Ebrœ̂ 13:20 - Kálar Nzyɛ̌m : Ejwán é Sáá

²⁰ Me lɨ́ ejɨʼla e Nzyɛ̌m, mʉr dí egbâ mɨ́ná gá mepyɛbla ɨ́ miléme, waá á pɛh «Mbɔʼlʉ bintemě nɨ́nɨ́ɨ́», Tî gá wɨ́ná Yésʉs nyá. Ɨ́ tɨ̂ʼ, Nzyɛ̌m á sâ ó, saá ngá dǐ njʉ̌m dǐ e njʉ̌m dǐ nyɨ́, ɨ́ nzɨ̌ metié mé.

Kálara Zyɛ̌m Edwán é mpʉ̌n

²⁰ Neme Zyɛm Sɔŋ ndɨ egba motala paʼra ga wina, nye ó b'a pɛ̀h Tî ga wina ndwe e Kobla bɨntœme nɨnɨ, Yesʉs é foo, pɛ̀ha foo we lé elɛʼle ó, nyi mɛʼle motié nye a sʉ é l'efu ó, Sɔŋ we nkʉʼ de mpʉn njʉmdia e bɨna ga ɛ.

Ebrœ̂ 13:20 ပူးပေါင်းရင်းမြစ်များ

Yʉanes 10:11

«Me ó mbɔʼlʉ binteme mpâ. Mbɔʼlʉ binteme mpâ, nye lɨ́ edwě twiʼ yé ɨ́ dilá bínteme byé.

Ebrœ̂ 10:22

nó mɨ́ná jálá le esîhle gá bǎʼ e Nzyɛ̌m, abe e mesónó ɨ́ miléme, e milémé lwɨ́ŋlá e búʼó yɨ́. Milémé gá míná, myé mû ó mipubá. Menyʉ́l gá mɨ́ná mɨ́ɛ, mé mé ó minjwɨá e medíbé me dí ɨ́ ntyɛ́h ntyɛ́h má.

Rôm 15:33

Nzyɛ̌m dí egbâ mɨ́ná gá mepyɛbla ɨ́ miléme nyá, nye díʼee e bɨ̌n óbɛ̂h. Amɛn.

2 Tesalonika 3:16

Nó ó, Tî gá wɨ́ná, mʉr dí egbâ mɨ́ná gá mepyɛbla ɨ́ miléme nyá, nye gbâʼ bɨ̌n mepyɛbla ɨ́ miléme ɨ́ bijɔʼ bíbyɛ̂h, le menzɨ̌ mɨ́mɛ̂h. Tî gá wɨ́ná díʼee e bɨ̌n óbɛ̂h.

Yʉanes 10:14

Mɛm, me ó mbɔʼlʉ binteme mpâ. Mpʉ Sɔ́ŋ wǎm dí egʉ́a mé yɨ́, me lɨ́ egʉ́a nyê. Nó ntémé ó mé dí egʉ́a bínteme byâm, binteme byâm ntémé gʉ́a mé yɨ́. Mě dwé twiʼ yâm ó, lɨ́ esú é bínteme byâm.

Mɨlʉmlʉ 2:24

Nzyɛ̌m nzě pɛh nyê, pɛʼ nyé ɨ́ mekpaa mé éswie, ebě, eswie, lé á bé agwá mɛ̂r nyé kɔ́m kɔm.

1 Pyɛr 2:25

Ebě, bɨ̌n bé á be ɨ́ melú mé épíhe ó, mpʉ bínteme byé á dîm bí. Nó ɨ́ báánâ, bɨ̌n mû ó sí swîʼ, tó kœb mbɔ̂ʼlʉ wɨ́n. Nye ntémé ó pá di mbɔ̂ʼlʉ misísǐm mín.

Mɨlʉmlʉ 3:15

Bɨ̌n bé á si bana jʉ̂ Etín é Twiʼ. Damá jóʼǒ mpʉ yé á syɛ́ɛlɨ nó yɨ́, Nzyɛ̌m nyɨɛ, nyɨ́ bánǎ pɛh nyê, dwih nyé lɨ́ odwe. Bɨ̌h ó dí oboʼlo ó lɔ̌b waá.

