1 Korin 1:30 - Oksapmin

³⁰ Got orhordapat Gur norhe nitamur napor kis naham Jisas Krais ohe tapnong nahat napapatmur. Inahat napapatin dir Krais ohsi tap hat pati ohoh ihan Got oh dakuu da oh mon ohe boknong mat papatin dir wamar am haptimur. Dir wamar ma am hapti oh Krais orhe dap teimdapatwi er da hrep nang tatpat patin nang arpit namdao yah hat saperhan Gur yah hat sapti han bap gurmur napotin ohe dao ama da oh mon Krais orhe dap teidapatwi napapat ma hapat daham am haptimur.

1 Korin 1:30 ပူးပေါင်းရင်းမြစ်များ

Matyu 1:21

Uhe brer ma itipra oh mon tit itipramur. Itporhan oh gure er da dat namdama gurnong namburin han hatipramur rim ohe winhe Jisas oh potinmur ama potip oh.

Ruk oh yah meng ma brak matip ohe meng oh 11:49

Gur ihat pati han bap ohoh ihan Got oh dakuu am hat patdapat mama meng moh ritipmur. Ma ritip oh Kaput norhe meng pot pisapti han propeto norhe mengtei darherpat hano ihir ire patinong susa meng pot pisaptin ihir kat ihirnong garmar ina ruumsup apriyao kat ihirnong suyarit hapuriyao mat pisasiprimur ritipmur.

Ruk oh yah meng ma brak matip ohe meng oh 21:15

Gurnong ire duupnong napisayahanoh ama napisaya tei orhor noh gurnong dakuu dasi naham daham yahnap meng potin ohe meng oh gure atem tei rit natipramur. Rit natporhan ama meng oh gur ihirnong potperhan ihir gure meng oh sakarap naham na namkatiprimur. Inahatipra ohoh ihan gur Nuhurnong napisayahanoh nuhur kian meng sa potipri na dahat patimdapat orhor napisayahanoh sonmur.

Jon oh yah meng ma brak matip ohe meng oh 1:18

Hanip dirhe Got ohnonghe na wandeipti hanmur. Got orhe bopor mat ma papat brer orhorwi Got orhe pat da oh dirnong namgitporhan dir wamar am haptimur.

Jon oh yah meng ma brak matip ohe meng oh 14:6

Potporhan Jisas oh Ama apteinong son ohe mandap kat oh norhormur. Arpin meng ma riptihe norhe bokdapatwi tarpapatmur. Eimat yah hat paten ohe dahe norhe boknongwi hat patmur. Noh ihat pat han ohoh ihan At ohe patnong sapera dahayahanhe wan kathe ti na saptimur. Norhe boknongwi ham at ohe patnong saptimur.

Jon oh yah meng ma brak matip ohe meng oh 17:26

Am hapti ihirnong oh noh gwe mihat pat da meng oh ihirnong por pinggipatmur. Pinggipatru pinggitwi ma paptepra oh Noh ire tap patin gwe nohe danong ham bopor nahapatru hat orhor ihirnonghe bopor mat orhor ha paptenoh rim indeipramur pongop.

Jon oh yah meng ma brak matip ohe meng oh 8:12

Gahan Jisas oh Noh kakdah han gonsi gure has han oh nohmur. Norhe danong ma haya han gur kwitem dus na saptimur. Eimat paten dasi nahapat ohe has teiwi saptimur napongop.

Aposer 26:18

Noh ire patinong ma nadarheripra oh go ire mutuhnong susa ire kin kwi hat patim ma er hat sapti kin oh adipekam has yah teinong deio Satan ohe hrepdapat hat patin go ambur yah teinong deio mat ha pisashenoh rim aptei oh sus ihirnong meng pot pisapatin Got oh ire er hat sapti ma yansi mat papat yan oh it yansi na mar hanhan mar mandapramur. Mandama norhe danong ham Ohwi inahatin hatin hanwa dahatperhan ma norhor ongeng mat papat bap ire tapnong matipramur napor hangopmur potipri.

Rom ihirnong Por oh brak atip ohe meng oh 1:17

Ama kasip mengnong amrama Ohwi inahatin hatin hanwa ma dahat patiru ihat dahat pati ohe pe ohwi Got oh Moh yahnap hat pati han ihirmur naporpatmur. Got oh Ama ihat dahat pati ohe pe ohwi noh ihirnong Gur yah hat pati han bapmur potipramur ma dahatip da oh orhe ritporhan ma brak matpa yah meng dap tei orhor orhe ama dahatip da oh pitap teinong mar am nahatipmur. Pitap teinong mar ma am nahatip meng oh mamaru hat patmur. Orhor inahatin hatin hanwa dahapti ohe pe ohwi yahnap bapmur napor eimat yah hat paten dasi nahatipra han bap gurmur ritporhan brak matpamur.

