Matyu 16:16 - Oksapmin

¹⁶ Dahanahatporhan Saimon Pita oh Go Got dipwi patesuhru patru pat han ohe monmur. Go Got oh Noh hanip ihirnong amburin han tit darhetipramur rim ma kis matip han oh gomur pongop.

Matyu 16:16 ပူးပေါင်းရင်းမြစ်များ

Matyu 1:16

Jekop oh Josep ohe itap oh. Josep oh Maria uhe imap ohmur. Inap Maria uh Jisas ohnong ma itip kuu uhmur. Jisas oh Got orhor ihirnong ambutipra hanmur potip hano rim Krais porishe han ohmur.

Matyu 14:33

Ihtiporhan bot dah tongnot pati han nuhur Go arpin Got ohe brerhe dahayamur pora ohe danong ham armi matpa.

Matyu 16:15

Potperhan oh Gin guragurra nohnong de hano naporipti napor dahanahangop.

Matyu 26:63

Potporhan Jisas oh kimirit mandangopri. Ihtiporhan Got ohe ap yawar hanat bok han ire duupteinap han oh Gin go Got ohe brer darhetipra ma ritip brer Krais oh goda. Gohanoh Dawa. Noh Got ohe nadarhetipra ma ritip brer Krais oh nohmur rim Got dipwi pat han ohe winnong rim awam tuketinmur. Go wan hanhanhe Go Noh wan hanmur rim awam tuketinmur pongopri.

Matyu 27:54

Jisas oh irat bok sar garmat patin orhor ami ire kakhano orhe hrep pati hano ihir sein kak oh kwet patin Jisas oh da maras uso bipi isip apiro hatporhan ihir wamara kas isip tit hangopa. Hama moh arpin Got ohe brer ma hapat dahangopa.

Matyu 4:3

Pahoh hatporhan er da nahapat han oh aprisa Go Noh Got orhe brermur ripat ohoh ihan kwei moh den mara dinmur pongopri.

Mak oh yah meng ma brak matip meng oh 14:61

Dahamtiporhan oh Dawa go ama ri ohwa. Gur wanahayaoh Hanip Brer noh han kasipnap han ohe bes oper tan oh tongnoma rian tap aw tei maruh apripatin wanahatiprimur pongopri.

Ruk oh yah meng ma brak matip ohe meng oh 2:11

Gure amamnap hatin ohe meng oh mamarumur. Gin mama kwitem morhor Depit ohe ap mutuh moh kakdah pati kuuhan gurnong namburipra brer tit sariyamuro. Oh Got orhor Ihirnong sa amburipra rim kis mat pat han Hanipyah Krais ohnong sariyamuro.

Jon oh yah meng ma brak matip ohe meng oh 1:49

Gipotporhan Natanier oh Tisa. Go nohnong imat napor moh ihan go Got ohe brermur. Go Isrer nuhurnong napapten han ham nure kakhan hat pat hanmur pongopri.

Jon oh yah meng ma brak matip ohe meng oh 11:27

Jisas oh potporhan Mata uh Hanipyaha. Dawa. Noh gonong Go Got oh ihirnong ambutin han kakdah darhetipramur rim ma kis nahat napapatdapat nadarhetir han oh gomur dahat patmur pongop.

Jon oh yah meng ma brak matip ohe meng oh 20:31

Nohe mama brak dei oh Gur Jisas ohnong Oh Got orhe Noh ihirnong ambutin han darhetipramur ma ritip han oh oh ma hapat. Orhor Got ohe brer ma hapat. Oh orhe kasip eimat paten dasi nahatin han ma hapat daham eimat paten dasi ha hatingwe rim noh mama brak dei ohmur.

Jon oh yah meng ma brak matip ohe meng oh 6:57

At oh eimat paten dasi hat pat han ohoh ihan nohnonghe ama da ohsi naham nadarhetipmur. Ama da ohsi naham nadarhetip ohoh ihan nohe ina boknong ma nadaya gur ama da ohsi haptimur.

Jon oh yah meng ma brak matip ohe meng oh 6:68

Napotporhan Saimon Pita oh Hanipyaha. Nuhur nihohe pat ha songwe. Gorhorwi eimat paten dasi nahatin meng oh naporpatmur.

