NEHEMIA 1:9 - Ombibeli Iyapuki

⁹ ndelenee ngeenge tamu lialuluka kwaame ndele tamu diinine oipango yange ndele tamu i wanifa, ovo va tewatewa nande va kale fiyo okomunghulo weulu, Ame ohandi va eta monhele oyo nde i hoolola edina lange li kale mo.’

NEHEMIA 1:9 ပူးပေါင်းရင်းမြစ်များ

1 EEHAMBA 8:48

Hano, ngeenge tava aluka kwoove nomutima aushe nomwenyo aushe moshilongo shoukwatwa wavo, ndele vo otava ilikana nokutaalela koshilongo osho we shi pa ooxe nokoshilando osho we shi hoolola nokotembeli ei nde ku tungila,

1 EEHAMBA 9:3

NOmwene okwe mu lombwela ta ti: “Ame nda uda ko eilikano neindilo loye we li popya koshipala shange; ongulu ei we i tunga, Ame nde i yapula, edina lange li kale mo fiyo alushe. Nomesho ange nomutima wange tau ka kala mo alushe.

1 OMAFIMBO 16:35

Tyeni: “Kalunga kexupifo letu, tu xupifa; tu ongela u tu xupife mo moiwana, opo tu hambelele edina loye liyapuki, noku li tanga molwefimano loye.

ESRA 6:12

Ndele Kalunga ou a tula mo edina laye, na hanaune po ohamba keshe noshiwana keshe osho tashi nane eke lasho oku shi tauluka, nokutya okuhanauna po ongulu ei yaKalunga muJerusalem. Ame Darius nde shi tya. Nashi wanifwe shili!”

OMAPSALOME 106:47

Omwene, Kalunga ketu, tu kwafa, tu kongolola mo moiwana, opo fye tu hambelele edina loye liyapuki, noku li tanga molwefimano loye.

OMAPSALOME 107:3

nokwe va ongela moilongo moushilo nomouninginino, moumbangalanhu nomoumbuwanhu.

OMAPSALOME 147:2

Omwene ota tungulula Jerusalem, Ye ota ongele ava, va halakanifwa vovana vaIsrael.

JESAJA 11:12

Ndele ta ka dikila oiwana epandela, ndele ta ongele Ovaisraeli ava va li va twalwatwalwa, novahalakanifwa vomuJuda ote va kongolola kominghulo nhee dedu.

JESAJA 27:12

Ndele mefiku tuu olo, Omwene ota ka shopola oiimati okudja komulonga waEufrat fiyo okokamulonga kaEgipiti; akutu nye Ovaisraeli, otamu ka toolwa umwe naumwe.

JESAJA 56:8

Omwene Kalunga ou ta ongele Ovaisraeli va li ve lihana ota ti: “Navakwao vahapu ohandi va ongele natango kuye.”

JEREMIA 12:15

Ndelenee ngeenge nde va duda mo mokati kavo, ohandi va file onghenda vali, ndele handi va alulile, keshe umwe kefyuululo laye, nakeshe umwe kedu laye.

JEREMIA 3:14

“ ‘Alukeni! Akutu nye, ovana oonakuliteeka nge, Omwene osho ta ti, osheshi Ame nde mu tambula. Ndele Ame ohandi mu ile umwe moshilando shimwe noovavali mepata limwe, nohandi ke mu twala kuSion.

JEREMIA 31:10

“Udeni ondjovo yaKalunga onye oiwana nye mu ke di udifile meenhunhu dokokule domefuta mu tye: ‘Ou a halakanifa Israel, ote ke shi ongela yo, note shi amene ngaashi omufita ta amene oshuunda shaye.’

JEREMIA 32:37

Tala, ohandi ke va kongolola koilongo oyo aishe handi ke va kandulila ko mokuhanduka kwange nomoupyuhandu wange nomouladi wange unene wa xwama. Ndele ohandi ke va alulila monhele tuu ei notava kala mo ve nombili.

JEREMIA 6:22

Omwene osho ta ti: Otapa di ovanhu kedu lokoumbangalanhu, noshiwana shinene tashi djuuka, tashi di kominghulo dedu.

HESEKIEL 14:6

Onghee hano lombwela eumbo laIsrael: Omwene Kalunga ota ti ngaha: Lidilululeni nokulialuluka koikalunga yeni ndele oipala yeni inamu i taalelifa koixuna yeni aishe.

HESEKIEL 36:24

Ndele Ame ohandi ke mu kufa mo moiwana ndele handi mu ongele kumwe moilongo aishe, ndele handi ke mu eta moshilongo sheni.

LEVITIKUS 26:3

“Nye ngeenge tamu ende meenghedimhango dange ndele tamu diinine oipango yange noku i wanifa,

SAKARIA 8:7

Omwene womatanga ovakwaita ta ti ngaha: Tala, oshiwana shange Ame ohandi ke shi kulila medu lokoushilo nomedu lokouninginino,

MATEUS 24:31

ndele ta tumu ko ovaengeli vaye ve nomanghuma e neendaka dopombada, ndele tava ongele ko ovahoololwa vaye keembinga nhee, okominghulo deulu fiyo okudikwao.

DEUTERONOMION 12:21

Onhele oyo, Omwene Kalunga koye te i lihoololele yokukalekela mo edina laye, ngeenge mu lyaafane kokule nalo, hano toma ngaashi nde ku lombwelele eengobe doye noimuna yoye, Omwene e i ku pa, u i lye peenhu doye, omwenyo woye ngaashi wa hala.

DEUTERONOMION 12:5

Ndelenee monhele tuu oyo Omwene Kalunga keni ta ka hoolola mulimwe lomomapata eni aeshe, a nangekele edina laye onhele, oyo mu nokukonga nomu nokuya ko.

DEUTERONOMION 30:1

“Ndele oinima aishe ei, ngeenge tai ya kombada yoye, nokutya enangeko noupuna netulomutima, oyo nde i tula komesho yoye, ndele ove to i tambula momwenyo woye mokati koiwana aishe oyo, oko Omwene Kalunga koye e ku tela ko,