Ebrœ̂ 4:14 - Kálar Nzyɛ̌m : Ejwán é Sáá

¹⁴ Mɨná gá bé e ánɨ̂nɨ̂n njwɨ́ɨ opara: Yésʉs, Mwân mé Nzyɛ̌m. Nye á si ntaa jʉ́o, le ejwoo le baántɛ́n, tó di ɨ́ jʉ́o kʉ́. Nó, mɨná tôʼ gá dóló le ekǎm búʼó gá yɨ́ná.

Kálara Zyɛ̌m Edwán é mpʉ̌n

¹⁴ Bɨna ga mu ó e njwɨɨ opara ndɨ lʉ sa yiyɛh ɛ: Yesʉs, Mwan mo Zyɛm. É mpʉ yé ndɨ no e, bɨna toʼ ga dolo lé emɛʼle buʼo ga yina. Nye a be ó si ntaa jobo e l'ejyoo le ebantɛn, lé ebula to di é jobo kʉ.

Ebrœ̂ 4:14 ပူးပေါင်းရင်းမြစ်များ

Ebrœ̂ 9:24

Ebě, Krîst á bé anî mbɛ̌r kán bʉ̂r, bé á sumo Nzyɛ̌m wɨ́, waá dí enwɨɨla e mpǎŋ mpáh Nzyɛ̌m wɨ́. Mbɛ̌r waá, wé ó njɨ mveʼle, lɨ́ enwɨɨla e mpáh mpâ. Nye á nî ó, ɨ́ jʉ́o kʉ́. Nye mû ó lɨ́ etyɛ̂b ɨ́ jʉ́o kʉ́ ɨ́ míh mé Nzyɛ̌m lɨ́ elwib ɨ́ nkɔ̌m gá nyɨ́ná.

Ebrœ̂ 12:2

Míh gá mɨ́ná, mé dwɛ́ʼɛɛ sɔ̂ʼ njɨ Yésʉs, ebě, nye ó b'á kar nzɨ̌ búʼó. Nye ntémé ó b'á swâhle nye. Nye á kam ó, nye síaa e mitúú, nye tyélɔɔ ɨ́ lɨ́ kʉ́, jʉ́ŋɔɔ. Nye á si pyêh sôn mʉ̂r dí ebɛb ɨ́ mbi éswie laá nyɨ́. Nye á kam ó, nye dwêʼ nó ó, nye nkʉ̂ bi bísʉhʉʉ̌ Nzyɛ̌m á boo komo nye bí. Ɨ́ báánâ, nye mû ó ɨ́ mbó éjʉ́m mé Nzyɛ̌m Sɔ́ŋ ɨ́ mecwɨ́ɨ́ mé jwɨ́ɨ.

Ebrœ̂ 10:23

Mɨná bôʼlaa gá sá mɨ́ná dí ekam gá yɨ́. Milɔ̌b myaá ó dí egbâ mɨ́ná gá mpûʼla ɨ́ miléme. Mʉ̌r sá apɨ́ŋla, ebě, mʉr á dwe mɨná gá menkɛ̌ʼ ɨ́ buo buo nyá, nye ó mʉr ebúʼlɔɔ.

Ebrœ̂ 9:12

Jɔ̌ʼ Yésʉs á nî mpáh Nzyɛ̌m nyaá yɨ́, nye á bé anʉa sʉ́á métié mé óntamakǎ, nkʉ̂ maá bíntœœ. Metié nyé á nʉa, nî e mé má, mé á be ó maá mé nye mʉr tɨ̂. Nye nzě tó nî ɨ́ ntɔ́ɔ á be ɨ́ buú buǒ tí nyɨ́. Nye á nî ó, jɔʼ gwár lɨ́ esú é bíjɔʼ bíbyɛ̂h, ó nye nkʉ̂ táa góo, le edwih mɨ́ná gá ɨ́ mpila ébébe, ó mɨná díʼee gá onzyɛh o bʉ̂r, njʉ̌m dǐ e njʉ̌m dǐ.

