Ebrœ̂ 9:15 - Kálar Nzyɛ̌m : Ejwán é Sáá

¹⁵ Mpʉ̌ Krîst á sâ nó yɨ́, nye mû ó mesaádɔm dí etyɛ̂b páʼ gá nyɨ́ná e Nzyɛ̌m nyá. Nye á tyɛ̂b nó ó, lɨ́ esâ édwán é sáá páʼ gá nyɨ́ná e Nzyɛ̌m. Saá nyaá, nye tɨ̂ʼ ó, lɨ́ esú é bʉ̂r ó Nzyɛ̌m á jébe bá, ó bé bíʼee twǐʼ njʉ̌m dǐ, jala e nkɔb líʼe nyɔ́ɔ́. Yé ó sá Nzyɛ̌m á kɛʼ bé yɨ́, ebě, Krîst á si dwe, lɨ́ enzě táǎ góo, le edwih mɨ́ná gá ɨ́ mpila ébébe, pɛʼ mɨ́ná gá ɨ́ fá. Mɨná bé á be gá ɨ́ mpila yaá ó, tɨ̂ e bisyɛ́ɛla bí ébébe mɨ́ná bé á sâ gá ɨ́ jɔʼ mɨ́ná bé á be gá ɨ́ saá esôʼ yɨ́.

Kálara Zyɛ̌m Edwán é mpʉ̌n

¹⁵ Ebe no ó Krɨst ndɨ mosàa-mɔm lé eduula paʼra wina boo Zyɛm ɨ. Nye a cyelɔ é dia mosàa-mɔm yaa ó, Zyɛm nkʉʼ de edwan e mpʉn ɨ. Nye a de mpʉn waa ó, e bʉr nye a jebe e, ó bé biʼe tiʼ molu mo mpoʼ mɨmɛh nye a kɛʼ be e. Ebe, Krɨst a si kɛha tiʼ ye lé ejala e mɨsyem ga mina, ó nye kʉrɨ bɨna ga. Mɨsyem myaa, myé a dɨ mɛr bɨna ga ó, taare é jɔʼ bɨna bé a be ga é mpʉn nye a taare de e bɨmpam ga bina ɛ.

Ebrœ̂ 9:15 ပူးပေါင်းရင်းမြစ်များ

Rôm 8:30

Bʉr o nyé á boo twâr bá, bé ó nyé á jébe bá. Baá nyé á jébe bá, bé ó nyé á dwe nkam ɨ́ míh mé bá. Bʉr o nyé á dwe nkam bá, bé ó nyé á dwe ntémé kûm bá.

Rôm 8:28

Mɨná bé lɨ́ egʉ́a gá ó, Nzyɛ̌m, nye lɨ́ eboó komlo bísá bíbyɛ̂h ó, byé díʼee e nyɔm lɨ́ esú é bʉ̂r o dí ekpɛl nyé, baá nyé á jébe ɨ́ mitíʼá mí lémé wé bá.

Ebrœ̂ 9:12

Jɔ̌ʼ Yésʉs á nî mpáh Nzyɛ̌m nyaá yɨ́, nye á bé anʉa sʉ́á métié mé óntamakǎ, nkʉ̂ maá bíntœœ. Metié nyé á nʉa, nî e mé má, mé á be ó maá mé nye mʉr tɨ̂. Nye nzě tó nî ɨ́ ntɔ́ɔ á be ɨ́ buú buǒ tí nyɨ́. Nye á nî ó, jɔʼ gwár lɨ́ esú é bíjɔʼ bíbyɛ̂h, ó nye nkʉ̂ táa góo, le edwih mɨ́ná gá ɨ́ mpila ébébe, ó mɨná díʼee gá onzyɛh o bʉ̂r, njʉ̌m dǐ e njʉ̌m dǐ.

