1 Korin 1:10 - Oksapmin

^10-12 Gur ihat yah hat pati orhora; Krowi ohe aptei han ihir aprisa nohnong Korin aptei sios ihir sakarap gosham kat ihir Nuhurri Por ohe meng amram dindeipti han nuhurmur. Kat ihir Nuhurri Aporos ohe han ham ohe mengnong amram dindeipti han nuhurmur. Kat ihir Nuhurri Pita ohe han ham Pita ohe mengnong amram dindeipti han nuhurmur. Kat ihir Nuhurri Krais orhe han ham ohe mengnong amram dindeipti han bap nuhurmur rim sakarap gosham inggoshaptimur napotirimur. Napotperhan noh amram da er hatirmur. Nohanhera. Noh Jisas Krais orhe mengtei meng naporpat ohoh ihan gin noh kasip mengtei napotiprohmur. Gure sakarap gosham katket tahat pati da oh mandama tit dawi hat patima Tit meng pokwi dimar paptepera daham tit dawi hat patenmur.

1 Korin 1:10 ပူးပေါင်းရင်းမြစ်များ

Matyu 9:16

Jisas oh kopen da ohsi; rihohe da ohsi na sahsah deiptio rim oh mameng moh ringop. Rihohe aripti watah oh tem tahatporhan kopenohe watah bra tit dara rihohe watah temnong na apaptimur. Apayahanoh mukmak tahah tei hanip go dirhitporhan tem isip hatiprohmur.

Mak oh yah meng ma brak matip meng oh 2:21

Jisas oh kopenohe da ohsi; rihohe da ohsi na sahsah deiptio rim oh mameng moh ringopri. Rihohe aripti watah oh tem tahatporhan kopenohe watah bra tit dara rihohe watah temnong na apaptimur. Apayahanoh mukmak tahah tei hanip go dirhitporhan tem isip hatiprohmur.

Mak oh yah meng ma brak matip meng oh 3:24

Tit kakhan ohe hrepdapatwi hat patimdapat amuk orhe amuk orhe gosham sut patin goshayahanoh irair tap hat gonsi timbas hatiprohemur.

Jon oh yah meng ma brak matip ohe meng oh 10:19

Jisas oh ameng oh potporhan Juda ihir amrama kat han ihir Mama han oh mongsup oh ohe mutuh oh da aban mat papatin ihat mengripat han ohoh ihan nuhur ama ihat mengripat han ohe meng mohri nuhur amratiproheda. Nuhur na marasiprohemur goshangopa. Goshatperhan kat han ihir Es. Mongsup oh da aban mat papatsi han ihiroh mihtin dakuu mengwi riyao kin kwisi han ihirnong pondeiyao haptida irair gigosham yot da hangopa.

Jon oh yah meng ma brak matip ohe meng oh 17:23

Tit hanwi hat ha patengwe rim ma indeipat oh go nohsi patru noh ihirsi ihat patepora daham indeipatmur. Indeipatin tit dawi hat pati da oh dam timdiporhan kakdah maihir wamara nohnong Orhor darhetip han ma hapat. Itap oh ama darhetip han ohe danong ham bopor mat papatru ire danonghe oh imat bopor mat papat ma hapat sa dahapri.

Jon oh yah meng ma brak matip ohe meng oh 7:43

Ihapti ihir Jisas oh Got oh nambutin han darhetipra ma ritip handa da moh wan hana daham irair yot da hangopa.

Jon oh yah meng ma brak matip ohe meng oh 9:16

Gipotporhan kat han Parisi ihir Ama han oh tuperipti dik ohe danong na hapat han moh Got oh na darhetip hankino ama ritpa oh. Kat han ihir Es. Got oh er hat sapti han ihirnong pang buksi han matporhan hanip dire na imtin hatin han tit matin hatinda. Basra. Na imtin hatinmur. Mama han moh na imtin hatin da indeipat han ohoh ihan moh Got orhe darhetip hanmur gigosham ihir ama yot da hatpa oh.

Aposer 4:32

Got orhe danong hat pati kuuhan ihir tit dawi ham patesheri. Ihat patin erer oh tit han Moh norhemur na rima Diradire titwimur gosham patesheri.

Rom ihirnong Por oh brak atip ohe meng oh 1:13

Nohe taptem gur mohnong dahatinmur. Nohe da oh dipwi gure patinong apripora dahapat orhor apripor ihah tei oh ti da ti da oh apris mandap gatnahapatmur. Noh gure patinong apripora ma dahat pat oh nohe mong mong mama Juda na hat pati han bap ihirnong noh meng pot pisapat ohe pe oh ire Krais ohe danong ma hapti da oh gurhe ihat ha dahat patengwe rim noh apripor dahapatmur.

