé ó, mitúú bɨ́n á sia e myé ɨ́ nzɨ̌ mpûʼla Tî Yésʉs-Krîst á gbâ bɨ̌n ɨ́ miléme nyɨ́ mí. Bɨ̌h sá nó ó, ɨ́ mpǒm mé Nzyɛ̌m gá wɨ́ná, dí Sɔ́ŋ gá wɨ́ná nyá.

Filipi 1:29

Nzyɛ̌m á dib bɨ̌n nzɨ̌ ó, bɨ̌n gúmlaa Krîst, abě njɨ ɨ́ jɔʼ bɨ́n dí ebúʼla nyé yɨ́, kʉ́ buú be ntémé, ɨ́ jɔʼ bɨ́n dí esia e mitúú ɨ́ mpúhlá nyɨ́n e nɔ́ɔ́ yɨ́.

2 Korɛnt 7:15

Nye lɨ́ ebuú kpɛl bɨ́n ɨ́ jɔʼ nyé dí esímsa méjóʼo mɨ́n, bɨ̌n óbɛ̂h yɨ́, le ɨ́ jɔʼ nyé símsá mpʉ bɨ́n á nʉa nye e bʉ́á le osâʼsâʼ yɨ́.

1 Korɛnt 2:3

Nó yaá ó mé á pyâl kwá nyɨ́n mpʉ̌ tyɛʼbol, lwɨ́ŋlá e bʉ́á le mesâʼ yɨ́.

Éfɛsɔs 6:5

Bitúʼǎ, bɨ̌n bé ɨ́ jala le esâ ójwɨ́ɨ bɨ́n, baá o dí bʉr ó sí yɨ̂ʼ bá, mejóʼo. Jwááwáá gá bê, le edwe bé dúu. Séáá gá bé e milémé mímyɛ̂h, mpʉ̌ sá lɛ́ɛ́, bɨ̌n séá ó Krîst syɛ́ɛ́.

Mataos 11:12

Táare ɨ́ jɔ̌ʼ Yʉánɛs Ndubʉr á nyɛl edu bʉ̂r yɨ́, nzě kumo ɨ́ báánâ: Mpóʼo mé Dâ, nye lɨ́ esuŋɔɔ e nkul. Bʉr o cére, bé sáá ó, bé dɛ́nɨɨ nye e nkul.

Filipi 1:5

Ebě, mpʉ bɨ́n á syɛŋa mebô e me yɨ́, yé á be ɨ́ mbɨa. Bɨ̌n bé á si bâʼra e me lɨ́ etúnǒ Mbɨambɨa Lɔ́ɔ, táare ɨ́ dʉ́ó lé ésôʼ, kumo mûh.

Mɨlʉmlʉ 9:6

Nó ó, gbɔlwaa sí. Go e ní ɨ́ nkana. Bé ólɛ́ɛ gó sá gó jálá le esâ gʉ̂ʼ yɨ́.»

Filipi 2:19

Tî Yésʉs, nye lɨ́ egbâ mé mpûʼla ɨ́ léme ó, me mû ó kúno elómlo bɨ́n Timotɛ̂. Me óbuú soho ɨ́ jɔʼ mé ójóʼǒ lɔ́ɔ́ wé óduho gʉ̂, dumo e sɔ́má yɨ́n wɨ́ yɨ́.

1 Korɛnt 4:14

Mé acɛma bɨ́n mpʉ́nʉ̌ lɨ́ ejwɨʼ ó, mě gbá ó bɨ̌n sôn ɨ́ nyʉ̂l. Mě cɨ́l bɨ́n ó, cɨ́lɨ́ɨ, jwɨʼ gwár e gwár e mpʉ mé jálá le esâ bwán bâm mé dí ekpɛl bá yɨ́.

Filipi 4:15

Bɨ̌n bʉr ó Fílipi, bɨ̌n bʉr o tɨ̂, bɨ̌n bé lɨ́ egʉ́a ɨ́ jɔʼ mé á duhǒ sí Masedónia, lɨ́ etáare étó túnǒ Mbɨambɨa Lɔ́ɔ yɨ́, bɨ̌n ó b'á be Mbɛ̌r-Nzyɛ̌m ngwár wé á susúʼo me wɨ́. Bɨ̌n omér ó b'á soho ɨ́ jɔʼ mé á bee embɨa yɨ́, nkʉ̂ súʼo mê ɨ́ jɔʼ mé á bɔma le ebébe yɨ́.

Mɨlʉmlʉ 16:29

Nó ó ndwéela mimbʉʼ á tumo meláma, nzě kpâhwǎ tô kám ɨ́ mâ ntɔ́ɔ waá tʉ́ŋlʉ̌, le ejóʼo bʉ́á. Nye nzě bɨʼ mébóó sí ɨ́ míh mé Pɔ̂l, bé e Silâs.

Filipi 1:6

Me lɨ́ ekʉ́ gʉ́ǎ sá yɨ̂: ó Nzyɛ̌m, nyɨ́ táare édwir mílémé mín mbɨ̂mbɨá. Me lɨ́ egʉ́a ntémé ó, nye ótô le esâ nó, tó pyâl ɨ́ jɔʼ nyé ósîl ékomlo bɨ́n ɨ́ dʉ́ó Yésʉs-Krîst óbáʼǎ nze yɨ́.