Ebrœ̂ 10:36

Sá dí ejɨŋɔɔ ɨ́ páʼ wɨ́n yɨ́, yé ó bíhwó. Bɨ́n ósâ bíhwó nó, bɨ̌n bé ósâ gwɨ́má mé Nzyɛ̌m ɨ́ jɔʼ yaá. Bɨ̌n bé obǐ sá nyé á kɛʼ bɨ̌n yɨ́.

1 Timotɛ 2:5

Ebě, Nzyɛ̌m, nye ó njɨ ngwár. Nó ntémé, bʉr, bé ó njɨ e mesaádɔm ngwár dí páʼ bé e boo Nzyɛ̌m nyá. Nye mʉr tɨ̂, nye ó mʉr: Yésʉs-Krîst,

Ebrœ̂ 12:24

Bɨ̌n bé á si nze kwá mé Yésʉs, mesaádɔm á sâ edwán é sáá páʼ gá nyɨ́ná e Nzyɛ̌m nyá. Bɨ̌n bé á si pyâl, cɨɨ ɨ́ nzɨ̌ metié mé nyé á pubo bɨ̌n e mé má. Metié mé maá jaá lwilwib ó, njɨ mekǎn me dí ɨ́ mbɨa má, laa maá Ábɛl nyɨɛ á cɨ má.

Ebrœ̂ 7:22

Mpʉ̌ Nzyɛ̌m á ntaa minkâl nó yɨ́, yé á nze sâ ó, Yésʉs díʼee e mbeʼ ébaʼle sáá nyé á tyêl nyɨ́. Sá tɨ̂ʼ ó sáá nyaá dí ɨ́ mbɨa, laa nyaá esôʼ yɨ́.

1 Pyɛr 3:18

Ebě, Krîst mʉr tɨ̂ʼ á si dwe jɔʼ gwár lɨ́ esú é bíjɔʼ bíbyɛ̂h ɨ́ lɔ̌b bísyɛ́ɛla bí ébébe bín. Nyɨɛ tîtyěl mʉr á búra ó, le onzyɛ́h ó bʉ̂r, lɨ́ esâ ó, nye tôʼ e bɨ̌n nkǒ Nzyɛ̌m dí yɨ́. Bʉr bé á si jʉ̂ nye ɨ́ nkǒ páʼ bípúno. Nzyɛ̌m nyɨɛ nzě sâ ó, nye bíʼee nkul ɨ́ nkǒ páʼ Sísǐm wé.

Ebrœ̂ 13:20

Me lɨ́ ejɨʼla e Nzyɛ̌m, mʉr dí egbâ mɨ́ná gá mepyɛbla ɨ́ miléme, waá á pɛh «Mbɔʼlʉ bintemě nɨ́nɨ́ɨ́», Tî gá wɨ́ná Yésʉs nyá. Ɨ́ tɨ̂ʼ, Nzyɛ̌m á sâ ó, saá ngá dǐ njʉ̌m dǐ e njʉ̌m dǐ nyɨ́, ɨ́ nzɨ̌ metié mé.

Rôm 5:6

Sá mé dí elɛ́ɛ yɨ̂ʼ, yé ó: mélú mé épíhe, mɨná bé á be gá ó, onzwoó. Jɔʼ yaá ó Krîst á nze ka búra e mɨná gâ, minjéʼe-Nzyɛ̌m yɨ́. Nye á dwe ó, ɨ́ mpǎŋ jɔ̌ʼ Nzyɛ̌m á boo pɛ̂h yɨ́.

Ebrœ̂ 9:28

Jwɨʼ gwár e gwár e Krîst. Nye á si dwe jɔʼ gwár, ó nye búraa le misyóm lɨ́ esú é bʉ̂r ɨ́ buo buo. Ɨ́ jɔʼ mbá nyé ókǎ nze yɨ́, nye ákǎ báʼǎ nze ɨ́ lɔ̌b ébúra e misyóm. Nye ónze ó, lɨ́ enzě tíʼ bʉ̂r o dí ebóno nyé bá.

