Ebrœ̂ 6:17 - Kálar Nzyɛ̌m : Ejwán é Sáá

¹⁷ Nzyɛ̌m á tíʼe ɨ́ lémé wé ó, nyě sá ó bʉr gʉ́ŋaa lɨ́ otyeetye ó, nye ábîr mbɨambɨa nkɛ̌ʼ nyé. Nó yaá ó nyé á ntaa minkâl ɨ́ jɔʼ nyé á kɛʼ bʉr membɨa mé yɨ́. Minkál myé myaá ó b'á lɨl nkɛ̌ʼ nyé. Bʉr o jálá le ebi nkɛ́ʼ nyaá bá, bé ogʉ́ǎ tyeetye ó, bé ókʉ́ bi nyê.

Kálara Zyɛ̌m Edwán é mpʉ̌n

¹⁷ Zyɛm a nʉa tiʼa ó, bʉr, bé ógʉa cyecye ó, nye aŋa jɨha mbɨambɨa nkɛʼ we. No yaa ó nye a de mɨnkɛla é jɔʼ nye a liʼe bʉr e monkɛʼ me e. Bʉr o ndɨ ejala le ebi bɨsa bibyɛh Zyɛm a kɛʼ be e, bé ògʉa cyecye ó, nye ókʉ dira monkɛʼ me.

Ebrœ̂ 6:17 ပူးပေါင်းရင်းမြစ်များ

Ebrœ̂ 6:18

Yé e bisá bíbá bi dí abe e nkul ecénɔɔ bí: bisâ byaá, byé ó nkɛ̌ʼ ti e minkál mé Nzyɛ̌m. Mɨná nʉa gá pîm ɨ́ búʼó ó, duho tɨ̂. Nzyɛ̌m, nyé abe e nkul elɛ́ɛ bíbɛr ɨ́ sí, tɔʼ e bá tîtííǎ. Mɨná gá bé ó bʉr o mû sí bîr sá yɨ́yɛ̂h, lɨ́ esú lé édi e mpûʼla ɨ́ milémé gá míná bá. Mpûʼla nyaá, nye ó kwahaá ɨ́ ponó ɨ́ míh gá mɨ́ná.

Ebrœ̂ 11:9

Ɨ́ lɔ̌b búʼó yé ó nyé á tíʼe ɨ́ sí Nzyɛ̌m á kɛʼ nye yɨ́, damá jóʼo ó, nye á tíʼe tɨ̂ʼ ó mpʉ njwóo. Nye á didi tɨ̂ʼ ó, ɨ́ mbɛ̌r kán. Isaac, bé e Yákɔb, bʉr o bé e boo nɔ́ɔ́ bé á kɛʼɔɔ sí yaá bá, bé á di ntémé ó, ɨ́ mbi mímbɛ̌r myé á be ɨ́ nwɨɨla e wɨ́haá mí. Bɨ́bɛ̂h, bé á si bóno ebi mémbɨǎ Nzyɛ̌m á kɛʼ Abraham má. Mé ó b'á be nkɔb líʼe nyɔ́ɔ́.

Yʉanes 10:10

Ndíblʉ̌ nzé ó, lɨ́ enzě díbe, le ejʉ̂, le egbah. Mɛm á nze ó, bʉr bíʼee twiʼ. Bé bíʼee yé ɨ́ buo buo.

1 Pyɛr 3:7

Ɨ́ jwɨʼ gwár yaá, bɨ̌n bɨɛ ojʉ̂m, diʼee gá mbɨ̂mbɨá, bɨ̌n e bʉbá bɨ́n. Bɨ̌n e gʉ́á ó, le mʉmá, le mʉrʉ̂m, mʉmá ó dí ɨ́ tyɛʼ, laa mʉ́rʉ̂m. Dwéʼ gá bé dúu, ebě, bɨ́ɛ ntémé óbi émbɨǎ Nzyɛ̌m á kɛʼ baá nyé á tíʼ bá lɨ́. Lé ó dí nkɔb líʼe nyɔ́ɔ́. Bɨ́n óbe, atíʼe nó wá, yé óbɛ̌m kɔbla bɨ́n ɨ́ jɔʼ bɨ́n dí ejɨʼla e Nzyɛ̌m yɨ́.

1 Pyɛr 1:3

Mɨná gúmlaa gá waá dí Nzyɛ̌m mé Tî gá wɨ́ná Yésʉs-Krîst, waá dí Sɔ́ŋ wé nyá. Nyɨ́ buú jɨ̂ʼ mɨ́ná gá nkoó, ntɔ̂ʼ dwe mɨ́ná gá nkul ebyɛ̂l jɔʼ mbá, lɨ́ esú ó, mɨná díʼee gá lwɨ́ŋlá e mpûʼla ɨ́ miléme. Mpûʼla nyaá, nyě duhó ó, ɨ́ nkul pɛhá nyé á pɛh Yésʉs-Krîst ɨ́ soo wɨ́.

Jacques 1:17

bisá bíbyɛ̂h bi dí ɨ́ mbɨa bí, le mindwéá mi dí ɨ́ pémémé ɨ́ mipáʼ mímyɛ̂h mí, byé duho ó, ɨ́ jʉ́o kʉ́, kwá mé Nzyɛ̌m Sɔ́ŋ. Nzyɛ̌m ó b'á komlo ocwícwén, le dʉ́o ti e l'álomó. Nó ó, nyé abe lɨ́ ecéně mpʉ bísâ byaá dí ecéne bítyé byɔ́ɔ́ yɨ́. Nyé acéně mpʉ dʉ́o, sá dí edíme, kǎ líʼe bʉ̂r ɨ́ pyóo yɨ́.

