कुलुस्सियां 1:6 - ओङ राजपूत

⁶ हा सुसमाचार पुरे जग़त मां सफल हुवे पला, ते फैलता जाये, जिंवे तम्चे मां ओस समय कनु सफल हुं लाग़ला, जिसे बेले तम्ही नरीकारा ची कृपा चे बारे मां सुणले ते सच्‍चमां तम्ही समझले हुते।

कुलुस्सियां 1:6 ပူးပေါင်းရင်းမြစ်များ

मत्ती 24:14

ते स्वर्ग़ राज़ चा हा सुसमाचार सारे संसारा चीया जातिया मां प्रचार करला जई कि सारीया जातिया उपर ग़वाही हो, तब अन्त आती जई।

मत्ती 28:19

ऐवास्ते तम्ही जावा, ते सब जातिया चे लौका नु चैले बणावा, ते वानु, ब़ा, ते पूत, ते पवित्र आत्मा चे नांवा लारे बपतिस्मा ङिया।

मरकुस 16:15

ते ओणे वानु केहले, “तम्ही सारे संसारा मां जती कर ते सारी सृष्टि चे लौका नु सुसमाचार प्रचार करा।

मरकुस 4:8

पर कोच्छ आच्छी भोंये उपर ढेले। ते उग़ती कर फल आणला, ते कुई त्रीस गुणा, कुई साठ गुणा, ते कुई साऔ गुणा फल आणला।”

यूहन्‍ना 15:16

“तम्ही मनु कोनी चुणले, पर मैं तम्हानु चुणले ते तम्हानु नियुक्‍त करले कि तम्ही जती कर फल आणा ते तम्चा फल बणला रिहो, कि तम्ही माये नांवा लारे जको कोच्छ ब़ा नरीकारा कनु मांगा, ते ओ तम्हानु ङिही।

यूहन्‍ना 17:19

वांचे वास्ते मैं आपणे आप नु पवित्र करती कर दुधी सेवा मां ङिये पला, कि वे वी सच्‍चाई लारे पवित्र हुती कर दुधी सेवा करो।

यूहन्‍ना 4:23

पर ओ समय आवे पला बल्कि हमा वी छै, जाये मां सच्‍ची अराधना करने आले ब़ा ची अराधना आत्मा ते सच्‍चाई लारे करी, कांकि नरीकार आपणे वास्ते इसड़े ही अराधना करने आला नु सोधे।

प्रेरितां चे काम 11:18

ईं सुणती कर, वे चोप रेहले ते नरीकारा ची बढ़ाई करती किहुं लाग़ले, “बल्ति तां नरीकारा ने नेरीया जातिया नु वी जीवन वास्ते मन फिराव चा दान ङिला।”

प्रेरितां चे काम 12:24

पर नरीकारा चा वचन फैलता ते बधता गेला।

प्रेरितां चे काम 16:14

लुदिया नांवा ची थुआथीरा शहरा ची हेक असतरी प्रभु उपर विश्‍वास राखणे आली हुती। वा मंहगी बैंजनी रंगा ची ओढ़णी बेचणे आली हुती वा बङे ध्यान लारे अम्चीया बाता सुणे पलती। प्रभु ने विचे मना चे दरवाजे खोलती ङिले ताकि, जको कोच्छ पौलुस किहे पलता, वा बाता नु ध्यानारीत सुणो।

प्रेरितां चे काम 26:18

कि तु वांचीया आँख खोल, कि वे अन्धकार महु काढ़ती कर ज्योति मां, ते शैताना चे अधिकार महु नरीकारा चे राज़ मां गेहती आवे। वे पापा कनु माफ पाओ, ते वांचे बीच मां आती जाओ, जको माये मां विश्‍वास चे जरिये नरीकारा वास्ते पवित्र करले गेले।’

रोमियां 1:13

ते हे माये भऊ, मैं ना चाहवी कि तम्ही ऐचे कनु अणजाण रिहा कि मैं कई वारी तम्चे गोढु आणे चाह्‍ले कि, जिंवे मनु होर नेरीया जातिया कनु फल मिड़ला, यूहीं तम्चे महु वी मिलो, पर मैं हमा तक मजबूरी मां रुकला रेहला।

रोमियां 15:19

ते चैन्ह ते अदभोत कामा ची सामर्थ लारे, ते पवित्र आत्मा ची सामर्थ लारे माये ही जरिये करले गेले। इठे तक मैं यरुशलेम कनु लाती कर चऊं पासु ते इल्‍लुरिकुम तक मसीह चे सुसमाचार चा पूरा-पूरा प्रचार करला।

