Korosi 1:10 - Oksapmin

¹⁰ Imat ma nadahandeipti oh Hanipyah orhe hrepdapat hat patim yah hat sapti dao orhe bopor mat pat ohe dao ama da ohsiwi hat ihir ihat ha sashengwemur. Ihat susa Got gorhornong am hatin ohe dao yah hatwi sashen ohe dao oh isip hat ha sashengwemur.

Korosi 1:10 ပူးပေါင်းရင်းမြစ်များ

Jon oh yah meng ma brak matip ohe meng oh 15:16

Gurdapat Dir orhe han hatper daham norhe han na haptimura; norhordapat gurnong Norhe han matpor daham norhe han nahapatmur. Gure da oh dam timama eimat ha patenoh rim inahapatmur. Inahapat ohoh ihan guragure dahaya da oh norhe mengtei at ohnong dahandeiyahan at oh ama daham dahandeiya da orhor napripramur.

Jon oh yah meng ma brak matip ohe meng oh 15:8

Inahatporhan gur ihat dam trun haptin ihir gurnong wanaham Moh Krais ohe nita han ihir ma hapat daham at ohnonghe win isip han matiprimur.

Jon oh yah meng ma brak matip ohe meng oh 17:3

Eimat paten dasi ham ma patepri oh mamaru hat pateprimur. Arpin Got gonongsi; gorhe darhetip brer Jisas Krais nohnongsi nuhutnongwi Ihit ihat pati han yot ma hapat daham nuhutnong am hat paten ohe da orhorwi tei dahat tei dahat patiru hat orhorwi pateprimur.

Rom ihirnong Por oh brak atip ohe meng oh 1:13

Nohe taptem gur mohnong dahatinmur. Nohe da oh dipwi gure patinong apripora dahapat orhor apripor ihah tei oh ti da ti da oh apris mandap gatnahapatmur. Noh gure patinong apripora ma dahat pat oh nohe mong mong mama Juda na hat pati han bap ihirnong noh meng pot pisapat ohe pe oh ire Krais ohe danong ma hapti da oh gurhe ihat ha dahat patengwe rim noh apripor dahapatmur.

Rom ihirnong Por oh brak atip ohe meng oh 4:12

Gure rawi basmur. Gatdeipti han bap nuhurhe eit watahwi gatmat na mandama orhe eit watah na gatmat patim orhor Got orhorwi inahatin hatin hanwa ma dahat patesuh da hatin hat orhor ma pati bap nuhursi diradir tap da ham tit bapwi hat pati ohoh ihan diradire duupteinap aw oh Epraham ohmur.

Rom ihirnong Por oh brak atip ohe meng oh 6:4

Ihat ma tom waihiri oh niyarit haputperhan ohsi tap mat sein nasariya hatin ham tom waihirimur. Ihat ma waihiri oh er danong hatin ohe da oh ha haputinoho. Hapurit itap ohe wanohe yahnap kasip ohsi Krais ohnong ma pamsuhupru nohnonghe kopenohe yah danong hat son ohe da inasi nahat ha napamsonoh daham tom waihirimur.

2 Korin 2:14

Mahaw ihirdapat kat mahaw ihirnong ire merwi mar ti tapmar pisaptimur. Pisusa iraire aptei oh Nuhur hanip maihirnong ambura nure han deiyamur rim amam ham birhiptimur. Amaru hat orhor Got oh dirnong Ihir Krais orhe tapnong hat patio rim kuuhan ire kintei oh dipwi amam nahat napisapatmur. Napisusa aptei aptei oh orhe meng pot pison inasi nahatporhan meng pot pisaptimur. Meng pot ma pisapti oh apop temtiperhan sahren gwe oh tit uhe rum tem tit uhe rum tem ros sapatru hat orhor orhornong am hatin ohe meng ohhe ihat hanip mutuh ros among among oh artahat sapatmur. Orhor imat napisapat han ohoh ihan nuhur Got orhornongwi weso por armi mat paptimur.

2 Korin 4:6

Rih mong moh has timbas hat patin Gin mong moh ha has hatinoh ma ritip Got orhor nure danong nadapem nahas mat napapat Got ohmur. Has nahat ma napapat oh Got orhe yah hat paten ohe has da oh Jisas ohe boknong atan kakeir hatin has mat papatin dir ama hasnong wamara orhornong am haptimur.