Rom ihirnong Por oh brak atip ohe meng oh 11:36

Orhorwi duupteinap hat pat han ohoh ihan erer gon moh gonsi orhorwi darpama orhe hrepnongwi mat papat ohoh ihan dirdapat tit han tit ohnong apinhe na apin hatinmur. Ihat pat han orhornongwi dir dipdipwi win adaptuhur armi mar papten han ohmur. Arpinwa.

Rom ihirnong Por oh brak atip ohe meng oh 12:5

Amaru hat orhor dirhe trun han hat pati orhor Krais orhe boknong ham tit inawi hat patimur. Ihat tit inawi hat patim nitat atamreindin nitat ma hat pati oh irair gospanggeit ha indingwe rim nitat ina pesi hat patimur.

Rom ihirnong Por oh brak atip ohe meng oh 16:11

Norhorsi tap gap Juda bap Herodion ohnonghe sa yah hat pato rim dahatahat hangwermur potinmur. Nasisas ohe aptei Hanipyah orhe danong hat pati ihirnonghe sa yah hat patio rim Por oh dahatahat hangwermur potinmur.

Rom ihirnong Por oh brak atip ohe meng oh 16:7

Norhorsi tap bap Juda bap kuu gamin ma nohsi tap hat karapus hat pateshe Andronikassi; Junias ihithe sa yah hat patio rim dahatahat hangwermur potinmur. Nohe ma Krais ohwi inahatin hatin hanwa ma dahatip oh komdapatmur. Ihitri ama danong oh hatpamur. Ama ihitnong oh aposer ihir winsi mat papti yot ihitmur.

Rom ihirnong Por oh brak atip ohe meng oh 4:25

Ama da pamsuhup han ohe ma haputip oh dire er hat sapti ohe gwemat Got oh Go was ire er gap hirmat amdam ire gwemat haputinmur por darhetporhan oh arpin wandas dire er gap ohe gwemat haputipmur. Haputporhan it da ma pamsuhup oh orhe dap teidapat dirnong Gur yah han bapmur napotinmat pamsuhupmur.

Rom ihirnong Por oh brak atip ohe meng oh 4:6

Dire na tamreipti ohe pe oh Got oh be Go yah hanmur naporpatmur nohe ma naporpat mengru hat orhor Depit ohhe girim brak matipmur. Depit oh girim ma brak matip oh Na tamreipti ohe pe oh Got oh gur yah han bapmur ma porpat bap ihiroh amamsi hat pati bap ihirmur dahat patim mameng moh brak matipmur.

Rom ihirnong Por oh brak atip ohe meng oh 5:19

Tit han orhap Got ohe porpat mengnong na amram amkatip ohe pe oh kuuhan trun bap dir er danong ham er hat saptimur. Ohe ama hatipru hat orhor tit han orhap Got ohe meng gonsi amram yah mat dimtip ohe pe oh kuuhan trun bap dirnong Got oh Gur yah han bap gurmur napotipramur.

Rom ihirnong Por oh brak atip ohe meng oh 5:21

Isip mat ma pihip oh Got oh Kuuhan gonsi ihir er hat saptin haputin ohe hrepnong hat patiru hat orhor norhe damdapat orhor yah matpora ma dahapat da ohe hrepnong isipnap hat ha patengwe. Ihat patin Maihir yah hat pati kuuhan bapmur por diradire Hanipyah Jisas Krais ohe dap teimdapat yah hat eimat paten dasi matipramur daham orhe damdapat Yah matpora ma dahapat da oh isip mat pihipmur.

Rom ihirnong Por oh brak atip ohe meng oh 8:1

Krais Jisas orhe tapnong hat pati dirnong oh Krais orhe dap teimdapat dirnong yah hat orhorwi paten da nahapat Yahsup oh dir er nang ohe eimat batbet dar paten ohe hrepdapat nang natpat napapatin orhor nang narpima yah teinong nahat napapatmur. Inahat napapat ohoh ihan Got oh ihat napapat dire boknong nahatin menghe timbasnapmur.

Rom ihirnong Por oh brak atip ohe meng oh 8:23

Ama ihat pati oh ama erer ihirwi ihat na patimur. Orhe brer naham Yahsup ohri napin pat ohe kamen tei it titsi ma napripra han dirsi tap hat yimam minhan patimur. Yimam ma minhan pati oh Norhe brer ihirnong erer moh apriprawa daham mamen mat nat pat erer oh orhe brer nohnong isip mat orhor sa napripra daham yimam minhan patimur. Isip mat ma napripra oh dire ina moh wan inasi nahatipramur.

