Kulusas 3:12 - Fanawbuid tagsibaliwas Fakayabian

¹² Nu katanya, aroro am wan Dius at nafili ay at nafasaman ay at fakesugun, masine nu kedkesugan tuam fia, ay nu magalang am, ay nu kamababaun am, ay nu malukme am, ay nu mafangagwanta am.

Kulusas 3:12 ပူးပေါင်းရင်းမြစ်များ

Isayas 42:1

Yawi nalong te, “Ste wan ku fagsuguan. Nafaksvn au at amatanganan, ay nafili au anya ay guseganan au anya. Nafatayuk au ku Falad sa anya, ay namae fagmatuyanun ban sas fagayu talun at taw.

Isayas 45:4

Nafili au emu laman nanggubuk o ku fagsuguan ay ku nafili fag ngay taw Israel. Nafauseganan au emu gina o yud natoglag angku.

Isayas 63:15

Damai emi siginans banwa, am fagbanwanan at yud e malong ay at masine. Wain am fagyudun ggubuk ya emi, ay am fagyudun gfasure ya am fagmabalyananun sa emi? Wo kesug ya ay kafanyu emi.

Isayas 65:22

Ay bunwa ban at ngay fawayan at namanwan sat ngay bale, ay at nanggutlu at ngay fananumun. Aroro nu setain sik fun kayu nu ngaduge nu yud kayango, katanya yangay ban ku ngay taw nu gleleg, ay kanya tua ban fagayu tagagbilug at ngay nainlufuyan.

Isayas 65:9

Gfasawad kban Akub ay Uda at kasugfunanan tiba, ay kanya ban fagayu at nangagbilug ku nafili fag talun at ke ngay buksul. Kanya fagayu ku nafili ay ku ngay fagsuguan at namanwan ban sanya fag talun.

Eremyas 31:20

Yawi gbalus te, “Ngay taw Efraim, o nunda am wan ku fakesugun ku ngay sisian? Dewa malayun nu glong au sa ayu at mauri, kesug ktua gugat ayu. Kaylat ktua gugat ay kafanyu ayu.

Eremyas 31:3

Ebi Yawi ansure sa sangay taw Israel ay nalong te, “Nesug au ayu at yud e fakatabuan. Siginan ku fagmagalangun, nafakbang au ayu sa angku.

Esekyel 16:8

“ ‘Ay gina au nadog nadalan emu, nalag au te, baguina wo. Nu katanya, nafae lanbung au emu, ay nafatuyanan au te, kesug au emu. Ay nawat au sik nasadian sa emu te, au wan tagagbilug emu. Au, Fun Dius Yawi, taglong tuy.

Mateu 24:22

Dius ban nu dway ban nafagud kanya fag buknga, wa ban e gleleg ya. Ay dewa katanya, aroro kesug tua at nafili fag ngay taw, gfagud way ban ginanya fag buknga.

Mateu 24:24

E kadasug ban ay kamuag te, ‘Au wan Dius at nafili fag Fun,’ ay ‘Au wan Dius at taglong at sadi.’ Ay kanya ban namalag at madulo ay at mabalyanan fag ngay fakamulun, laman nanfamaskudan nanfandaya anggan Dius at nafili fag ngay taw.

Mateu 24:31

Ay gina ban e gbudyung daul gsugu kban ku ngay tagbarita, laman namaful ku nafili fag ngay taw siginans fagayu talun ay dewa ndaginan fag fungfung daga.

Markus 13:20

Ay tam Fun nu dway ban nafagud kanya fag buknga, wa ban e gleleg ya. Ay dewa katanya, aroro kesug tua at nafili fag ngay taw, gfagud way ban ginanya fag buknga.

Markus 13:22

E kadasug ban ay kamuag te, ‘Au wan Dius at nafili fag Fun,’ ay ‘Au wan at sadi Dius at taglong.’ Ay kanya ban namalag at madulo ay at mabalyanan fag ngay fakamulun, laman nanfamaskudan nanfandaya anggan Dius at nafili fag ngay taw.

Markus 13:27

Ay gsugu kban ku ngay tagbarita laman namaful ku nafili fag ngay taw siginans fagayu talun, ay dewa ndaginan fag fungfung daga.

Lukas 1:78

aroro tam Dius mafangafanyu tua ay mafangesug sa antam, ay namadasug sa antam sik tagfalangfe, kata menit nu bagu kasure,

Lukas 18:7

Anggan tam Dius ggubuk at filian fag taw nu guro sa anya fagngabak menit ay fagngabak yabi, o kin? O Dius gfadugean nu ggubuk?

Ruma 1:7

Griruk au sa ayu fagayu tagbanwan sanya sfuruan Ruma, Dius at ngay fakesugun, kanya nauro ayu laman at ngay nafili. Sumawa nangus fia ayu Dius tam Mama ay tam Fun Isus at fagmagalangun ay at fagmanabayanun.