1 Pyɛr 1:21

Krîst ó b'á sâ ó, bɨ̌n dyɛ̂ʼwaa e Nzyɛ̌m, mʉr á pɛh nye, dwih nyé lɨ́ odwe, dwe nyé kûm ntémé nyá. Sá tɨ̂ʼ ó búʼó yɨ́n le mpûʼla nyɨ́n dí njɨ ɨ́ Nzyɛ̌m yɨ́.

1 Tesalonika 1:10

Bé lɨ́lɛ́ɛ́ ntémé ó, bɨ̌n mû ó lɨ́ ebóno Mwân mé Nzyɛ̌m ngá duho ɨ́ jʉ́o kʉ́ nyá. Nye ó waá Nzyɛ̌m á pɛh, dwih lɨ́ odwe nyá. Yésʉs waá ó b'á tíʼ mɨná gâ, lɨ́ esâ ó Nzyɛ̌m sá alɛ̂ʼle mɨ́ná gá nkpaa nyé ɨ́ móhó nyé ótíʼe mílɔ̌b wɨ́. Móhó waá, wé mû ó kúno epyâl.

Kolosi 2:12

Ɨ́ ndubó bɨ́n á duŋɔɔ wɨ́, bɨ̌n bé á si debe, bɨ̌n e Krîst ɨ́ jɔʼ gwár. Bɨ̌n e né ntémé ó b'á pah, ebe bɨ́n dí ebúʼla nkûl nɨ́nɨ́ɨ́ mé Nzyɛ̌m. Nkǔl nɨ́nɨ́ɨ́ nyaá ó b'á pɛh nye.

1 Pyɛr 5:4

Ɨ́ jɔʼ «Mbɔ̂ʼlʉ bintemě nɨ́nɨ́ɨ́» ngá báʼǎ nze yɨ́, nye ótoŋlo bɨ́n ɨ́ syɛ́ɛ́ yɨ́n yaá, lɨ́ ebôr bɨ́n bikáráá bi dí ɨ́ buo kûm bí. Byé ódidi ɨ́ ntyɛ̌n ntɨ̂ ntyɛ̌n ó, mentyɛnwa me tɨ̂ʼ adímedime, tó kumo ɨ́ twǐʼ njʉ̌m dǐ.

Ebrœ̂ 10:29

Bʉr pǎ nyɛɛ́ jʉ́ŋɔɔ ɨ́ lɔ̌b ébɨ̌h bé sá métié mé Moyɨ̂z lɨ́, á dwɛʼra e mʉr dí etyéele Mwân mé Nzyɛ̌m sí mebo mé nyá! Nye ókʉ́ jala e bibɨ́bla bíntɨ́ʼá, laa náǎ, ɨ́ lɔ̌b jwɨʼ yé yɨ̂: metié Krîst á pyêl, lɨ́ esâ édwán é sáá e mé má, mé mû nye ó tʉ̂toʼó, nyɨɛ yɨ́ɛ sí pǎ pubɔɔ e tɨ̂! Bɨ̌n jwɨʼ nyá ɨ́ lɔ̌b mʉ̂r á pya Sísǐm mé Nzyɛ̌m wé á nyɛɛ sâ nye mpam wɨ́ nyá? Mʉr tɨ̂ʼ ókǎ sáŋɔɔ nyá ɛ́?

Ebrœ̂ 9:20

Nye á lɛ́ɛ e bé ó: «Mâʼ, mé ó metié mû lɨ́ eswɨɨ, sâ sáá páʼ gá nyɨ́ná le Nzyɛ̌m má.»

1 Tesalonika 5:23

Nzyɛ̌m waá dí esâ ó, bʉr tíʼaa ɨ́ mepyɛbla nyá, nye mʉr tɨ̂, nye púbaa bɨ̌n ɨ́ mipáʼ mímyɛ̂h. Nye bâʼlaa misísǐm mín, milémé mín, ti e menyʉ́l mɨ́n. Nye bâʼlaa bɨ̌n mbɨ̂mbɨá nó, mɨná díʼee gá abe e mebě, tó pyâl ɨ́ jɔʼ Tî gá wɨ́ná Yésʉs-Krîst óbáʼǎ nze yɨ́.

Filipi 4:9

Gwá baʼle gá milɔ̌b mímyɛ̂h bɨ́n á jɨ̂ʼ ɨ́ me le ekam mí. Lɔ́ɔ́ wɨ́wɛ̂h bɨ́n á jóʼo me lɨ́ elɛ́ɛ, le sá yɨ́yɛ̂h bɨ́n á bee me lɨ́ esâ yɨ́, baʼlaa gá byê. Nzyɛ̌m, mʉr dí egbâ mɨ́ná gá mepyɛbla ɨ́ miléme nyá, ódi ɨ́ bɨ̌n.

