1 Timoti 6:16 - Oksapmin

¹⁶ Orhorwi haputin timbas patru pat hanmur. Orhorwi has isipsinap hat patin hanip dir orhe duupnong na hatin hatinmur. Hanip dir na wandeiptru na wandeipri hanmur. Orhornongwi Gorhorwi winsi hat paten hanmuro. Gorhorwi kasipsi hat paten hanmuro por orhornongwi armi mar papten hanmur. Arpinwa.

1 Timoti 6:16 ပူးပေါင်းရင်းမြစ်များ

Jon oh yah meng ma brak matip ohe meng oh 1:18

Hanip dirhe Got ohnonghe na wandeipti hanmur. Got orhe bopor mat ma papat brer orhorwi Got orhe pat da oh dirnong namgitporhan dir wamar am haptimur.

Jon oh yah meng ma brak matip ohe meng oh 6:46

Mengwi amraptimura; at ohnong wamtin oh na wandeiptimur. Got orhorsi patdapat ma apdap han orhor pokwi ohnong wandeipatmur.

Piripai 4:20

Orhor inahapat at Got ohoh ihan dir orhornongwi dipdipwi armi mat orhorwi papten hanmur. Arpinwa.

Korosi 1:15

Ama bopor mat pat brer oh itap Got orhor hatin hat patin dir orhornong wamara Dire na wandeipti han itap Got orhorhe mihat pat han ma hapat daham am haptimur. Orhorwi ihat isipnap hat pat han ohoh ihan ma tarpatip han erer oh orhe hrepnongwi mat papatmur.

1 Timoti 1:17

Ama inahatip han oh na hapura kakhan hat patesuhru patru hat orhorwi patepra han ohmur. Hanip dirhe kin wamtinhe na wandeipti han ohmur. Orhorwi arpin Got ohmur. Ama ihat pat han ohnongwi armi maro win isip adaptuhuro mat papten han ohmur. Arpinwa.

Hibru 13:8

Gur Krais orhornong dahenmur. Orhe pohon yahnap hat ma pat da oh na yawar mar patesuh da orhorwi hat patru patepranap hanmur.

Jemis 1:17

Imat er nahatin oh Got oh eimat timbasnapmur. Aw tei mahat ohe has han ma darpatip han oh orhor pokwimur. Orhorwi ihat pat ohoh ihan oh atan danda oh hatip haho dapsi haho ma ihpatru na hapat hanmur. Oh tit da duung dawi hat pat han ohoh ihan yahnap yahnap han dire boknong ma nahapat oh orhe hrep papatdapat orhorwi papatim dire boknong nahapat ma hapat dahenmur.

1 Jon 1:5

Jisas ohe ma naporisuh wanin meng orhor noh mama gurnong naporpat ohmur. Ma naporpat meng oh Got orhe bok oh er da ham kwitem hat pat dahe orhe bok oh eimat timbasnapmur. Yah da orhap gon gurus rit pat han Got ohmur.

1 Jon 1:7

Got orhe yah da teiwi hat patru hat ma pati bap diroh orhe yah hat ma patru hat orhorwi sapti han bap dirmur. Ihat ma pati bap diroh Got orhe nita kuuhan ihir tit dawi ham yah han gosham yah hat patimur. Ihat yah da tei ma pati dirnong oh Got orhe mon Jisas ohe heim ma tanduketip ohsi dire er hat sapti er gap gonsi hirmat namdama yah nahapatmur.

1 Jon 4:12

Dir Got ohnong na wandeipti han orhora; dir hanip ihirnong da apris bopor mat paptihanoh ama imat bopor mat papti ohe pe oh ama na wandeipti Got orhor dire da mutuh patim ihirnong da apris bopor mat papten ohe da oh dirnong isip mat orhor naprisa pei mat orhorwi napisapatmur.

Jut ohe brak mat atip ohe meng oh 1:25

Orhor pokwi dire Got ohmur. Orhorwi Hanipyah Jisas Krais orhe dap tei namburin han ohmur. Ihtin han ohoh ihan armi mar papten han oh orhor pokwimur. Has kasip ohsi hat paten han oh orhor pokwimur. Kakhan ham napapten hanhe orhor pokwi patmur. Ihtin han oh ihat orhor rih patesuhru patru patepra han orhormur. Ihtin han ohnongwi armi mar paptepera daham armi marwi paptenmur. Arpinwa.

Erer tarpatipra 1:6

Arpit namdama dirnong gin gurnong Got orhe hanat bok han bap nahahmur. Nahama ama inahah han bap gursi; norhorsi dir ihirnong paptemo Got ohe atamreindin oh atamreiyao hen han bap nahahmur napor ihat paten han bap kis nahat napapatmur. Ihtin han bap nahat napapat ohoh ihan dir Orhe kasip ohsi ha napaptenoh rima orhe winnong dipdipwi adaptuhur paptiru hat orhor paptenmur.

Erer tarpatipra 1:8

Hanipyah Got oh Nohri patesuhru patru ihat orhorwi patepra hanmur ginaporpatmur. Ama ginaporpat Got oh orhorwi duuptei kasipnap han rih patesuhru ginhe patru apripra han ohmur.

Erer tarpatipra 21:3

Wanporhan noh amraoh orhe pohon tongnopat bas amdapat kasip mengtei We. Gur gin amratinmuro. Gin Got ohe ma patepra oh orhe kuuhan ire mutuh oh patepramuro. Oh ihat patin ihirhe orhe nita bap kuu han ham pateprimuro. Arpin napormuro. Got orhorsi; orhe nita kuuhan ihirsi tap hat pateprimuro.

Erer tarpatipra 22:5

Ihat ma patepri oh Hanipyah Got orhe has ohsiwi kwitem timbas mong da timbas has teiwi orhor mong da teiwi pateprimur. Ihat patepri ohoh ihan atan oh ha has hatinoh. Tanggam suhum has matpera ti na dahatiprimur. Has titwi hat patina kuuhan ihir Got ohsi kakhan titwi hat dipdipwi pateprimur.

Erer tarpatipra 4:11

Sara Hanipyah nure Got go erer gon moh gonsi go nadarpatip hanmuro. Gorhorwi dahatporhan erer moh tarpatip oh gin mama pat ohmuro. Gorhorwi ihtin han ohoh ihan gorhornongwi has yahnap hanmur naporin hano armi nahen hano kasipnap hanmur naporin hano oh gorhor pokwimuro poriptingopa.

Erer tarpatipra 7:12

Ma armi matpa oh Ire ma giporiya oh arpinnap mengmuro. Diradire Got oh orhorwi dakuunap hanmuro. Orhorwi kasipnap hanmuro. Oh ihtin han ohoh ihan orhornongwi armi mar papten ohe dao orhornongwi has yahnap hanmur por papten ohe dao orhornongwi Weso por papten ohe dao orhornongwi win isipsi mar papten ohe dao orhornongwi kasipnap hanmur por papten ohe dao ada orhorwi patru eimat patepra hanmuro. Arpinwa por armi deingopa.