2 Korin 5:9

Ohsi tap hat paten ohe danong oh isip hat pati orhor dire isipnap ma dahat pati oh Got orhornong Gin kakdah mama patihe Got orhor amam hat paten ohe da ohsi hat orhor patepera. Hapur sus orhorsi tap hat patimhe orhor amam hat paten ohe da ohsi hat orhor patepriwa daham orhe amam hat paten ohe danong ohwi isip hat saptimur.

2 Korin 9:8

Imat panggeitpera ma dahapti gurnong oh Got oh Noh ihat ma pan hat yah mat orhor apripti ihirnong oh noh iraire din ohesi; ihirnong panggeitin ohesi ruumsan mat orhor tap mat apripora daham imat napin inasi nahat napapatmur. Inahatin inasi nahat pat ohoh ihan guraguresi; ihirnong yah mat panggeitin ohesi tap mat ruumsan mar bapkei mat orhor napripatmur.

Epesas 1:17

Noh Got ohnong gure ihat pati meng ma nadahandeipat oh At Gota. Has yah dasi han go nure Hanipyah Jisas Krais ohe Gotmur. Ihtin han Got go ihir Got oh Ihtin han Got pat ma hapat ha dahatingwe rim go gorhe Yahsup ohsi ihirnong da tanpetin dasi mara dakuu deio mat paptenmur por noh Got ohnong nadahandeipatmur.

Epesas 2:10

Orhor nambutin inasi nahat napapat moh rih orhor Got oh Krais Jisas orhe tapnong hatipri bap ihir mama yah da mama yah danong hat sa sasipri daham ama yah da oh mamen mat natipmur. Mamen mat nasara ama mamen mat natip yah danong hat sashen ohe inasi naham kis naham napapatmur.

Epesas 4:1

Noh Got ohe atamreipat hano rim karapus nahat patimur. Karapus hat pat han norhor Got oh Krais ohe kasip ohsi inahapato rima noh kasip meng tei gurnong mama meng moh napotiprohmur. Got oh Gur norhe nita kuuhan bap hama mihat sa sasipri daham ma kis nahatipru hat orhorwi gurhe ihat orhorwi sashenmur.

Epesas 4:13

Nitat mat ma napdap da ohsi isip hat orhorwi saptin saptin kaput Got ohe mon oh ihtin hanhe daham am hapti dao Ohwi inahatin hatin hanwa dahapti dao oh kaput tap kat ham titwi hatiprimur. Hapti Krais orhe hanip yah ham ma pat da hatin orhor dirhe hanip yah ham orhor hatin hatiprimur.

Epesas 5:10

Ama dam ohsi hat susa Hanipyah ohe Moh yahmur napor ma amam hat pat danong asoh dason tahat sasipora daham dason mat orhorwi sashenmur.

Epesas 5:15

Gur has teinong hat pati han bap gur ohoh ihan da hut patim kwitem dus ohe da hatin hat pati han bap ire da hatin hat sasipri. Dakuu hat ma has teinong sapti han ire da hat saptiru hat orhorwi potahat sashenmur.

Epesas 5:2

Krais oh dirnong bopor nahama dire gwemat haputipmur. Dire gwemat ma haputip ohe gapgwe oh ap yawar tei apop atendeipti ohe gapgwe hatin hat sus Got ohe rum tem roporhan oh da yah ham amam hatipmur. Ihan Krais oh dirnong imat bopor naham haputipru hat orhor gurhe arwananah ihirnonghe imat orhor bopor mar da apris paptenmur.

Piripai 1:11

Ongeng tahat patin gorhe duutin dasi hat ma sapat da oh Jisas orhe nita bap ihirnong yah mat orhor apripatru mat orhorwi ihirnonghe imat teip mat orhorwi apris paptenmur. Imat teip mat apisapatin ihir wamara am hapti gorhornong armi nahamo winsi han nahamo ha nahatingwemur por nadahandeipatmur.