Rôm 8:11

Nó ntémé, Sísǐm mé Nzyɛ̌m, mʉr á pɛh Yésʉs, dwih nyé lɨ́ odwe nyá, dí ɨ́ bɨ̌n nó, go ó, Nzyɛ̌m ópɛh ményʉ́l mɨ́n, maá me dí elaǎ mpʉ̌ ngúl mpáá má. Nye ódwe mé twiʼ ó e nzɨ̌ Sísǐm wé dí ɨ́ menyʉ́l mɨ́n maá wɨ́.

Mɨlʉmlʉ 5:30

Nzyɛ̌m bimpám gá bíná á si pɛh Yésʉs, dwih nyé lɨ́ odwe. Yésʉs waá ó bɨ́n á jʉ̂ lɨ́ ebomlo nyé e binzâŋ, bɨ́nɔɔ nyé ɨ́ kolôs kʉ́ nyá.

Mataos 26:28

Ebě, metié mâm ó mâ, metié mû lɨ́ eswɨɨ lɨ́ esú ó, Nzyɛ̌m tyélɨɨ saá páʼ nyɔ́ɔ́ le bʉr ɨ́ buo buo má. Nyě tyél nyé ó, nye nkʉ̂ pɛʼ bé bibaa bí ébébe byɔ́ɔ́.

Éfɛsɔs 1:20

Nkul nyé, nye lɨ́ eséa ɨ́ mɨná gâ mpʉ nyé á séa ntémé ɨ́ Krîst ɨ́ jɔʼ Sɔ́ŋ á pɛh nye lɨ́ odwe, dil nyé ɨ́ jʉ́o kʉ́ ɨ́ mbó éjʉ́m wé yɨ́.

Galásia 1:1

Yé ó mɛm Pɔ̂l, mʉr milʉ́mlʉ́, ó dí ecɛma bɨ́n mekaná mâ. Mé abe ɨ́ milʉ́mlʉ́ mé nyʉ́ʉ́ mʉ̂r. Twárá mé á twárɔɔ wɨ́, wé á bé acɨɨ e nzɨ̌ mʉr. Yésʉs-Krîst, bé e Nzyɛ̌m Sɔ́ŋ, mʉr á pɛh nye, dwih nyé lɨ́ odwe nyá, bé ó b'á lómo me.

2 Korɛnt 13:11

Nó ó, bɨ́ɔɔ́ bâm le okɛ́l bâm ɛ̌! Mě lɛ́ɛ́ ó, diʼee gá mbɨ̂mbɨá. Tiʼaa gá lɨ́ otîtyěl. Jóʼáá gá melɨ́ mâm. Tʉtoŋlaa gá sâ gwár. Tiʼaa gá ɨ́ mepyɛbla. Nó ó Nzyɛ̌m dí egbâ mɨ́ná gá mpam ti e mepyɛbla byé nyá, ódi e bɨ̌n yɨ́.

2 Korɛnt 4:14

Ebě, bɨ̌h bé lɨ́ ekʉ́ gʉ́a ó, waá á pɛh Tî Yésʉs, dwih nyé lɨ́ odwe nyá, nye ntémé ópɛh mɨ́ná gá le onɔ́ɔ́. Nyé otyêl mɨ́ná gá ɨ́ míh mé, ɨ́ gúmó Yésʉs dí yɨ́.

1 Korɛnt 15:15

Yé bé yé ó nó wá, yé nyɨ́n ntémé ó, bɨ̌h bé lɨ́ elɛ́ɛ bíbɛr, dumo e Nzyɛ̌m, ebě, bɨ̌h bʉboʼló ɨ́ páʼ wé ó, nye ó b'á pɛh Krîst. Yé bé odwe, bé ákóʼó pɛhɔɔ nó, lɛ́ɛ́, Nzyɛ̌m á bé apɛh nyê.

1 Korɛnt 14:33

Ebě, Nzyɛ̌m á bé ajébe mʉ̂r ó, nye tíʼaa tʉ́ŋlʉ̌ oleŋéleŋé. Nye á jébe nye ó, nye tíʼaa ɨ́ mepyɛbla.

