Ebrœ̂ 8:5 - Kálar Nzyɛ̌m : Ejwán é Sáá

⁵ Opara bɨ́ɛ, bé sɨ́séá ó, ɨ́ mpáh Nzyɛ̌m, nyaá sí yɨ̂. Nye ó njɨ lɨ́ ebaŋa mpáh Nzyɛ̌m mpâ dí ɨ́ jʉ́o kʉ́ nyɨ́. Nó ɨ́ jɔ̌ʼ Moyɨ̂z á be ó, nyě sumó ó mbɛ̌r kán mé Nzyɛ̌m yɨ́, Nzyɛ̌m á lɛ́ɛ e né ó: «Gwá sumǒ sá yɨ́yɛ̂h lɨ́ edû mveʼlě mbɛ̌r gó á lɛ̂ʼlɔɔ lɨ́ ecwɨ̂ʼ kʉ́ yɨ́.»

Kálara Zyɛ̌m Edwán é mpʉ̌n

⁵ Opara bɛɛ, bé esea-sea ó, é tiʼe ndɨ é l'efu le edwe Zyɛm kum ɨ. Tiʼe yaa, yé a saŋɔ ó, lé edu dweʼle Saʼ Nɨnɨ mo Zyɛm ndɨ é jobo kʉ ɨ. No ó, é jɔʼ Moyiz a be ó, nye fumo ó Saʼ Nɨnɨ mo Zyɛm ɨ, Zyɛm a lɛɛ e nye ó: «Gʉa komlo sa yiyɛh lé edu dweʼle saʼ go a lɛʼlɔ é l'ecwɨʼ kʉ ɨ.»

Ebrœ̂ 8:5 ပူးပေါင်းရင်းမြစ်များ

Kolosi 2:17

Milɔ̌b mínɨ̌ mímyɛ̂h, myé ó sisîm, dí elɛ̂ʼlě sâ mpâ dí enze yɨ́. Nó ó, otyeetye o tɨ̂ʼ wɨ́ɛ, wé ó Krîst.

Ebrœ̂ 10:1

Metié, mé ó sisîm dí elɛ̂ʼlě mpʉ bísá bí émbɨa, byé ójala le ebe ɨ́ jɔʼ byé ngá pyâl yɨ́ wɨ́. Metié maá, mé adila míkuó bísâ byaá. Opara, bé dwídwé míndwéá mimpwár ó, ɨ́ mbú wɨ́wɛ̂h lɨ́ esú é bʉ̂r o dí egwɨ̂m ó, bé díʼee mbɨ̂mbɨá bá. Sâ gwár, mindwéá myɔ́ɔ́, myé ákóʼó sâ ó, bʉr baá díʼee mbɨ̂mbɨá ɨ́ mipáʼ mímyɛ̂h.

Ebrœ̂ 9:9

Yɨ̂ʼ, yé ó mveʼle dí elɛ̂ʼle mɨ́ná gá ɨ́ jɔʼ yɨ̂ʼ ó, bʉ̌r damá tíʼe ótír, táǎ Nzyɛ̌m mebyaʼ mɔ́ɔ́ ɨ́ nzɨ̌ mindwéá myaá, myé abe e nkul epubo míléme mi bʉ̂r o dí edîʼ nyé myǎ bá. Myé abe lɨ́ esâ ntémé ó, mipahlá mílémé myɔ́ɔ́, myé díʼee ɨ́ pyɛɛɛ.

Ebrœ̂ 12:25

Nó, gwá di gá le ocwóó, ó bɨ̌n sá abene mʉ̂r mû lɨ́ ecɨ̂l bɨ́n nyá. Ɨ́ mimbú mí píhe, bé á si bene ejóʼo mʉr á nze ɨ́ sí yɨ̂ʼ nyá, akpɛl éjóʼo ɨ́ jɔʼ nyé á boo lɛ́ɛ bé sá nyé óntɨh bé yɨ́. Jɔʼ yé á ka pyâl yɨ́, bé ntɔ̂ʼ sáa ékɨ̂ŋ ntɨ́ʼá. Yé á bé akǎ bána. Mʉr á nze ka lwib e mɨná gá nyá, nyɨ́haá, nyé twíí, nye á duho ó kʉ́. Mɨ́ná bé óbene gá lɔ́ɔ́ wé nó, nzê mɨná bé ókɨ̂ŋ gá ntɨ́ʼá tɨ̂ʼ yɨ́ɛ ɛ̌? Nzyɛ̌m pǎ nyɛɛ́ ntɨ̂ʼ bímpám gá bíná ɨ́ lɔ̌b ajóʼo wɔ́ɔ́, á dwɛʼra e mɨná gá bɨɛ!

Ebrœ̂ 11:7

Ɨ́ lɔ̌b búʼó, Nóe á si jóʼo Nzyɛ̌m jɔʼ nyé á cɨ̂l nye ɨ́ lɔ̌b sá yé á be ó, yé ósyɛ́ɛ yɨ́. Nye dína apǎ bee yé e dîh, nye nzě gbâ lwǐb mé Nzyɛ̌m yaá ɨ́ dúu, ntɔ̂ʼ kpaʼ byɛ̂l, dû mpʉ̌ Nzyɛ̌m á tɨ́e ó, nye sâʼ yɨ́. Nye nzě nî tɨ̂, bé e mbɛ̌r bʉ̂r wé, bɨ́bɛ̂h ntɔ̂ʼ tíʼe. Ɨ́ lɔ̌b búʼó yé ó nyé á lɛ̂ʼle ó, syɛ́ɛla bʉ́ʉ́ bʉ̂r, bé á sâ yɨ́, yé á be ɨ́ bébe yɨ́. Bɨ́ɛ bé á bé adyɛ̂ʼwo e Nzyɛ̌m. Nye á bi nkam ó, tâŋ nkɔb nyé, ɨ́ lɔ̌b búʼó yé.

Mɨlʉmlʉ 7:44

«Ɨ́ lʉá tʉ́ŋlʉ̌, bimpám gá bíná, byé á bě e mbɛ̌r kán, gúmó bé á baʼle sá dí eboʼlo ɨ́ lɔ̌b mé Nzyɛ̌m yɨ́. Mbɛ̌r waá, wé á sumɔɔ ó, mpʉ̌ Nzyɛ̌m á tɨ́e Moyɨ̂z ó, wé súmɔɔ yɨ́. Wé á nwɨɨla ó e mveʼle nyé á bee yɨ́.

Mataos 2:12

Píe tɨ̂, Nzyɛ̌m nzě cɨ̂l bé ɨ́ nzɨ̌ bilíma ó, bé ayɨ́ báʼǎ búla, tô kwá mé Erôd. Bé á to kumo kwár nyɔ́ɔ́ ó, kǎ cɨɔɔ ɨ́ nzɨ̌ swîh.

Ebrœ̂ 13:10

Mɨná gá bɨɛ ó dí le alatâr mé Nzyɛ̌m. Bʉr o dí eséa ɨ́ mbɛ̌r kán mé Nzyɛ̌m bá, bé abe e nkul enze lɨ́ alatâr waá, nkʉ̂ de méde mû kɛlá tɨ̂ʼ má.

Mɨngwiha 15:5

Mé ká bee nɛ́ɛ: bee mpáh Nzyɛ̌m ɨ́ jʉ́o kʉ́, nye mû mběʼ. Nye á be ó lɛrá e kán, mbɛ̌r kán sáá.