Ebrœ̂ 6:16

Jɔʼ bʉ̂r ntɨ́ntáá mínkâl yɨ́, bé ntɨntaa myé ó, lɨ́ egbâ díé é mʉ̂r dí entaa bé ɨ́ dúu nyá ɨ́ minkâl. Minkál myɔ́ɔ́ myaá, myé lɨ́ egbâ nkǎ-tí ɨ́ mesónó.

Ebrœ̂ 6:12

Bɨ̌h bé akpɛl ó, bɨ̌n díʼee mipwɨ́pwɨ̂h mí ósyɛ̂l o mésâ. Bɨ̌h jaá gwɨ̂m ó, njɨ bɨ̌n sâʼ mpʉ bʉ́ʉ́ óbûʼla mé Nzyɛ̌m dí eboó sɨsâ yɨ́: bé e búʼó ndu e bíhwó. Bɨ́ɛ ntémé ó ngá nʉǎ sá Nzyɛ̌m á kɛʼ bé yɨ́, jala e nkɔb líʼe nyɔ́ɔ́.

Galásia 3:29

Yé bé bɨ̌n bé lɨ́ egúmo e Krîst nó, lɛ́ɛ́, bɨ̌n ntémé bé ó bwá bé ónta mé Abraham. Bɨ̌n ntémé bé ó bʉr o ngá bi ménkɔb ɨ́ mbɨambɨa bisá Nzyɛ̌m á kɛʼ Abraham bí bá.

Rôm 11:29

Ebě, jɔ̌ʼ Nzyɛ̌m mû sí tíʼe ɨ́ lémé wé ó, nyě jébé ó mʉr swîh, nkʉ̂ mʉr kɛl, le edwe nyé mindwéá yɨ́, nye ácéne mítíʼá mí ésôʼ myaá píe tɨ̂.

Ebrœ̂ 11:7

Ɨ́ lɔ̌b búʼó, Nóe á si jóʼo Nzyɛ̌m jɔʼ nyé á cɨ̂l nye ɨ́ lɔ̌b sá yé á be ó, yé ósyɛ́ɛ yɨ́. Nye dína apǎ bee yé e dîh, nye nzě gbâ lwǐb mé Nzyɛ̌m yaá ɨ́ dúu, ntɔ̂ʼ kpaʼ byɛ̂l, dû mpʉ̌ Nzyɛ̌m á tɨ́e ó, nye sâʼ yɨ́. Nye nzě nî tɨ̂, bé e mbɛ̌r bʉ̂r wé, bɨ́bɛ̂h ntɔ̂ʼ tíʼe. Ɨ́ lɔ̌b búʼó yé ó nyé á lɛ̂ʼle ó, syɛ́ɛla bʉ́ʉ́ bʉ̂r, bé á sâ yɨ́, yé á be ɨ́ bébe yɨ́. Bɨ́ɛ bé á bé adyɛ̂ʼwo e Nzyɛ̌m. Nye á bi nkam ó, tâŋ nkɔb nyé, ɨ́ lɔ̌b búʼó yé.

Rôm 8:17

Yé bé mɨná gá mû ó bwân mé Nzyɛ̌m nó, go ó, mɨná gá ntémé bé ó bʉr o ngá bi ménkɔb kwá mé Nzyɛ̌m bá. Yé óbe ɨ́ páʼ gá wɨ́ná ó, jwɨʼ gwár e gwár e mpʉ̌ Krîst, mɨ́ɔɔ́ gá wɨ́ná, ngá bi mé ménkɔb yɨ́. Mɨ́ná gá le onɔ́ɔ́, bé ósia e mitúú mímpwár, lɨ́ esú ó, mɨná bíʼee gá kûm mpwár nó, mɨná bé ónʉa gá membɨa maá, jala e nkɔb líʼe gá nyɨ́ná.

Jacques 2:5

Bɨ́ɔɔ́ bâm! Okɛ́l bâm! Bʉr mé dí ekpɛl bá! Jóʼláá gâ: Nzyɛ̌m á si twâr baántéʼenteʼe o bʉ̂r ó sí yɨ̂ʼ lɨ́ esú ó, nye gbâʼ bé buobuo búʼó ɨ́ miléme. Nzyɛ̌m á si kɛʼ bʉr o dí ekpɛl nyé bá ó, nye ódwe bé mimbɨambɨa bísâ ɨ́ Mpóʼo nyé. Ntʉ báántéʼenteʼe o bʉ̂r ó sí yɨ̂ʼ ó ngá lîʼ e bisá nyé á kɛʼ bí ɛ́?

Éfɛsɔs 1:11

Mɨná bɨ́ pûhla gá e Yésʉs-Krîst ɨ́ twárá Nzyɛ̌m á twâr mɨná gá yɨ́. Nye á boo twâr mɨná gâ ó, kʉ́ e sí dína apǎ bě kuhá. Yé á be ó mpʉ nyé á boo jwɨʼ yɨ́, nyɨɛ mʉr dí egbâ nkûl ɨ́ sá yɨ́yɛ̂h, le esâ ó, bijwɨʼ le mitíʼá mí lémé wé, byé lwɨ́ŋlɨɨ nyá.