Ebrœ̂ 6:13

Yé á be ó, ɨ́ jɔ̌ʼ Nzyɛ̌m á kɛʼ Abraham bisá bí émbɨa yɨ́, nye á si ntaa minkâl. Mpʉ yé dí ó, yé abe e mʉr dí elaǎ Nzyɛ̌m yɨ́, nó ó nyé á gbâ díé lé nye mʉr tɨ̂ʼ ɨ́ minkâl yɨ́.

Ebrœ̂ 3:1

Bɨ́ɔɔ́ bɨ́h le okɛ́l bɨ́h dí egúmo e Nzyɛ̌m bá, mɨná gá ó bé á bi gá nkɔb mpwár: njɨ́blɨ́ Nzyɛ̌m á ntɨh mɨná gá, duho ɨ́ jʉ́o kʉ́ wɨ́. Jwɛ́ʼɛ́ɛ́ gá sɔ̂ʼ njɨ Yésʉs mpʉ nyé dí yɨ́: nye ó mʉr milʉ́mlʉ́ mé Nzyɛ̌m, báʼǎ be ntémé njwɨ́ɨ opara gá wɨ́ná mpʉ mɨ́ná dí ekam gá yɨ́.

Ebrœ̂ 2:14

Bwán nyé dí elwib, dumo e bé bá, bé e bipúno ndu e bidwehé. Jwɨʼ gwár yaá ntémé ó Yésʉs á tíʼe yɨ́. Nye á si dwe lɨ́ esú ó, nye têʼlaa mʉr á bɨbe e nkul eswie nyá. Mʉr waá, nye ó sɔ́ŋ meleme.

Mɨngwiha 5:9

Bé á didyɛɛ ó, edwán é jɨ̂m. Bé ó: «Go ó jálá le enʉa mékaná mâ, gbɛ́ɛ bísitâm, ebě, go á si jʉ́ŋɔɔ. Go á si dwih bʉr ɨ́ mpila ébébe, tô e bé kwá mé Nzyɛ̌m. Go á si syɛ́ɛla metié mô lɨ́ esú é bʉ̂r baá. Bé ó bʉr o bíkúl bíbyɛ̂h, ndu e bilwǐb bíbyɛ̂h, bʉr o mémpóʼo mɨ́mɛ̂h, ndu e mesí mɨ́mɛ̂h.

Ebrœ̂ 8:13

Ɨ́ mpʉ̌ Nzyɛ̌m á jébe saá mbá «edwán é sáá» yɨ́, nye á si liŋ nyaá esôʼ mbǒr. Nó ó, sá mû mbǒr, nkʉ̂ yaá mû sí jwɨm yɨ́, yé mû ntémé ó kúno edîm yɨ́yɛ̂h!

Títos 3:7

Nye á si tíʼ mɨná, sâ ó, mɨná bíʼee gá nkam ɨ́ míh mé ɨ́ nzɨ̌ mpam nyé. Mɨná bé ódi gá ntémé ɨ́ baá nyé á dwe twǐʼ njʉ̌m dǐ, jala e nkɔb líʼe nyɔ́ɔ́ bá. Mpûʼla, nye mɨná gá ɨ́ miléme ó, mɨná bé óbi gá nkɔb nyaá.

Títos 1:2

Bé lɨ́ etyɛ̂b mekʉ̌ sí ɨ́ sɨ́ŋ ɨ́ lɔ̌b mpûʼla gá nyɨ́ná nyɨ̂: ó, Nzyɛ̌m ódwe mɨ́ná gá twǐʼ njʉ̌m dǐ. Nzyɛ̌m, mʉr dí alɛ́ɛ bíbɛr nyá, á kɛʼ mɨná gá twiʼ yaá ó, jɔʼ kʉ́ e sí, byé á be apǎ bě kuhá yɨ́.

