Matyu 25:34 - Oksapmin

³⁴ Ginaporpat oper tannong ma tongnoya gurnong oh Gur at Got ohe bapkeisi naham napapat han bap gurmur. Ama han bap gur rih mong na darpat patin orhor at orhor Norhe papindin hrepnong moh ham norhorsi dipdipwi pateprimur daham ma mamen mat natip da oh mama han bap gur apris datinmur napotipramur.

Matyu 25:34 ပူးပေါင်းရင်းမြစ်များ

Matyu 13:35

Imat ma porisuh oh arpin propet tit han ohe brak matip meng oh dam tarpapatmur. Ma brak matip oh Jisas ohe boknong mar Noh paham mengteiwi meng am deipramur. Ma am deipra oh mong na tarpat patin ma treman patesuhru patesuh meng oh noh potipramur. ritporhan propet ohe ma brak matip meng oh gin dam tarpapatmur.

Matyu 19:29

Gurwi imat wamat na papindiprimur. Gursi; kuuhan gonsio ihir gure ma hat saptiru nohnong dinahatinmat apo mongo kuu brero taptemo supir itapiro ama erer mandam nohnong dinahayanoh ama dinahaya han ihirsi guragur tap ham yan ruumsan datiprimur. Daripti dahe eimat paten dasi datiprimur.

Matyu 20:23

Potperhan oh Gut arpin nohe tap batbet datiprimur. Ihtin orhor nohe kat tan tongnoya kat tan tongnoya ma hatipri oh nohe basmur. At orhe damdapat orhor Mama ap tan moh mama han yot ihit sa tongnotipri rim mamen mat at pat yot han ihitwi orhe amamen mat pat tei oh tongnotiprimur pongop.

Matyu 21:5

Rim ma brak matip meng oh mamarumur. Kaput Jerusarem aptei gur wandeiyaoh gure napapindin han oh kopenohe donki bas oh tongnoma orhe dahe manap han ohoh ihan heisup dasi hat apripatin na wamtiprimur. Yah hat paten ohe manap dasi hat apripatin gur wamtiprimur. rim brak matipmur.

Matyu 25:21

Apriporhan oh wamara Go yahnap natamreipat hanmur. Noh garpok gwe bes teinong ma matip oh gin go pomat papat han ohoh ihan noh gin isip mat orhor gwe hrepnong matiprohmur. Ma imtiproh oh ditadite taman titwimur daham ditadit tap mat amam ham indiprohemur potipri.

Matyu 25:23

Apriporhan oh wamara Go yahnap hat natamreipat hanmur. Noh garpok gwe bes teinong ma matip oh gin go pomat papat han ohoh ihan noh gin isip mat orhor gwe hrepnong matiprohmur. Ma imtiproh oh ditadite taman titwimur daham ditadit tap mat amam ham indeiprohemur potipri.

Matyu 25:40

Napotperhan kakhan nohdapat Es. Norhe taptem gur win timbas han maihirnong ma panggeishe oh arpin gur nohnong inahashemur napotipramur.

Matyu 25:41

Oh oper tannong ma nahah han gure napotipra ohe meng ohmura; watah tanong dei han ihirnong oh Gure boknong oh Got oh heisup nahat pat han bap gurmur. Ihtin han bap gur nohnong namdama at Got ohe irat hashe na tikimapat dipdipwi has hatwi patepra apteinong moh kaput Satan ohsi orhe enser ihirsi sa hatipri rim amamen matip apteinong oh mama gur nohnong namdam eimat sonmur napotipramur.

Matyu 27:37

Ihama oh boknong mar ma suya ohe meng oh brak mar ohe suya ohe irat bok kakwit andeh saringopa. Brak mar ma itpa oh Moh Jisasmur. Juda ire kakhanmur por brak mat saringopa.

Matyu 3:2

Patin Got ohe yah hat napapindin oh kakduup hahmuro. Ihan gur da tamburketinmuro pot uarisuhri.

Matyu 5:19

Ihtin ohoh ihan gur Mama meng moh gar na tarpatin meng moh mandatpor daham ihirnong Gar na tarpatin meng moh mandatinmur poriya guroh Got ohe aptei hathe gurnong win timbas bap nahatipramur. Meng gonsi yah titwimur daham ma poripti han gure win oh Got ohe apteihe gurnong win isipsi bap nahatipramur.

Mak oh yah meng ma brak matip meng oh 10:17

Gahan Jisaso ihir Gin dir wan apteinong sapero rim mandap oh saptin tit han tit sakat aprisa Jisas ohe duup oh katin takir tongnongopri. Tongnoma Jisas ohnong Tisa. Yah hatwi sapat hana. Noh kinhat ushanoh yah hat eimat paten dasi hatiproh por dahandeingopri.

