Hibru 4:12 - Oksapmin

¹² Got ohe meng dam tarpapat kasip meng oh mamaru hat patmur. Bior tansi tansi gret hat ma patnong oh Got ohe meng gretnap meng ohe hrepdapat mat papatmur. Ama gretnap ohdapat dire mutuhnong hama tamsi; awarsinong moh orhe meng gret ohsi katket mara tam orhe dei awar orhe dei mar pomat dason mat papatmur. Indeipat diradire ina tei dahapti dasi; mutuhdapat ma dahapti dasi ayotnong ohhe pomat dason mar wamat napapatmur.

Hibru 4:12 ပူးပေါင်းရင်းမြစ်များ

Ruk oh yah meng ma brak matip ohe meng oh 8:11

Jisas oh Nohe tit han tit den gwe sakmar pipmur ma napot ohe paham meng ohe mutuh meng oh mamarumur. Ama den gwe oh Got ohe meng ohmur.

Jon oh yah meng ma brak matip ohe meng oh 12:48

Nohe mengnong na amram kom asaripti han gurnong kaput komdapat ma nasatipra meng oh patmur. Norhe mama naporpat meng orhordapat kaput mong pepe dik oh nasatipramur.

Jon oh yah meng ma brak matip ohe meng oh 6:51

Ama aw teidapat wandas eimat paten dasi nahapat den oh norhormur. Ama den oh gur dipero daham nadeyahanoh ama han gur eimat paten dasi ham eimat pateprimur. Ama den oh norhormur. Gin kakdah ma pati han gur eimat paten dasi ha hatingwe rim norhor gure gwemat haputipramur pongop.

Aposer 2:37

Pita oh ameng oh potporhan kuuhan ihir ameng oh amram Mameng moh nure danong mahan nakapom er nahahmur pora Jisas orhe mengtei tamrein sapti han Pitao ihirnong Nohanhera. Mameng moh nure danong mahan nakapomur. Gin nuhur kinhatiprohe por ihirnong dahandeingopari.

Aposer 4:31

Dahamtiperhan ama tarmuriya ap oh bupangopri. Bupatporhan Yahsup oh ire mutuhnong ham isip hangopri. Imat isip mat papatin ihir watahpei ham Got ohe meng oh watahpei hat orhor pot pisasheri.

Aposer 5:33

Pitao ihir Gur Jisas ohnong irat bok sur garmar sutpamur potperhan kaunsir hat pati han ihir amrapti heisup mar Ihirnong sutperhan ha haputingwemur goshangopari.

Aposer 7:38

Ama potip han oh hanip timbas mong oh dire awher ihirsi patina Sainai yeinong ruhupmur. Rus patin Got ohsi pati da bap enser ihir tit han tit apris ohnong meng potipmur. Meng potporhan oh na timbas hatipra meng amram brak mat natipmur.

Rom ihirnong Por oh brak atip ohe meng oh 1:16

Gur mohnong dahenmur. Krais orhe yah meng moh ma pot pisapti ohe pe oh ihir arpin Krais orhor inahatin hatin hanwa dahatperhan Got orhe kasip ohsi ambutin inasi mar papatmur. Ihtin kasip mengo rim noh hanip ihirnong potin oh noh na kas ham potin dawi ham porpatmur. Got oh yah mar ambutin inasi mar ma papat oh Juda nuhurnongri imat nambutin inasi nahat napapatmur. Komdapat Grik han bapo ama be han hat pati bap gurnong oh ihtin inasi nahapatmur.

1 Korin 1:24

Ihir ihat dahat patimura; kat han Juda hat pati han bapo Juda na hat pati han bapo dirnong oh Got oh Gur norhe nita bap gurmur napor kis nahat napapat bap dirnong oh Krais ohe irat bok sur gartaham haputip ohe meng moh Got orhe kasip hat pat dao dakuu hat pat dao oh nuhurnong namgitip meng ma hapat daham am haptimur.

2 Korin 2:17

Nuhurnong ma Got oh ihat son inasi nahat napapat bap nuhurmur. Ihtin inasi ma inahat napapat bap nuhuroh kat han ire Nuhur Got ohe meng moh erer oh han ap mat pisusa yan daripti ohe tan hat meng moh pisaper daham ma meng pisaptiru mat nuhur imat meng na pisaptimur. Nure ma ihat saptinong ohri Krais orhe nitao rim ma Got ohe kis naham nadarhetip han hatin hat orhorwi arpin han hat orhorwi meng pot pisaptimur.

2 Korin 4:2

Garham na mandama pomat orhorwi meng naporiptimur. Pomat orhor ma naporipti oh ahar er hapti ohe dao paham meng napotin ohe dao nuranure meng oh Got ohe meng tapnong mar imat gapa naham napotin dao oh ti na inahaptimur. Ama ihtin dasi hat patim na napora pomat arpin mengwi pitap teinong mar naporiptimur. Gur nuhurnong Ihir yahnap hat orhorwi patihe daham ha am hatingwe rim Got ohe kinteihe pomat orhorwi naporiptimur.

Epesas 5:13

Ire er da oh has teinong mar pitap teinong matperhan kuuhan gonsi ihir has teinong hat pati kuuhan ihirnong wamara ihat pati kuuhanhe daham pomat daham am haptimur.

Epesas 5:26

Krais oh dire gwemat ma haputip oh Noh norhe nita sios kuuhan bap maihirnong tom gahdeipti ohe tan mat gahmaro norhe meng ohsi yah maro mar ongeng mat papten dasi matipramur. Deipat ire ina bok andeh sirap huhun tamboro er yan datin hatin hat pati ohe tamboro oh timbasnap ina yahnap ongeng mar mihihnap mat papat bok tei andeh norhe bes teinong mar datipramur daham dire gwemat haputipmur.