2 Timotɛ 2:10

Mě dúhwó mítúú mímyɛ̂h ó, lɨ́ esú é bʉ̂r Nzyɛ̌m á twâr bá. Nye á twâr bé ó, bé bíʼee twiʼ, ti e kûm dí edǐ njʉ̌m dǐ e njʉ̌m dǐ nyɨ́, ɨ́ nzɨ̌ mé Yésʉs-Krîst.

Yʉanes 10:28

Me lɨ́ edwe byé twǐʼ njʉ̌m dǐ. Byé ákóʼó dîm ɨ́ nkɔb bʉr. Kâr mʉ̂r ngá pɛʼ mé byǎ ɨ́ mebô.

Mataos 19:29

Yé abe e mʉr dí elíʼě mbɛ̌r wé, bɨ́ɔɔ́ bé, okɛ́l bé, sɔ́ŋ wé, nyɔ̌ŋ wé, bwán bé, nkʉ̂ bipemé byé ebe nyé dí edû mé, dí abáʼǎ bi byé nzɔʼ nter, nʉa ntémé twǐʼ njʉ̌m dǐ, jala e nkɔb líʼe nyé.

1 Yʉanes 2:25

Nó ó, nkɛ̌ʼ Nzyɛ̌m Sɔ́ŋ mʉr tɨ̂ʼ á dwe mɨná gá nyɨ́, nye ó nyɨ̂: twǐʼ njʉ̌m dǐ.

1 Pyɛr 5:10

Nzyɛ̌m ó dí mʉr dí elɛ̂ʼle mɨ́ná gá mpam ɨ́ bijɔʼ bíbyɛ̂h nyá. Nye ntémé ó b'á jébe mɨná gá ó, mɨná tô di gá ɨ́ mentyɛnwa mé ɨ́ nzɨ̌ mé Yésʉs-Krîst. Mentyɛnwa maá, mé ódi ó, njʉ̌m dǐ e njʉ̌m dǐ. Bɨ́n óbe, sí sia e mitúú, tâŋ bá mâ jɔʼ nó, Nzyɛ̌m, nyé obáʼǎ komlo bɨ́n, pɨr bɨ́n mekʉ̌ sí ɨ́ sɨ́ŋ. Nyé obáʼǎ gbâ bɨ́n nkul ɨ́ menyʉ̂l, sumo bɨ́n sí ɨ́ píʼi.

Jacques 1:12

Metyɛʼ me mpóm, mé díʼee e mʉr dí edûhwo mébʉ́blá nyá. Ebe mʉ̂r tɨ̂ʼ síl ébóblɔɔ nó, nye óbi myɛ́na me tɨ̂: twǐʼ Tî Yésʉs á kɛʼ bʉr o dí ekpɛl nyé bá yɨ́.

Ebrœ̂ 11:13

Bʉr baá bɨ́bɛ̂h, bé á dwe ó, bɨ́ɛ lɨ́ edyɛ̂ʼwo e Nzyɛ̌m. Jɔʼ bé á dwidwe nó yɨ́, bé á bé apǎ bǐ sá nyé á kɛʼ bé yɨ́. Sâ gwár, bé á bee nkɛ̌ʼ nyaá ó, nye dína ká ká lɨ́ ejaa. Bê nzě soho nyê. Bé bʉr o tɨ̂, bé á si gʉ́a lɨ́ otyeetye ó, bé ó ojwóo ti e milaa-nkpǎʼ ɨ́ sí yɨ̂.

2 Tesalonika 2:14

Nzyɛ̌m á si jébe bɨ̌n ɨ́ túnó bɨ́h á túno bɨ̌n Mbɨambɨa Lɔ́ɔ wɨ́. Nye á sâ nó ó, bɨ̌n dwéŋɔɔ kûm, jala e nkɔb líʼe nyɨ́n ɨ́ jɔʼ Tî gá wɨ́ná Yésʉs-Krîst ngá nyɨ̂n ɨ́ diá kûm yé yɨ́.

