IBRANI 9:28 - BOWOT BOHUA

²⁸ Kolourih ka'a, Kristus sinotikat nyorah arop monjadi porahpah ahkan mongapit dusan aro ulun. Io ahkan lombut hino aang koduo tikatoh, eam hino ahkan ngobuah soal dusa, tahpi ahkan nyolamat ulun-ulun ijo ngindoi polombut-Oh.

IBRANI 9:28 ပူးပေါင်းရင်းမြစ်များ

MATEUS 20:28

Sama kolou Anak Ulun rih ka'a; Io lombut eam ahkan tonohalu, tahpi ahkan mohalu, tutang nyorah hasong-Oh ahkan momordehka aro ulun.”

MATEUS 25:31

“Amatnoin Anak Ulun lombut kolou Lahca tongitot molehkat-molehkat-Oh. Io ahkan tuot ang ngosan pododusan aiou ijo hajo.

MATEUS 26:28

Tului tuhrih daha-Ku ijo monsah bowot Pohotala – daha ijo tonusuh ahkan aro ulun ahkan pongapun dusan'ndo.

YOHANES 14:3

Uliumba Ahku tulak nahtap unuk ahkan'kam, Ahku hoduli hino tutang ngomin ihkam, mangat ang umoh Ahku anai, ang anan ka'a ihkam anai.

KESAH RASUL-RASUL 1:11

‘‘O, ulun-ulun Galilea,’’ hion koduo behti rih, ‘‘ombai ihkam tombok iou ang anan nokara nokuh langit? Yesus ijo ihkam nohto hogahtang nokuh soruga rih ang toharep'kam, ahkan huli hino umba cara orih ka'a, kolou ijo ihkam nohtooh nanai.’’

RUMA 3:25

Pohotala noparahpah Yesus Kristus, mangat honong popahtoi-Oh rih ulun tongorimahoh ius boliwus tahkan kosalaioh, amat iro porocaya umba Io. Pohotala nguan angkodorih ahkan ngorinah koadilan-Oh. Tului ang wayah ijo houn Pohotala ius nyolenankosabar ngindoi, toharep dusa-dusan ulun. Nyiring Io eam mohukum iro.

RUMA 5:15

Tahpi ijo koduooh rih eam sama; tului ponongan Pohotala mahcu labih kohajoi, amat tonihpong umba kototurung ijo konuan bain Adam. Kototurung ihco behti, kotuluirih aro ulun mahtoi. Eam inon labih hajo hino kojorian tahkan pononganasi Pohotala, tutang ponongan solamat ijo tononga-Oh, ahkan kodorih karon ulun nguha kohinut ahtoioh ihcobehti, yorih Yesus Kristus.

RUMA 6:10

Popahtoi ijo tonyuru Kristus, anairih popahtoi toharep dusa. Orih nyolung sino tikat iou ahkan turus-jahamoh. Tutang komonyun ijo tonitoi-Oh huntuh tuh anairih kobolum ahkan Pohotala.

RUMA 8:23

Tutang eamoh sohopus kolunon bewe ijo ngorunguh; ihto bongon ka ngorunguh ang luwang homboruan'to. Ihto jari norima Roh Pohotala, kolou ponongan Pohotala ijo pahtukoh, tahpi ihto magun ka'a ngindoi Pohotala nguwat arop ihto paringoh, tutang ngonjorian ihto monjadi anak-anak-Oh.

RUMA 8:3

Inon ijo eam duon konuan bain hukum agama, kotului ihto ulun bolomu, orih jari konuanoh bain Pohotala. Pohotala ijo mongalah kowasa dusa luwang tobiat ulun, hawui ngirimrih Anak-Oh bongoi, ijo lombut aang koada'ai sama umba kolunon ijo bodusa, ahkan ngudap dusa.

1 KORINTUS 1:7

nyiring ihkam eam kurang ihco borehkat ka, pondehan ihkam ngindoi Tuhan ihto Yesus Kristus lombut, tutang gihtan kobain paring ulun.

1 KORINTUS 15:54

Amat behti ijo dahpot mahtoi tuh jari tonokiri umba behti ijo eam dahpot mahtoi, tutang behti ijo tahkan kolunon tuh, tonokiri umba ijo tahkan soruga, ang ohkot rih punai nyolung inon ijo tonyurat a'ang Surat Borasih, ‘‘Popahtoi ius tonolon; komanang jari sapai!’’

1 TESALONIKA 1:10

Iro mander ka'a, tohou koloukuwoh ihkam moharapoh polombut Anak Pohotala tahkan soruga, yorih Yesus, ijo jari tonombolum bain Pohotala tahkan popahtoi. Yesus orihrih ka'a ijo monyolamat ihto tahkan kosingin Pohotala ijo ahkan lombut.

2 TESALONIKA 2:1

Tohou polombut Tuhan ihto Yesus Kristus tutang tohou ahkan tomupungoh ihto ahkan mohcon hihco Io, tuhrih ijo ahku nyawot hawui paham umba ihkam.