Piripai 1:27

Gin gur amratin. Isip meng tit napotiprohmur. Meng isip oh mamarumur. Krais orhe yah meng ma napotip danong amram pomat ma dindeiptiru hat orhorwi sashenmur. Ihat susa Por oh apirhanhe dir yah hat saptin orhor ha wanahatinoh. Na apirhanhe dire yah hat sapti meng orhor ha amratinoh daham yah hat orhorwi sashenmur. Yah hat orhorwi sapti meng ma noh amratipra oh mameng mohmur. Ihir yah mengnong na mandama kasip hat orhorwi patimuro. Patim tit dawi hat patim tit han ohwi ha tamreipat hatin hat patim meng moh Arpin menghe ha dahatingwe rim pomat orhorwi kasip mar meng pot pisaptimuro.

Piripai 4:18

Gure Epaprodaitas ohe kintei ma natiri oh oh popris napriporhan noh gonsi datirmur. Darpat gin na hatip hama ruumsan hat orhorwi patmur. Ma natiri oh Got ohnong apop gapgwesi mar atendeiyarit oh gapgwe mar da yah hapatru mat orhor Got ohnong da amam mar nohnonghe natirimur.

Korosi 2:19

Ire ma ihapti oh hanip diradire ina boknong moh dahenmur. Hanip diradire hito meo tam mingo dip taham isip hat ma sapat oh kak ohe pe oh isip hat sapatmur. Amaru hat orhor Got orhe nita sios bap dir Krais orhe meo tam mingo hito oh hatin hat patimur. Orhor kak gon hat patim orhor kak hat pat ohe pe oh Got orhe damdapat Ihir ihat isip hat ha songwe ma dahapat ohe pe oh dirnong isip nahat napisapatmur. Dasuh meng naporipti han bap ire ma dasuh meng naporipti oh Krais ohe kak ohe boknong na dip tahat patim irarhe be ina dam gonwi hat patim ihtin meng oh naporipti ohoh ihan ire naporipti mengnong ohri amrapri.

Korosi 2:6

Gur Jisas Krais ohnong Ohwi nuranure Hanipyah ma hapat dahapti orhe meng ma datparu hat orhorwi orhorsi tap hat pati han ire yah hat saptiru hat orhor yah hat sashenmur.

Korosi 3:20

Brer gurhe suanir itanir ire meng gonsi naporiya mengnong oh amram dindeinmur. Got oh Ihir Hanipyah orhorsi tap hat patim ire ihat ma sayanong oh yaho daham orhor amam hat pat ohoh ihan brer gur ire mengnongwi amram dindeinmur.

Korosi 4:5

Hanipyah orhe nita na hat pati bap ihir gure mutuh oh patihanhe onggem ihir ihat patin orhor gure yah hat saya apriya hatin ohe da oh yah mat manap da tei orhorwi pinggit pisashenmur.

1 Tesaronaika 2:12

Nure apris gurnong ihat ma napapindiri oh guragure Got ohe danong hatin ohe danong nakasip deiyao ruumsup hat pati danong oh napanggeim pang nahayao Got orhe amam nahat napapindin ohe danong ohwi hat indinmur napor saw nasariyao nahat napapindirimur. Ama inahat napapat Got orhor gurnong Gur norhe napapindin hrepnong hatinmur. Hapti norhe has da moh guragur tap hat taman datinmur ma naporpat han Got orhormur.

1 Tesaronaika 4:1

Nohanher taptem bapa. Gin tit mengnong moh dahatinmur. Nuhur gursi patim Got orhe Ihir ihat sayahan yaha daham amam hat pat da oh namgit indirimur. Namgitperhan gur am hapti ama da ohsi ihat saptimur. Ihat ma sapti oh ha isip hat sashenoh rim isip mat orhorwi pisashenmur rim nuhur Hanipyah Jisas orhe mengtei kasip mat orhor naporiyamur.

2 Timoti 2:4

Ami bap ihiroh ami ire atamreindin ohsi; iraire danong ham tamreindin ohsi sahsah mar na tamreiptimur. Iraire duuptei hat pat han oh Norhe atemnongwi dinaham tamreipti ma hapat ha dahatinoh rim orhe atemnong dimar tamreiptimur. Amaru hat orhor gohe Krais ohe atamrein danong ohwi hat patim atamrein sashenmur.