Rom ihirnong Por oh brak atip ohe meng oh 8:9

Oh ina teimdapat er da tarpapat ohe hrepnong mat papat han bap ihirmura; gurnong oh ihat na patimur. Gurnong oh gure mutuh oh Got orhe Yahsup oh patin ohoh orhe hrepnong naham napapatmur. Krais ohe Yahsup oh gure mutuh oh na pathanoh ama han gur Krais ohe nita bap hat na pati bap gurmur.

1 Korin 1:24

Ihir ihat dahat patimura; kat han Juda hat pati han bapo Juda na hat pati han bapo dirnong oh Got oh Gur norhe nita bap gurmur napor kis nahat napapat bap dirnong oh Krais ohe irat bok sur gartaham haputip ohe meng moh Got orhe kasip hat pat dao dakuu hat pat dao oh nuhurnong namgitip meng ma hapat daham am haptimur.

1 Korin 12:18

Hanip dire ina moh ihat tit hanwi hat na patmur. Got orhor Hanip dire ina pe pe moh imat nitat mat atpora daham nitat ina pe pe moh natipmur. Orhor imat ina pe pe moh natip ohoh ihan hanip dir nitat ina pesi hat patimur.

1 Korin 12:27

Amaru hat orhor Krais orhe buh bes ina ham titwi hat patmur.

1 Korin 12:8

Got orhe Yahsup oh dirnong gospanggeit sashen nitat da ma napin pat oh mamaru hat patmur. Tit han ohnong ma apripat oh Got orhe meng oh dakuu mat porin ohe da oh apripatmur. Tit han ohnong ma apripathe Got orhe mengnong am hama kuuhan ihirnong porin ohe da oh apripatmur.

1 Korin 4:15

Gurnong Norhe bopor nahat napapat brer gurmur ma napor meng moh gurnong wanahat napapti han ihir trun trun patihanhe trun han ihir gurnong napapti orhora; gure napapat han ita oh tit han noh pokwimur. Noh Krais ohe yah meng oh napotporhan gur ama naporpat ohe pe oh Krais ohe tapnong hat patio rim ihan noh gure ita titwi hat patmur mama napor ohmur.

1 Korin 6:11

Kat han gur rih ihtin dasi hat pateshe bap gurmur. Gin mama patinong oh Got orhor er gap hirmat namdama yah nahat napapatmur. Imat ma napapat oh orhor diradire Hanipyah Jisas Krais ohe dap teimdapat orhe Yahsup oh gure mutuhnong nahatporhan Yahsup orhor Got orhe gon han bap nahat napapatmur. Orhe gon han bap nahat napapatin orhe kintei oh yah hat patin oh Gur yah hat pati han bapmur naporpatmur.

2 Korin 12:2

Mamarumur. Nohe am hat pat han tit Krais ohe nita hat patim kapkap gasnang por tapas pora tei ohe pepe aw tan tei mahat sariyaoh pat hatipmur. Ma ihtip oh gin noh patin gin mama 14 krismas hatir ohmur. Ama ihat pat hatip han oh norhor ihat pat hangopmur. Ma pat hatip oh norhe ina mohsi pat hatipde da da ohwi pat hatipe daham norhor hanhan hat patmur. Got ohwi am hat patmur.

2 Korin 4:6

Rih mong moh has timbas hat patin Gin mong moh ha has hatinoh ma ritip Got orhor nure danong nadapem nahas mat napapat Got ohmur. Has nahat ma napapat oh Got orhe yah hat paten ohe has da oh Jisas ohe boknong atan kakeir hatin has mat papatin dir ama hasnong wamara orhornong am haptimur.

Garesia 3:13

Dir pohon mengnong dimtipera dahapti orhor pomat na dindeipti ohoh ihan Got oh heisup nahat napapatmur. Ama da oh Jisas oh dara ama yan oh oh datipmur. Ohe ma heisup nahat napapat da oh ma datip oh mama brak matpa mengru hatin mat datipmur. Ma brak matpa meng oh Hanip sama Moh er han sutin han ma hapat daham irat boknong nang atpayahanoh ama irat boknong nang atpaya hannong oh Got ohhe heisup mat papat hanmur por brak matpamur. Ma brak matpa mengru hat orhor Got orhe bopor heisup nahat napapat da oh Jisas orhe sur gartahatip boknong matipmur.