Mak oh yah meng ma brak matip meng oh 10:40

Ihtin orhor nohe kat tan tongnoya kat tan tongnoya ma hatipri oh nohe basmur. At orhe damdapat orhor Mama ap tan moh mama han yot ihit sa tongnotipri rim mamen mat at pat yot han ihitwi orhe amamen mat pat ap tan tei oh tongnotiprimur pongopri.

Ruk oh yah meng ma brak matip ohe meng oh 11:28

Potporhan Jisas oh Es. Nohnong non namdip kuu uhnong dahatipri. Amamsi kuuhan ihiroh Got ohe mengnong amram dindeipti bap ihirmur pongopri.

Ruk oh yah meng ma brak matip ohe meng oh 11:50

Ma ritip meng oh puh gure boknongsi tap mar napor giritipmur. Ihan gin mama dik ma pati kuuhan bap gur ihtin bap hat pati ohoh ihan mong kopen ma darpa pe orhor Got ohe meng pot pisapti han ihirnong sut ma pisasheru mat orhor ginhe mama sut pisapti oh ama ohe batbet gonsi oh gur datiprimur.

Ruk oh yah meng ma brak matip ohe meng oh 12:32

Giporpat Jisas oh orhe han ihirnong Norhe han pang han gurnong oh at Got orhe napapindin hrepnong naham Norhorsi paten ohe da oh ihirnong apriprawa dahat pat ohoh ihan gur na napriprakin daham da er hapri. Napriprawa daham da yah hatwi patenmur.

Ruk oh yah meng ma brak matip ohe meng oh 19:38

Got ohnong armi mar ohe win ma adaptuhutpa oh Hanipyah Got orhe mengtei apripat kakhan moh Got orhe yah mar bapkei mat papat han apripatmuro. Gin Got oh dirsi yah han ham manap dasi nahat napapatmuro. Ihan hanip dirhe putei mahat ma pat Got ohnong armi mar ohe winnong isip mar paptepero. por amam mat pihipari.

Jon oh yah meng ma brak matip ohe meng oh 1:49

Gipotporhan Natanier oh Tisa. Go nohnong imat napor moh ihan go Got ohe brermur. Go Isrer nuhurnong napapten han ham nure kakhan hat pat hanmur pongopri.

Jon oh yah meng ma brak matip ohe meng oh 17:24

At go mong erer moh kopen na tarpat patin orhor go nohe danong ham bopor naham winsi nahat napaptesuhmur. Gwe norhe han ma nadeipat hansi; komdapat ma norhe han nadeipra hansi ihir nohe ma patepra tei oh tap hat pateprineng dahapatmur. Norhorsi patim gorhe winsi nahapat da oh wamar ha dahatingwemur.

Jon oh yah meng ma brak matip ohe meng oh 19:15

Potperhan ihir Baes. Er oh pisona. Pisus irat bok sur garmar ha sutingwe ator mengtei pongopa. Potperhan Pairat oh Gure duuptei kamoheim oh irat bok sur garmar ha sutingweda potporhan Got ohe ap yawar hanat bok han ire duuptei han ihir Es. Nure duuptei kamoheim oh tit hanwi. Sisa ohwimur pongopa.

Aposer 15:18

Got oh Juda na hat pati han bap ihir nohnong angnahaprimur ritip ohoh ihan nohe da oh Juda na hat pati han Got ohe danong ma hapti ihirnonghe ruumsan meng oh ire boknong mar potiproheda. Ire boknong na potiprohemur dahat patmur.

Aposer 3:26

Dire boknong naham napotip ohoh ihan orhe atamreipat han ohnong ma pamsuhur oh Gin go susa ire er hat sapti da oh dat amdama bapkei mat papindinmur por pamsas dire patinongri nadarhetipmur potipri.

Rom ihirnong Por oh brak atip ohe meng oh 8:17

Dir Got orhe brer hat pati ohoh ihan orhe nat pat erer oh orhe brer Krais orhe darpatru mat orhorwi orhorsi taman titwi datiprimur. Orhe batbet ma datipru mat dariyahanoh ama imat dariya han bap dir has yahnap da oh orhorsi taman tap mat datiprimur.

1 Korin 15:50

Nohe taptem bapa. Nohe ma naporpat oh gur mihat ha dahatingwe rim naporpatmur. Hanip dire ina moh gonsi timbas hapat ina ohoh ihan ama ohe inasi hat patim Got orhe napapindin teinong na saprimur. Aw tei oh eimat paten inasi ham paten ap tei ohoh ihan mama pathar timbas hapat ina mohsi hathe na saprimur.