Ebrœ̂ 6:20

Tɨ̂ʼ ó Yésʉs á nî yɨ́. Nye á nî ó, esôʼ e mɨná gâ. Nye mû ó njwɨ́ɨ opara gá wɨ́ná, mpʉ̌ Mɛlkisédɛk á be yɨ́. Nye ódi ntémé ó njɨ nó, njʉ̌m dǐ e njʉ̌m dǐ.

Éfɛsɔs 4:10

Mʉr á sulo ɨ́ sí yɨ̂ʼ nyá, nye ntémé ó b'á bére, laǎ jʉ́o, le ejwoo le baántɛ́n. Táare ɨ́ tyé yaá, nzě kumo ɨ́ gúmó yɨ́yɛ̂h, nye ó ngá jwɨ́ɨ̌ sá yɨ́yɛ̂h.)

Rôm 8:34

Nzé óláa mɨ́ná gá bibaa bí ébébe, le edwe mɨ́ná gá bintɨ́ʼá? Abe e mʉr! Yésʉs-Krîst á si dwe, búra e mɨná gâ. Yé abě njɨ nó. Nye á si pah, duho lɨ́ odwe, tó di ɨ́ mecwɨ́ɨ́, ɨ́ mbó éjʉ́m mé Nzyɛ̌m Sɔ́ŋ. Nye ó mʉr nkɔ̌m, waá dí ekamle e mɨná gá nyá.

Ebrœ̂ 3:14

Sá dí tɨ̂ʼ yɨ́, yé ó: mɨ́ná ódi gá ɨ́ bidǐ gá bíná, apʉʼa tɨ̂, tó pyâl ɨ́ mesíé nó, go ó, mɨná gá be ó bʉr ó njoo mé Krîst ó tɨ̂ʼ yɨ́.

Ebrœ̂ 2:17

Sá tɨ̂ʼ ó yé á jala ó, nye díʼee kwahaá mpʉ bɨ́ɔɔ́ bé, ɨ́ mipáʼ mímyɛ̂h yɨ́. Nye á nwɨɨla e mɨná gá ó, lɨ́ esú ó, nye nkʉ̂ cwɨ́a e mɨná gá, le edi njwɨ́ɨ opara mɨ́ná ókʉ́ bûʼla gá nyá. Nye ó jálá le eséa ɨ́ páʼ bísâ bi dí edwɛ̂ʼ Nzyɛ̌m bí. Nye ó mʉr á dwe, búra le misyóm mí bʉ̂r bé, le eleʼě Nzyɛ̌m ɨ́ nkpaa nyé nyá.

Ebrœ̂ 10:12

Tó kœb ó, Krîst nyɨɛ á si dwe wé ndwéá ngwár ɨ́ kpɔ́ŋ lɨ́ edwih mísyóm lɨ́ esú é bíjɔʼ bíbyɛ̂h. Nye nzě tó di sí ɨ́ mbó éjʉ́m mé Nzyɛ̌m.

Ebrœ̂ 8:1

Lʉ́ ékǎn e bísá bɨ́h dí elɛ́ɛ bɨ́n bí, wé ó wɨ̂: mɨná gá bé ó e mbi njwɨ́ɨ opara waá. Nye ó ndîndǐl ɨ́ jʉ́o kʉ́ ɨ́ mbó éjʉ́m mé Nzyɛ̌m Sɔ́ŋ nkul nyɨnyɛ̂h.

Mɨlʉmlʉ 1:11

Bʉr baá ntɔ̂ʼ lɛ́ɛ e bé ó: «Bʉr ó Galilê, bɨ̌n di náǎ lɨ́ edwɛ̂ʼ jʉ́o kʉ́ ɨ́ di di di ɨ́ yé? Yésʉs, mʉr pɛʼɔɔ ɨ́ sɔ́má yɨ́n nyá, óbáʼǎ nze ó, mbi ngwár e ngwár bɨ̂n bee nyé lɨ́ ebɨ́nɔɔ ɨ́ jʉ́o kʉ́ nɨ̌.»

