1 Jon 5:6 - Oksapmin

⁶ Ama Got orhe brerwa dahapti han Jisas Krais oh kakdah mama wandasa tom waso heim tandukero ma hatip ohe pe oh Arpin Got orhe brer ma hapat dahatin ohe da oh dirnong namgim ihtipmur. Ma ihtip oh tom ohwi na waihipmur. Tom ma waihip ohsi orhe heim ma tanduketip ohsi tap mat namgim ihtipmur. Ihtiporhan Got orhe Yahsup oh arpin da ohe duuptei han hat pat ohoh ihan Krais orhe ma ihtipnong oh arpin Got orhe brer hat patim ihtip ma hapat dahatin ohe da oh napor am nahapatmur.

1 Jon 5:6 ပူးပေါင်းရင်းမြစ်များ

Matyu 3:16

Patitporhan Jisas oh tom dahdapat marpatin orhor aw tan mahat tanpura Got orhe Yahsup oh ner kurwam hatin hat wandasa ohe bas oh tongnongopri.

Ruk oh yah meng ma brak matip ohe meng oh 22:20

Dama den oh dapti Jisas oh den ma panderu mat orhor irat gwe tom gap san oh dara Moh norhe heim ohmur. Norhe heim ohsi gure er gap nahirmar nadurketipramur. Ama inahatipra heim ohsi Got oh gurnong yah nahat napaptepra ohe meng oh kopenohe meng deimur pora irat gwe tom gap san oh kumet kak ohe tan kak mar apingopri.

Jon oh yah meng ma brak matip ohe meng oh 14:17

Ama napanggeit napaptepra Yahsup oh arpin meng ohe duuptei ohmur. Kakdah morhe danong hat pati ihiroh ama Yahsup ohnong na wandeiyao na dahayao hat pati ohoh ihan ihir Yahsup oh nure mutuhnong ha hatinoh na dahatin ina hat pati bap ihirmur. Gurnong oh guragursi tap hat orhorwi patru patepra ohoh ihan gur ama Yahsup ohnong am hat patimur.

Jon oh yah meng ma brak matip ohe meng oh 14:6

Potporhan Jisas oh Ama apteinong son ohe mandap kat oh norhormur. Arpin meng ma riptihe norhe bokdapatwi tarpapatmur. Eimat yah hat paten ohe dahe norhe boknongwi hat patmur. Noh ihat pat han ohoh ihan At ohe patnong sapera dahayahanhe wan kathe ti na saptimur. Norhe boknongwi ham at ohe patnong saptimur.

Jon oh yah meng ma brak matip ohe meng oh 15:26

Inahapti orhor noh gurnong napanggeit napapten Yahsup oh nadarhetipramur. Ma nadarhetipra oh arpin meng ohe duuptei ohe Yahsup ohmur. Ama Yahsup oh nadarhetporhan oh at ohe patdapat aprisa nohe ihat ma pat meng oh Oh ihat pat hanmura; ihat pat hanmura napor meng oh am nahapramur.

Jon oh yah meng ma brak matip ohe meng oh 16:13

Kwitnong oh arpin mengnong isip mat papten ohe Yahsup oh aprisa arpin meng gonsi oh am naham dason nahapramur. Imat meng ma naporipra oh orhe da meng oh na naporipramura; orhe amrapat mengwi naporipramur. Naporpat ihtin han tit apripramura; Ihtin han tit apripramura napor am nahapramur.

Jon oh yah meng ma brak matip ohe meng oh 3:5

Gipotporhan Jisas oh Noh arpin meng napotiprohmur. Hanip gurnong Got ohe Yahsup oh tom ohe tan gahnahamo kopen nasariya brer hatin nahamo na nahahhanoh gur Got ohe napapindin hrepnong na hatiprimur.

Jon oh yah meng ma brak matip ohe meng oh 4:10

Potporhan oh Es. Go Got orhe gonong napin han oh go hanhan haho deip nahah han nohnong hanhan haho hahmur. Gomdapat am hahneng nohnong Go tom ti namdina napornengmur. Naporneng noh dasi tom oh namdenengmur potipri.

