2 Timotɛ 4:8 - Kálar Nzyɛ̌m : Ejwán é Sáá

⁸ Yé jaá kǎ lîʼ mé ó, njɨ ebǐ káráá dí komá lɨ́ esú lâm yɨ́. Káráá yaá ó dí elɛ̂ʼle ó, mɨ́ bi nkâm ɨ́ míh mé Nzyɛ̌m. Tî Yésʉs, mʉr dí etíʼe mílɔ̌b lɨ́ otîtyěl nyá, ódwe mé yǎ lɨ́ elú lé épíhe. Nye ádwe yɨ́ɛ njɨ me e me. Káráá yaá, yé ódweŋɔɔ ntémé ó, bʉr bɨ́bɛ̂h o dí ekpɛl ébee nyé lɨ́ ebáʼǎ nze bá.

Kálara Zyɛ̌m Edwán é mpʉ̌n

⁸ Yi kʉ ka liʼ me ó njɨ ebœrɔ epʉʼlʉ é lʉ, laa ndɨ koma é l'efu lam ɨ. Epʉʼlʉ laa, lé ó ngo lɛʼle ó, mɨ bi mokebe é mih mo Zyɛm. Da Yesʉs óbœr me la ó, é dobo nye óbula ze e. Nye ó tiʼà mɨlɔb ndɨ etiʼe é l'ocɨcyel ɨ. Nye aŋa dwe yɛɛ njɨ me e me. Mopʉʼlʉ maa, mé óbœrɔ nteme ó, bʉr bɨbɛh lé esoho dobo Yesʉs-Krɨst óbula ze e.

2 Timotɛ 4:8 ပူးပေါင်းရင်းမြစ်များ

Jacques 1:12

Metyɛʼ me mpóm, mé díʼee e mʉr dí edûhwo mébʉ́blá nyá. Ebe mʉ̂r tɨ̂ʼ síl ébóblɔɔ nó, nye óbi myɛ́na me tɨ̂: twǐʼ Tî Yésʉs á kɛʼ bʉr o dí ekpɛl nyé bá yɨ́.

Mɨngwiha 2:10

Ayɨ́ jóʼo gá bʉ́á ɨ́ lɔ̌b bíntɨ́ʼá bé ngá dwe bɨ́n bí. Paá bee gâ: Sɔ́ŋ meleme ómɛ̂r bɨ́n bʉ́ʉ́ bʉ̂r, gbâ bé ɨ́ mbʉʼ, lɨ́ edǐ bóblo bɨ́n. Bɨ̌n bé ósia e mitúú, tó kumo ɨ́ melû kám. Gwá baʼle gá búʼó, tó kumo lɨ́ eswie. Sá tɨ̂ʼ ó mé ódwe bɨ́n twǐʼ njʉ̌m dǐ yɨ́. Bɨ̌n bé óbi myɛ́na maá, mpʉ̌ nkɔ́ɔ́ dí ebórɔɔ̌ káráá yɨ́.

1 Pyɛr 5:4

Ɨ́ jɔʼ «Mbɔ̂ʼlʉ bintemě nɨ́nɨ́ɨ́» ngá báʼǎ nze yɨ́, nye ótoŋlo bɨ́n ɨ́ syɛ́ɛ́ yɨ́n yaá, lɨ́ ebôr bɨ́n bikáráá bi dí ɨ́ buo kûm bí. Byé ódidi ɨ́ ntyɛ̌n ntɨ̂ ntyɛ̌n ó, mentyɛnwa me tɨ̂ʼ adímedime, tó kumo ɨ́ twǐʼ njʉ̌m dǐ.

1 Pyɛr 1:4

Nye á byâ mɨná gá jɔʼ mbá ntémé ó, lɨ́ esú lé édwe mɨ́ná gá mepwaʼ me dí komá ɨ́ jʉ́o kʉ́ má, jala e nkɔb líʼe gá nyɨ́ná. Sá dí komá lɨ́ esú gá lɨ́ná yɨ́, yé ábo, atô mébomo, abe e nkul edwɛ̂hla.

2 Timotɛ 1:12

Sɨ́ǎ yaá ó mé dí esia e mitúú yɨ́. Damá jóʼǒ mpʉ mé dí ebi mítúú mí tɨ̂ʼ yɨ́, mé ajóʼo bá sôn, ebe mé dí egʉ́a mʉ̂r mé á dyɛ̂ʼwo e né nyá. Mɨ́ bûʼla ntémé ó, nyě e nkul esâ ó, me bâʼlaa lɛ́ʼlá nyé á dwe me wɨ́. Nye óbaʼlě lɛ́ʼlá waá ó, tó pyâl ɨ́ móhó Yésʉs ngá báʼǎ nze wɨ́.

