Hibru 3:14 - Oksapmin

¹⁴ Kasip goshat patim gure rih orhor kopenat ma Ohwi inahatin hatin hanwa daham ma kasip hatpa da oh kasip hat orhorwi ma marin pati bap dirwi Krais orhorsi tap hat tamreimo pati han bap dirmur.

Hibru 3:14 ပူးပေါင်းရင်းမြစ်များ

Rom ihirnong Por oh brak atip ohe meng oh 11:17

Juda na hat pati bap gur Got orhe nita ham ma ihat patinong oh dahatinmur. Irat orip hanip ma amgap itpa irat orip te oh tan oh patina tanwi gatmar mandatper dahayahanhe gatmar mandatiprohemur. Ama gatmar mandaya tandapat oh kot dus ohe orhap ma marpat orip te oh gatmar pisus ama gatmar mandaya ohe boknong dip matiprohemur. Amaru mat orhor Juda na hat pati bap gurnong nambura kat Juda ma Got orhe danong ham orhe boknong hat pateshe orhe boknong asoh nahat napapatmur. Inahat napapatin rihohe gatmar mandaya orip dam bok ohdapat kopen ohe popris ohe boknong dip deiya tenong tom gap apris ma yah deipatru mat orhor gurnonghe Got orhe Juda ihirnong yah da ma bapkei mat apripat da orhor gurnong napripatmur.

Rom ihirnong Por oh brak atip ohe meng oh 11:22

Imat gatmar namdatiprarim orhe hinhina naham yah nahapat da ohsi; heisup nahat napapat da ohsi ayot danong oh dahat patenmur. Ohe danong na ham ma mandaya ihirnong oh heisup da tei papatmur. Orhe danong hat patiru hat orhorwi ayahanoh ama ihat pati bap gurnong oh orhor hinhina da tei orhorwi napapatmur. Ihat na ayahanoh gursi tap mat gatmar namdatiprohmur.

1 Korin 1:30

Got orhordapat Gur norhe nitamur napor kis naham Jisas Krais ohe tapnong nahat napapatmur. Inahat napapatin dir Krais ohsi tap hat pati ohoh ihan Got oh dakuu da oh mon ohe boknong mat papatin dir wamar am haptimur. Dir wamar ma am hapti oh Krais orhe dap teimdapatwi er da hrep nang tatpat patin nang arpit namdao yah hat saperhan Gur yah hat sapti han bap gurmur napotin ohe dao ama da oh mon Krais orhe dap teidapatwi napapat ma hapat daham am haptimur.

1 Korin 10:17

Hanip dir trun bap pati orhor den oh tit pokwi taman ma dapti oh hanip dir tit inawi hat patiwa daham tit den pokwi daptimur.

1 Korin 9:23

Noh imat meng ma pot pisapat oh Krais orhe yah meng oh dam timdiporhan diradir tap mat yah dam datinmat noh imat meng pot pisapatmur.

Epesas 3:6

Ama nareman paptesuh da ma namgipat oh mohmur. Krais orhe inahapat yah meng ohe pe oh Juda hat pati hansi; Juda na hat pati hansi diradir tap han bap titwi hat pati ma hapat. Titwi hat patim Krais orhe dap teidapat Got orhe rit natip meng oh diradir tap hat titwi daripti ma hapat. Ma daripti oh Got orhe bapkei nahapat da oh gonsi diradir tap hat daripti ma hapat dahatin ohe da oh hanhan hat patin gin mama pitap teinong mara namgitporhan gin gonsi am ham dahat patimur.

1 Timoti 6:2

Ire hrepnong ham be ma atamreipti han bap iraire papat han oh Krais ohe nita hat pathanoh be ma atamreipti han ihirhe Dir tap han bap diradir ohoh ihan ohe naporpat meng moh noh na amratiprohmur dahapri. Ai. Dire napapat han moh Krais ohe danong hat pat moh dire bopor mat papti han ohoh ihan dire yah hat ma atamreiya ohe pe oh ohnong yah deiptimur. Ihan dir yah mat orhorwi ohe atamreindin oh atamreinper daham yah mat orhorwi ha atamreingwemur. Timoti go nohe mama napotiproh meng moh kasip mengtei orhor Gur mameng moh amram dimtinmur pora am mat pisashenmur.

