Korosi 3:11 - Oksapmin

¹¹ Orhor hatin nahat napisapat ohoh ihan gur Noh Juda bap han hat patwa. Noh Juda bap na hat pat hanwa. Noh eit watah gatmatin han hat patwa. Noh eit watah na gat matin han hat patwa. Oh hohop han hat patwa. Oh da kapot sar ma ihat sapat han hat patwa. Oh ire hrepdapat hat patin be atamreipat hanwa daham guragure ma ihat pati danong ohri hapri. Ama ihapti da oh na napanggeitin da ohoh ihan ama danong ohri hapri. Krais orhorwi napanggeitin ohe duupteinap han hat pat ohoh ihan orhornongwi dahat patenmur.

Korosi 3:11 ပူးပေါင်းရင်းမြစ်များ

Jon oh yah meng ma brak matip ohe meng oh 14:23

Potporhan oh Ei. Nohe danong ham ma bopor nahat pati gur nohe mengnongwi amrat patimur. Ama amrapti han gurnong oh at oh bopor nahama nuhut apris gursi eimat napapteprimur.

Jon oh yah meng ma brak matip ohe meng oh 15:5

Noh dam timapat nangbarmur. Gur nohe temur. Gur nohsi aya noh gursi a hat ayahanoh gur dam ruumsan timaprimur. Nohsi na ayahanoh eimat dam na timdin inasi hat patimur.

Jon oh yah meng ma brak matip ohe meng oh 17:23

Tit hanwi hat ha patengwe rim ma indeipat oh go nohsi patru noh ihirsi ihat patepora daham indeipatmur. Indeipatin tit dawi hat pati da oh dam timdiporhan kakdah maihir wamara nohnong Orhor darhetip han ma hapat. Itap oh ama darhetip han ohe danong ham bopor mat papatru ire danonghe oh imat bopor mat papat ma hapat sa dahapri.

Aposer 28:2

Ripti tom inimsi ham mong er hat pat mong ohoh nuhur damesi hat patin ihir nure danong ham nambur irat natendeingopa. Natemtiperhan nuhur gonsi irat kaknong susa dame tinggitpa.

Aposer 28:4

Gandut pot papatin ama ihir wamara Epe. Mama han moh hanip susuh hankino. Ama orhe hanip ihirnong susuh ohe pe oh orhornong tom oh sutin orhor na sutmur. Ma na sut oh gin ha haputinoh rim inapawam oh bes moh sumur goshangopa.

Rom ihirnong Por oh brak atip ohe meng oh 1:14

Nohe taptem gur mohnong dahatinmur. Got oh yah naham meng ma napin pat moh nohnongwi na napin pat ma hapat dahapatmur. Kuuhan gonsi ihirnong potin ohesi tap mat napin pat ma hapat. Ihan ihirnong potin ohe dahe yan hat hatin patmur. Meng potin da ma isip yan hat hatin ma pat oh Grik ma poripti han bap ihirsi; Grik na hat pati han bap ihirsi tap mat potin meng oh isip yan hat hatin patmur. Dakuu hat pati han bap ihirsi; da hut pati han bap ihirsi tap mat potin meng oh isip yan hat hatin patmur.

Rom ihirnong Por oh brak atip ohe meng oh 10:12

Ritporhan ma brak matpa oh Got oh Juda hat pati han irarhe hat patimura; Juda na hat pati irarhe hat patimur daham ameng oh ritipda. Basra. Juda hat pati bapsi; Juda na hat pati bapsi Got orhor tit bapwi nahat napapatmur. Inahat napapat han oh diradire gonsi Hanipyah tit pokwimur. Ama inahat napapat han ohnong dir Gorhor nuhurnong napanggeitina por dahamtiperhan orhe damdapat Noh imat bapkei matpora ma dahapat da oh ama imat dahandeiya han gonsi dirnong tap mat bapkei naham isip mat orhor napripatmur.