1 Korɛnt 9:25

Bʉr o dí etó sâ bísá bí nkûl bá, bé nyɛɛ́ dil ményʉ́l mɔ́ɔ́ ó, ɨ́ byúú bíti. Bé lɨ́ esâ nó lɨ́ esú ó, bé ntáŋaa, bǐ káráá dí elaǎ mpʉ̌ ngúl mpáá yɨ́. Nó ó, mɨná bɨɛ̌ sáá gá ó, mɨná bíʼee gá káráá ngá dǐ njʉ̌m dǐ e njʉ̌m dǐ yɨ́.

Kolosi 1:5

Búʼó le kpɛ̌l yɨ́n yaá duho ó, ɨ́ mpûʼla dí bɨ̌n ɨ́ miléme, ó bɨ̌n bé óbǐ sá dí bɨ̌n komá ɨ́ jʉ́o kʉ́ yɨ́. Mbɨambɨa Lɔ́ɔ dí le otyeetye wɨ́, wé ó b'á nyɛɛ lɛ̂ʼle bɨ̌n syɛ́ɛla yaá.

Mɨngwiha 1:7

Paá bee gâ: nye lɨ́ enze ɨ́ dwiné. Bʉr bɨ́bɛ̂h, bé óbee nyê, damá be ó baá bé á lúmo nye ekʉá bá. Bʉr o bíkúl bí sí yɨ̂ʼ bíbyɛ̂h, bé ójɨ médwê le ekâm ékúhó lé. Eee! Amɛn!

Títos 2:13

Mɨná bé ótíʼe nó ó, lɨ́ ebóno mʉ̂r dí egbâ mɨ́ná mpûʼla ɨ́ miléme, waá dí esʉ mɨ́ná metyɛʼ me mpóm nyá. Nye ó Nzyɛ̌m nɨ́nɨ́ɨ́: Tiʼbʉr gá wɨ́ná Yésʉs-Krîst, waá ngá báʼǎ lɛ̂ʼle nyé mʉr tɨ̂ʼ e kûm ɨ́ buo buo nyá.

Mɨngwiha 19:11

Nó ó, me á si bee jʉ́o mû mběʼ. Mpáŋá kablá, yé á si pyâl tɨ̂. Mʉr á kalwo ɨ́ yé kʉ́ nyá, bé lɨ́ ejébe nyé ó: «Waá Ebûʼlɔɔ.» Nye lɨ́ ejébɔɔ ntémé ó: «Mʉr Otyeetye.» Nyě títíʼé mílɔ̌b le elwímla dɔ̂m ó, lɨ́ otîtyěl.

2 Timotɛ 2:5

Bʉ̂r obá sá nzwámlá nó, mʉr ngá bórɔɔ̌ káráá mpʉ myɛ́na nyá, óbe ó njɨ waá ngá sila nyʉ́ʉ́, dû mpʉ bé á pa tyêl metié mé éjwɨʼla ménkul maá yɨ́ nyá.

2 Timotɛ 4:1

Me lɨ́ edî gó ɨ́ hwɨ́m ɨ́ míh mé Nzyɛ̌m Sɔ́ŋ, bé e Yésʉs-Krîst: (Yésʉs waá ó múo nzě tíʼe míkublakúbla le odwe milɔ̌b nyá.) Myúú mímboʼlá mimbá, myé ó: nzéá nyé óbáʼǎ nze wɨ́, le Mpóʼo nyé ójwɨ́ɨ nyɨ́. Mě tyél gó etié ó, ɨ́ míé mé óboʼlo onâ baá ó:

1 Timotɛ 6:19

Bé kʉ̂komaa bé bʉr o tɨ̂ʼ ekʉ̌m empâ, lɨ́ esú é mélû me dí enze má. Bé sá nó ó, bé nkʉ̂ mɛ̂r twiʼ ɨ́ kpɨ́ɨ́ɨ́, yaá dí kwahaá mpǎŋ twiʼ yɨ́.

1 Korɛnt 2:9

Tó kœb ó, yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Sá mʉ̂r ngwár dína apǎ jóʼo, nkʉ̂ bee yɨ́, sá mʉ̂r dí apǎ jwɨʼ ɨ́ lémé wé lʉ́ʉ́ dʉ́o yɨ́, Nzyɛ̌m á komlo yé ó, lɨ́ esú é bʉ̂r o dí ekpɛl nyé bá.