Epesas 6:17

Got orhor it nambura yah hat paten dasi nahat napapatwa dahapti ohe dahe kasip kak ung hatin mat andinmur. Got orhe Yahsup oh Got orhe ma napripat yah menghe bior hanat hatin mat marima sashenmur. Ama erer Got oh wanin mat nat pat oh marim mamen tahat patenmur.

1 Tesaronaika 2:13

Nuhur apris Got orhe meng oh napotperhan gur amrama Moh hanip guragure meng na naporiya ma hapat. Got orhe meng oh naporiya ma hapat daham datirimur. Gur ihat datirio rim nuhur Got ohnong dipwi weso naporiptimur. Oh arpin Got orhe meng ohoh ihan Got orhe danong hapti han gure da mutuh oh arpin dam timdin meng oh gure mutuh patmur.

1 Tesaronaika 5:23

Nure at Gota por ma nadahandeipti meng oh At Gota. Go gorhorsi; nuhursi manap gosham yah hat paten ohe duuptei han oh gorhorwimur. Ihtin dasi naham napapat han gorhor Tesaronaika aptei sios bap ihirnong Got gorhor hatin mar gorhe yahnap danong asoh isip mat apisus gon gurus por apaptenmur. Imat apapatin ina da oh yahnap bok inasi hat patin Jisas Krais oh it apris ha wamtinoh rim go ihirnong ihtin inasi mat paptenmur por nuhur imat gure paten meng oh nadahandeiptimur.

Hibru 13:7

Gur guragure sawa naporishe kakhan ihirnong dahenmur. Daham ire yah hat sus ma hapurishe danong ham Ihir Got ohwi inahatin hatin hanwa dahat patim ihat sashe ma hapat. Ihan dirhe ihat orhor sasipera daham ihat sashenmur.

Hibru 6:5

Got orhe meng oh ire mutuh oh dam timdiporhan wamar am haptimur. Kaput ma wamtipri kasip oh ihir gin orhor wamar am hat patimur.

Jemis 1:18

Inahapat han orhe damdapat orhor Noh norhe mon ohe arpin ihtip ohe meng dap teidapat ihirnong norhe brer matporo. Norhe gon han matin oh maihirnongri norhe gon han bap matipramur. Mara norhe erer ma darpa oh komdapat norhewi matipramur daham orhe da orhor orhe brer nahapatmur.

1 Pita 1:23

Gur Got orhe brer ma hat pati oh kakdah han diradire timbas hapti da ohsi manhetperhan Got orhe brer haptida. Basra. Orhe eimat paten da ohsi namanheya brer oh orhorsi eimat paten brer haptimur. Orhe ma inahapat oh orhe meng na timbas ham eimat pat ohe meng ohe pe oh inahapatmur. Inahat napapat ohoh ihan guragur da gosapris patenmur.

Erer tarpatipra 1:16

Ohe bes oper tandapathe oh beshei merum marin patgop. Atem kat moh bior tansi tansi gret matpa hatin kot patgop. Orhe rumkinhe mongsut atan isip ma heit pat hatin heit manda hangop.

Erer tarpatipra 19:15

Ohri hat ma us han ohe atem tei oh bior gretnap tit atem kat oh kot patgop. Ama bior gret atem kat kot pat ohsi among among kuuhan er bap ma pati ihirnong ohe merwi mar sutipramur. Suma orhe hrepnongwi mara heisup mat orhorwi paptepramur. Heisup mat orhorwi ma paptepra oh kasip Got orhe bopor heisup mat papat san dahnong oh mar paptepramur.

Erer tarpatipra 19:21

Tahe por mandama orhe atem kat kot pat bior ohsi ite ami bap ihirnong sut pisangop. Sut itporhan ner ihir apris sein daptin ake pisut mandangopa.

Erer tarpatipra 2:16

Ihan gur ihapti ohoh Epe. Nuhur er hat sapti sa dahama mandatinri. Na ihyahanoh oh gin orhor apris ama han gursi; ohe atem kat ma bior kot pat ohsi gusutipriri.

Erer tarpatipra 2:23

Mara urhe brer ihirnonghe sutporhan haputipriri. Imtiporhan Got ohe nita aptei aptei sios bap gur amrama am hapti Watina. Hanipyah orhor diradire mutuhdapat ma dahapti da oh gonsi orhorwi am hat pat han ma hapat dahatipriri. Ihat dahat pat han ohoh ihan guragure ma ihat sapti ohe pe kis yan oh napriprari.

Erer tarpatipra 20:4

Kanmat mandatporhan gahan noh wandeioh Jisas ohnong na mandatin ina ham orhe mengo Got ohe mengo oh ihir kasip ham marin patio rima ihirnong mahaw mar sutperhan ma haputpa da bap ihiroh masasa patingopa. Ama bap ire ma pateshe oh kurwah ohe danong na hamo orhornong arhur irat bok kis matpa ohe danong na hamo orhe win kis oh ire kinbi teio bes teio na brak matpao ama ihat pateshe han bap ire da oh masas patingopa. Ihir ihat patin Krais oh Gin Satan ohnong tanggap tem apat mandamur. Gurhe nohsi tap ham ihirnong papindin ohe kakhan hat patin krismas 1,000 birhim timbas hatipramur pora kuuhan ihirnong dahamar satin inasi matporhan ihir kakhan ire tongnopti tei oh tongnoma ire hrepnong mar paptingopa.