Erer tarpatipra 1:1 - Oksapmin

¹ Jisas Krais oh Komdapat ma tarpat sasipra ohe meng oh Jon nohe kinteinong pitap matporhan noh mama brak dei ohmur. Nohe kinteinong ma pitap matir oh Got ohdapat Jisas ohnong pinggitirmur. Pinggitporhan Jisas ohdapat Got ohsi pati han enser ihir tit han ohnong pinggitirmur. Ohnong pinggim darhetporhan ohdapat orhe atamreipat han nohe kinteinong pitap matirmur. Nohe kintei ma pitap matir oh Got oh kapkap arpin tarpatiprawa ma dahah da oh orhe atamreipti han bap gurnong namgitinmat nohe kinteinong pitap matirmur.

Erer tarpatipra 1:1 ပူးပေါင်းရင်းမြစ်များ

Jon oh yah meng ma brak matip ohe meng oh 12:49

Noh norhe dahapat da meng orhor na naporpatmur. Norhornong nadarhetip han at orhor Go ihirnong Mameng moh mihat daham meng potinmura; mameng moh mimat potinmur napor am nahatporhan noh gurnong at orhe am nahat napapat wanin meng orhorwi naporpatmur. Imat naporpatin orhor na amrapti han gurnong gure ma na amrapti meng orhordapat kaput nasam inahatipramur.

Jon oh yah meng ma brak matip ohe meng oh 15:15

Duuptei han ire da oh iraire atamreipti han ihir am hat patida. Ihir hanhan hat patimur. Amaru gur nohe natamreipti han hatin hat patineng nohe ma ihpat da oh gurnong na naporpatnengmur. Gur norhe yah han hat pati ohoh ihan noh at ohe naporpat meng oh gonsi gurnong naporpatmur.

Jon oh yah meng ma brak matip ohe meng oh 3:32

Ama ihat tandaptuhut pat han oh orhe kin wamaro orhe amramo hapat ohe meng ohwi ripatmur. Oh ihat ripat orhor kuuhan gon ihiroh Arpin meng ripathe na dahaptimur.

Jon oh yah meng ma brak matip ohe meng oh 8:26

Noh gurnong Gur mama ihat sapti oh ermur napor nasam napotin ohe meng oh ruumsan patmur. Ruumsan pat orhor norhornong ma nadarhetip han ohe meng oh nohnong napotporhan ameng ohwi gurnong naporpatmur. Ama han oh arpin hanmur pongop.

Rom ihirnong Por oh brak atip ohe meng oh 16:25

Nohe yah meng napot napisapatru hat orhor Got ohhe inahat orhor kasip nahat napapten han Got orhormur. Nohe ma napot napisapat meng oh Jisas Krais orhe yah meng orhor napot napisapatmur. Ama napot napisapat yah meng oh rih orhor treman patesuhru patesuhmur. Gahan ama ihat treman patesuh meng oh Got orhor pitap teinong mar papatmur.

Garesia 1:12

Noh suhur ham saporhan meng am nahayao be meng naporiyao nahatperhan am ham meng na napotipmur. Na napotipmura; Jisas Krais ohwi nohe kinteinong meng oh pitap matporhan ama pitap matip meng oh napotipmur.

Epesas 3:3

Imat kis nahapat orhe reman papat da meng oh nohnong am nahatipmur. Am nahatporhan noh ama meng oh gurnong gar meng tit brak mar mama nasar ohmur. Gin ma nasar meng moh gur sama Got orhe reman papat da oh Jisas Krais orhe dap teidapat ma indeipat da oh Por ohe da tei imat am mat papatin dirnong imat am nahapat ma hapat dahatiprohemur.

Taitas 1:1

Por noh Taitas gonong mama brak mat nasar ohmur. Norhornong oh Got oh Por go norhe natamreio Jisas Krais ohe meng pot pisao hen han gonong norhor kis nahahmur napor kis nahat napat han noh Taitas gonong mama brak mat nasar ohmur. Kis nahat napapat han ohoh ihan Got oh Maihir norhe nita mat papat bap ihirmur por kis mat papat han ihir Got ohwi inahatin hatin hanwa ma dahapti ohe danong oh pomat orhorwi daham ha am hengwe rim noh mama ihat atamreipat ohmur. Got oh Ihir ihat ha songwe ma dahapat ohe yah danong hatin ohe arpin meng oh am hat ha songwe rim noh mama atamreipat ohmur.

Erer tarpatipra 1:19

Go gin ma wamtiproh oh gin orhor ma tarpatiproh ohsi; kaput ma tarpat sasipra ohsi tap mat wamtiprohmur. Ihan gwe ma wamtiproh han oh gonsi tap mat brak matinmur.

Erer tarpatipra 1:9

Noh guragure nita Jon noh brak mat mama nasar ohmur. Diradir Jisas ohe nita bap dir Got orhe napapindin hrepnong hat pati bap dirmur. Ama ihat pati han dirnong be han ihirdapat Jisas ohe nita hat pati han bap ma hapat daham ina ruumsup napriptimur. Ina ruumsup diradir titwi daripti han dirmur. Ina ruumsup napripti orhor Jisas orhe tapnong hat pati ohoh ihan dir na gapa ham kasip hat orhorwi saptimur. Noh Got ohe mengsi; Jisas ohe arpin meng ma napor mengsi pot pisapatin ama ohe pe oh ihir nohnong inahama tom goh Patmos mongnong nang natpam namdatpamur.