Rom ihirnong Por oh brak atip ohe meng oh 12:1

Nohe taptem bapa. Got oh dirnong hinhina da isip nahat napapato rim noh gurnong kasip mengtei napotiprohmur. Ire Got gwemur por apop sum ma apriptiru mat orhor gure da ina oh dasi orhor patim Got orhornong aprishenmur. Imat apin oh Got gorhemur por ongengnap mar pomat papatdapat orhornong aprishenmur. Got oh Imat orhor naprisa ha armi nahengwe dahapat ohoh ihan imat ma apripti oh orhor amam hapatmur.

Rom ihirnong Por oh brak atip ohe meng oh 12:16

Gorhe ma Noh ihtin han tit dara noh ihtin han hat patneng ma dahapat da oh ihirhe ihtin da hat patikin daham gorhe ma ihat dahapat da oh ihirnong apris panggeinmur. Nohwi ihtin han hat pat ohoh ihan noh be bisei hat pati han ire tapnong ham na indiprohmur dahapri. Ire tapnong ham guragur tap hat patenmur. Gurdapat Nohwi dasi han hat patmur dahapri. Ihirhe ihat dahat pati ma hapat daham guragur tap hat patenmur.

Rom ihirnong Por oh brak atip ohe meng oh 15:30

Nohe taptema. Gur amratin. Diradire Hanipyah Jisas Krais ohsi tap hat patim orhe Yahsup oh dirnong hinhina gosham gospanggeit indin da napin pato rim noh gurnong kasip mengtei napotiprohmur. Gur nohnong Got oh napanggeit napapten ohe meng oh norhe kasip hat Got ohnong dahandeipatru mat orhor gurhe imat orhor nadahamar paptenmur.

Rom ihirnong Por oh brak atip ohe meng oh 16:17

Nohe taptem bapa gur amratinmur. Sios bap gurnong er naham katket nahat napisusa Krais orhe yah meng ma napotpanong oh amkara er da teinong pranahat napisapti han bap ihirnong inin hat patim kom asar mandanmur. Ire tapnong hathe patepri.

1 Korin 11:18

Gure ma ihat patinong oh nohe ma na amam hat pat oh mameng mohri napotiprohmur. Kat han ihirdapat Korin aptei sios kuuhan ihir rotu ham tarmuriya tei oh ihir katket taham kat irarhe kat irarhe hat patimur napotperhan noh amram nohe daheri katpe tit gur arpin ihat patikin daham da er hat patmur.

1 Korin 12:25

Yah hat na pat pe ohe danong ham ha paptengwe rim ma natip da oh ina kat pe kat pe yot itait sakarap goshat patepririm tap kat da titwi gospanggeit ha patengwe rim ama da oh natipmur.

1 Korin 3:3

Gur kakdah han ire dahat sapti da hatin hat patimur ma napor meng oh mamarumur. Gur kat han ihiroh Nuhurri Por ohe han hat patim ohe mengnong amram dindeipti han nuhurmur. Kat han ihir Es. Nuhurri Aporos ohe han hat patim ohe mengnong amram dindeipti han nuhurmur rim ma sakarap gosham heisup goshapti oh kakdah morhe danong hat patim ma ihat sapti han ire da hatin hat patim ihat sapti basda. Gur kakdah morhe danong hat patim ihat sapti han ire da hatin hat patim ihat sakarap goshat saptimur.

1 Korin 4:16

Noh ihat gure ita hat pato rim kasip mengtei Gur ita norhe ihat sapat danong mohwi dimar sashenmur mama naporpat ohmur.

2 Korin 10:1

Nohanhera. Kat han ihir nohe boknong meng ma nahapti oh Por oh kakduup apris patim oh kas hat patim meng oh pomat na naporpatmur. Meih sus patim oh kasip bok mengtei inahah meng hatin mat naporpatmur napor meng oh nohe boknong nahat napaptimur. Inahapti orhor noh Krais oh orhe danong na ham manap mengtei risuh ohe tan hat orhor gurnonghe noh imat orhor napotiprohmur. Napotporhan gur amratinmur.

2 Korin 13:11

Nohe taptem gurheo. Gur nohe mengnong moh amratinmuro. Amrama yah danong hatin ohe danong moh Got orhe dahat pat da ohsi tap kat mat pisasipera daham tap kat mat pisashenmur. Imat pisus guragur tit dawi hama manap dasi gosapris yah hat patenmur. Ihat patin bopor naham manap dasi nahapat Got oh gursi tap hat sa patepra.

2 Korin 13:9

Arpin mengnong isip mat pison inasi hat ma pati oh nuhur gapa han hatin hat patin gur kasip han hatin hat patihanoh oh yahmur daham amam haptimur. Ihat dahapti ohoh ihan nuhur Got ohnong ire ihat ma pati da oh Got gorhor isip mat apisus gorhe dahat pat da ohsi; ire ma dahapti da ohsi tap kat mat apisashenmur por nadahandeiptimur.

