1 SAMUEL 1:19 - Ombibeli Iyapuki

¹⁹ Vo eshi ve liungaana ongula inene ndele va ilikana koshipala shOmwene, vo ova shuna ndele tave uya meumbo lavo muRama. Elkana a nangala nomwalikadi waye Hanna, nOmwene okwe mu dimbulukwa.

1 SAMUEL 1:19 ပူးပေါင်းရင်းမြစ်များ

GENESIS 21:1

Ndele Omwene okwa talela po Sara, ngaashi e mu udanekela. Ndele Omwene okwa ninga ngaashi a popile.

GENESIS 30:22

Ndelenee Kalunga okwa dimbulukwa yo Rakel, e mu uda ndele e mu pa oludalo.

GENESIS 4:1

Ndele Adam okwa nangala nomwalikadi waye Eva, ndele ye ta ningi oufimba ndele ta dala Kain, ndele ta ti: “Ame onde limonena omulumenhu kekwafo lOmwene.”

GENESIS 8:1

Ndele Kalunga okwa dimbulukwa Noa noifitukuti aishe noimuna aishe ei ya li pamwe naye mongulu yomomeva. Ndele Kalunga okwa pepifa omhepo kombada yedu opo omeva a oholoke,

2 EEHAMBA 4:17

Nomwalikadi a ninga oufimba nokwa dala okaana okamati mefimbo tuu olo lomudo, ngaashi Elisa e mu lombwela.

OMAPSALOME 119:147

Ohandi penduka fimbo inaku sha, ndele handi kuu onghuwo. Ohandi teelele ondaka yoye.

OMAPSALOME 136:23

Oye tuu ou, e tu dimbulukwa mediniko letu, osheshi alushe ouwanghenda waye tau kala po.

OMAPSALOME 25:7

Omatimba omounyasha, nomanyono ange, nowii wange ino u dimbulukwa. Dimbulukwe nge panghenda nomolwouwa woye, Omwene.

OMAPSALOME 5:3

Omwene, ongula inene to ka uda ondaka yange; ongula inene ohandi ku lilongekidile efiyawilo nohandi liameke kwoove.

OMAPSALOME 55:17

Onguloshi nongula nomutenya ohandi lili nokunyemata, opo Ye ota udu ondaka yange.

MARKUS 1:35

Nongula inene, fimbo eluwa inali tenda, Ye okwa penduka a dja mo, ndele okwa ya koima kwe likalela, ndele ta ilikana.

LUKAS 23:42

Ndele okwa tya: “Jesus, dimbulukwe nge, ngeenge wa fiki mouhamba woye.”

JOSUA 18:25

Gibeon naRama naBeerot,

1 SAMUEL 1:1

MuRamataim omwa li omulumenhu Omusufi, wokeemhunda daEfraim, edina laye Elkana yaJeroham yaElihu yaTohu yaSuf Omuefrat.

1 SAMUEL 1:11

Ndele ye okwa udaneka eudaneko ndele ta ti: “Omwene womatanga ovakwaita, Ove ngeenge to tale oluhepo lomupiya woye omukainhu, ndele to dimbulukwa nge, ndele ito dimbwa omupiya woye omukainhu, ndele to yandje komupiya woye omukainhu okaana okalume, opo nee ame ohandi ke ka yandja kOmwene ka ninge kOmwene omafiku aeshe omokukala kwako. Noshimbi itashi ke uya komutwe wako.”

1 SAMUEL 15:34

Opo nee Samuel a ya kuRama, ndele Saul okwa ya keumbo kuGibea.

1 SAMUEL 16:13

Opo nee Samuel a kufa oshanga yomaadi nokwe mu vaeka mokati kovamwaina, nOmhepo yOmwene ye uya muDavid kefiku tuu olo ndele ya kala muye. Ndele Samuel okwa fikama ndee ta i kuRama.

1 SAMUEL 19:18

Ndelenee David okwa ya onhapo nokwa xupifwa, ndele te uya kuSamuel muRama, ndele okwa hepaululila Samuel ashishe eshi Saul e shi mu ningila. Opo nee ye a ya pamwe naSamuel ndele va kala muNajot puRama.

1 SAMUEL 2:11

Opo nee Elkana okwa ya keumbo laye mu Rama, fimbo okaana okamati ka kala pomupristeli Eli, okulongela Omwene.

1 SAMUEL 25:1

Ndele Samuel okwa fya. NOvaisraeli aveshe va ongala ndele va lila eefya daye, ndele ve mu paka meumbo laye muRama. Ndele David okwa fikama nokwa ya kombuwa yaParan.

1 SAMUEL 7:17

Opo nee ye okwa shuna kuRama. Osheshi oko kwa kala eumbo laye. Oko a tokola eendjovo daIsrael noko a tungila Omwene oaltari.

1 SAMUEL 8:4

Opo nee ovakulunhu aveshe vaIsrael va ongala ndele tava i kuSamuel muRama,

1 SAMUEL 9:26

Ndele vo va penduka ongula inene. Eluwa eshi tali tende, Samuel okwa ifana Saul kombada yonduda ndele ta ti: “Penduka, ame ohandi ku findikile.” Ndele Saul okwa penduka, ndele vo aveshe vavali, ye naSamuel, va ya pondje.