Ebrœ̂ 1:8

Sâ gwár, nye á lɛ́ɛ, dumo e Mwân wé nyɨɛ ó: Nzyɛ̌m ɛ́! Go ó dí edi ɨ́ mecwɨ́ɨ́ mé jwɨ́ɨ́ yô njʉ̌m dǐ e njʉ̌m dǐ. Go ó dí ejwɨ́ɨ lɨ́ otîtyěl.

Mɨlʉmlʉ 3:21

Báánâ, nye ɨ́ jala le edi ɨ́ jʉ́o kʉ́, ɨ́ di di di, tó pyâl ɨ́ jɔ̌ʼ Nzyɛ̌m óbáʼǎ tyêl bísá bíbyɛ̂h ɨ́ bityé byɔ́ɔ́ mpʉ nyé á boo kɛʼ, duho myâ yɨ́. Nye á kɛʼ nó ó, cɨɨ e nzɨ̌ ogwíha o mílɔ̌b bé, baá dí egúmo e né bá.

Lʉkas 24:51

Nye dína lɨ́ esʉ bé metyɛʼ me mpóm nɛ́ɛ: nye ntɔ̂ʼ duhǒ gúmó bé á tyɛ̂b yɨ́, nzě bɨ́nɔɔ ɨ́ jʉ́o kʉ́.

Markus 16:19

[Jɔ̌ʼ Tî Yésʉs á sil elwib e bé nó yɨ́, Nzyɛ̌m nzě nʉa nyé, tô e né ɨ́ jʉ́o kʉ́, tó dil nyé ɨ́ mbó éjʉ́m wé.

Ebrœ̂ 2:1

Sɨ́ǎ yaá ó dí ó, milɛ́ʼlá bé á nyɛɛ dwe mɨná gá mí, mɨná díʼee gá ɨ́ puuu lɨ́ egwá jôʼlo myé, lɨ́ esú ó, mɨná sá akǎ tyenɔɔ gá díbé tíe, jɨ́bla.

Markus 1:1

Metááré mé Mbɨambɨa Lɔ́ɔ́ mé Yésʉs-Krîst, [Mwân mé Nzyɛ̌m], mé ó mâ.

Mataos 4:3

Mbôblobʉr ntɔ̂ʼ pyâl gúmó Yésʉs á be yɨ́. Nye e né ó: «Yé bé go ó Mwân mé Nzyɛ̌m nó, lɛ́yɨ́ɨ́ mékóʼ mâʼ ó, mé líŋaa mede.»

2 Korɛnt 9:13

Syɛ́ɛ́ bɨ́n ngá séa yɨ́, yé ólɛ̂ʼle bʉ̂r ó, bɨ̌n bɨ́ sul bɨ́n bʉr o tɨ̂ʼ sí, sâ méjóʼo, táare ɨ́ jɔʼ bɨ́n á kam Mbɨambɨa Lɔ́ɔ́ mé Krîst yɨ́, kumo mûh. Bʉr, bé ódwě Nzyɛ̌m kûm tɨ̂. Bé ódwe nyé kûm ntémé ó, ɨ́ jɔʼ bé óbeě mpʉ bɨ́n ngá súʼo bé e mingúlá mín, kala e bʉr bɨ́bɛ̂h yɨ́.

2 Korɛnt 12:2

Me lɨ́ egʉ́a nyʉ́ʉ́ mʉ̂r ɨ́ Krîst, mûh, mimbû kám e minâ. Mʉr waá á si nʉŋɔɔ, bɨ́nɔɔ kʉ́, laǎ jʉ́o le ejwoo, tó pyâl tʉ́ŋlʉ̌ baántɛ́n dí jʉ́o lɛ̂l yɨ́. (Yé bé nye á tô ó, ti e nyʉ̂l bipúno nó, mé agʉ́a. Yé bé nye á bé atô e nyʉ̂l bipúno ɨ́ jɔʼ yaá nó, me ntémé agʉ́a. Nzyɛ̌m nye omér ó dí ejaá gʉ́a.)