Ruma 13:14

Suluni tam Fun Isus at nafon antam fag ugali, ay lag am gfaning ya ay bilug at fakaylatun.

Ruma 9:11

Dius nafalag te, kata tua at algan nu gfili at ngay sisian, ay bunwa siginans taw at nafakamulun. Nu katanya, gina kafag duksay yud yay ansalug, ay gina yay yud nafakamulun at masine ay mauri, Dius nalong sas Rebeka te, “Am faglon ban gafagsuguanan am ngenge.”

1 Kurintu 13:4

At ke fakesugun fag taw mafangagwanta tua ay malukme, ay di gfangalabian ay di kamatungudun,

2 Kurintu. 6:6

Gfatoglag ami te, ami wan Dius at ngay fagsuguan siginan nu gugali ami at masine, ay siginan em fagsafulun, ay fagmagwantaun, ay fagmalukmeun, ay at masine fag amatanganan, siginan at Masine fag Falad at fanggubukun ay at matuyan fag fakesugun.

Galasya 5:6

Aroro nusnga sinu at kinsadi sa tam Fun Isus, we tungkul ya dewa e fakatoglagan ay yud e fakatoglagan. Nu bunway, at mafanud, ke fagafanudun tua takalag sit fakamulun siginan nu mafangesug.

Efesu 1:4

Aroro siginan tam fagmasadiun sa anya, kanya nafili antam siginan yay nu yud nawat fagdaul daga, laman umsine tam ay di tam e malong sas Dius at daga salubangan. Aroro kesug tua antam,

Efesu 4:2

Am famababauni tua, ay malukmei tua ay magwantai tua, ay maluayani ay mafangesugi.

Efesu 4:24

ay fagfasiun ayu at bagu tua fag taw at kinkawat takata Dius, laman ay ugali matuyan tua ay di e malong.

Efesu 4:32

Nu bunway, madmalukmeani tua ay edkesugani, ay fadfalyamani tua nu nke fagmauriun sa ay iba, kata Dius nu gfalyam ay asalanan siginan tam Fun Isus.

Filipus 1:8

Dius nasaful wa te, kesug au ayu fagayu kata tam Fun Isus nu kesug ayu.

Kulusas 3:10

ay nasulun am at bagu fag ugali. Dius, at nawat ayu, gfataglayun gfabagu ay ugali gfaning anya, laman tumoglag am fia anya.

1 Tesalunika 5:15

Ay lag am gfasud tagfakamulun sa ayu at mauri, nu bunway malukmei tua sas galay am at sadi, ay sas fagayu taw.

2 Timuteu 1:9

Kanya nafalangfe ay nauro antam laman di tam e malong, bunwa siginan tam ngay fakamulun nu bunway siginan tuas Dius at algan ay at fagmagalangun sa antam, at nafon sa antam sa tam fagmasadiun sa tam Fun Isus, siginan ngay nu yud ankawat fagdaul daga.

2 Timuteu 2:10

Ay nu katanya, gagwantan au fagayu nusnge wain laman sas Dius at nafili fag ngay taw, laman siginan tam Fun Isus kanya fagayu umlangfe ay mul at yud e fakatabuan fag fagmasineun.

Titu 1:1

Au, Pablu, Dius at fagsuguan, ay tam Fun Isus at nasugu. Nasugu angku laman gfaksvn au Dius at nafili fag ngay taw at fagafanudun, ay gfasaful sa anya fagayu at fagmatuyanun sabaliwa nu gugali tua gfaning Dius.

1 Pedru 1:2

Am wan Dius tam Mama at ngay nafili kata at fagsafulun siginans fakasigadan. Ay at Masine fag Falad gfasine ayu, laman gfaning tuam Isus tam Fun ay laman umkalyam ay ngay asalanan siginan at nabulanan. Sumawa nangus fia ayu tagtungud at fagmagalangun ay at fagmanabayanun.

2 Pedru 1:10

Ku ngay faduksay, ugatani atuyani te, Dius tuam at ngay nafili. Aroro nu katanya tua ay fakamulun, di ban am kamomuy.

1 Uan 4:19

Si tua antam fakesugun aroro Dius nesug tua antam.

2 Uan 1:13

Am faduksay fag mangena, Dius at nafili kata emu, at ngay sisian glong emu te, O manabayan tuo?

At Nafasure 17:14

Kanya fagayu namawayan Tupa Riangan, dewa katanya, Tupa Riangan gbabo way, aroro kanya wan fagayu dius at Dius ay fagayu fun at Fun. Ay at ngay nauro ay at ngay nafili ay fagayu at matuyan nu gfaning anya namabo yangay gfasfuan anya.”