Erer tarpatipra 7:14 - Oksapmin

¹⁴ Dahanahatporhan noh ohnong Hanipyaha. Nohri hanhan hat patmur. Gorhor am hat patmur potip. Potporhan oh Maihir iraire mahaw han ihir ina ruumsup isip tit apriya orhor ihir Jisas orhe panggeitin ohe kasip ohsi na gapa ham kasip ham yah hat ma pati han bap ihirmur. Ire watah has dapsi mohhe sipsip bap ohe heim ohsi gahmara ongeng mar has mar mama an pati han ihirmur.

Erer tarpatipra 7:14 ပူးပေါင်းရင်းမြစ်များ

Mak oh yah meng ma brak matip meng oh 13:19

Ma inahatipra batbet sup oh rih mong darpam ma patesuhru ginsi mama pati oh ihtin batbet oh timbas patesheru gin mama pati ohmur. Kaputhe ihtin batbet sup ti na datiprimur. Ma ihtipra dik ohwi wanohe batbet sup datipri. Ihan mong er hat patim apris nitiprakin. Tuperipti dik patin apris er naham nitiprakin daham Got ohnong ama dik oh apris er nahatiprarim dipwi Got ohnong dahamar patenmur.

Jon oh yah meng ma brak matip ohe meng oh 16:33

Kakdah moh gur ruumsupsi hapti orhor noh kakdah mohe erer oh nohe hrepnong mar ambapte mat papatmur. Ambapte mat papat ohoh ihan gur Oh erer moh orhe hrepnongwi mat papat ma hapat daham manap da tei hat orhorwi da yah hat patenmur. Gur Nuhur Jisas orhe tapnong hat pati moh yah hat patiwa daham gur da yah hat ha patengwe rim noh mameng moh napormur napongop.

Aposer 14:22

Meng pot ma pihipa oh Gur Jisas orhe danong mama hat pati oh ama danong orhorwi kasip hat orhorwi patenmur. Got ohe napapindin teinong ma sapri oh ruumsup nahat napaptin orhor saprimur. Ihat ruumsup nahat napaptin orhor sapri ohoh ihan Jisas orhe danong hat pati da oh kasip hat patenmur poripti Jisas orhe danong ma hat pati ire danong akasip mat pihipari.

Rom ihirnong Por oh brak atip ohe meng oh 5:3

Ama amam ham ma minhan pati oh ama has danong ohwi datinmat amam hat na patimur. Ina ruumsup apirhanhe wes ina ruumsup kasip nahapat han go apiro por amam hat patimur.

1 Korin 6:11

Kat han gur rih ihtin dasi hat pateshe bap gurmur. Gin mama patinong oh Got orhor er gap hirmat namdama yah nahat napapatmur. Imat ma napapat oh orhor diradire Hanipyah Jisas Krais ohe dap teimdapat orhe Yahsup oh gure mutuhnong nahatporhan Yahsup orhor Got orhe gon han bap nahat napapatmur. Orhe gon han bap nahat napapatin orhe kintei oh yah hat patin oh Gur yah hat pati han bapmur naporpatmur.

2 Tesaronaika 1:4

Weso pora Got orhe nita bap aptei aptei ma pati ihirnonghe Tesaronaika sios bap ihir ihat kasip hat orhorwi patimur por gure winnong armisi naham win nadaptuhut napisaptimur. Nuhur imat gure winnong ma nadaptuhut napisapti oh mamaru mat napisaptimur. Kat ihirdapat Tesaronaika aptei pati Got ohe nita ihirnong Maihir Got orhe nita bapmur rim ina ruumsup apriperhanhe ihir batbet isip dat sapti orhor ire Got ohe danong hat ma pati da oh na gapa ham kasip hat orhorwi ihat saptimuro por gure winnong armisi naham win nadaptuhut napisaptimur.

Hibru 13:12

Amaru hat orhor Jisas oh ap mutuh ohe doho kot dah oh orhe heim ohsi dire er gap nahirmar yah nahatinmat dire gwemat heim duker haputipmur.

Hibru 9:14

kakdah ohe apop gapa heim ohsi imat pondeishe ohoh ihan Krais ohe kasip heim oh atnap yahnap nahapat ma hapat dahaptimur. Orhe bok andeh mihihnap bok ina hat patin eimat paten ohe Yahsup ohe kasip ohsi dire gwemat haputipmur. Ihat mihihnap hat pat han oh heim tandurker haputip ohoh ihan ina teimdapatwi na yah nahapatmura; dam na tarpatin ohe er da oh hapti damdapat Gin orhor ma ihpat ohe er oh er hat pat sa daham damdapat ma dahapti da ohsi tap mat yah nahapatmur. Yah nahama dire patru patepra Got orhe atamreindin inasi nahapatmur.

1 Pita 1:19

Ma namohotip oh Krais orhe heim yahnap yan isipsihe na mohotin hatin heim ohsi namohotipmur. Ama heimsi ma namohotip han ohe bok oh sipsip bap ire bok trotinsi yahnap hat patin sum ma atendeishe sipsip bap hatin hat patin ohe heim oh dukera namohotipmur.