Rom ihirnong Por oh brak atip ohe meng oh 3:22

Ama kat oh mamarumur. Jisas Krais ohe danong ham Ohwi inahatin hatin hanwa dahatperhanwi Got oh Gur yah hat pati bapmur naporpatmur. Juda bapo Juda na hat pati han bapo diradir gonsi Got ohe kintei er hat susa orhe amam nahatin ohe yah danong akap mar ihat saptimur. Diradir tap hat gonsi dir ihat pati ohoh ihan dirnong Gur yah hanmur napotin kat oh tit Juda bap irarhemur. Tit Juda na hat pati han bap irarhemur napotin kat oh yot kathe ti na patmur. Diradir tap hat er hat pati bap dir ohoh ihan tit kat pokwi hat patwimur.

Rom ihirnong Por oh brak atip ohe meng oh 3:29

Eit watah gatmar Juda bap hat patim Got oh inahatin hatin hanwa ma dahapti ohe pe ohwi Got oh Gur yah han bapmur naporpatmur. Watah na gatmat pati han bap gurnonghe Got ohwi inahatin hatin hanwa ma dahapti ohe pe ohwi Gur yah han bapmur naporpatmur. Juda hat pati han bapsi; Juda na hat pati han bapsi ihat tit dawi hat pati ohe pe oh Gur norhe yah han bapmur naporpat ohoh ihan Got oh Juda ire Gotwi basmur. Diradire Got tit pokwi hat patmur.

1 Korin 12:13

Dir ihat trun han bap hat pati orhor tit inawi hat ma pati oh mamaru hat patmur. Juda hat pati han bapo Juda na hat pati han bapo ire hrepdapat nang tatpat patim be atamreipti han bapo ire hrepdapat nang na tatpat patim be han hat pati han bapo ama trun han bap hat ma pati han bap dirnong oh Got oh orhe Yahsup oh dire mutuhnong namtiporhan dir tap hat patim tom wasa Krais ohe ina ohsi dir tit inawi hat patimur.

1 Korin 14:11

Amram am hatin mengwi ripti orhor nohe na amrapat mengtei naporiyahanoh noh amram ama meng naporiya ma hapat daham am hatiprohda. Basra. Noh na amrapat meng ohoh ihan ama napor han ohsi nuhut hahap goshat hatin hat pateprohemur.

1 Korin 7:19

Got oh eit watah gatdeiptio na gatdeiptio ohnong dahapat handa. Basra. Ama ihaptinong oh ina teimdapat ihaptio rim oh na dahapatmur. Da mutuhdapat ma Got orhe sawa mengnong amram dimat ayanong asohwi yaho dahapatmur.

Garesia 2:20

Noh Krais ohsi tap hat irat bok sur garnahatperhan orhorsi tap hat haputip hatin hat pat ohoh ihan norhe ma pat moh norhe da basmur. Krais orhe da oh nohe mutuh mahan patin ihat patmur. Ihat pat ohoh ihan noh kakdah mama pat moh Got ohe brer oh nohnong hinhina naham ma haputip han Krais ohnong Arpin ohwi inahatin hatin hanwa daham noh mama pat ohmur.

Garesia 5:6

Jisas Krais ohsi tap hat ma pati dirnong oh Got oh eit watah gatmatperhan ama gatdeiya ohe pe oh Go yah hanmur naporpatda. Na gatdeiyahanhe ama na gatdeiya ohe pe oh Go yah hanmur naporpatda. Basra. Ama gatdeiya na gatdeiya hapti ohe pe oh na ginaporpatmur. Jisas Krais ohe tapnong hat patim Ohwi inahatin hatin hanwa daham ihirnong bopor mar panggeipti ohe da ohwi Got oh wanaham Go yah hanmur naporpatmur.

