1 KORINTUS 3:5 - BOWOT BOHUA

⁵ Kotu'ui iai Apolos rih? Tutang iai Paulus rih? Ihkai tihkas dolang pohalu Pohotala, ijo ius niting ihkam ahkan porocaya umba Kristus. Ihkai baya molalus gawi ijo tonyuhu Tuhan ahkan ihkai nyinong behti.

1 KORINTUS 3:5 ပူးပေါင်းရင်းမြစ်များ

MATEUS 25:15

Ahkan nyinong pohalu rih io nonga numbun kosanggupoh nyinong-behti. Ahkan ihcobehti io nonga limo kuhjan duit bulou. Ahkan ijo bokonoh io nonga duo kuhjan duit bulou. Tutang ahkan ihcobehti hino io nonga sokuhjan duit bulou. Turus io tulak.

LUKAS 1:2

Iro nyurat hotohorong umba ijo jari tomorihta ahkan ihto bain ulun-ulun ijo nohto bongoi karonaang nyolung orih tahkan pahtukoh, tutang pongohino mborihtaoh kabar orih.

YOHANES 3:27

Yohanes mutah, ‘‘Kolunon eam duon anaingina ino-inon amat eam tononga Pohotala ahkaioh.

KESAH RASUL-RASUL 18:24

Pondehan rih, lombutrih nokuh Epesus ihcobehti ulun Yahudi konanak ang Aleksandria bogare Apolos. Io pihtar bopander tutang paham solembang usin Surat Borasih,

KESAH RASUL-RASUL 19:1

Pondehan Apolos anai ang Korintus, Paulus rahat nomuoikodiling podalaman tana rih turus johcok ang Epesus. Ang anan io hosombang umba pira-pira ulun ijo jari porocaya umba Yesus.

RUMA 15:16

Io ius ngojorian ahku monjadi pohalu Kristus Yesus ahkan sonuhu, ahkan nokuh uhtus-uhtus ijo bohkon Yahudi. Tutang ahku molalusoh kolou imam, ijo mborihta Kabar Hinut tahkan Pohotala, mangat ulun-ulun ijo bohkon Yahudi, monjadi ihco ponyorahan ahkan Pohotala, ijo dahpot tonorima baiou-Oh. Keleh Roh Pohotala napa iro monjadi ihco ponyorahan ijo khusus bagi Pohotala.

1 KORINTUS 12:28

Kodorih ka'a ang luwang ukup, Pohotala jari nahtap unuk ahkan mahca-mahcam ulun; Ijo pahtuk rasul-rasul, koduo nabi-nabi kotolu guru-guru, turus iro ijo nguan kahtahelan-kahtahelan, pongohuli iro ijo tononga pononga ahkan ngopios ulun, ata'ai ahkan ndohop ulun bohkon, ata'ai monjadi okonulun, ata'ai ka ahkan bopander umba mahca-mahcam basa ijo helan.

1 KORINTUS 16:12

Tohou konduang ihto Apolos, jari pira tikat ahku nonga tiruk ahkaioh, mangat io homboh konduang ijo bohkonoh, tulak masap ihkam. Tahpi io jaha komo yakin, ijo io harus tulak uhuntuh. Olu kodorih, amat anai kosapet noin, puna io ahkan lombut.

1 KORINTUS 3:10

Umba kotoun ijo tononga Pohotala, ahku kolou ahli mangun, hawuiius ngina galang ahkan gedung rih, tutang ulun bohkon mangun gedung ang isun galang rih. Nyinong ulun harus nohtoanioh moro-morong koloukuwoh io mangunoh ang ngosan galang rih.

1 KORINTUS 3:22

Paulus, Apolos, Petrus, kolunon tuh, pombolum tutang popahtoi, jaman tuh ata'ai ka jaman ijo ahkan lombut, kopari-paringoh anai ain'kam.

1 KORINTUS 3:7

Jadi ijo boguna iorih Pohotala, tului Io ijo mombolumoh. Ijo ngombulan tutang ijo nyiramoh eam boguna.

1 KORINTUS 9:17

Jahkaoh ahku nguan gawik orih, ngosan konohuang'ku bongok, mahka ahku tou moharap ahkan dahpot upah. Tahpi ahku mborihta Kabar Hinut rih, puna tului koharusoh. Ahku sonuhu bain Pohotala ahkan nguan orih.