2 Korin 5:20

Inahat napapat han nuhur ohoh ihan nuhur Krais orhe mengtei orhe meng pot pisapti han bap nuhurmur. Orhe meng pot ma pisapti oh Got oh nure atem tei tongnoma orhorsi mahaw hat pati han gurnong Gin gure Got ohsi mahaw hat pati da oh mandama orhorsi yah han hat paten ohe danong hatinmur napor kasip mengtei dipwi napot napisaptimur.

2 Korin 6:1

Nuhur Got ohe tapnong ham atamreipti han nuhuro rim Got orhe damdapat orhor Imat yah matpor daham yah nahat orhor ma napapat bap gurnong orhe inahapat danong oh wa hapri. Damsi hat orhorwi ha patengwe rim nuhur mama kasip mengtei naporipti ohmur.

Garesia 4:12

Nohe kasip hat naporpat mengnong moh nohe taptem gur amratinmur. Noh Juda nuranure sawa meng hrepdapat hat patdapat noh sawa mengnong mandama be han bap gur hatin hat patmur. Ihtin ohoh ihan gurhe Juda nure sawa meng hrepnong hapri. Nohe ma hat patru hat indinmur. Noh gursi patina gur nohnong na inaham yah mat napapinpamur. Ginhe imat ma napaptesheru nahat orhor napaptenmur.

Piripai 1:27

Gin gur amratin. Isip meng tit napotiprohmur. Meng isip oh mamarumur. Krais orhe yah meng ma napotip danong amram pomat ma dindeiptiru hat orhorwi sashenmur. Ihat susa Por oh apirhanhe dir yah hat saptin orhor ha wanahatinoh. Na apirhanhe dire yah hat sapti meng orhor ha amratinoh daham yah hat orhorwi sashenmur. Yah hat orhorwi sapti meng ma noh amratipra oh mameng mohmur. Ihir yah mengnong na mandama kasip hat orhorwi patimuro. Patim tit dawi hat patim tit han ohwi ha tamreipat hatin hat patim meng moh Arpin menghe ha dahatingwe rim pomat orhorwi kasip mar meng pot pisaptimuro.

Piripai 3:16

Ihtin orhor gin mama namgim naporpat da mohri dimtipera daham dindeinmur.

1 Tesaronaika 5:13

Patim nure mutuh moh ihir napanggeim tamreipti ma hapat. Ihan yahnap mat orhor da apripora daham ihirnonghe gur bopor mar ire hrepnong hat orhor patenmur. Iham guragur manap da tei da gosat orhorwi patenmur.

2 Tesaronaika 2:1

Nohe taptem gur amratin. Dir Hanipyah Jisas Krais oh it apris orhe duupnong naham ruprup nahatiprawa daham dir minhan patimur.

1 Timoti 5:21

Nohe imat meng pomtinmur ma napor meng moh noh Got ohe kinteio Krais ohe kinteio yahnap enser ire kinteio oh kasip mengtei mama napor ohmur. Ihan Timoti gorhe da ohri Moh er hanhe Moh yah hanhe por satin da ohri hat patim satipra. Go potahat dahataham manap da tei orhor sanmur.

2 Timoti 4:1

Krais Jisas ohe it ma apripra oh hanip dirnong orhe hrepnong naham napapindin yahnap han ham apripramur. Aprisa haputpa bapsi; da pati bapsi tap naham dahanaham nasatipramur. Ihtin han Kraissi; Got ite kintei kasip mengtei ma napotiproh meng moh ite dap tei awam hatin tuker napotiprohmur.

1 Pita 2:11

Nohe yah han bopor nahat napapat han bap gurnong oh kasip mengtei napotiprohmur. Gur kakdah moh kakun hohop han bap hat pati han bap gur ohoh ihan gure da mutuhdapat tarpam er nahapat da oh eimat kom asar mandanmur. Ama er da oh orhap tarpapat da oh Got orhe apteinong son ohe yah danong sum naer deipat ohoh ihan ama danong oh eimat kom asar mandanmur.

1 Pita 5:10

Gur batbet ma daripti moh gin kakun gar dik tit batbet dariptimur. Gar dik tit dar patin komdapat Got orhor it yah naham kasip hat paten ohe inasi nahatipramur. Ama inahatipra Got oh hanip dire danong ham yah nahapat da ohe duuptei oh orhorwimur. Ama dahapti da ohe duuptei han orhor Maihir Krais orhe tapnong hama orhe dipwi pat has yah da ohsi tap mat taman dara ha patengwe napor namburpat Got orhor inahatipramur.