Mɨngwiha 22:20

Waá dí eboʼlo mílɔ̌b mîʼ nyá, nye lɨ́ elɛ́ɛ ntémé ó: «Yé ó nó. Me lɨ́ ekpâhwǎ báʼǎ nze.» Yé díʼee nó. Dâ Yésʉs, ntáʼ!

Mɨngwiha 4:10

Jɔʼ yɨ́yɛ̂h bé á sɨsâ nó yɨ́, otɔ́má bʉ̂r mekám mébá le onâ baá, bé á si pipíʼa sí ɨ́ mpǒm mʉr á be ɨ́ mecwɨ́ɨ́ mé jwɨ́ɨ nyá, lɨ́ edwe mʉ̂r dí e twǐʼ njʉ̌m dǐ nyá kûm. Bé á be lɨ́ epɨpɛʼ bíkáráá bí gʉ̂l byɔ́ɔ́ ɨ́ milʉ̂, didyɛ́ʼɔɔ byé sí ɨ́ míh mé. Bé ó:

Mɨngwiha 4:4

Bidiá bí ójwɨ́ɨ mekám mébá e binâ, byé á be ó lɨ́ ebɔma mécwɨ́ɨ́ mé jwɨ́ɨ yaá ɨ́ nká. Otɔ́má bʉ̂r mekám mébá le onâ, bé á be ó tɨ̂, mindîndǐl, e mikán ɨ́ pumo pumo ɨ́ menyʉ̂l ndu e bikáráá bí gʉ̂l ɨ́ milʉ̂.

Ebrœ̂ 9:28

Jwɨʼ gwár e gwár e Krîst. Nye á si dwe jɔʼ gwár, ó nye búraa le misyóm lɨ́ esú é bʉ̂r ɨ́ buo buo. Ɨ́ jɔʼ mbá nyé ókǎ nze yɨ́, nye ákǎ báʼǎ nze ɨ́ lɔ̌b ébúra e misyóm. Nye ónze ó, lɨ́ enzě tíʼ bʉ̂r o dí ebóno nyé bá.

2 Timotɛ 1:18

Go lɨ́ egʉ́a ntémé mimbi bísyɛ́ɛla nyé á sâ bʉr Éfɛsɔs mí. Tî Yésʉs sâʼ ó, nye bíʼee njɨ́ʼá nkóó ɨ́ mebó mé ɨ́ móhó nyé óbáʼǎ nze wɨ́.

1 Tesalonika 1:10

Bé lɨ́lɛ́ɛ́ ntémé ó, bɨ̌n mû ó lɨ́ ebóno Mwân mé Nzyɛ̌m ngá duho ɨ́ jʉ́o kʉ́ nyá. Nye ó waá Nzyɛ̌m á pɛh, dwih lɨ́ odwe nyá. Yésʉs waá ó b'á tíʼ mɨná gâ, lɨ́ esâ ó Nzyɛ̌m sá alɛ̂ʼle mɨ́ná gá nkpaa nyé ɨ́ móhó nyé ótíʼe mílɔ̌b wɨ́. Móhó waá, wé mû ó kúno epyâl.

Rôm 8:23

Yé abě njɨ nó. Nzyɛ̌m mû ó sí ntɨh mɨ́ná gá Sísǐm wé. Mɨná bé á nyɛɛ bi gá ó, etʉ́m laá. Damá jóʼo nó, milémé gá míná dína ó lɨ́ etíme. Yé ó nó, tó kumo ó, dʉ́ó Nzyɛ̌m ósîl étyêl mɨ́ná gá ɨ́ tyé bwán bé yɨ́. Dʉ́o laá ó nyé ngá dwih ményʉ́l gá mɨ́ná ɨ́ mpila ébébe yɨ́.

Rôm 2:5

Jɔʼ yɨ́yɛ̂h gó dí esâ élele é léme, nkʉ̂ bene édwirǎ léme yɨ́, go náǎ ó, lɨ́ ebul bíbaa bí ébébě Nzyɛ̌m ngá niniʼe gó bí. Byé ókǎ láŋɔɔ ó, ɨ́ móhó Nzyɛ̌m ólɛ̂ʼle bʉ̂r ɨ́ buo buo nkpaa nyé wɨ́. Dʉ́o laá ntémé ó nyé ngá lɛ̂ʼle mʉ̂r nyɨnyɛ̂h mpʉ nyé dí etíʼe bʉ̂r milɔ̌b lɨ́ otîtyěl yɨ́.

Mataos 24:36

«Ɨ́ lɔ̌b móhó waá le jɔʼ yaá, mʉr ngwár, nyé agʉ́a wê. Damá jóʼo bééngeles dí ɨ́ jʉ́o kʉ́ bá, bé agʉ́a. Damá jóʼo Mwân mé Mʉr, nye ntémé, nyé agʉ́a. Nzyɛ̌m Sɔ́ŋ nye omér ó dí egʉ́a.