Epesas 1:23

Imat kakhan matip han Jisas Krais oh aw pe mong pe mong mong moh gonsi patwimur. Mong mong moh gonsi patim erer oh gonsi yah deipatmur. Ihat patin orhe nita diroh orhe boknong ham dam inasi mar yah deiptimur.

Epesas 2:14

Inahat ma napapat oh Juda hat pati han nuhursi; Juda na hat pati han bap gursi mahaw gosham dohosi ham apet goshat patin gahan Krais orhor dire ihat pati mutuh doho oh naurkamara diradir da gosar manap goshat indin dasi naham tit han bapwi nahat napapatmur.

Epesas 2:15

Yot bap hat pati bap dirnong oh tit bapwi nahatinmat oh Juda nure pohon sawa meng oh Gur ihat patenmura; ihat sashenmura rishe sawa mengnong oh orhe haputip ohe pe oh amkar namdatipmur. Amkar namdama yot han bap ma hat pati oh gin kopenohe han bap titwi nahatipmur. Nahatporhan gin manap gosham yah hat mama pati ohmur.

Epesas 3:17

Papatin ihir Krais orhorwi inahatin hatin hanwa ma dahapti ohe dap tei oh Krais orhor ire mutuhnong ham ha patenohmur. Ihat patin Got gorhornongsi; hanip ihirnongsi bopor mar da apripti ohe da oh ire mutuhnong ha hatinohmur. Hama irat kaker oh mong mutuhnong yah hat wasa iratnong ma kasip deipatru hat orhor bopor mar da apripti ohe dahe ihat orhor ha kasip deinohmur.

Epesas 3:6

Ama nareman paptesuh da ma namgipat oh mohmur. Krais orhe inahapat yah meng ohe pe oh Juda hat pati hansi; Juda na hat pati hansi diradir tap han bap titwi hat pati ma hapat. Titwi hat patim Krais orhe dap teidapat Got orhe rit natip meng oh diradir tap hat titwi daripti ma hapat. Ma daripti oh Got orhe bapkei nahapat da oh gonsi diradir tap hat daripti ma hapat dahatin ohe da oh hanhan hat patin gin mama pitap teinong mara namgitporhan gin gonsi am ham dahat patimur.

Epesas 6:8

Ihat ma atamrein sapti han guroh mohnong dahat patimur. Hanipyah oh duuptei han ire yah hat ma tamreipti yano ire hrepdapat hat patim be yah hat ma tamreipti ohe yano oh yah yan tit pokwi Hanipyah oh napripatwa dahat patimur. Ihat dahat pati ohoh ihan amam ham pan hat orhorwi atamrein sashenmur.

Korosi 2:10

Ama ihat sasuh han Krais orhor kakdah han maire nure hrepnong mar nuhur kakhan bapmur ma ripti bap ihirnonghe orhorwi orhe hrepnong mar papatmur. Ihat napapat han oh orhe tapnong hat ma pati han bap gurnong oh orhorsi pati ohoh ihan gurnong oh orhor hatin hat pati da oh isip mat orhorwi napris napapatmur.

1 Jon 5:20

Dir am hat patimur. Got orhe brer oh kakdah mama wandas patesuh ohe pe oh dire da nadapema arpin Got orhornong am hatin ohe da oh napdapmur. Napriporhan dir ohnong am haptimur. Am hapti orhe brer Jisas Krais ohsi tap hat ma pati oh Got orhorsi tap hat patimur. Ama ohsi ihat pati Got orhor arpin Got eimat paten dasi nahapat Got orhormur.

2 Jon 1:9

Han ihir Krais orhe naporpat mengnongwi marin na paptema wan meng tit ohe boknong dip mar pot pisayahanoh ama ihat sapti han bap ihiroh Got ohsihe tap hat na pati han bap ihirmur. Krais orhe naporpat mengnong asoh arpin meng ma hapat daham kasip ham marin papayahanoh ama ihapti han gur itap ohsi; mon ohsi itait tamansi tap hat pati bap gurmur.