1 Korin 2:9

Ihir ihat na dahatpamur. Dirnong oh Got orhor orhe Yahsupnong Go sus ihirnong pinggim am matinmur potporhan oh dirnong namgim am nahapatmur. Ama reman paptesuh meng ma namgipat oh rih mamaru mat ritporhan brak matpamur. Got oh Kaput norhornong bopor nahat napapti ihirnong oh mama yah da moh apripramur daham mamen mat paptesuh da oh kin na wandeiya nat tem na amraya damdapat na dahaya hapti ohe da ohmur. ritporhan brak matpamur. Yahsup ohe ma namgipat oh orhor Got ohe dahapat da musum dus treman pat dao ama erer da wamara dirnong namgim am nahapatmur.

1 Korin 6:9

Got orhe napapindin hrepnong er hat sapti han ihir ma na hatipri oh gur na dahat patim ihat saptida. Er hat sapti han ihir Got ohe napapindin hrepnong hatiprikin daham guragure danonghe dasuh mathe pisasipri. Mohnong dahat patim ihat sashenmur. Bisei saw hat sayao dasuh got ire danong hayao han inap ihirnong abisei saw mat pisayao han yot gutagut bisei saw goshat sayao

Garesia 5:21

Tit er da orhap dahapat da ohmur. Tit er tom dam ma da ban tahat sapti da ohmur. Tit tarmuriya tei ma tohor meng goshat sus ma mian imah ire da hatin hat sapti da ohmur. Ama ihtin da muk oh diradire ma er hat sapti da muk ohmur. Ama ihat sapti han gurnong noh rih kasip mengtei napotipru ginhe it mama napor ohmur. Gur kaput Got ohe napapindin hrepnong na hatinmat ihaptimur.

Epesas 5:5

Nohe ma napotiproh meng moh gur arpin ma hapat dahat pati meng oh napotiprohmur. Mamarumur. Bisei saw goshat sapti ihiro imah mian ire da hatin hat er hat sapti ihiro nohewimur por ma abap mat pisapti ihiro ama bap ihir eimatnap Kraissi; Got ite napapindin hrepnong na hatipri bap ihirmur. Erer oh nohewimur por ma abap mat pisapti han bap ihir ama erernong iraire got hatin mat paptim ihat saptimur.

1 Tesaronaika 2:12

Nure apris gurnong ihat ma napapindiri oh guragure Got ohe danong hatin ohe danong nakasip deiyao ruumsup hat pati danong oh napanggeim pang nahayao Got orhe amam nahat napapindin ohe danong ohwi hat indinmur napor saw nasariyao nahat napapindirimur. Ama inahat napapat Got orhor gurnong Gur norhe napapindin hrepnong hatinmur. Hapti norhe has da moh guragur tap hat taman datinmur ma naporpat han Got orhormur.

2 Timoti 2:12

Dirhe ruumsupsi hat orhor kasip hat orhorwi ayahanoh dirhe ohsi kakhan titwi ham ihirnong paptim wamat indiprimura; wamat indiprimura. Diradire boknong dahama dirhe kas ham orhe win aremayahanoh ohhe kaput itap ohe kintei Noh maihirnong hanhanmur napor win naremdipramura; win naremdipramura.

2 Timoti 4:8

Timbas matporhan yan oh nang dap dakmeiriya han ireo rim ma mamen mat asariptiru mar Got oh Norhe danongwi kasip hat ma sapti han ire yan atpora rim ma nasarpat yan oh nohe mamen mat nat patmur. Kaput pepe dik oh Hanipyah duung dasi ma nasapat han orhor nasama ama mamen mat nat pat yan oh napripramur. Ama yan oh nohnongwi na napripramur. Hanipyah ohnong oh kapkap apris pitap teinong ha hatinoh daham kinkin da hat ma pati bap gursi gonsi diradirnong tap mat ama yan oh napripramur.

Hibru 1:14

Enser ihir gonsi oh Got ohe atamreipti da bap ihirmur. Ihtin bap hat patim Got oh Gur norhe ambutipra kuuhan bap ihirnong panggeim paptenmur por darhetporhan ihir arpin napanggeim napapti bap ihirmur.

Hibru 11:16

It iraire mandam apdapa mong teinong ma na pipa oh ihir wan mong yahnap mong aw teinong son ohe danong hat patim girishe ma hapat dahaptimur. Ihir ihat dahat ma pateshe oh Got oh Ihir aw teinong aprin ohe danong hat pati ohoh ihan ihir nohnong nuranure Gotmur naporiyahanoh yaho. Noh na kasa hat patmur. Ihan noh ire paten ohe ap mutuh oh matei amamen matpor dahama amamen mat mandatipmur.