1 Korɛnt 6:14

Nzyɛ̌m, mʉr á pɛh Tî Yésʉs, dwih nyé lɨ́ odwe nyá, ópɛh ntémé mɨná gâ, dwih lɨ́ odwe, e nkul nyé.

Mɨlʉmlʉ 17:31

Nó nyé á tyêl dʉ́ó nyé ngá tíʼe bʉ̂r ó sí yɨ̂ʼ bɨ́bɛ̂h milɔ̌b myɔ́ɔ́ lɨ́ otîtyěl lɨ́. Nye ntémé, nyɨ́ pɛ̂h mʉ̂r ngá tíʼe mílɔ̌b myɔ́ɔ́ myaá nyá. Nyɨ́ lɛ̂ʼle bʉ̂r bɨ́bɛ̂h jwɨʼ ɨ́ syɛ́ɛla yɨ̂: epɛh nyé, dwih nyé lɨ́ odwe!»

Mɨlʉmlʉ 13:30

Nzyɛ̌m nyɨɛ nzě dwih nyé lɨ́ odwe.

Mɨlʉmlʉ 2:32

Yésʉs waá ó Nzyɛ̌m á pɛh, dwih lɨ́ odwe nyá. Lɔ̌b wé ó bɨ́h dí eboʼlo bɨ́n wɨ̂.

Lʉkas 22:20

Jwɨʼ gwár yaá, ɨ́ jɔʼ bé á sil ede yɨ́, nye ntɔ̂ʼ báʼǎ dwe bé bélé ményoʼ. Nye ó: «Menyoʼ mâ, mé ó edwán é sáá Nzyɛ̌m mû lɨ́ etyêl páʼ nyɔ́ɔ́ e bʉr lɨ́. Nyě tyél nyé ó, ɨ́ nzɨ̌ metié mâm mû lɨ́ eswɨɨ lɨ́ esú lɨ́n má.

Markus 14:24

Nye e bé ó: «Metié mâm ó mâ: metié lɨ́ eswɨɨ lɨ́ esú ó, Nzyɛ̌m tyélɨɨ saá páʼ nyɔ́ɔ́ e bʉr ɨ́ buo buo má.

Rôm 16:20

Nzyɛ̌m, mʉr dí egbâ bʉ̂r mepyɛbla ɨ́ miléme nyá, nye ó waá mû kúno etyéelě Sátan sí ɨ́ mebo mɨ́n nyá. Metyɛʼ me mpóm mé Tî gá wɨ́ná Yésʉs, mé díʼee e bɨ̌n.

Rôm 1:4

Ɨ́ nkǒ páʼ sísǐm wé dí ti wɨ́, nye njwɨrá ó, «Mwân mé Nzyɛ̌m», Yésʉs-Krîst, Tî gá wɨ́ná. Nzyɛ̌m á lɛ̂ʼle mɨná gá ó, nyě e njwɨrá waá ó e nkul ɨ́ buo buo ɨ́ lɔ̌b pahá sóo wé.

Mɨlʉmlʉ 4:10

bɨ̌n óbɛ̂h le bʉr o b'Ɨ́zraɛ̂l bɨ́bɛ̂h, gʉ́ŋáá gá bé ó, mʉr bɨ́n mû lɨ́ ebee lɨ́ etyɛ̂b tîtyěl nyâ, nye mû mbɨ̂mbɨá ó ɨ́ lɔ̌b nkûl díé mé Yésʉs-Krîst, mʉr Nazarɛ̂t. Yésʉs waá ó bɨ́n á jʉ̂ lɨ́ ebomlo nyé e binzâŋ, bɨ́nɔɔ nyé ɨ́ kolôs kʉ́ nyá. Tó kœb ó, Nzyɛ̌m á si pɛh nye lɨ́ odwe.

Rôm 10:7

Bé á cɛma ntémé ó: «Sá akǎ lɛ́ɛ ntémé ɨ́ lémé gô tʉ́ŋlʉ̌ ó: “Nzé ósulo wâʼ ɨ́ sí yɨ̂, tó pyâl ɨ́ kwár odwe ě?” (Nó yé lɛ́ɛ́ ó, mʉ̌r sá apahle ó, yé e nyʉ́ʉ́ mʉ̂r ótó kœ̌b Krîst ɨ́ gúmó ódwe dí yɨ́, ntɔ̂ʼ búla e né gʉ̂ʼ nyá.)