24 Yʉ to xí hñeme car Jesucristo i tøhmi guegue da mötzi, cja̱ i jñɛgui da mandadobijʉ. Da ncjadipʉ hnar bbɛjña̱ co cár da̱me̱, da dyøjte göhtjo ca te i bbɛjpi, como i pa̱di gue cár da̱me̱ i sostene.
Nu car hñøjø, i toca da mandadobi cár bbɛjña̱, ncja ngu̱ nʉm ña̱jʉ i mandadobi nʉm cuerpojʉ. Ncjapʉ hne̱je̱, i mandadoguijʉ car Cristo, göhtjoguigöjʉ como ngu̱ xtá e̱me̱jʉ. Xí ngʉzquijʉ ca rá nttzo ca ndí tu̱jʉ, cja̱ rí hñe̱ guegue car ddadyo nzajqui ca dí pɛhtzijʉ.
Guejtjo dí mbe̱mbiquijʉ ja ncja da hmʉbi quí bbɛjña̱ cʉ hñøjø cʉ xí ntja̱jti. Göhtjo yojmi da ma̱jtsjɛhui. Nʉr hñøjø da nú̱ cár bbɛjña̱ ncja ngu̱ ga nú̱tsjɛ guegue. Cja̱ nʉr bbɛjña̱ da dyøjti ca i ma̱n cár da̱me̱, da hñi̱htzibi.
Nuquɛjʉ, guí mɛfitjojʉ, gui dyøjti quer jmu̱jʉ hua jar jöy, ca te da bbɛjpiquijʉ. Jin gui jøña̱ bbʉ i jantiquijʉ, pa da mbe̱ni gúr jogui mɛfi, cuando jin gui cierto. Pe gui mbe̱nijʉ, bí jantiquijʉ ca Ocja̱ göhtjo ʉr tiempo, cja̱ gui pɛjpijʉ quer jmu̱jʉ göhtjo mbo ir mʉyjʉ.
Nuquɛ, Tito, guehquitsjɛguɛ, gui un cʉ ba̱jtzi hñøjø hnar ejemplo rá zö, göhtjo ca guí øte. Gui hmʉy ncja ngʉ drí ntzöhui pa da tti̱zqui. Gui uni ir mʉy pa gui u̱jti cʉ ba̱jtzi hñøjø car palabra ca ncjua̱ni.