2 Timotɛ 1:3 - Kálar Nzyɛ̌m : Ejwán é Sáá

³ Me lɨ́ edwě Nzyɛ̌m nzyǒo ɨ́ jɔʼ yɨ́yɛ̂h. Me lɨ́ esâ sɨ́n lɨ́ esâ mínjɨʼla ɨ́ lɔ̌b gô, móhó e pum. Mě séá nyé syɛ́ɛ́ yaá ó e mipahlá mí léme mi dí ɨ́ pyɛɛɛ mí, jwɨʼ gwár mpʉ bímpám byâm, byé á sɨsâ nye yǎ yɨ́.

Kálara Zyɛ̌m Edwán é mpʉ̌n

³ Me edwe Zyɛm ekiba é jɔʼ yiyɛh. Me esa zyee lé esa mɨnjwɨʼla é l'efu lo, moho e pum. Me esea syɛɛ ye ó e mɨpɛhla mɨ leme ndɨ é pyɛɛɛ ɛ, jwɨʼ gwar mpʉ bɨmpam byam, byé a dɨ sea nye ya ɛ.

2 Timotɛ 1:3 ပူးပေါင်းရင်းမြစ်များ

Ebrœ̂ 13:8

Mpʉ̌ Yésʉs-Krîst á bě kʉ̌ʼ yɨ́, mpʉ yaá ntémé ó nyé dí mûh. Nye ódi ntémé ó njɨ nó, njʉ̌m dǐ e njʉ̌m dǐ.

Mɨlʉmlʉ 23:1

Nó ó, Pɔ̂l á bɨʼ bʉr ó bʉm mejwôʼlʉ. Nye ó: «Bɨ́ɔɔ́ bâm, mě séá Nzyɛ̌m syɛ́ɛ́ ó e léme ɨ́ sɔ́ɔ́ɔ́, pyâl ɨ́ dʉ́ó lɨ̂ʼ mûh.»

Mɨlʉmlʉ 24:14

Nó ó, ɨ́ lɔ̌b wɨ̂, me lɨ́ ekam ɨ́ mpǒm nyǒ ó, me lɨ́ eséǎ Nzyɛ̌m bimpám gá bíná syɛ́ɛ́, lɨ́ edû nzɨ́ mé Krîst, nyaá bʉ́ʉ́ bʉ̂r dí ejébě “bɨ́blǎ yébe” nyɨ́. Mɛm, me lɨ́ ebúʼlǎ sá yɨ́yɛ̂h dí cɛmá lɨ́ mekaná mé Moyɨ̂z ndu e maá mé ógwíha o mílɔ̌b yɨ́.

1 Timotɛ 1:19

ɨ́ nzɨ̌ búʼó yô le mipahlá mí lémé myô mi dí ɨ́ pyɛɛɛ mí. Bʉ́ʉ́ bʉ̂r bɨ́ɛ, bé á be ó sí kâr éjwɨ́ɨ mílémé myɔ́ɔ́, búʼó yɔ́ɔ́, yé ntɔ̂ʼ ndáma, nwɨɨla e sitíma dí elʉ́ŋa ɨ́ medíbé, dîm yɨ́.

1 Timotɛ 1:5

Ɨ́ metwɨ́ɨ́ ménɨ̌, ndumló tɨ̂, wé ó, mɨná kpɛ́laa gâ. Kpɛ̌l yaá, yé dúhaa ɨ́ miléme mi dí ɨ́ sɔ́ɔ́ɔ́ mí, le ɨ́ mipahlá míléme mi dí ɨ́ pyɛɛɛ mí. Kpɛ̌l yaá dúhaa ntémé ɨ́ mpǎŋ búʼó yɨ́ná dí abě mbáʼrá e mikóo yɨ́.

Mɨlʉmlʉ 24:16

Sá tɨ̂ʼ ó mé dí egbâ nkûl lɨ́ etiʼe ɨ́ míh mé Nzyɛ̌m le maá me bʉ̂r, e mipahlá mí léme mi dí ɨ́ pyɛɛɛ mí yɨ́.

Mɨlʉmlʉ 22:3

«Me ó Yúden. Me á byɛ̂l ó, Tarsôs ɨ́ sí Silisía. Me á ka bwaʼ yɨ́ɛ ó wâ. Lɛ̂ʼla wǎm á be ó Gamalyɛ̂l. Nye ó b'á lɛ̂ʼle me mpʉ mé dúʼoo metié bímpám gá bíná yɨ́. Me á si gbâ nyʉ̂l nyǎm lɨ́ edwě Nzyɛ̌m kûm jwɨʼ gwár mpʉ bɨ́n ntémé dí esâ ɨ́ báánâʼ yɨ́.