Jon oh yah meng ma brak matip ohe meng oh 4:14

nohe ma ri tom oh namdiporhan dayahanoh it komdapathe tom din dahe na haptimur. Tom din da na hat patin tom uuptem ohdapat marapat orhor hatin hat hanip mutuh oh ihat patin dipwi paten dasi haptimur potipri.

Jon oh yah meng ma brak matip ohe meng oh 6:55

Nohe ina bok oh arpin dennapmur. Norhe heim oh arpin tomnapmur.

Aposer 8:36

Pot susa tom hru gar duup tit kotpari. Koripti ama han oh Pirip ohnong Tom hru moh noh Got ohe danong ham waprohmur. Noh kinhapat han ohra ihan noh na waproh pongopri.

Rom ihirnong Por oh brak atip ohe meng oh 3:25

Got oh Krais ohnong Gin go kakdahnong wayonmur. Wasa ihir er hat saptin nohe ihirnong sutinmat heisup mat papat ohe yan oh gin gwe boknong mar go ire kak han ham haputinmur. Hapur heim tandurketporhan ihir Nure gwemat heim tom durker ma hapat sa dahapri. Ihat ma dahaya ihirnong oh noh it yansi na matipramur por darhetporhan oh wandas dire gwemat kakdah moh haputirmur. Ma haputir oh kuuhan dir er hat sapti ohe yan oh Got oh dirnong kapkap ma na naprisuh oh Got oh Noh be dat amdatpramur na dahama Mon orhe boknong matipramur. Mara norhe duung dasi hat pat da moh pitap teinong mar pinggitipramur daham mon orhe boknongwi mar Gin go ire gwe mat haputina potporhan haputirmur.

Epesas 1:7

Orhe imat ma bopor nahatip oh mon Krais orhor dire gwemat haputipmur. Hapura orhe heim ohsi dire er da tein tahat patim ma er hat sapti danong moh orhordapat dat namdam yah da teinong nahat napapatmur. Inahat ma napapat oh Got orhe er yan napripra ma dahapat danong oh natimbas deipatmur. Imat er da dat namdam ma napapat oh Got orhe damdapat Imat yah matpora daham ma yah nahapat da oh isip mat bapkei mat papatin ohoh ihan isip mat orhor napripatmur. Imat isip mat napris napapatin ama da ohsi dakuu hayao da tanpet indin ina dasi hat hayao hat patimur.

Korosi 1:4

Weso por nadahamar pati ohe duuptei oh Epapras oh apris Korosi ihir Krais Jisas ohe danong hama Ohwi inahatin hatin hanwa dahat patimuro. Ihat dahat patim Got ohe nita bap kuuhan gonsi ihirnong bopor mat paptimuro ririt nuhut amrama Got ohnong weso por nadahandeiptimur.

1 Timoti 3:16

Ama dire yah hat paten arpin meng nareman papat meng oh Got oh pitap teinong matir meng moh wanohe arpin meng yahnap meng tit ma hapat daham mama ga ripti meng hatin mat ripti ohmur. Krais oh hanip hapat pitap hatipmura; pitap hatipmura. Pitap hapat orhe ongeng tahat yah hat sapatin Got ohe Yahsup oh orhe yah hat ma sapatnong oh namgitipmura; namgitipmura. Enser ihir wandeishemura; wandeishemura. Orhe meng oh aw pe mong pe han gonsi pot pisaperhan ihir amram arpin ohwi inahatin hatin hanhe dahashemura; dahashemura. Dahatperhan Got oh orhe yahnap teinong pihipmura; pihipmura. rim mama ga oh ripti ohmur.

