1 Pita 4:10 - Oksapmin

¹⁰ Got orhe damdapat hanip ihirnong panggeit papten da moh nitat mat apripora daham nitat mat napripatmur. Ama nitat mat napin pat da oh guragure hrepnong mar pomar paptimdapat ama nitat napin pat da orhorsiwi hat patim panggeit pisashenmur.

1 Pita 4:10 ပူးပေါင်းရင်းမြစ်များ

Matyu 20:28

Amaru hat orhor Hanip Brer norhor hat patmur. Noh winsi han hama gurdapat nohnong ha napanggeingwe rim na wanhupmur. Basra. Nohdapat win timbas han hatin ham gurnong napanggeinmat wanhupmur. Noh gur eimat paten ohe dasi hat ha patengwerim noh gure danong hama haputinmat wanhupmur. Ihan gurhe amaru hat orhor patenmur napongop.

Matyu 24:14

Got ohe napapindin hrepnong hatin ohe meng ohri mong mong moh gonsi ha amratingwe rim pot pisaperhan komdapat mong pepe dik oh apripramur napongop.

Matyu 24:45

Jisas oh Gur mohnong dahatinmur. Kamah han hat pat han oh wannong tit saporim orhe atamreipti han ihir kinhat pat han ohnong ohe erer oh ohe hrepnong mar saproh. Dakuu hat pan hat orhorwi tamrein sapat han tit pathanoh ama han orhornong Gin noh wan teinong tit saprohmur. Gin go apo norhe natamreipti hano ihirnong gwe hrepnong mar papatinmur. Imat papatim den dapti dik oh den pomar nitat mar pandemo papatinmur potiprohmur. Gipora mandam saprohmur.

Matyu 25:17

Mani 2,000 kina ma dar han ohehe tap da orhor matporhan it 2,000 kina ohe boknong matipri.

Matyu 25:44

Por imtiporhan ihir it Es. Hanipyaha go desut pahoh haho tom din haho hohop han haho watah timbas han haho sik haho karapus haho hat patin nuhur desut wanaham na napaptenipti napotiprimur.

Mak oh yah meng ma brak matip meng oh 10:45

Amaru hat orhor Hanip Brer norhor hat patmur. Noh winsi han hama gurdapat nohnong ha napanggeingwe rim na wanhupmur. Basra. Nohdapat win timbas han hatin ham gurnong napanggeinmat wanhupmur. Noh gur eimat paten ohe dasi hat ha patengwe rim noh gure danong hama haputinmat wanhupmur. Ihan gurhe nohe ma dahat patru hat orhor patenmur pongopri.

Ruk oh yah meng ma brak matip ohe meng oh 12:42

Por dahamtiporhan Hanipyah oh Gur mama mengnong dahenmur. Kamah han hat pat han oh wannong tit saporim orhe atamreipti han ihir kinhat pat han ohnong ohe erer oh ohe hrepnong mar saproh. Dakuu hat pan hat orhorwi tamrein sapat han tit pathanoh ama han orhornong Gin noh wan teinong tit saprohmur. Gin go apo norhe natamreipti hano ihirnong gwe hrepnong mar papatinmur. Imat papatim den dapti dik oh den pomar nitat mar pandemo papatinmur potiprohmur. Gipora mandam saprohmur.

Ruk oh yah meng ma brak matip ohe meng oh 19:13

Gidahapat sonmat oh orhe atamreipti han kathei ihirnong tap tei deipat Gin noh meih mongnong sapra ohoh ihan gur mama mani mohsi tamohoma titsi it dariptin kaput norhor apris wanahatipramur por gor kwei hayop yitir tamreim daripti ohe gor kwei oh nitat mat apdapri. Aprisa pipri.

Ruk oh yah meng ma brak matip ohe meng oh 8:3

Tit Joana uhmur. Uhe imap Kusa oh Herot ohe atamreipti han ihirnong wamat papat han ohmur. Tit Susana uhmur. Ama yitir kuu ihirsi; kat kuu ruumsan ihirsi Jisas ohe tapnong hama iraire deno ihseno erer oh dara Jisaso orhe pinggit pisapat hano ihirnong apris ama panggeit pisashe oh.

Rom ihirnong Por oh brak atip ohe meng oh 15:25

Noh kimsi apris ihtipramur. Gin noh Jerusarem ap mutuhnongri saprohmur.

Rom ihirnong Por oh brak atip ohe meng oh 15:27

Ire imat ma atiri oh iraire damdapat orhor ihirnong panggeitpera daham yah da tei orhor mani oh atirimur. Imat mani ma atiri oh yan hat hatin hat patimdapat atirimur. Yan hat hatin hat patimdapat ma atiri oh Got orhe yah da oh Juda hat pati bap ihirnongri apriporhan ihirdapat Juda na hat pati Masedonia mongo Akaia mongo ihirnong apriptimur. Apriperhan ihir Dirnong Got ohe yah da oh napripti ma hapat. Ire ma napripti oh dir yan hat hatin pati ohoh ihan dirdapat it ina tei ohe panggeitin ohe erer oh apripera daham mani oh atirimur.