Erer tarpatipra 17:1

Gahan dis ma marin pati beshei enser irair tit han wandasa Jon nohnong Go apris wamtin. Noh Got ohe bopor heisup oh winsi bisei saw kuu urhe er hat sapat ohe pe apin bopor heisup oh namgitiprohmur. Bisei saw kuu ma potpa oh winsi ap mutuh ma trun tom sapat duup ohe pat ap mutuhnong oh er apteio pora gipotpamur. Gin ama ap mutuhnong bopor heisup matin ohe da oh namgitiprohmur. Go wamat patinmur.

Erer tarpatipra 19:10

Enser oh napotporhan noh ohe duup oh bos hamnong ham timama ohe danong ham armi matpor ihpatin oh Es. Nohe danong ham armi nahatipra. Noh ditadit tap Got ohe atamreipti han ditaditmur. Gure taptem bap Jisas ohe arpin meng ma dindeipti ihirsi; diradir tap atamreipti bap diradir ohoh ihan nohe danong ham armi nahatipra. Got orhe danong ham armi mat paptenmur napongop. Got ohe meng pot pison ina mara ma kasip deipat sup oh dirnonghe Jisas ohe meng oh pot pison ina dasi nahat napapat ohmur.

Erer tarpatipra 19:9

Gahan enser oh Jon nohnong Gin go mama meng moh brak matinmur. Sipsip bap oh Gin noh kopen kuu dara amam ham den ruumsan dinmat norhe nita gurnong Gin apris amam ham den dinmur napor unatipramur. Ma unatipra gur oh amamsi bap gurmuro napor ama meng oh brak matina napongop. Naporpat it nohnong ama meng oh Got ohe arpinnap meng ohmur napongop. Napotporhan noh mama nabrak dei ohmur.

Erer tarpatipra 21:2

Tarpatperhan noh it wandeioh awam ongeng mat papat ap mutuh kopenohe Jerusarem ap mutuh oh aw tei mahat Got ohsi patdapat wanpatgop. Kuu ire han datperim ma awat tahaptiru hat awat yahnap tit ara wanpatgop.

Erer tarpatipra 21:9

Gahan Got orhe bopor heisup beshei dis nitat ma marin pati enser ihir bes enser oh pepe ruumsup apin ohe beshei dis oh marin pat enser oh aprisa Jon nohnong Gin sipsip bap ohe kuu ma datiproh oh gin noh gonong namgitiprohmur. Go apris wamtinmur napongop.

Erer tarpatipra 22:1

Gahan enser oh tom tit dama eimat paten dasi hatin ohe tom tit Jon nohnong namgingop. Ama tom oh Gotsi sipsip bap itaite pohon tongnopti tei duupdapat marasa kakeirsi hasnap tom apripatgop.

Erer tarpatipra 22:16

Gahan Jisas oh Noh Jisasmur. Noh patin orhor nohe pepuh oh Depit oh irat bap ohe tan hat marhupmur. Gahan Depit oh irat ohe tan hetporhan noh it ohe puh ire bokdapat irat bap hatin hat tarpatipmur. Noh yinggarheis mong da hatin hah tei ma has hapat hatin han oh nohmur. Ihat ma pat han noh norhe enser ohnong Gin go susa ma ihtipra ohe meng erer oh sus sios ihirnong potinmur pora darhetporhan oh susa Jon ohnong gonsi meng erer oh pinggimur ringop.

Erer tarpatipra 22:6

Gahan enser oh Jon nohnong Gwe wamara ma brak dei meng moh gonsi arpinnap dam tarpatipra ohe mengmuro. Got oh orhe meng pot pison han ihirnong orhe Yahsup ohsi kasip mara ma darherpat Got orhor nohnonghe Gin mama erer moh kimsi orhor ma tarpatipra meng oh go susa ohnong pinggitinmuro napor nohnong nadarhetporhan noh mama apris gin namgi ohmur napongop.

Erer tarpatipra 22:8

Noh Jonmur. Norhor mama ihtipra ohe erer moh noh wamaro amramo hama noh mama brak dei ohmur. Gahan noh erer oh amrama wandeipat enser ma namgi enser ohe duup oh bos hamnong ham timama ohe danong ham armi matporim ihtip.

Erer tarpatipra 22:9

Noh kopen armi matpor ihpatin oh Es. Go nohnong inahatipra. Noh gwe ma tamreipato Got ohe meng pisapti han gwe taptemo mama brak meng amram dindeipti hano ihirsi; diradir gonsi tap Got ohe atamreipti han bap dir ohoh ihan go nohe danong ham armi nahatipra. Got orhe danongwi ham armi mat paptenmur napongop.

Erer tarpatipra 4:1

Gahan noh ihpat wandei wandein aw tan mahat ron kat oh tanpur hangop. Tanpurhan rih tom san akitwi pong por meng deiptiru hat ma meng napor han orhor it meng tit napor hangop. Mon go manong marona. Marasa komdapat ma ihapra oh namgitiprohmur napor hangop.

Erer tarpatipra 5:7

Ihat pat han sipsip bap oh susa ap tan mutuh tongnot pat han ohe bes oper tan brak tein bok oh oh daringop.