रोमियां 15:28

ऐवास्ते मैं ईं काम पुरे करती कर, ते वानु हा चन्दा सपोत्र करती कर तम्चे गोढु हुता हुला स्पेन सनु जई।

रोमियां 16:26

पर हमा प्रकट हुती कर सनातन नरीकारा ची आज्ञा लारे भविष्यवक्‍ता चीया किताबा चे जरिये सब जातिया नु बावड़ला गेला कि वे विश्‍वासा लारे आज्ञा मनणे आले हुती जाओ।

2 कुरिन्थियां 10:14

अम्ही आपणी हद्दी मां रेहती कर तम्चे उपर घमण्ड करु, कांकि मसीह चा सुसमाचार सुणाते हुले तम्चे तक सबकनु पेहले अम्ही पुज़ती गेले हुते।

2 कुरिन्थियां 6:1

ते अम्ही जको नरीकारा चे भईवाल छिऊं, ईं वी समझाऊं, कि नरीकारा चा अनुग्रह जको तम्चे पर हुला, ओनु बेकार ना जऊं ङिया।

इफिसियां 3:2

अगर तम्ही नरीकारा चे ओ अनुग्रह चे प्रबन्ध चा समाचार सुणला हो, जको तम्चे वास्ते मनु ङिला गेला,

इफिसियां 4:21

बल्कि तम्ही सच्‍चमां ओची सुणली ते जिसड़ी ईशु मां सच्‍चाई छै, ओचे मां सिखाले वी गेले,

इफिसियां 4:23

ते आपणे मना चे आत्मिक सुभाव मां नवें बणते जावा।

इफिसियां 5:9

हर तरह ची निर्दोषीता भलाई ते सच्‍चाई मां सोज़ले चे फल छी।

फिलिप्पियां 1:11

धार्मिकता चे आच्छे गोण जको ईशु मसीह कनु मिले ओचे लारे तम्ही भरीले रिहा जाये कनु नरीकारा ची महिमा ते स्तुति हुती रिहो।

फिलिप्पियां 4:17

हा बात कोनी कि मैं दान चाहवे, बल्कि तम्चे मां इसड़ी आशीष ङेखणा चाहवे जको दान ङेणे लारे आवे।

कुलुस्सियां 1:10

ताकि तम्चा चाल-चलन प्रभु चे लायक हो, ते ओह सारे प्रकार कनु खौश हो, ते तम्चे हर-प्रकार चे भले कामा चा फल लाग़ो, ते नरीकारा चे ज्ञान मां बढ़ते जावा।

कुलुस्सियां 1:23

ईं तां हो सग़े कि तम्ही विश्‍वास ची ढाल उपर मजबूत बणले रिहा ते ओ सुसमाचार ची आस नु जानु तम्ही सुणले, ना छोड़ा, जाया प्रचार आसमाना चे तले सारे संसारा मां करला गेला ते जाया मैं पौलुस सेवक बणला।

1 थिस्सलुनीकियां 1:5

कांकि अम्चा सुसमाचार तम्चे गोढु हेको वचना मां ही कोनी, बल्कि ताकत ते पवित्र आत्मा, ते इरादे लारे पुज़ला, जिंवे तम्ही जाणा कि अम्ही तम्चे फायदे चे वास्ते किसड़ा जीवन जीते तम्चे मां किवें बणती गेलते।

1 थिस्सलुनीकियां 2:13

ऐवास्ते अम्ही वी नरीकारा चा धन्यवाद लगातार करते रिहुं, कि जब अम्चे जरिये नरीकारा चे सुसमाचार चा वचन तम्चे गोढु पुज़ला, तां तम्ही ओ बन्दे चा ना, पर नरीकारा चा वचन समझती कर ग्रहण करला, ते ओ तम्चे मां जको विश्‍वास राखा, असरदार छै।

2 थिस्सलुनीकियां 2:13

हे माये भऊ, ते प्रभु चे प्यारे लौक, चाही छै कि अम्ही तम्चे बारे मां सदा नरीकारा चा धन्यवाद करते रिहुं, कांकि नरीकारा ने आदि कनु तम्हानु चुणती गेले, कि पवित्र आत्मा चे जरिये पवित्र बणती कर, ते सच्‍चाई उपर भरोसा करती कर उद्धार पावा।

1 पतरस 5:12

मैं सिलवानुस चे हाथे, जानु मैं विश्‍वासयोग भऊ समझे, साफ-साफ लिखती कर तम्हानु समझाले, ते हा ग़वाही ङिली छै कि नरीकारा चा सच्‍चा अनुग्रह हाओ छै। ऐचे मां मजबूत रिहा।