कुलुस्सियां 3:10 - ओङ राजपूत

¹⁰ ते नवें सुभाव नु घाले जती, जको आपणे सृजनहार चे सुभाव चे अनुसार ज्ञान प्राप्त करने वास्ते नवें बणते जाये।

कुलुस्सियां 3:10 ပူးပေါင်းရင်းမြစ်များ

यूहन्‍ना 17:3

ते अनन्त जीवन हा छै, कि वे तनु हेक ही सच्‍चे नरीकारा नु, ते ईशु मसीह नु, जानु तु भेज़ले, जाणो।

रोमियां 12:2

ते ऐ संसारा ची रीति उपर ना चला। पर तम्ची ब़ुध्दि चे नवें हुती जाणे लारे तम्चा चाल-चलन वी बदलता जाओ, जाये कनु तम्ही नरीकारा ची भली, ते भावणे आली, ते सेद्ध इच्छा लारे अनुभव लारे मालुम करते रिहा।

रोमियां 13:12

रात घणी बीतती चुकली, ते ङिओ निकलणे उपर छै, ऐवास्ते अम्ही अन्धकार चे कामा नु छोड़ती कर ज्योति चे हथियार कसती गिहा।

रोमियां 13:14

बल्कि ईशु मसीह चे सुभाव नु धारण करती गिहा, ते शरीरा चीया इच्छा नु पुरीया करने मां ही ना लाग़ले रिहा।

रोमियां 6:4

ऐवास्ते वे मौत चा बपतिस्मा गेहणे लारे अम्ही ओचे लारे दफनाले गेले, ताकि जिंवे मसीह परमपिता ची महिमा चे जरिये मरला आला महु जिवाला गेला, यूहीं ही अम्ही वी नवें जीवन चे अनुसार चाल चलु।

रोमियां 8:29

कांकि जानु ओणे पेहले कनु ही चुणती गेले वानु पेहले कनु ठहराले वी छै कि ओचे पूता चे स्वरूप मां हो ताकि ओ घणे भावां मां पलेठी चा ठहरो।

2 कुरिन्थियां 3:18

पर जब अम्चे सब चे उघाड़े चेहरे कनु प्रभु ची महिमा यूं प्रकट हुवे, जिंवे करती शीशे मां हुवे। तां प्रभु चे जरिये जको आत्मा छै, अम्ही ओचे तेजस्वी रुप मां अंश-अंश करती बदलते जऊं पले।

2 कुरिन्थियां 4:16

ऐवास्ते अम्ही हिम्मत ना छोड़ु, अगर अम्चा ब़ाहरला इन्सानी रुप नाश हुता जाये, तां वी अम्चा भितरला इन्सानी रुप ङिओ उपर ङिओ नवां हुता जाये पला।

2 कुरिन्थियां 4:6

कांकि नरीकार ने आज्ञा ङिली हुती कि, “अन्धकारा महु ज्योति चमको।” ते नरीकारा ने ही अम्चे दिला मां आपणी ज्योति चमकाली कि ईशु मसीह मां नरीकारा ची महिमा चे सोज़ले मेल सग़ो।

2 कुरिन्थियां 5:17

ऐवास्ते अगर कुई मसीह मां छै तां वा नवीं सृष्टि छै। पुराणीया बाता गुजरती गेलीया, ङेखा वे सारीया नवींया हुती गेलीया।

गलातियां 3:27

ते तम्चे महु जितना ने मसीह मां बपतिस्मा गेहला, ते वाणे मसीह नु अपनाती गेले।

गलातियां 6:15

कांकि ना खतना ते ना बिना खतना कोच्छ छै, पर नवीं सृष्टि।

इफिसियां 2:10

कांकि अम्ही ओचे बणाले आले छिऊं, ईशु मसीह मां भले कामा वास्ते बणाले गेले छिऊं। नरीकारा ने अम्हानु पेहले कनु तियार करले। के अम्ही ऊं करते हुले आपणी जीन्दगी बिताऊं।

इफिसियां 2:15

ते आपणे शरीरा मां बैर यानि वा व्यवस्था जाया आज्ञा विधिया ची रीतिया उपर हुतीया, मिटाती ङिले कि ङुंहु लारे आपणे मां हेक नवें इन्सान पैदा करती कर मेल कराती ङियो।

कुलुस्सियां 3:12

ऐवास्ते नरीकारा ने चुणले आला ची तरह जको पवित्र ते प्यारे छी, बङी दया, ते भलाई, ते दीनता, ते नरमाई, ते सहनशीलता धारण करा,

कुलुस्सियां 3:14

यां सारा चे उपर जको प्रेम नु धारण करती गिहा जको प्रेम सारा नु एकता मां ब़ांधे।

फिलेमोन 1:6

मैं प्राथना करे पला कि विश्‍वास मां दुधे सहभागी हुवणे, तम्ची सारी भलाई ची पिछाण मां, मसीह चे वास्ते प्रभावशाली हो।

इब्रानियां 6:6

नरीकारा कनु दूर हुती गेले, तां वानु मन फिराव वास्ते बल्ति नवें बणावणे अनहोणे छै। कांकि वे नरीकारा चे पूता नु आपणे वास्ते दुबारा क्रूसा उपर चढ़ावी ते उजागर ही ओचे उपर कलंक लावी।

1 यूहन्‍ना 2:3

अगर अम्ही नरीकारा चीया आज्ञा नु मनु, तां ऐचे कनु अम्ही जाणती गिहुं कि अम्ही नरीकारा नु जाणती गेले।

1 यूहन्‍ना 2:5

पर जको कुई ओचे वचना उपर चले, ओचे मां सच्‍चमां नरीकारा चा प्रेम सेद्ध हुला। ऐचे कनु अम्ही जाणु कि अम्ही ओचे मां छिऊं।

प्रकाशितवाक्य 21:5

ते जको सिंहासन उपर ब़ेहला हुता, ओणे केहले, “ङेखा, मैं सारे कोच्छ नवें करती ङिये पला।” बल्ति ओणे केहले कि ऐनू लिखती गे कि, “कांकि हा वचन विश्‍वास चे लायक ते सच्‍च छै।”