Jon oh yah meng ma brak matip ohe meng oh 6:69

Ihan nuhur amram dahama Gowi inahatin hatin ma hapat dahat patimur. Dahat patim go Got orhor da ongeng mat papat han yah tit darhetipramur ma dahatip han oh go ma hapat daham am hat patimur pongop.

Aposer 14:15

Hanip gur kianorim nute danong hatperim ihapti. Nuhutra hanip diradir basda. Hanip tap bap diradirmur. Gin nuhut gurnong guragure na napanggeitin han erer ohe danong ma hat pati da moh mandama eimat patru patepra Got orhe danong hat paten ohe yah meng oh napotinmat mama apripti ohmur. Ama ihat patru patepra Got orhor aw tano mong tano tom hruo mong tan tei mama darpatip han erero oh ama Got orhorwi erer oh gonsi gon darpatip Got ohmur.

Aposer 8:36

Pot susa tom hru gar duup tit kotpari. Koripti ama han oh Pirip ohnong Tom hru moh noh Got ohe danong ham waprohmur. Noh kinhapat han ohra ihan noh na waproh pongopri.

Aposer 8:37

Potporhan Pirip oh Go Jisas ohwi inahatin hatin hanwa pomat dahat pathanoh yahwa. Tom wayona potporhan oh Dawa. Noh ihat ma dahat pat oh noh Jisas oh Got ohe brer ma hapat dahat pat ohoh ihan noh tom waprohmur pongopri.

Aposer 9:20

Sor ohe Damaskas ap mutuh ma indip oh ama yah hah dik orhor Juda ire rotu ap ap oh rosa Jisas oh Got ohe brermur rim Jisas ohe meng oh pot pihipri.

Rom ihirnong Por oh brak atip ohe meng oh 1:4

Ma tarpatipra oh yahnap hat paten danong oh Moh Got orhe brer ma hapat dahat paten ohe da oh Got orhe kasip oh ohe boknong pitap mara namgitipramur. Imat ma namgitipra oh orhe kasip ohsi mon ohnong pamsaporhan arpin orhe mon ohnong imat pamsa ma hapat dahatiprimur rim brak matpamur. Imat rim ohe boknong mar ma brak matpa oh diradire Hanipyah Jisas Krais orhe bok oh dam timama dam tarpatipmur.

2 Korin 1:19

Sairaso Timotio nuhur Got orhe brer Jisas Krais oh mihat pat hanmura; mihat pat hanmura ma napotiri han oh tandapat dawa ripat tandapat es ripat handa. Basra. Dawa. Noh inahatiprohwa ripat meng orhorwi ripat hanmur.

2 Korin 3:3

Gurnong wanaham ma am hapti oh mamaru hat patmur. Nuhur gure mutuh tamreiptin gur Got ohe danong hatirimur. Hatperhan kat ihir wanahama Ama ihir Krais orhe mengtei ihat sapti ohe pe oh maihir ihat pati ma hapat daham am haptimur. Gure ma ihat pati oh patesuhru patru patepra Got orhe Yah Sup oh gure paten da mutuhnong imtipmur. Ma imtip oh nure ma yah hat pati meng oh brak mar Krais ohe bes teinong matporhan orhordapat ihirnong pinggit papat hatin mat papatmur. Ama brak oh ihirnong ma pinggit papat oh rih Moses ohe kintei Got oh orhe meng kwei tan tei brak matip mengru hatin basmur. Hanip guragure mutuhnong napapatin ihir wanaham am haptimur.

2 Korin 6:16

Kakdah dasuh got ire ap yawar ohsi; Got orhe ap yawar ohsi tit apwi matin hatinda. Basra. Na imtin hatin ohoh ihan gur sahsah mathe paptepri. Got oh ritporhan ma brak matpa mengnong moh dahenmur. Ma brak matpa meng oh mamarumur. Got oh Noh ire ina oh norhe ap yawar hatin mara ire ina mutuh oh noh patepramur. Ihat ma patepra oh ihirnong norhe nita mar paptepramura; ihirdapat norhornong Nure Gotmur napor napapteprimur. ritporhan brak matpamur. Giritporhan ma brak matparu orhe nita ma nahat pat dir gonsi dipwi pat han Got orhe ap yawar ongeng mat apapten ohe ap yawar hatin hat patimur. Ihat pati han dir ohoh ihan gur Got ohe danong na hapti han ihirsihe sahsah goshathe patepri.