Rôm 6:23

Myɛ́na mé syɛ̂l misyóm, mé ó njɨ eswie. Tó kœb ó, ndwéá Nzyɛ̌m á dwe bʉr edwɛ́na wɨ́, wé ó twǐʼ njʉ̌m dǐ ɨ́ mpúhlá gá nyɨ́ná e Tî Yésʉs-Krîst.

Ebrœ̂ 9:16

Mʉ̂r sí cɛma mékaná mé líʼe, nzě dwe nó, bʉr, bé ókabla bílíʼe byé byaá ó, bé osí pǎ nyɛɛ́ beě jwɨʼ dí elɛ̂ʼle ó, mʉr á pa cɛma mekaná maá nyá, nyé akǎ be ɨ́ twiʼ yɨ́.

2 Korɛnt 3:6

Nye ó b'á dwe bɨ̌h nkul ó, bɨ̌h díʼee bʉr o jálá le eséa nyé syɛ́ɛ́ bá. Bɨ̌h mû ó osyɛ̂l o mésá bé, lɨ́ eníŋle bʉ̂r lɨ́ edwán é sáá. Nye á sâ saá nyaá ó e nzɨ̌ Sísǐm wé, abe e metié me dí micɛmá má. Ebě, metié mɨ́ɛ, mé jaá jʉ̂jʉ ó jʉ́ʼóo; Sísǐm mé Nzyɛ̌m wɨ́ɛ dwe bʉ̂r twǐʼ njʉ̌m dǐ e njʉ̌m dǐ.

Rôm 9:24

Nzyɛ̌m á jébe ó, mɨná gâ: le oYúden, le bʉr o dí abe óYúden bá.

Rôm 5:10

Jɔʼ mɨ́ná bé á be gá ontɨ̂m le obɨn mé Nzyɛ̌m yɨ́, Mwân mé Nzyɛ̌m á si dwe lɨ́ esú gá lɨ́ná, lɨ́ esâ sáá páʼ gá nyɨ́ná e Nzyɛ̌m Sɔ́ŋ. Krîst pǎ nyɛɛ́ cwɨ́a le ontɨ̂m le obɨn bé, á dwɛʼra e mɨná gâ, bʉr o sáá nyaá! Nzyɛ̌m ókʉ́ tiʼ mɨ́ná gá e nzɨ̌ twiʼ mé Yésʉs-Krîst, Mwân wé.

Rôm 5:8

Yésʉs-Krîst nyɨɛ á búra e mɨná gá ó, ɨ́ jɔʼ mɨ́ná bé á be gá osyɛ̂l o mísyóm yɨ́. Nó ó Nzyɛ̌m dí elɛ̂ʼle mɨ́ná gá kpɛ̌l yé yɨ́.

Lʉkas 18:18

Nyʉ́ʉ́ njwɨ́ɨ oYúden á be ɨ́ dî e Yésʉs ó: «Mbɨambɨa lɛ̂ʼla, me sâʼ wáǎ mbǐ sɔ̂ʼ dí ó, me nʉ́aa twǐʼ njʉ̌m dǐ, jala e nkɔb líʼe nyǎm?»

Markus 10:17

Mpʉ nyé á be, nye mû lɨ́ eja nzɨ́ yɨ́, nyʉ́ʉ́ mʉ̂r nzě swǐm kám, bɨʼ mébóó sí ɨ́ mpǒm nyé, ntɔ̂ʼ dî e né ó: «Mbɨambɨa lɛ̂ʼla, me sâʼ wáǎ mbǐ sɔ̂ʼ dí ó, me nʉ́aa twǐʼ njʉ̌m dǐ, jala e nkɔb líʼe nyǎm?»

Mataos 25:36

Me á be ó suswáh; bɨ̌n nzě bôr mé kán. Me á be ó lɨ́ ebíle; bɨ̌n nzě nze mé ɨ́ menɔɔlʉ. Me á be ó ɨ́ mbʉʼ; bɨ̌n nzě naa mê.”

