YAKOBUS 4:11 - BOWOT BOHUA

¹¹ Konduang-konduang, ara saling moncela ata'ai monosalan. Ulun ijo moncela ata'ai nosalan konduangoh ijo sama-sama Kristen, io moncela ata'ai nosalan hukum Pohotala. Tutang amat ihkam nosalan hukum Pohotala, orih rimai ihkam eam numbun hukum-hukum rih, molekan monjadi hakimoh.

YAKOBUS 4:11 ပူးပေါင်းရင်းမြစ်များ

LUKAS 6:37

‘‘Ararih mosara ulun bohkon, mangat ihkam bongom ka'a eam tomosara bain Pohotala. Ararih mohukum ulun bohkon mangat ihkam bongon ka'a ara tomohukum Pohotala. Ngapunrih ulun bohkon, mangat Pohotala ka'a ngapun ihkam.

RUMA 2:1

Bain tului orih, Konduang-konduang, Iairih Konduang, nyiring Konduang nosalanoh ulun bohkon? Konduang eam tepun ino-inon ahkan mombela arop! Tului amat Konduang nosalanoh ulun bohkon, podahar Konduang bongon nguanoh gawi ijo sama kolou iro; mahka Konduang ngohtunohhukum ngosan arop'mu bongor ka'a.

RUMA 2:13

Tului ulun ijo hokohinut hoduli umba Pohotala, eam tului ulun orih jari kota'an hukum agama Yahudi, molekan tului io nguanoh inon ijo tomihtik ang hukum rih.

RUMA 7:7

Amat kodorih, inon ijo tou ihto nuhtuioh? Ijo hukum agama Yahudi rih ja'at? Puna eam! Tahpi hukum rih ijo majar ahku tohou dusa. Ahku eam ahkan kota'an bokuhu rih inon, amat hukum agama rih eam nuhtui, ‘‘Ara bokuhu.’’

1 KORINTUS 4:5

Kobain orih, tului jaha ohkotoh, ara ihkam joi-join nuhkas, ijo ihcobehti bosala ata'ai eam. Ngindoi iou nyiring Tuhan lombut noin. Io iou ijo ahkan nguap paring rahasia-rahasia, ijo bosuhuk a'ang kopindong. Iorih ijo ahkan ngahkas paring niat ijo hotuyuk ang luwang ahtoi ulunkolunon. Ang ohkot rih punai nyinong behti norima tahkan Pohotala tara ijo pahtut tonorimaoh.

2 KORINTUS 12:20

Ahku kowatir ijo aang ohkot ahku masap ihkam noin, ahku nyombang ihkam eam kolou inon ijo ahku harapoh, tutang ihkam ka ahkan nyombang ahku eam kolou ijo ihkam harapoh. Ara-ara noin anai ijo hokolahi, hiri ahtoi, bolasut ahtoi, gunan ahkai bongoi, pinah-mopitnah, hasut-mohasut, bojuhu tutang monderoh.

EPESUS 4:31

Dianohrih karon anyam koporos ahtoi, dondam tutang kosingi. A'ai hino bokociak-ciak tutang mongajea-jea. Ara hino anai anyam hiri ata'ai anyam bohkon ijo sama mahcam orih.

1 TIMOTEUS 3:11

Oruh iro ka harus ulun ijo hinut, eam ulun ijo jolik mandernohou desas-desus. Iro harus kota'an nahan aropoh tutang jujur a'ang kokaro hal.

2 TIMOTEUS 3:3

Iro eam mongasi samaarop, eam rajin nonga apun, iro jolik ngonja'at-ngonja'at aran ulun bohkon, rajin hapa kokarasan, iro kejam, tutang eam ngojolik komorong.

TITUS 2:3

Kodorih ka'a hondakrih ihko ningak ulun bawi-bawi ijo oko, mangat hadat iro hotohorong umba inon ijo pahtut, bagi ulun ijo bolum khusus ahkan Pohotala. Iro eam tou mopitnah ulun bohkon, tutang eam tou kotagihan ngorih ijo mbusouoh. Iro pahtut majar hal-hal ijo pios,

YAKOBUS 1:16

Ara ihkam totihpu, Konduang-konduang'ku ijo tongasih.

YAKOBUS 1:19

Nohtoaniohrih tuh pio-pios, Konduang-konduang ijo tonokasih. Nyinong ulun harus bojoin ahkan ngonih, tahpi borakah ahkan nuhtui, tutang borakah ahkan bosingi.

YAKOBUS 1:25

Hukum Pohotala soporuna, tutang anaingina koba'as ahkan momorodehka kolunon. Tutang ulun ijo monoliti tutang nohtoani pio-pios hawui molalusoh hukum-hukum rih, tutang eamoh ngonih iou turus nolingouoh, ulun rih ahkan ponorehkat Pohotala a'ang nyinong hal ijo tonguaioh.

YAKOBUS 2:8

Ihkam nguan ijo morong, amat ihkam molalus hukum Kolahca'an ijo tonyombang luwang ayat Surat Borasih tuh, ‘‘Ngasirih sama arop'mu kolou ihko ngasih arop'mu bongom.’’

YAKOBUS 5:10

Konduang-konduang, ingatrih dolang nabi ijo nuhtui ngosan aran Tuhan. Iro sabar tutang tabah ngarot. Jadi, omin iro monjadi sutu.

YAKOBUS 5:7

Bain orih, bosabarrih Konduang-konduang'ku, nyiring Tuhan lombut. Nohto rih koloukuwoh sabaroh ihcobehti Pongumo ngindoi, nyiring umoioh polombut buaoh ijo borega ahkaioh. Umba kosabar io ngindoi uhjan musim ngonyahtu tutang uhjan musim dolak.

YAKOBUS 5:9

Ara bokuhtuk tutang saling hotosalan, mangat ihkam eam kona hukum bain Pohotala. Ingat! Hakim ius doni, tohtap ahkan lombut.

1 PETRUS 2:1

Kotului orih, dianrih tahkan arop'mu kokaro ang ja'at; ara hino hobalik, tutang ara bopura-pura. Ara bohiri ahtoi, tutang ara mohina ulun bohkon.