1 Tesaronaika 1:9

Mong mong ama ihir am hama gure boknong ma ripti meng oh mamaru hat riptimur. Ihirdapat oh Tesaronaika gure boknong ihir Got ohe nita bap ma pati ihir Poro ihir Tesaronaika apteinong saperhan ihir amam da tei orhor ambutiriri. Amburipti meng amram dasuh got apsupnong mandatiriri. Mandama arpin Got patesuhru patru patepra han orhe han ham atamreinpera daham orhe atamrein han bap hatiriri.

1 Timoti 4:10

Arpin meng ma hapat dahapti ohoh ihan dipwi pat Got oh kakdah han bap gonsi dirnong namburin han ma hapat. Namburin han hat pat ohoh ihan arpin orhe danong hat ma pati bap dirnong nambutipra ma hapat daham minhan wamat patimur. Inahatipra hanwa daham kasip hat orhor atamrein saptimur.

Hibru 10:31

Ihat patru pat han orhe bes teinong er da oh pranahat napisashen oh ero rim pranahat dahanaham nasapat han orhe bes teinong napisaprarim orhornong kasa hat orhorwi patenmur. Orhor imat nasam inahatin han ohoh ihan orhe brernonghe kom asaripri.

Hibru 12:22

Got orhe danong hat pati bap gurri ihtin ohe yei duupnong na haptimur. Gur patru patepra Got orhe pat duupnong hat patimur. Gur ihat ma pati oh awher ire Saion yei ka ohe Jerusarem ap mutuh Got oh matei patmur rim ma ohe patnong sasheru hat orhor gurhe orhe pat duup sus patimur. Got oh aw tei ma pat han orhe pat tei oh enser ruumsan na satin hatin da bap ihir tarmur amam hat pati tei ohmur.

Hibru 3:12

Guragure ranir ihirhe ihashe ohoh ihan norhe taptem gurhe ihtin danonghe hapri. Ihan gure mutuh oh er da ham Got orhorwi inahatin hatin hanwa na daham eimat patru patepra Got ohnong kom atin da oh tarpatiprarim potahat watahat patenmur.

Hibru 9:14

kakdah ohe apop gapa heim ohsi imat pondeishe ohoh ihan Krais ohe kasip heim oh atnap yahnap nahapat ma hapat dahaptimur. Orhe bok andeh mihihnap bok ina hat patin eimat paten ohe Yahsup ohe kasip ohsi dire gwemat haputipmur. Ihat mihihnap hat pat han oh heim tandurker haputip ohoh ihan ina teimdapatwi na yah nahapatmura; dam na tarpatin ohe er da oh hapti damdapat Gin orhor ma ihpat ohe er oh er hat pat sa daham damdapat ma dahapti da ohsi tap mat yah nahapatmur. Yah nahama dire patru patepra Got orhe atamreindin inasi nahapatmur.

1 Jon 4:15

Ihat am hapti Jisas oh arpin Got orhe brerwa daham riyahanoh ihat ma daham ripti han bap gure mutuh oh Got orhor patmur. Gurhe Got ohsi tap hat patimur.

1 Jon 5:20

Dir am hat patimur. Got orhe brer oh kakdah mama wandas patesuh ohe pe oh dire da nadapema arpin Got orhornong am hatin ohe da oh napdapmur. Napriporhan dir ohnong am haptimur. Am hapti orhe brer Jisas Krais ohsi tap hat ma pati oh Got orhorsi tap hat patimur. Ama ohsi ihat pati Got orhor arpin Got eimat paten dasi nahapat Got orhormur.

1 Jon 5:5

Kakdah mohe danong ambapte deipti han bap ihir de ihir dahayahanhe Jisas ohnong Got orhe brer darhetip hanwa ma dahapti han bap ihirwi kakdah mohe danong ambapte deipti han bap ma hapat dahenmur.

Erer tarpatipra 7:2

Gahan noh wandeioh it Got ohsi pati da ihir tit han atan marapat katdapat apripatgop. Apripat oh kuuhan ihir wamara Moh dasi patru pat Got orhe nita ma hapat ha dahengwe rim ire boknong abrak matin han oh marim apripatgop. Apris hatriphei Got ohsi pati bap maihirnong Got oh mongo tom hruo ihirnong er matin ohe kasip oh apriporhan kopen na mamen mat patin gin ihir er matiprohekin daham