1 Korin 15:10

Noh ihtin han hat patin orhor Got orhe damdapat orhor Ohnong yah matpora daham orhe da orhor yah nahatporhan gin noh mama ihtin han hat pat ohmur. Got orhe da orhor ma yah nahatip da oh na wa hama arpin dam tarpama mama dam timan sapat ohmur. Ihat dam ma timan sapat oh ire Krais ohe mengtei kasip hat ma atamrein sapti oh noh atnap kasip hat orhor atamrein sapatmur. Nohe ihat kasip hat orhor ma atamrein sapat oh norhe kasip orhor ihat sapatda. Basra. Got orhe damdapat orhor kasip nahapat kasip ohsi ihat atamrein sapatmur.

1 Korin 3:10

Guragure apnong dahenmur. Gur Got orhe ap hatin han bap hat patimur. Gur Got orhe ap hatin hat ma pati oh Got orhe damdapat orhor nohnong ap hatin ina dasi nahatporhan noh pohon ap yah mat ma hapti han ire da hatin ham ap mun nanip kis mar itip ohe tan mat meng dup mar napotipmur. Noh imat meng duup mar napotporhan tit han oh apris ama ohe mun kamen tei oh tam gonopti ohe tan mat meng naporpatmur. Ap yah mat hapti han ire er mat hatipririm orhe kamen tei orhorwi pomat ma haptiru mat orhor Got ohe meng poripti han nuhurhe wan meng potipririm orhe napotip meng orhorwi pomat potpera daham porinmur.

1 Korin 4:7

Gur winsi han bap hat patihanhe guragure dahapti ohe pe oh winsi han bap hat patida. Basra. Got orhorwi ihtin da napriporhan ihat patimur. Orhorwi ihtin da napin patin ihat pati ohoh ihan kinhat Norhe da orhor ihat pat hanmur daham armi tahat sasiprohe. Orhorwi imat napin pat han ohoh ihan na armi tahaprohemur.

2 Korin 6:1

Nuhur Got ohe tapnong ham atamreipti han nuhuro rim Got orhe damdapat orhor Imat yah matpor daham yah nahat orhor ma napapat bap gurnong orhe inahapat danong oh wa hapri. Damsi hat orhorwi ha patengwe rim nuhur mama kasip mengtei naporipti ohmur.

2 Korin 9:1

Judia mong ma Krais ohe nita han hat ma pati kuuhan ihirnong mani asar ma panggeiptinong oh gur dahat pati ohoh ihan noh trun meng na napotiprohmur.

Epesas 3:8

Norhe da oh Noh komnap han win timbas han hat pat ma hapat dahapatmur. Ihat ma dahat pat han nohnong Got oh orhe damdapat orhor Imat yah matpora dahapat da ohsi nohnong Go Krais orhe yahnap da hanip gur na dahatin hatin ohe yahnap da meng moh go Juda na hat pati bap ihirnong pot pisashenmur.

Epesas 4:11

Ama han orhor musum napin han oh orhe atamreindinnong asoh nitat mat napdapmur. Nitat mat ma napdap oh kat han ihirnong orhe mengtei meng pot pisashen han deio kat han tit ihirnong orhe meng porin han deio kat han tit orhe yah meng pot pisashen han deio kat han tit orhe nita ihirnong paptim meng am dein han deio imat orhe atamreindin asoh nitat mat napdapmur.

2 Timoti 1:18

Hinhina mar yah mat papatin kaput mong pepe dik oh hatporhan yah da tei sam imtinmur por adahandeipatmur. Noh rih Epesas ap mutuh oh patin oh nohnong ma napanggeisuh oh go am hat patmur.

Taitas 1:7

Kis mat ma pisapra oh Got orhe atamreindin oh sios bap ihirnong wamat papten han bap ihirnong kis matipra ohoh ihan ire yah hat saya apriya haptinong asoh wamara ire boknong matin meng oh timbas hat pati han ihirnongwi kis mat pisonmur. Mama mihat pati han bap ihirnongri kis deipra. Nohwi yah hat pat hanhe dahayao kapkap bopor heisup hayao wain tom isip dam da timbas hayao be bokdus hanip ihirnong inin meng por suyao noh titsi titsi datiprohnengo daham er mat dariyao ama ihat pati han bap ihirnongri kis deipra.

Hibru 6:10

Gur ihat patim Got orhe danong ayah deipti da ohsi diradire taptem ihirnong panggeitpera daham panggeisheru panggeit orhor mama papti ohmur. Ama ihat sapti da oh Got oh er han bas ohoh ihan oh na hanhan mara dahatwi pat hanmur.

1 Pita 5:10

Gur batbet ma daripti moh gin kakun gar dik tit batbet dariptimur. Gar dik tit dar patin komdapat Got orhor it yah naham kasip hat paten ohe inasi nahatipramur. Ama inahatipra Got oh hanip dire danong ham yah nahapat da ohe duuptei oh orhorwimur. Ama dahapti da ohe duuptei han orhor Maihir Krais orhe tapnong hama orhe dipwi pat has yah da ohsi tap mat taman dara ha patengwe napor namburpat Got orhor inahatipramur.

1 Pita 5:12

Mama hatip meng ma nasar moh Noh Sairas oh norhe taptem kasip ham pomat tamreipat hano rim noh ohnong potporhan oh ama nabrak dei ohmur. Mama brak mat ma nasar moh gur Got orhe damdapat orhor nuhurnong bopor naham ma yah nahapat oh arpin inahapat ma hapat daham ama danong mandapririm kasip hat marin ha patengwe rim mama brak mat nasar ohmur.