Hibru 11:1

Ohwi inahatin hatin hanwa ma dahapti da oh mamaru hat patmur. Damdapat Oh ihtin han tit imat napriprawa dahat pati ohe pe oh orhor tit dawi nahat napapatmur. Tit dawi nahat napapat ohoh ihan dirhe na wamat patim orhor damdapat Arpin inahatiprawa daham am ham minhan patimur.

Hibru 12:10

Kakdah han dire ather ihir iraire dahaya kis orhor kakun da nadason mar ponahaptimur. Got orhe ma ponahapat oh orhe ongeng mat papat yahnap da oh taman dara ohsi yah hat ha indingwe rim inahapatmur.

Hibru 3:1

Jisas oh napanggeitin han hat pat ohoh ihan Got oh aw tei mahatdapat gurnong Gin guragur tap hat tamrein sashenmur napor orhe han naham kis nahat napapat han gur Jisas orhornongwi rum mutuh mat paptenmur. Oh Got orhe mengsi darhetip han ma hapat. Oh ap yawar hanat bok han hatin hat patim dire er gap hirmat namdapat han ma hapat dahat pati han ohoh ihan orhe danongwi rum mutuh mat paptenmur.

Hibru 3:6

Moses oh be han hat patim atamreisuh hanmura; Krais orhe ma tamreipatnong oh ap nita han orhe brer hat patim orhe atamreindinnong oh pomar yah mat orhorwi atamrein sapat hanmur. Orhe ap hatin hat ma pati han bap diroh mama mihat pati bap dirmur. Dire Orhorwi inahatiprawa daham amam hat ma minhan pati da oh na gapa ham kasip hat orhorwi papayahan ama han dir orhe ap hatin hat pati bap dirmur.

Hibru 6:11

Guragure taptem ihirnong ma kasip ham panggeit pisapti da hatin hat orhor Got ohe danong hatin ohe dahe ihat kasip hat orhor saptiru saptin mong pepe dik oh sa hatipra. Ihat sayahan oh guragure Got oh inahatiprawa ma dahapti da oh gonsi dam sa tarpat sasipra.

Hibru 6:4

Kat han ihir Got orhe has yah da oh am hama aw tei ohe kasip yah den oh dama Yah ma hapat daham am haptimur. Got orhe Yahsup oh ire mutuhnong ham am hat patimur.

1 Pita 4:13

Es. Noh Krais orhe nita hat pat ohoh ihan nohhe Krais orhe darisuh batbet orhor hatin hat darpat ma hapat daham amam ham batbet dat sashenmur. Amam hat saptin orhe amam armi has da ohsi pepe dik ma pitap hatipra dik oh nohhe amam isipnap datiprawa daham amam hat orhor patenmur.

1 Pita 5:1

Sios kasip ham kat ihirnong wamat pati han pohon gurnong noh diradir tap bap hat pohon tamreipti han diradir ohoh ihan kasip meng tit napotiprohmur. Noh Krais ohe ma batbet datip oh norhor wamtipmur. Krais ohe has yah da ma pitap hatipra dik oh diradir tap mat taman titwi datiprimur. Ihtin han noh gure pomat tamreindin ohe kasip meng tit napotiproh ohoh ihan gur mandapri. Amranmur.

1 Jon 1:3

Ama nure wamaro ohe meng amramo hashe ohe meng oh gurnong ma napot napisapti oh gurhe amrama dahapti diradir tit dawi gosham da gosat patenmat nuhur mama napot napisapti ohmur. Diradir tit dawi ham da gosat ma pati ohe da oh itap Got ohsi; mon Jisas Krais ohsi diradir tit dawi ham da gosat pati ohe da ohmur.