Epesas 1:14

Imat ma napin pat Yahsup oh dirnong imin ohri napin patmur. Ma napin pat ohe pe oh Imin mohri nure bok pat ma hapat. Kaput erer napripra ma ritip oh arpin dam datipri ma hapat. Got orhe han nahat napapat dirnong oh arpin nambura orhe tapnong nahatipra ma hapat dahaptimur. Ama inahat napapat han orhorwi has yah dasi han ohoh ihan dir orhornongwi armi mat paptepera dahat patenmur.

Epesas 1:7

Orhe imat ma bopor nahatip oh mon Krais orhor dire gwemat haputipmur. Hapura orhe heim ohsi dire er da tein tahat patim ma er hat sapti danong moh orhordapat dat namdam yah da teinong nahat napapatmur. Inahat ma napapat oh Got orhe er yan napripra ma dahapat danong oh natimbas deipatmur. Imat er da dat namdam ma napapat oh Got orhe damdapat Imat yah matpora daham ma yah nahapat da oh isip mat bapkei mat papatin ohoh ihan isip mat orhor napripatmur. Imat isip mat napris napapatin ama da ohsi dakuu hayao da tanpet indin ina dasi hat hayao hat patimur.

Epesas 2:10

Orhor nambutin inasi nahat napapat moh rih orhor Got oh Krais Jisas orhe tapnong hatipri bap ihir mama yah da mama yah danong hat sa sasipri daham ama yah da oh mamen mat natipmur. Mamen mat nasara ama mamen mat natip yah danong hat sashen ohe inasi naham kis naham napapatmur.

Epesas 4:30

Er meng riyahanoh Got orhe Yahsupnong ina ruum apris imtiprohe ohoh ihan gur ama Yahsupnong ina ruumsup apin meng ohsi rit sasipri. Ama Yahsup oh Got oh Maihir norhe ambutipra han ihirmur. Ihan noh norhe Yahsup mohsi ire boknong ket tup saripti ohe tan mat itpora. Tup sar mihih mat papatin kaput pepe dik sa tarpatipra daham ama Yahsup ohsi dason nahat napapat ohoh ihan ama Yahsup ohnong ruum sup apris er deipri.

Epesas 5:26

Krais oh dire gwemat ma haputip oh Noh norhe nita sios kuuhan bap maihirnong tom gahdeipti ohe tan mat gahmaro norhe meng ohsi yah maro mar ongeng mat papten dasi matipramur. Deipat ire ina bok andeh sirap huhun tamboro er yan datin hatin hat pati ohe tamboro oh timbasnap ina yahnap ongeng mar mihihnap mat papat bok tei andeh norhe bes teinong mar datipramur daham dire gwemat haputipmur.

Piripai 3:9

Noh Krais ohe tapnong hat pat moh norhe sawa meng amram yah hat uso apiro hapat ohe pe oh Got oh go yahnap hat pat hanmur na naporpat ma hapat dahapatmur. Krais ohwi inahatin hatin hanwa dahatporhan Got orhordapat Go yah hanmur napotin inasi nahama Go yahnap hat pat hanmur naporpat ma hapat dahapatmur.

Korosi 3:16

Imat paptin Krais ohe meng oh Norhe mutuhnong orhornong am hatin ohe da oh pomat isip mat pisapora daham isip mat pisashenmur. Isip mat pisonmat oh dam tarpatin meng oh am goshayao sawa meng gospot sayao hat sashenmur. Ihat susa arpin Got ohnong weso potin ohe da ohsi hama rotu hapti gao Got orhe ga ritporhan ma brak matpa ohe gao Yahsup orhe napripat ohe gao ohwi Got orhornong weso potin da orhorsi patim ama ga tei oh sawa meng gospot saya apriya hat sashenmur.

1 Tesaronaika 5:23

Nure at Gota por ma nadahandeipti meng oh At Gota. Go gorhorsi; nuhursi manap gosham yah hat paten ohe duuptei han oh gorhorwimur. Ihtin dasi naham napapat han gorhor Tesaronaika aptei sios bap ihirnong Got gorhor hatin mar gorhe yahnap danong asoh isip mat apisus gon gurus por apaptenmur. Imat apapatin ina da oh yahnap bok inasi hat patin Jisas Krais oh it apris ha wamtinoh rim go ihirnong ihtin inasi mat paptenmur por nuhur imat gure paten meng oh nadahandeiptimur.