Mataos 25:34

Jɔʼ yaá, njwɨ́ɨ ólɛ́ɛ e baá o dí nye ɨ́ mbó éjʉ́m bá ó: “Ntáʼ gâ, bʉr o Sɔ́ŋ wǎm á sʉ metyɛʼ me mpóm bá. Ntaá nzě nî gá ɨ́ sí nyé á boo komlo bɨ̌n, táare ɨ́ jɔʼ kʉ́ e sí, byé á be apǎ bě kuhá yɨ́.

Éfɛsɔs 1:7

Mwân waá ó b'á pyêl metié mé, ntɔ̂ʼ búra e mɨná gâ. Nye á sâ nó ó, nye táŋaa góo, ó nye dwíhɨɨ mɨná gá ɨ́ mpila ébébe. Nye ó b'á sâ ntémé ó, Nzyɛ̌m pɛ́ʼɛɛ bibaa bí ébébe nyé á niʼe mɨná gá bí. Nzyɛ̌m á sâ mɨná gá bisyɛ́ɛla byaá ó, lɨ́ elɛ̂ʼle mɨ́ná gá mpwaʼ mpam nyé.

Mataos 22:3

Nye nzě lómo ósyɛ̂l o mésá bé ó, bé tôʼ jébe bʉ̂r o nyé á boo báŋle ɨ́ nzɔɔ nyaá bá. Bɨ́ɛ ntɔ̂ʼ bene énze.

Lʉkas 22:20

Jwɨʼ gwár yaá, ɨ́ jɔʼ bé á sil ede yɨ́, nye ntɔ̂ʼ báʼǎ dwe bé bélé ményoʼ. Nye ó: «Menyoʼ mâ, mé ó edwán é sáá Nzyɛ̌m mû lɨ́ etyêl páʼ nyɔ́ɔ́ e bʉr lɨ́. Nyě tyél nyé ó, ɨ́ nzɨ̌ metié mâm mû lɨ́ eswɨɨ lɨ́ esú lɨ́n má.

Mɨlʉmlʉ 20:32

«Nó ó, ɨ́ báánâ, me lɨ́ etímle bɨ́n ɨ́ mebó mé Nzyɛ̌m. Nyɨ́ lɛ̂ʼle bɨ́n mpam nyé e nzɨ̌ mekǎn mé. Nye bâʼlaa bɨ̌n e mekǎn maá. Mé e nkul elɨl bɨ́n ɨ́ búʼó le edwe bɨ́n nkɔb bilíʼe jwɨʼ gwár e gwár e baá bɨ́bɛ̂h dí egúmo e né bá.

Galásia 3:20

Mesaádɔm, nyě títyɛ́b ɨ́ jɔʼ yɨ́yɛ̂h ó, páʼ menkɔ̌m mebá. Sâ gwár, ɨ́ jɔ̌ʼ Nzyɛ̌m á kɛʼ Abraham membɨa yɨ́, Nzyɛ̌m, nye á bé alómo éngeles, nkʉ̂ mʉr ó, nye díʼee mesaádɔm páʼ nyɔ́ɔ́ le Abraham. Nye á séa ó, nye omér.

Ebrœ̂ 6:15

Abraham á si dûhwo mpʉ̂n. Sá tɨ̂ʼ ó nyé á bi sâ Nzyɛ̌m á kɛʼ nye yɨ́.

Ebrœ̂ 10:34

Bɨ̌n e mimbʉʼ bé á si sia e mitúú mímpwár. Jɔʼ bʉ̂r bé á dɛn mebi mɨ́n yɨ́, bɨ̌n bé á si bîr byé e bisʉhʉʉ, ebě, bɨ̌n bé á be ɨ́ kʉ́ gʉ́a ó, bɨ̌n bé óbánǎ bi bídimé bísâ. Bisâ byaá, byé ɨ́ buú mbɨa, laa byaá bé á nyɛɛ dɛn bí. Byé ntémé, byé ó bisá bi dí edi bí.