Ebrœ̂ 3:1

Bɨ́ɔɔ́ bɨ́h le okɛ́l bɨ́h dí egúmo e Nzyɛ̌m bá, mɨná gá ó bé á bi gá nkɔb mpwár: njɨ́blɨ́ Nzyɛ̌m á ntɨh mɨná gá, duho ɨ́ jʉ́o kʉ́ wɨ́. Jwɛ́ʼɛ́ɛ́ gá sɔ̂ʼ njɨ Yésʉs mpʉ nyé dí yɨ́: nye ó mʉr milʉ́mlʉ́ mé Nzyɛ̌m, báʼǎ be ntémé njwɨ́ɨ opara gá wɨ́ná mpʉ mɨ́ná dí ekam gá yɨ́.

Ebrœ̂ 6:6

Ɨ́ jɔ̌ʼ mbi bʉ̂r baá ká dímlě búʼó yɔ́ɔ́ yɨ́, yé abe e yʉ́ʉ́ sá swîh dí e nkul ekǎ sâ ó, mʉr báʼa túmǒ koo le mebébe mé, le edwirǎ léme. Ebě, bé bʉr o tɨ̂, bɨ́ bomlo Mwân mé Nzyɛ̌m e binzâŋ, bɨ́nɔɔ nyé ɨ́ kolôs kʉ́ ɨ́ jɔʼ mbá, lɨ́ esâ ó, nye búu pyaŋɔɔ ɨ́ kpɛŋlɛm.

Ebrœ̂ 7:3

Yé abe e mʉr ngwár dí egʉ́a sɔ́ŋ, nkʉ̂ nyɔ̌ŋ mé Mɛlkisédɛk, nkʉ̂ ntán yé. Mʉr, nyé agʉ́ǎ mpʉ̌ Mɛlkisédɛk á byɛ̂l yɨ́, agʉ́a ntémé nkʉ̂ nye á si dwe. Nyě nwɨɨlá ó e Mwân mé Nzyɛ̌m. Nyě dǐ ɨ́ dǐ pára yé ó, njʉ̌m dǐ e njʉ̌m dǐ.

Ebrœ̂ 10:29

Bʉr pǎ nyɛɛ́ jʉ́ŋɔɔ ɨ́ lɔ̌b ébɨ̌h bé sá métié mé Moyɨ̂z lɨ́, á dwɛʼra e mʉr dí etyéele Mwân mé Nzyɛ̌m sí mebo mé nyá! Nye ókʉ́ jala e bibɨ́bla bíntɨ́ʼá, laa náǎ, ɨ́ lɔ̌b jwɨʼ yé yɨ̂: metié Krîst á pyêl, lɨ́ esâ édwán é sáá e mé má, mé mû nye ó tʉ̂toʼó, nyɨɛ yɨ́ɛ sí pǎ pubɔɔ e tɨ̂! Bɨ̌n jwɨʼ nyá ɨ́ lɔ̌b mʉ̂r á pya Sísǐm mé Nzyɛ̌m wé á nyɛɛ sâ nye mpam wɨ́ nyá? Mʉr tɨ̂ʼ ókǎ sáŋɔɔ nyá ɛ́?

1 Pyɛr 3:22

Yésʉs waá á si bɨ́nɔɔ ɨ́ jʉ́o kʉ́. Nye mû ó lɨ́ mbó éjʉ́m mé Nzyɛ̌m Sɔ́ŋ, gúmó nyé dí ejwɨ́ɨ bééngeles, le misísǐm mi dí e jwɨ́ɨ le myaá mi dí e nkul mí yɨ́. Byé á si gbáŋɔɔ ɨ́ jwɨ́ɨ́ yé.