APOCALIPSIS 21:21 - Otomi

²¹ Cʉ doce quí goxtji car jñi̱ni mí doce perla rá ndo nojo, cada hnar perla xquí ttøti hnar goxtji. Mí juɛtzi rá tzi nttaxi cʉ perla. Cja̱ quí calle car jñi̱ni mí nxøgue gá oro, pe mí tjoxti car jiahtzi ncjahmʉ dur vidrio.

APOCALIPSIS 21:21 ပူးပေါင်းရင်းမြစ်များ

APOCALIPSIS 17:4

Car bbɛjña̱ mí je da̱jtu̱ rá ma̱di, már ncjʉjpöy cja̱ már ntjɛni. Mí tø tjebe cja̱ mí tzʉti ttzʉcja. Mí hna̱x pʉ jár cuerpo göhtjo tema clase cʉ adorno gá oro co gá doxto, göhtjo tema color, co gá perla. Cja̱ car bbɛjña̱‑cá̱, mí ja̱ hnar copa gá oro ca mí po vino, pa drí nti̱ cʉ to di zi. Nu car copa ca mí po vino i ne da ma̱, car hmʉy rá nttzo cja̱ co cʉ costumbre rá nttzo cʉ i tɛn cʉ cja̱hni̱ cʉ i e̱me̱ cʉ cjá̱a̱ cʉ jin gui hña̱ni. Cʉ cja̱hni̱‑cʉ́, jin gui ne da jiɛjmʉ ca rí dyøtijʉ ca rá nttzo.

APOCALIPSIS 18:16

Da ma̱jmʉ: ―¡Ay! ¡Ay! Jiøjquitjo nʉr ndo ciudad. Már tzi zöjma̱ja̱. Mí jñɛjmi hnar bbɛjña̱ rá tzi zö ca mí je ttaxi da̱tu̱ tzi fino, co da̱jtu̱ rá ncjʉjpöy co rá ntjɛni. Mí hna̱tzi rá ngu̱ quí adorno, gá oro, gá doxto cʉ i juɛtzi göhtjo tema color, co gá perla rá tzi nttaxi.

APOCALIPSIS 21:15

Car ángele ca ndár ña̱bbe mí ja̱ hnar vara gá oro ca mí jñɛjmi hnar ttzʉto, co nica̱ drí dyɛn car jñi̱ni co quí goxtji co cár cjoti.

APOCALIPSIS 21:18

Car cjoti ca mí coti car jñi̱ni mí nxøgue ʉr jaspe, tzʉdi, hnar doxto rá tzi ma̱di ca i juɛtzi rá nttaxi. Nu quí ngu̱ co quí edificio car jñi̱ni mí nxøgue ʉr oro cja̱ mí tjoxti car jiahtzi ncjahmʉ dur vidrio.

APOCALIPSIS 22:2

Car da̱tje mí dyo pʉ jar madé car jñi̱ni, pʉ jar da̱hñu̱. Göhtjo yonguadi car da̱tje mí jø za, gue cʉ za cʉ i ungui nzajqui cʉ to da zajpi quí ixi, cja̱ i tu̱ doce clase quí ixi. Cada za̱na̱ i ta̱ hna clase ʉr ixi. Cja̱ quí xi cʉ za, i sirve ncja ʉr hñi̱tji pa da hmʉy rá zö cʉ cja̱hni göhtjo cʉ nación. Ya jin da zöjʉ tema jñi̱ni.

APOCALIPSIS 4:6

Car lugar pʉ, már ndo nxi̱di, ncja ʉr mar mír ni̱gui, como cár piso mí nxøgue gá vidrio, mí juɛtzi már tzi nccangui. Hnanguadi mí bbʉh car ndo tjujni pʉ jabʉ már ju̱x ca Ocja̱. Cja̱ pé mí bbʉ gojo cʉ mí jñɛjmi zu̱we̱, pe nucʉ́, mí ángele. Guegue‑cʉ́ mí i̱ti madé car ndo tju̱jnitsjɛ. Rá ngu̱ quí dö mí bbʉy. Mí nxøgue dö jáy mʉy cja̱ co jáy xʉtja.