Taitas 3:5

Ma nambutip oh hanip diradire yah hat sapti ohe pe oh ambutpora daham na nambutipmur. Basra. Dir er hat patin orhor orhor hinhina dasi han ohoh ihan dirnong hinhina naham nambutipmur. Ma nambutip oh dire er gap hirmat namdama orhe Yahsup ohsi orhorsi yah hat paten ohe kopen brer nahama kopenohe han nahatipmur.

Hibru 10:29

Amaru hat Krais ohnonghe amkar mandayahanoh ama ohe pe oh atnap er yan datipri basda. Atnap er yan datiprimur. Krais ohnong amkar ma mandapti oh mamarumur. Krais oh ohe heim ohsi dik natip mengnong kasip mat papatmur. Ama kasip mat papat heim ohsi dire er gapnong nahirmat napapat heimnong oh Moh be heimhe daham dasei deipti dao hinhina mar yah deipti da ma nahapat ohe Yahsupnong dasei meng por kom asaripti dao ama ihapti ohe danong ham Krais ohnong tonggamar mandayahanoh ama ihya han ihir atnap er yan isip datiprimur.

Hibru 12:24

Gur anong sus ma pati oh Jisas oh mutuh han hama kopenohe dik natir mengnong ma dam timdin meng matir han Jisas orhe duupnong haptimur. Jisas ohe duupnong ma hapti oh Eper ohe gusut sashen ohe heim ma durketip duupnong oh na haptimur. Jisas orhe yah mat napanggeit napapten ohe heim durket namotip duupnong oh haptimur.

Hibru 13:20

Mama meng rim brak mat nasar han noh Got ohnong mimat dahandeipatmur. At Gota. Manap naham yah dasi nahapat Gota. Gorhe dipdipwi patepra ohe dik natip mengnong ma kasip matip heim ohe dap tei oh diradire Hanipyah Jisas ohnong it pamsuhupmur. It ma pamsuhup oh nuhurnong orhe hrepnong naham yah mat napapten ohe kaknap han mar pamsuhupmur.

Hibru 9:14

kakdah ohe apop gapa heim ohsi imat pondeishe ohoh ihan Krais ohe kasip heim oh atnap yahnap nahapat ma hapat dahaptimur. Orhe bok andeh mihihnap bok ina hat patin eimat paten ohe Yahsup ohe kasip ohsi dire gwemat haputipmur. Ihat mihihnap hat pat han oh heim tandurker haputip ohoh ihan ina teimdapatwi na yah nahapatmura; dam na tarpatin ohe er da oh hapti damdapat Gin orhor ma ihpat ohe er oh er hat pat sa daham damdapat ma dahapti da ohsi tap mat yah nahapatmur. Yah nahama dire patru patepra Got orhe atamreindin inasi nahapatmur.

Hibru 9:7

Oh ohri ap dah ohe tamreishe han ihiroh. Mutuh ap yawar dahnong oh duuptei hanat bok han ma hat pat han orhap krismas tit sa birhitiro rim rosuhmur. Ma rosuh oh be na rosuhmur. Apop heimsiwi rosuhmur. Rosa ama apop heim oh Norhe hanhan hat patim er hat sapato rim gin nasarmur por gwar tan tei apop heim amorpat Got ohe danong ayah deishemur. Ayah deipat Noh gin kuuhan ire hanhan hat patim er hat saptio rim mama nasar ohmur por heim oh amor Got ohe danong ayah deishemur.

1 Pita 1:2

Rih orhor At Got oh gurnong Noh mama han moh norhe nita matipramur. Matinmat oh norhe Yahsup ohsi norhe ongeng mat papten brer matipramur. Mara Jisas Krais orhe heim dap tei oh ire er gap yan oh ahirmatporhan orhe mengnongwi sa dimtipri daham kis nahatipmur. Ihat kis naham napapat han norhor gure ihat paten meng oh noh Got ohnong At Gota. Gorhe damdapat daham Ihirnong noh imat yah matpor ma dahapat da ohsi; manap goshat yah hat paten da ohsi ire mutuhnong isip mat orhor apisashenmur por nadahandeipatmur.