2 KORINTUS 11:23

Pohalu-pohalu Kristuskah iro? Naingoh kolou ahku ius nihou ahkal, tahpi ahku puna pohalu ijo puna labih morong tahkan iro paringoh! Ahku bogawi labih karas, ahku labih bojoin ponosolong ang luwang sipir, ahku labih aro tonyiksa tutang bojoin nyiring mahtoi.

2 KORINTUS 3:3

Iro bongoi dahpot nohto, ijo Konduang monjadi surat ijo tonyurat Kristus, ijo tonokirim nguha ihkai. Surat rih eam tonyurat umba dawat, tahpi umba Roh Pohotala ijo bolum; eam ka'a ang ngosan bahtu tulis tahpi ang ahtoi ulun.

2 KORINTUS 3:6

Io iou ijo nguan ihkai nyanggup monjadi pohalu ahkan ihco bowot ijo bohua, bowot ijo bogatung tahkan Roh Pohotala, bohkon tahkan hukum ijo tonyurat. Tului ijo tonyurat orihrih ngomin popahtoi, rahatoh ijo Roh Pohotala rih nonga pombolum.

2 KORINTUS 4:1

Ihkai nguan gawi tuh, tului kosayang ahtoi Pohotala. Orih kotuluioh ihkai eam puhtus asa.

2 KORINTUS 4:5

Borihta ijo ihkai nyiaroh rih, eam borihta tohou ihkai bongon. Borihta rih anai borihta tohou Yesus Kristus; ijo Io anairih Tuhan; tutang ihkai tuhrih jihpon-jihpon'kam kotului Io.

2 KORINTUS 4:7

Tahpi ponahtou rohani ijo komok orih, ihkai ngomiuoh ang luwang arop ihkai ijo eam borega tuh, ijo tonapa tahkan tana. Honong kodorih korinah bain kohajon kowasa rih mohcon aang Pohotala tutang eam aang ihkai.

2 KORINTUS 5:18

Paringoh rih tonapa bain Pohotala. Nguha Kristus, Pohotala nguan ihto hokopios hoduli umba Io, turus nyuhu ihto mangat ulun-ulun bohkon toudahpot hokopios ka'a umba Pohotala.

2 KORINTUS 6:1

Tului ihkai bogawi hombo-homboh umba Pohotala, mahka ihkai nyawot hawui tu'u-tu'u, a'ai ihkam mohonou kopios ahtoi Pohotala rih.

2 KORINTUS 6:4

Sobalikoh, a'ang kokaron hal, ihkai ngorinah ijo ihkai anairih jihpon-jihpon Pohotala. Tului, karon mahcam kosusah jari ihkai ngarotoh hawui sabar,

EPESUS 3:7

Pohotala nonga ahkak'ku pononga – iotuh gawi – ahkan mborihta Kabar Hinut rih. Ahku norima pononga rih nguha kowasan Pohotala ijo bogawi ang luwang arop'ku.

KOLOSE 1:23

Tahpi kopunai ihkam harus tohtap te'et porocaya tutang tombok tehen aang koporocayan'kam. Ara nyiring ihkam molohkak koharap ijo jari tononga ahkan'kam, kotihka ihkam norima Kabar Hinut tahkan Pohotala. Kabar rih jari tomborihta ahkan nyinong ulun ang hopus kolunon. Tutang ahkan orihrih ka'a ahku Paulus jari monjadi pohalu.

KOLOSE 1:25

Pohotala nyuhu ahku monjadi pohalu ukup-Oh, ahkan kogunan'kam. Ahku harus monyapai borihta tahkan Pohotala, koparingoh;

1 TIMOTEUS 1:12

Ahku ngohawot torimakasih ahkan Kristus Yesus Tuhan ihto. Io jari nonga koba'as ahkak'ku ahkan mohalu Io, tutang Io ijo ngohu ahku layak ahkan gawi orih,

1 PETRUS 4:10

Ihkam nyino-nyinong jari norima pononga-pononga ijo hokobohkon tahkan Pohotala. Kotului orih kolou ponggawi ijo pios tahkan ponongan-ponongan Pohotala, hondakrih ihkam monggunaoh pongonduon rih ahkan kogunan sama-sama.