1 Korin 10:11 - Oksapmin

¹¹ Ire ma ihashe da oh dir am hama ire ti da ti da ma hashe danong oh hatipririm ihir ama meng oh dire boknong naham brak matpamur. Ihan mong moh timbas hatin dik oh kakduup hat pat ohoh ihan ire ma ihashe da oh gur am ham ihapri. Gur yah hat orhorwi patenmur.

1 Korin 10:11 ပူးပေါင်းရင်းမြစ်များ

Matyu 13:39

Mahaw han tit apris er gwe ma sakmatip han oh Satan ohmur. Dam datin dik oh mong pepe dik ohmur. Dam datin ihirnong oh norhe natamreipti han enser ihirmur.

Matyu 13:40

Ihtiporhan dasuh wit ruprup mat irat tei itparu mat orhor kaput mong pepe dik hah tei oh enser ihir apris inahatiprimur.

Rom ihirnong Por oh brak atip ohe meng oh 13:11

Ihat patenmur ma napor oh dire gin mama pati danong moh daham ginapormur. Rih dir kopenat Got ohe danong ma hatpa oh Krais orhe it apris nambutin dik oh meihdapat hat patesuhmur. Gin mama pati dik moh orhe it apris nambutin oh kakduup nahat napapatmur. It apris nambutin oh kakduup nahat napapat ohoh ihan gin masas tei pati dik hatin hat patimur.

Rom ihirnong Por oh brak atip ohe meng oh 13:12

It apris nambutin dik oh kakduup nahat ma napapat oh mong moh kwitem hat ma pat oh gin mong da hatin kakduup hahmur. Kakduup nahat napat ohoh ihan kwitem dus ma er hat sapti da oh gonsi oh hariri por mandatinmur. Mandama gin has teinong ham er dasi gusutin ohe yah da oh namya hatin mat ar mamen taham yah hat sashenmur.

Rom ihirnong Por oh brak atip ohe meng oh 15:4

Rih Got ohe meng ritporhan ma brak matpa meng gonsi meng oh amrama dir da yah hat patim kasip hat orhor Orhor imat yah nahatiprawa daham minhan ha patengwe rim meng oh gonsi ritporhan brak matpamur.

Rom ihirnong Por oh brak atip ohe meng oh 4:23

Got oh Epraham ohnong Gwe ihat dahat pat ohe pe oh noh gonong Go yah hanmur napormur giritporhan brak matpa meng oh Epraham ohe boknongwi na potipmur.

1 Korin 10:6

Ire ma ihashe oh dirhe ihirnong wamara ire ma er da hashenong oh dirhe Nuhurhe ama er da oh hatiprohenengo dahapririm dirnong namgim ihashemur.

1 Korin 7:29

Nohe taptema. Nohe ma naporpat meng moh mohnong daham naporpatmur. Gin mong moh timbas hatin dikhe kakduup hat patmur. Kakduup hat pat ohoh ihan gar dik mama indiprohe dik moh kuusi han gurhe kuu timbas han hatin hat indinmur.

1 Korin 9:10

Hanip dire boknongsi tap mat daham ginapotipmur. Ma ginapotip oh mong marim den gonopti hansi den suhupti hansi irair tap hat Nure mama mihat tamreipti pe moh dam yah mat datipriwa daham ha tamreingwe rim ginapotipmur.

Garesia 4:24

Kuu yot moh Got orhe dik atip meng yot hatin hat pateshe kuu yot ihitmur. Nang tatpat pat hatin hat ma patesuh kuu uh Sainai yei ka Got ohe dik ma natip meng hatin hat patesuh kuu uhmur. Ama Sainai yei ka dik natip meng oh gahansin kuu Hega uh hatin hat pat ohoh ihan ama sawa meng hrepnong hat ma pati ihiroh urhe ma nang tatpat patesuh ohe tan hat patimur.

Piripai 4:5

Hanipyah ohe it aprin oh kakduup hah ma hapat daham gur ahar manap da tei hat patim meng pot pisashenmur. Ihat pot pisaptin ihirhe gurnong wanahama sa am hapri.

Hibru 10:25

Ihat susa diradire tarmur ma rotu hapti danong oh mandapri. Kat ire tarmutinmat na apripti da hatin hapri. Gur Hanipyah orhe aprin dik oh kakduup hah ma hapat. Ihan da kasip goshat inpera daham tap tei ham da kasip goshat patenmur.

Hibru 10:37

Krais orhor kapkap apripra ohoh ihan gur kasip hat orhorwi minhan patenmur. Oh kapkap apripramur ritporhan ma brak matpa oh mamaru hat patmur. Ma apripra han oh na sun ham kapkap orhor apripramur.

1 Jon 2:18

Nohe taptem brer gur mohnong dahenmur. Gin mong moh timbas hatinmat kakduup hat pat ma hapat dahenmur. Timbas hatinmat kakduup hat ma pat oh rih Kaput Krais ohnong mahaw matin han tit tarpatipramur ma ripti meng oh gin arpin ohnong mahaw mat papti han bap ihir ruumsan tarpam mama pati ohmur. Ihat ma pati oh dir wamara Gin mong timbas hatinmat kakduup hah ma hapat daham am haptimur.