1 Pita 3:21

Tom hru dahdapat orhor ma ambutip oh kaput Norhe kuuhan ihir tom waperhan mimat ambutipramur rim namgitipmur. Gin ma namgitipru hat orhor dir tom waperhan namburpatmur. Tom ma wapti oh sirap tambor hirmat mandatinmat na waptimur. Hanip ire kintei Nohe da ohri gin Got orhe kintei oh ongeng matwi paptepramur rim tom waptimur. Ama ihat waya ohe pe oh Got oh Krais ohe hapur mashup dap tei oh dirnong namburpatmur.

1 Jon 1:7

Got orhe yah da teiwi hat patru hat ma pati bap diroh orhe yah hat ma patru hat orhorwi sapti han bap dirmur. Ihat ma pati bap diroh Got orhe nita kuuhan ihir tit dawi ham yah han gosham yah hat patimur. Ihat yah da tei ma pati dirnong oh Got orhe mon Jisas ohe heim ma tanduketip ohsi dire er hat sapti er gap gonsi hirmat namdama yah nahapatmur.

1 Jon 4:10

Ama mon ohnong Go ire gwemat haputinmur. Haputporhan noh gwe ma hapur ohe dap tei oh noh ire er hat sapti yan oh it yansi na mara eimat hanhan mar amdatipramur por mon ohnong darhetipmur. Ma darhetip oh orhe dirnong da napris bopor nahat napapat da oh mon orhe boknong mar namgitipmur. Ma namgitip oh dire arwananah ihirnong bopor matin da oh mihat pat ma hapat dahatin ohe da oh mon orhe boknong mar namgitipmur. Ma namgitip oh dire Got ohnong bopor deipti da hatin mat na namgitipmur. Bopor matin da oh morhe gon hat patmur rim mon orhe boknong mar dirnong namgitipmur. Namgitporhan dir wamara hanip ihirnong da apris bopor deipti da oh mihat pat ma hapat daham am haptimur.

Erer tarpatipra 1:5

Jisas Krais Got ohe meng dason teiwi ripat han ohri duuptei masas pip han aw pe mong pe moh ohe kakhan ire duupteinap hat pat han Jisas oh orhe da orhor gurnong yah nahapat dasi; manap gosham yah hat paten dasi sa nahat napaptepra. Dir er nang ohe natpat pat hrepdapat hat patin Jisas oh bopor nahat napapatdapat dire danong ham hapura ama er nangnong orhe heim ohsi arpit namdatipmur.

Erer tarpatipra 5:9

Ama ihir bos hamnong hama kopenohe ga tit riptingopa. Kopenohe ga tit ma ritpa oh mamarumur. Gonong nitpawa; Gonong nitpawa. Nitperhan gwe heim oh tanduketipwa; tanduketipwa. Tandukera ama heim ohsi kakdah han ihirnong amohotipwa; amohotipwa. Ihir Got ohe nita ha hatingwe rim amohotipwa; amohotipwa. Han ambap ambap amohotipwa; amohotipwa. Han ameng ameng nitatsi han amohotipwa; amohotipwa. Ina nitasi han amohotipwa; amohotipwa. Mong mong nitatsi han amohotipwa; amohotipwa. Gowi ihtin hanmura; ihtin hanmura. Ihan brak tein bok oh gowi datin hanmura; datin hanmura. Dara gata emtin hanmura; emtin hanmura.

Erer tarpatipra 7:14

Dahanahatporhan noh ohnong Hanipyaha. Nohri hanhan hat patmur. Gorhor am hat patmur potip. Potporhan oh Maihir iraire mahaw han ihir ina ruumsup isip tit apriya orhor ihir Jisas orhe panggeitin ohe kasip ohsi na gapa ham kasip ham yah hat ma pati han bap ihirmur. Ire watah has dapsi mohhe sipsip bap ohe heim ohsi gahmara ongeng mar has mar mama an pati han ihirmur.