Mataos 7:22

Ebě, ɨ́ móhó étíʼ é mílɔ̌b, bʉr ɨ́ buo buo, bé ólɛ́ɛ e me ó: “Dâ ɔ́, Dâ ɔ́, paá bee ɔ̌! Bɨ̌h bé á si gwîh milɔ̌b mé Nzyɛ̌m ɨ́ díé lô. Ɨ́ díé lô, bɨ̌h bé á si so meleme! Ɨ́ díé lô, bɨ̌h bé á be ó sí sâ mésimá ɨ́ buo buo!”

1 Tesalonika 5:4

Bɨ́ɔɔ́ bâm! Okɛ́l bâm! Bɨ̌n bé ajéʼě lɔ̌b waá. Bɨ̌n bé átwɨrǎ móhó waá. Wé ápyâl bɨ́n mpʉ̌ ndíblʉ̌.

2 Korɛnt 5:2

Ebě, lɨ́ odiá wɨ̂, mɨná jónó gá ó ɨ́ jɔʼ yɨ́yɛ̂h. Sá mɨ́ná dí ebuú gwɨ̂m gá yɨ́, yé ó, mɨná káa céne gá odiá gá wɨ́ná, lɨ́ etó di ɨ́ waá mû mɨná gá ɨ́ jʉ́o kʉ́ wɨ́.

Lʉkas 10:12

Mě lɛ́ɛ́ bɨ́n ó, dʉ́ó Nzyɛ̌m ótíʼe bʉ̂r milɔ̌b, dwe bé mebě yɨ́, bintɨ́ʼá byɔ́ɔ́, byé óbuú bwaʼ, laa byaá bi bʉ̂r ó Sodôm.»

1 Korɛnt 3:13

Syɛ́ɛ́ mʉ̂r nyɨnyɛ̂h dí eséa yɨ́, yé ónyɨ̂n ɨ́ ponó ɨ́ dʉ́ó lé étíʼ é mílɔ̌b, ebě, nyɔ̌m sá yɨ́yɛ̂h, wé ónyɨ̂n ɨ́ sʉ́lʉ́lʉ́ ó, ɨ́ móhó waá. Nyɔm tɨ̂, wé nyɨ́nyɨ́n ó, ɨ́ siʼe ngá lɛ̂ʼlě nyɔ̌m syɛ́ɛla mʉ̂r yɨ́. Syɛ́ɛla yé sí dûhwo yɨ́ɛ siʼe yaá nó, lɛ́ɛ́, syɛ́ɛla yaá, yé á kʉ be ó e nyɔm lɨ́ esú mé Nzyɛ̌m.

Filipi 3:11

Ebě, mpûʼla, nye me ɨ́ léme ó, me ntémé, me ópah, bǐ twiʼ.

2 Tesalonika 2:8

Jɔʼ yaá ó nyɨ́ɛ, mʉr dí egbah metié mé Nzyɛ̌m nyá, ókǎ nyɨ̂n ɨ́ kpɛŋlɛm yɨ́, Tî Yésʉs, nyé okǎ jʉ̂ nyé e ngúl num wé. Nye óteʼle mʉ̂r waá ó, ɨ́ nzéá nyé ónze wɨ́.

2 Timotɛ 1:10

Mpam nyaá á ka nyɨ̂n ɨ́ kpɛŋlɛm ó, lɨ́ epyál mé Yésʉs-Krîst, Tiʼbʉr gá wɨ́ná. Nyɨ́ teʼle nkûl eswie. Nye á lɛ̂ʼle mɨná ɨ́ nzɨ̌ Mbɨambɨa Lɔ́ɔ ntémé ó, mɨná bi gá twiʼ mpâ, yaá dí njʉ̌m dǐ e njʉ̌m dǐ yɨ́ ó, ɨ́ Krîst.

Ebrœ̂ 12:11

Jɔʼ mɨ́ná dí edweŋɔɔ gá bintɨ́ʼá byaá yɨ́, yé ɨ́ kpaa ɨ́ léme, anwɨɨla ó, yé ó sá ésoho. Jɔ̌ʼ túú waá ká laa yɨ́, bʉr o dí egʉ́ǎ sâ dí tɨ̂ʼ yɨ́ bá, bé ntɔ̂ʼ kǎ gʉ́a ó, nkúná wɨ́ komlo bé miléme. Bé mû kǎ lîʼ le esâ ó, njɨ bisyɛ́ɛla bi dí tîtyěl bí, bi ntémé mepyɛbla tɨ̂.