2 Timotɛ 3:15

Símsáá ntémé mpʉ gó á boo táare egʉ́a Mékaná mé Nzyɛ̌m, duho lɨ́ ontwǒm gô yɨ́. Mekaná maá, mé e nkul ecɨ̂l mɨ́ná. Ocwóó waá, wé lɛ́ʼlé mɨ́ná ó, edyɛ̂ʼwo e Yésʉs-Krîst. Búʼó yaá ó dí etíʼ mɨ́ná.

2 Timotɛ 1:5

Mě sá ntémé ó, sîsimsǎ búʼó yô dí abě mbáʼrá e mikóo yɨ́. Yé ó mbǐ búʼó ngwár e ngwár nyɔ́ŋ mpám gǒ Lɔyîs, bé e nyʉ̌ŋ Eníke, bé á be e yé yɨ́. Me lɨ́ ekʉ́ gʉ́a ɨ́ lémé wâm ó, mbǐ búʼó waá ó dí go ntémé ɨ́ léme wɨ́.

1 Tesalonika 3:10

Móhó e pum, bɨ̌h kʉ́ buú jɨʼla e Nzyɛ̌m ó, mɨná béelaa gá mempǒm. Bɨ̌h bé lɨ́ egwɨ̂m ó, bɨ̌h swâhlaa lɔ́ɔ bɨ́h á nyɛl elɛ́ɛ bɨ́n ó, bɨ̌n bé ɨ́ jala le ebúʼla wɨ́.

Galásia 1:14

Ɨ́ bʉr ó duo yâm, me ó b'á bu dû metum mé óYúden. Me á si gbâ nyʉ̂l nyǎm ɨ́ swííá lɨ́ ebaʼle métum bímpám bíh, byé á líʼe má.

2 Korɛnt 1:12

Sá bɨ́h dí enkʉ́na tɨ̂ʼ yɨ́, yé ó yɨ̂: kʉ̌ tyen dí tîtyěl, waá bɨ́h dí edû e milémé míh mímyɛ̂h ɨ́ míh mé Nzyɛ̌m wɨ́. Mipahlá mílémé míh, myé boʼlo ó, bɨ̌h bé e mbɨambɨa kʉ̌ tyen. Ɨ́ kʉ̌ tyen waá, bɨ̌h jaá sâ ó, njɨ bím mpâm mé Nzyɛ̌m dí ekpɛl ó, bɨ̌h sâʼ yɨ́. Kʉ̌ tyen ngwár waá ó bɨ́h á bu dû kwá nyɨ́n, le ɨ́ sí yɨ̂ʼ yɨ́yɛ̂h wɨ́. Wé abɔma e milɛ́ʼlá bʉ̂r ó sí yɨ̂ʼ dí edwe bʉ̂r mí.

Rôm 9:1

Mě lɛ́ɛ́ ó, otyeetye, abe bíbɛr. Mě lɛ́ɛ́ ó, ɨ́ mpúhlá nyɨ́h e Yésʉs-Krîst. Mipahlá mí lémé wâm, myé lɨ́ ekʉ́ boʼlǒ lɔ́ɔ waá e nzɨ̌ Sísǐm mé Nzyɛ̌m.

Mɨlʉmlʉ 27:23

Ebě, ɨ́ pum wɨ̂ʼ mûh, éngeles mé Nzyɛ̌m, mʉr mé dí egúmo e né, waá mé dí eséǎ syɛ́ɛ́ yé nyá, nye sí nzě gúmó mê bé yɨ́.

Mɨlʉmlʉ 26:4

«OYúden bɨ́bɛ̂h, bé lɨ́ egʉ́ǎ mpʉ̌ twiʼ yâm, yé á bɨbe, táare lɨ́ osohó wâm, nzě kumo mûh yɨ́. Bé lɨ́ egʉ́a ntémé mpʉ mé á bwaʼ ɨ́ gúmó kúl bʉ̂r yâm, yé á be yɨ́, ti e Yerʉ́zalɛm.

Lʉkas 2:37

njʉ̂m wé ntɔ̂ʼ dwe, nyɨɛ ntɔ̂ʼ lîʼ kúho. Nye á didi ó nó, tótôʼ, tó kumo mímbû mekám mwom e mimbú mínâ. Nye á bé abɔ́ʼa e mpáh Nzyɛ̌m. Nye á sɨséa tɨ̂ʼ ó, móhó e pum. Nye á bɨbe ó, lɨ́ eti méde e bijɔʼ, lɨ́ esú lé éjɨʼla e Nzyɛ̌m.

1 Timotɛ 5:5

Nó ó, waá dí kúho tyeetye ɨ́ ntɛ̂ʼ wé omér wɨ́, wé lɨ́ ekʉ́ sâ sɨ́n lɨ́ ejɨʼla e Nzyɛ̌m móhó e pum, ó nye súʼaa wê. Nzyɛ̌m nye omér ó dí egbâ wé mpûʼla ɨ́ léme.