1 Jon 1:7

Got orhe yah da teiwi hat patru hat ma pati bap diroh orhe yah hat ma patru hat orhorwi sapti han bap dirmur. Ihat ma pati bap diroh Got orhe nita kuuhan ihir tit dawi ham yah han gosham yah hat patimur. Ihat yah da tei ma pati dirnong oh Got orhe mon Jisas ohe heim ma tanduketip ohsi dire er hat sapti er gap gonsi hirmat namdama yah nahapatmur.

Erer tarpatipra 1:5

Jisas Krais Got ohe meng dason teiwi ripat han ohri duuptei masas pip han aw pe mong pe moh ohe kakhan ire duupteinap hat pat han Jisas oh orhe da orhor gurnong yah nahapat dasi; manap gosham yah hat paten dasi sa nahat napaptepra. Dir er nang ohe natpat pat hrepdapat hat patin Jisas oh bopor nahat napapatdapat dire danong ham hapura ama er nangnong orhe heim ohsi arpit namdatipmur.

Erer tarpatipra 12:11

Dire taptem ihir sipsip bap ohe heim ohe kasip ohsi; arpin meng pot ma pisapti ohe kasip ohsi ama yot ite kasip ohsi Satan ohnong ambapte matamuro. Ihir Dir ihat saptin niyarit hapuriyahan yahwa daham ihat sashe han ihirmuro.

Erer tarpatipra 15:2

Marin patihan noh it wandeioh tom sor hru tan oh tom kakeir tan hatin ohsi; irat has hatin ohsi tap hat has hat patgop. Ama tom kakeir tan ohe manggap hir ohon oh kurwah ohnong ambapte mar suyao orhe irat bok kis matpa boknong ambapte deiyao orhe kis matpa winnong ambapte deiyao ma hashe han bap ihir tandeit patingopa. Tandeit patin Got orhor ihirnong gita hatin ros hatin nitat mar ma apir ros oh nitat marin patingopa.

Erer tarpatipra 17:6

Ihat pathe dahama noh wandeioh urhe bes teidapat Got ohe nita bap ihirnong Got ohe danong hapti da moh na mandapti moh noh sutpora daham supat heim oh it urhor dama wain tom dama da ban taham deinin hat sapti ohe tan hat sapatgop. Ihat sapathan noh wamara da trun trun darhetip.

Erer tarpatipra 2:9

Orhordapat gure orhe nita hat patim ma ihat saptinong oh orhor am hat patri. Gurnong ina ruumsi nahat napapti dao gure borop han hatin hat pati dao oh orhor am hat patri. Orhor wanahah oh kakdah moh borop han hatin hat pati orhor Got orhe kinteinong oh erer ruumsansi hat pati han bap gurri. Juda hat pati han kat han ihirdapat Nuhurwi Juda bap hat patimur rim gurnong dasuh naham dasei meng naporiyao hat ma sapti oh orhor am hat patri. Ama dasuh nahat napisapti bap ihir arpin Juda bap hat pati basri; ihir Satan ohe nita han bap hat patim ginaporiptiri.

Erer tarpatipra 22:14

Ihtin ohoh ihan kuuhan gure da oh watah gahmar has mat paptem aripti gur ama ap mutuh ohe ap gwatei oh rosa eimat paten ohe dasi hen ohe irat gwe oh kapom din inasi nahat napapat bap gur ohoh ihan ama kuuhan gur amamsi hat paten han gurmur.

Erer tarpatipra 5:9

Ama ihir bos hamnong hama kopenohe ga tit riptingopa. Kopenohe ga tit ma ritpa oh mamarumur. Gonong nitpawa; Gonong nitpawa. Nitperhan gwe heim oh tanduketipwa; tanduketipwa. Tandukera ama heim ohsi kakdah han ihirnong amohotipwa; amohotipwa. Ihir Got ohe nita ha hatingwe rim amohotipwa; amohotipwa. Han ambap ambap amohotipwa; amohotipwa. Han ameng ameng nitatsi han amohotipwa; amohotipwa. Ina nitasi han amohotipwa; amohotipwa. Mong mong nitatsi han amohotipwa; amohotipwa. Gowi ihtin hanmura; ihtin hanmura. Ihan brak tein bok oh gowi datin hanmura; datin hanmura. Dara gata emtin hanmura; emtin hanmura.

Erer tarpatipra 7:9

Ihat mandatporhan noh wandeioh kuuhan wanohe tam ban na satin hatin ban tit tarmut mandaya hangop. Ama ihir aw pe mong pe among among ina nitatsi han bapo ambap ambap bapo among among nitatsi bapo ameng ameng nitatsi bapo ihir watah has dapsi ara gaku rin tan marima mutuh ap tan tongnot pat hansi; sipsip bap ite rumkin dason oh tarmut mandaya hangop.