2 TIMOTEUS 4:8

Tutang huntuh hodiah komanang ngindoi ahku. Aang Ondou Kiamat, Tuhan, Hakim ijo adil rih ahkan monyarah hodiah orih ahkak'ku, tului ahku bolum hokopios umba Pohotala. Tutang eam ahku iou ijo ahkan norima hodiah rih, tahpi ka'a paring ulun ijo ngindoi polombut Tuhan hawui paham rindu.

TITUS 2:13

Uhuntuh ihto rahat ngindoi Ondou, ijo ihto paham mohara-harapoh rih; ang Ondou orih rih kolunon ahkan nohto kohajon Yesus Kristus, yorih Pohotala Mahahajo tutang Lahca Ponyolamat ihto.

IBRANI 1:14

Amat kolourih molehkat-molehkat rih, inon kotu'uioh? Iro anairih roh-roh ijo mohalu Pohotala, tutang ijo sonuhu Pohotala ahkan dohop ulun-ulun ijo ahkan norima kosolamatan.

IBRANI 10:10

Yesus Kristus jari nguan inon ijo tongohondak Pohotala tutang nyorah arop-Oh monjadi porahpah. Umba ponyorahan rih, ijo konuai-Oh tihkas sino iou ahkan turus-jahamoh, ihto paring tonomuhi tahkan dusa.

IBRANI 12:14

Bousaharih, ahkan bolum ruhkun umba paring ulun. Bousaharih ka'a bolum borasih, khusus ahkan Tuhan. Tului eam ihcobehti ka dahpot nohto Tuhan, amat io eam bolum kolourih.

IBRANI 2:3

Mahihino umba kosolamatan ijo labih hebat tahkan pohtoh-pohtoh rih! Amat ihto eam anai poduli toharep kosolamatan rih, ihto puna botatu eam ahkan luhput tahkan hukuman. Tului Tuhan bongoirih ijo pahtu-pahtukoh mborihta kosolamatan rih, tutang ulun ijo sula-sulak lomoi ngonihoh, jari mombuktioh komorongoh ahkan ihto.

IBRANI 4:15

Imam hajo ain ihto rih, bohkon tahkan imam ijo eam dahpot umba nginyam kolomun-kolomun ihto. Sobalikoh, Io jari tonihkos a'ang karo hal, sama kolou ihto bongon; tihkas Io eam napa dusa!

IBRANI 5:9

Mahka uliius Io tomonjadi ponyolamat ijo soporuna, Io monjadi luwangtohasak solamat ijo kototahiu bagi paring ulun ijo te'et umba Io,

IBRANI 7:27

Io eam kolou imam-imam hajo ijo bohkon, ijo nyinong ondou harus monyorah pononga kotului dusa-dusan iro bongoi lomoi, punai tului dusa-dusan ukup. Yesus nyorah porahpah tihkas sino tikat ahkan turus-jahamoh, ohkot Io monyorah arop-Oh bongoi monjadi porahpah.

IBRANI 9:25

Imam hajo ain Yahudi nyino-nyinong toun nyolong nokuh Ruang Palingborasih ang luwang Lohpou Tuhan hawui ngomin dahan ihcokungan ohcin. Tahpi Kristus eam nyolong ahkan monyorah arop-Oh dulangduli.

1 PETRUS 2:24

Kristus bongoi ngohtun dusa-dusan ihto aang arop-Oh ngosan kahju sopolahki, mangat ihto morodehka tahkan kowasan dusa, tutang bolum numbun konohuang Pohotala. Himang-himang Kristusrih ijo ngopios ihkam.

1 PETRUS 3:18

Kotului Kristus bongoi mahtoi tihkas sino iou, ahkan turus-jahamoh kotului dusan kolunon – ihcobehti ijo eam bosala, mahtoi ahkan ulun ijo bosala. Kristus nguan ohrih rih, mangat Io dahpot nihting ihkam nokuh Pohotala. Io tomunu socara behtiuoh, tahpi tonombolum hoduli socara rohani.

2 PETRUS 3:12

kotahin ihkam ngindoioh tutang morinduoh polombutoh Ondou Pohotala. Aang Ondou rih langit ahkan opah bosaha, tutang tului kopodioh, mahka ramu-ramu ijo ang langit ahkan lonyuh.

1 YOHANES 3:2

Konduang-konduang ijo tonyita! Ihto huntuh anairih anak-anak Pohotala, tahpi koada'an ihto noin, jaha korinah. Tahpi ihto ta'an ijo amat Kristus lombut, ihto ahkan nyolung kolou Io, kotului ihto ahkan nohto Io a'ang koada'an-Oh ijo komorongoh.

1 YOHANES 3:5

Ihkam ta'an, ijo Kristus lombut ahkan muhi dusa-dusan kolunon, tutang ijo eam aro dusa aang arop-Oh.

YUDAS 1:21

tutang bolumrih toturus ang pinda kosingou kasih Pohotala kotahin ihkam ngindoi pononganasin Yesus Kristus Tuhan ihto, ijo ahkan nonga ahkan'kam pombolum sojahti tutang kototahiu.

PONGORINAH 1:7

Nohto, Io lombut ngolindung bounondou! Paring ulun ahkan nohto Io, taput ka'a iro ijo jari nyadop Io. Karon uhtus ang tana ahkan nahtum tului Io. Yo, musti! Amen!