Hibru 4:3

Dam timdin meng naporipti moh Arpin dam timdin meng naporiya ma hapat dahapti kuuhan dir oh orhe Matei sa tupetipri napor nakis matip teinong haptimur. Orhe tupet indin tei ohe meng ma napotip oh tit oh mamaru mat napotipmur. Noh ihirnong heisup mat papatim orhor ihir susa sa tupetipri ma dahat pat teinong oh ihir eimat eimatnap na hatiprimur. Noh heisup ham awam akwera giripatmur. Got oh ameng oh ritporhan brak matpamur. Got oh erer oh gonsi darpama mamen deipat orhor tuperpat ama tupetin tei oh patim ihirnong ameng oh potipmur.

Hibru 9:26

Krais oh Noh tit dah pokwi heim duker moh na yah hatiproh daham dire gwemat heim oh dipwi dukerpatneng batbet oh mong na darpa tei orhor batbet tit tit mat darpatru darpatnengmur. Tit dah pokwi heim dukerhan yah hatiprohwa dahatip ohoh ihan mama pati dik moh timbas hatin kakduup hah tei wandasa dire gwemat hapurpat orhe heim ohsi tit dahwi ma tanduketip oh dire er danong eimatnap timbas matipmur.

Jemis 2:5

Nohe taptem gur imat hanip sapri. Got orhe ma ihpatnong moh dahenmur. Oh Moh borop han hat pathe ihan noh mandatpor dahapatda. Basra. Kakdah mohe borop hat pati ihirnong Mama han oh norhe danong hat pat ohoh ihan norhor norhe danong hen ohe da oh ohnong kamah han matiprawa. Deipat Krais ohe ma papat hrepnong matiprawa. Deipat norhe danong hat pati han gurnonghe norhe napapat hrepnong moh arpin matiprawa dahat patmur. Got orhor ihat daham yah deipat han ohoh ihan hanip gur Moh borop hanhe por sapri.

1 Pita 1:9

Dir Ohwi inahatin hatin hanwa dahapti ohe pe oh Got oh nambur napapato rim dir ama amam ohsi hat patimur.

1 Pita 3:9

Ihat patima hanip ihir gurnong er naham inahayao dasei meng naporiyao nahayahanhe gurdapathe ire ma inahaya da oh Dirhe it yansi mar imtiper daham indeipri. Gurdapat oh Got ohe yah da oh ihirnong bapkeisi mat ha paptenoh rim Got oh ihirnong bapkei mat papten ohe meng ohwi adahamar paptenmur. Got oh Gur imat ihirnong bapkeisi mat papten ohe meng oh nohnong dahanahatperhan noh ihirnong bapkei dei gurnong bapkei nahah nahat napaptepramur napor orhe brer naham kis nahatipmur. Imat kis nahatip ohoh ihan gur ire imat adahamarwi paptenmur.

Erer tarpatipra 13:8

Imat wamat patin mong mong mama pati gonsi ihir ama kurwah ohe danong ham ihir armi deiprimur. Gonsi armi deipri orhor kat ihir mong na tarpat patin orhor da dipwi paten ohe brak tei ma win atip ihir ohnong na armi deiprimur. Da dipwi ma patepri ohe brak oh sipsip bap hatin ma sutpa han ohe brak ohmur.

Erer tarpatipra 17:8

Mamarumur. Gwe ma wandei kurwah oh rih patesuhmur. Gin na patmur. Ihtin orhora; kimsidapat ditin timbas tanggapdapat marasa it pat hatipramur. Pat hatporhan eimat timbas matin teinong matipramur. Na mat patin oh kuuhan ire win rih mong na tarpat patin orhor da dipwi paten ohe brak teinong win na atip ihir wamar Epe. Rih patesuh ma hapat. Gahan timbas hatip ma hapat. Gin it pat ma hapat daham da trun darhetiprimur.

Erer tarpatipra 19:16

Ama han oh among among dire kakhanhe orhorwimur. Dire hanipyah hat pat oh orhapnap kakhan hat pat hano rim orhe watah dapsi an pat ohe boko orhe mun boko oh ama ihat pat ohe win oh abrak matpasi han oh patgop.

Erer tarpatipra 21:7

Er danong ire merwi mar suya han ihirnong noh ama han ihirnong norhe brer mara nohe erer oh apripramur. Aprisa Got noh ire armi nahatin han itap hat paptepramur.

Erer tarpatipra 5:10

Ihirnong dire Got ohe nita bap matipwa; nita bap matipwa. Iham ihirnong gorhorsi tap ham kat han ihirnong papindin han matipwa; papindin han matipwa. Mara Got ohe hanat bok han matipwa; hanat bok han matipwa. Imtip han ihir kakdah mong ohe kakhan hatipriwa; kakhan hatipriwa ihat ga rim armi deiptingopa.