Taitas 2:14

Ama minhan pati han Krais orhor Noh ire er nang hrepnong hat pati moh norhor ambura yah teinong matpora. Yah teinong mara ire er gap ahirmara eimat norhe kuuhan hat paten han bap matpora. Mara yah hat pan hat sashen ohe da ohsi matpora daham orhe yah hat paten ohe danong na hama dire danong ham dire gwemat haputipmur. Ama inahapat han orhornong apripra ma hapat daham minhan patimur.

Hibru 9:12

Ros ma tamreipat oh kakdah hanat bok han ire meme heimo burmakau heimo ohsi ros ma tamreisheru hat na tamreipatmur. Orhe heim ohsiwi Got orhe ongengnap mat papat teinong tit dah pokwi ruhupmur. Rosa dipwi nambur napapatru napapten ohe da oh orhe heim ohsi rosa namohotipmur.

Jemis 1:5

Dakuu danong hatip hat pati gur Got ohnong dahandeinmur. Dahamtiperhan Got oh manap da tei yah mat isip mat orhor napripat han ohoh ihan gur dakuu danong hatip hat patim ma dahandeiya oh Got orhor ama da oh yah mat orhor napriprohmur.

1 Pita 1:2

Rih orhor At Got oh gurnong Noh mama han moh norhe nita matipramur. Matinmat oh norhe Yahsup ohsi norhe ongeng mat papten brer matipramur. Mara Jisas Krais orhe heim dap tei oh ire er gap yan oh ahirmatporhan orhe mengnongwi sa dimtipri daham kis nahatipmur. Ihat kis naham napapat han norhor gure ihat paten meng oh noh Got ohnong At Gota. Gorhe damdapat daham Ihirnong noh imat yah matpor ma dahapat da ohsi; manap goshat yah hat paten da ohsi ire mutuhnong isip mat orhor apisashenmur por nadahandeipatmur.

2 Pita 1:1

Noh Saimon Pitamur. Jisas Krais orhor Go norhe meng mohsi pot pisona napotporhan orhe kis nahat napapat han noh orhe boknong hat patim orhe mengtei be atamreim sapat han noh mama brak mat nasar ohmur. Diradire namburpat han Jisas Krais oh Gotmur. Ama Krais orhor orhe duung dasi hat pat ohe pe oh orhornong Ohwi inahatin hatin hanwa dahatin ohe da oh Juda hat pati bap nuhurnong yah mat orhor napripatmur. Yah mat orhor ma napripatru mat orhor gurnonghe imat orhor napripatmur. Napriporhan ohwi inahatin hatin hanwa ma dahat pati han bap gurnong mama brak mat nasar ohmur.

1 Jon 5:6

Ama Got orhe brerwa dahapti han Jisas Krais oh kakdah mama wandasa tom waso heim tandukero ma hatip ohe pe oh Arpin Got orhe brer ma hapat dahatin ohe da oh dirnong namgim ihtipmur. Ma ihtip oh tom ohwi na waihipmur. Tom ma waihip ohsi orhe heim ma tanduketip ohsi tap mat namgim ihtipmur. Ihtiporhan Got orhe Yahsup oh arpin da ohe duuptei han hat pat ohoh ihan Krais orhe ma ihtipnong oh arpin Got orhe brer hat patim ihtip ma hapat dahatin ohe da oh napor am nahapatmur.

Erer tarpatipra 14:4

Ama han bap ihir kuu ihir tap na saw ham ongeng taham yahnap hatwi ma pati han ihirmur. Ihir sipsip bap ohe Noh anong sapora daham saporhan ihirhe ohe komnongwi ma dinggoshapti bap ihirmur. Kakdah han maire mutuhdapat ihirnong ma ambutip oh kopen pa awduup pera han pohon ihirnong apriptiru Got ihit taman kopenat ma amburiya moh nute taman tit pokwimur rim ma ambutpa han ihirmur.

Erer tarpatipra 5:9

Ama ihir bos hamnong hama kopenohe ga tit riptingopa. Kopenohe ga tit ma ritpa oh mamarumur. Gonong nitpawa; Gonong nitpawa. Nitperhan gwe heim oh tanduketipwa; tanduketipwa. Tandukera ama heim ohsi kakdah han ihirnong amohotipwa; amohotipwa. Ihir Got ohe nita ha hatingwe rim amohotipwa; amohotipwa. Han ambap ambap amohotipwa; amohotipwa. Han ameng ameng nitatsi han amohotipwa; amohotipwa. Ina nitasi han amohotipwa; amohotipwa. Mong mong nitatsi han amohotipwa; amohotipwa. Gowi ihtin hanmura; ihtin hanmura. Ihan brak tein bok oh gowi datin hanmura; datin hanmura. Dara gata emtin hanmura; emtin hanmura.