Taitas 3:1

Taitas go Got ohe nita hat pati kuuhan ihirnong Gur gapman bap kakhan hat pati han ire hrepnong hat inpera daham ire hrepnong hat patim ire naporiya meng oh marim amram dindeinmur. Dimara ire yah tamreindin ohnong oh tamreindina naporiyahanoh naporiya meng oh gur damdapat pan hat pati da orhorsi tamreinmur.

Taitas 3:14

Krit ihir gospanggeit indin ohe danong asoh na hat pati bap ohoh ihan Got orhe nita kuuhan bap ihir gospanggeit indin ohe danong asoh na hama be patepririm Taitas go ihirnong Gur beheri gapa hat patepri. Kat kuuhan ihir ire din hano erer oh hatip hat patihanhe moh panggeitin kat oh patin orhor dir kapkap na panggeiyahan er hatiprohekin daham ama ihat hatip hat pati kuuhan ihirnong panggeitin ohe da oh kasip hat orhor am ham pomar panggeit paptenmur porinmur.

Hibru 11:5

Inok oh Got ohwi arpin inahatin hatin hanwa dahat patin Got oh wamara ohnong amam matipmur. Amam ma matip oh brak meng oh Noh Inok ohnong amam mat papatmur ritipmur. Imat amam mat papatdapat Got orhor Inok oh na hapur dasi patin orhor dasi ambura aw teinong mahat pruhupmur. Orhor aw teinong mahat pruhum mandatporhan hanip ihir angmar mandatpamur.

Hibru 13:16

Imat armi mat paptim arwananah ihirnong asoh panggeipti dao erer hatip hatperhan panggeim apripti dao oh hanhan mar mandapri. Dahat patim orhor panggeinmur. Ama imat armi mar panggeipti da oh Got oh Nohnong armi naham apop natemar napripti ohe tan mat nohnong napriya ma hapat daham oh da yah ham amam hapatmur.

Hibru 13:21

Ama imat pamsuhup han Got go gorhe ma ti da ti da dahapat danong dinahatin ohe tihan tihan kasip da oh apris paptenmur. Imat apris papatim gorhe Noh ire mutuh oh ihat patin yaho ma dahapat da oh Krais ohe heim dap tei oh nure mutuhnong namtinmur. Krais gonong nuhur dipwi armi naham napapten hano rim mameng moh napormur. Arpinwa.

2 Pita 1:8

Ama da gonsi marim isip mat pisayahanoh imat isip mat pisaya ohe pe oh dire Hanipyah Jisas Krais ohnong daham ma am hapti ohe da oh na wa hama dam ham isip hat mama sapat oh ma hapat dahaptimur.

2 Pita 3:18

Kasip hat orhor marin paptim ama ihat sapti han ire danong ohri hapri. Diradire Hanipyah namburpat han orhornong Oh ihat pat hanhe daham am hatin ohe dao orhe da orhor bapkei naham yah nahapat ohe dao ohnong titsi titsi dar am hatpora daham ama ohe danong ohwi isip mat pisashenmur. Orhorwi has yahnapsi hat pat han ohoh ihan gino kimsio kaputo dipdipwi armi mar papten han oh orhor pokwimur. Arpinwa.

1 Jon 3:22

Dahamara Got orhe bopor mat papat dao orhe sawa mengo ohnong amram dindeipti ohoh ihan dire Got ohnong ma dahandeipti ohe erer oh gonsi napriporhan dariptimur.

1 Jon 5:20

Dir am hat patimur. Got orhe brer oh kakdah mama wandas patesuh ohe pe oh dire da nadapema arpin Got orhornong am hatin ohe da oh napdapmur. Napriporhan dir ohnong am haptimur. Am hapti orhe brer Jisas Krais ohsi tap hat ma pati oh Got orhorsi tap hat patimur. Ama ohsi ihat pati Got orhor arpin Got eimat paten dasi nahapat Got orhormur.

3 Jon 1:6

Gwe ihirnong imat da apris bopor mar panggeipat ohe meng oh Got ohe nita sios bap ma pati nuhurnong napotperhan nuhur amratirimur. Ama ihat apripti han Got orhe nita bap ihir gwe pat teinong apriyahanhe ire son ohe mandaphe guragure kat Got orhe atamreipti han bap ihirnong panggeitpera daham ma panggeiptiru mat orhor ihirnonghe imat orhor panggeim darherinmur.