रोमियां 8:3 - ओङ राजपूत

³ कांकि जको काम व्यवस्था, शरीरा चे वजह दुर्बल हुती कर ना कर सग़ली, ओनु नरीकारा ने करले, यानिकि आपणे ही पूता नु पापमय शरीरा ची समानता मां, ते पाप चे बलिदान हुवणे चे वास्ते भेज़ती कर, शरीरा मां पापा उपर ङण्ड ची आज्ञा ङिली।

रोमियां 8:3 ပူးပေါင်းရင်းမြစ်များ

मरकुस 15:27

वाणे ओचे लारे ङोन ङाकु, हेक ओचे सज़्ज़े पासु ते हेक ओचे खब़्ब़े पासु क्रूसा उपर चढ़ाले।

यूहन्‍ना 1:14

ते वचन देहधारी हुला, ते अनुग्रह ते सच्‍चाई लारे भरीती कर अम्चे बीच मां डेरा करला, अम्ही ओची इसड़ी महिमा ङेखली, जिसड़ी ब़ा चे हिकड़ाते ची महिमा।

यूहन्‍ना 9:24

यहूदी नेता ने ओ बन्दे जको अन्धा हुता बल्ति ङुजी वारी हकारती केहले, “तु ठीक हुला ओची महिमा नरीकारा नु ङे, ओ बन्दे नु ना। कांकि अम्हानु पता छै ऊं बन्दे पापी छै।”

प्रेरितां चे काम 13:39

ते जिसीया बाता लारे तम्ही मूसा ची व्यवस्था चे जरिये बेकसूर ना ठहरले, ऐवास्ते ईशु उपर हर हेक जणा जको विश्‍वास करने आला छै ओही निर्दोष ठहरी।

रोमियां 3:20

व्यवस्था चे कामा लारे कुई वी इन्सान नरीकारा चे सामणे धर्मी ना ठहरी, कांकि सेर्फ व्यवस्था चे जरिये पापा ची पिछाण हुवे।

रोमियां 6:6

कांकि अम्ही जाणु कि अम्चा पुराणा सुभाव ईशु चे लारे क्रूसा उपर चढ़ाला गेला, ताकि पाप चे शरीर नाश हुती जाओ, कि आग़ु कनु अम्ही पाप चे गुलाम ना बणु।

रोमियां 7:18

कांकि मैं जाणे, कि माये मां यानिकि माये शरीरा मां कुई आच्छी चीज वास ना करी। इच्छा तां माये मां छै, पर भले काम माये कनु हुवी ना।

रोमियां 8:32

नरीकार, जेह्णे आपणे पूता नु वी कोनी राखले, बल्कि ओनु अम्चे सब चे पापा वास्ते मरणे वास्ते ङिती ङिले, तां ओ ओचे लारे अम्हानु होर सब कोच्छ कां नी ङिही?

रोमियां 9:3

कांकि माई हा मनसा हुती कि, आपणे यहूदी भावां वास्ते ते आपणे देशा चे लौका वास्ते आप श्रापित हुती मसीह कनु अंज हुती जईया।

2 कुरिन्थियां 5:21

मसीह जको पापा कनु निष्पाप हुता, ओनु ही नरीकारा ने अम्चे वास्ते पाप ठहराला, कि अम्ही ओचे मां हुती कर नरीकारा ची धार्मिकता चे भाग़ी हुती जऊं।

गलातियां 3:13

मसीह अम्चे वास्ते श्रापित बणला, अम्हानु मोल गेहती व्यवस्था चे श्राप कनु छुड़ाले, कांकि लिखले पले, “जको कुई काठ चे उपर लटकाले जाये ओ श्रापित छै।”

गलातियां 3:21

तां कां व्यवस्था नरीकारा चे वायदे चे विरोध मां छै? कङी वी ना हो, कांकि अगर नियम इसड़ा ङिला जईया जको जीवन ङे सग़ीया तां सच्‍चमां धार्मिकता व्यवस्था लारे ही हुवीया,

फिलिप्पियां 2:7

बल्कि ओणे तां आपणे सब कोच्छ त्याग़ती कर। ते हेक सेवक चा रुप धारण करती गेला, ते इन्सान हुती गेला।

इब्रानियां 10:12

पर मसीह तां पापा चे बदले हेक ही बलिदान सदा वास्ते चढ़ाती कर नरीकारा चे सज़्ज़े पासु जती ब़ेहला।

इब्रानियां 10:14

कांकि ओणे हेक ही चढ़ावे लारे वानु जको पवित्र करले जई, सदा वास्ते सेद्ध करती ङिले।

इब्रानियां 2:14

ऐवास्ते कि ऊलाद्ध लुहींया ची ते मांस ची हुवे, मसीह ईशु वी लुहीं ते मांस चे हुती गेले कि मौत चे जरिये ओ ओनु यानि शैताना नु, जाये मां मौत ची ताकत हुती, कमजोर करती ङियो

इब्रानियां 2:17

ऐवास्ते ओनु जरुरी हुते, कि सब बाता मां आपणे भावां आलीकर बणो, जाये कनु ओ वां बाता मां जको नरीकारा लारे मेल खई, हेक दया करने आला ते भरोसेमन्द महायाजक बणो, कि लौका चे पापा वास्ते प्रायश्‍चित करो।

इब्रानियां 4:15

कांकि अम्चा महायाजक इसड़ा कोनी जको अम्ची कमजोरीया मां अम्चे लारे ङुखी ना हो सग़ो। बल्कि ओ सब बाता मां अम्चे आलीकर परखला गेला, तां वी निष्पाप रेहला।

1 पतरस 2:24

ओ खौद्द ही अम्चे पापा नु आपणे शरीरा चे उपर चती कर क्रूसा उपर चढ़ती गेला, जाये कनु अम्ही पापा चे वास्ते मरती कर धार्मिकता चे वांचे वास्ते जीवन बिताऊं, ओचे ही मार खाणे ची वजह कनु तम्ही चंगे हुले।