Isayas 60:6 - Fanawbuid tagsibaliwas Fakayabian

⁶ Ay ay talun umkapnu kamelyu siginans Midyan ay Efa. Ay kanya fag ngay taw siginans Syeba umdasug sa emu gbuba gintu ay ngay famaebebanglu fag lune laman nanseg Yawi.

Isayas 60:6 ပူးပေါင်းရင်းမြစ်များ

Fakasigadan 10:7

Ay Kus at ngay baguama: Seba, Sabta, Raama ay Sabteka. Ay Raama at ngay baguama: Syeba ay Dedan.

Fakasigadan 25:13

Ismael at ngay baguama siginan at kaka anggan at ngenge: Nebayut, Kedar, Adbiel, Mibsam,

1 Fun 10:2

Kanya andasug sas Erusalem gadgaloan at ngay fagsuguan ngayu, ay e tabanan yangay ngay kamelyu gbuba ngay famaenamnam fakonun, ay ngayuk gintu, ay at mafanud fag ngay gang. Ay kanya nu ndasug sas fun Sulumun, nainto fagayu at fagyaintoun sa anya.

2 Fun 8:9

Ay Kasael nalao sas Elisyu ay gtabanan ufatk safuluk kamelyu e buba at mafamilian fag ngay famaloun siginans Damasku laman at fon sas Elisyu. Ay kanya nu ndasug sas Elisyu, nalong te, “Am fagsuguan Ben-Adad, Aram at fun, nasugu angku, laman nanginto emu te, o kafia yay ban at fakasaitun?”

1 Krunika 1:33

Midyan at ngay baguama: Efa, Efer, Anuk, Abida ay Eldaa. Kanya fagayu Ketura at ngay kasugfunanan.

2 Krunika 9:1

Talun Syeba at fun fag mangena nu nadungug sabaliwas fun Sulumun, kanya andasug sas Erusalem laman namaskud Sulumun siginan at maidap fag ngay fagintoun. Kafag mangena andasug gadgaloan at ngay fagsuguan ngayu, ay e tabanan yangay ngay kamelyu gbuba ngay famaenamnam fakonun, ay ngayuk gintu, ay at mafanud fag ngay gang. Ay kanya nu ndasug sas Sulumun, nainto fagayu at fagyaintoun sa anya.

Alubad. 67:4

Ngay taw sas fagdaul daga guseganan ay galubad, aroro matuyan nu ginsaful o anya fagayu, ay gtabanan tuo gugat.

Alubad. 72:10

Tarsis ay anggan ngay furu tagsis wabilug dagat at ngay fun ay Syeba ay Seba at ngay fun, namon nangus at ngay famonun sa anya.

Alubad. 72:15

Ngaduge tua ban nangus kafag fun nu gleleg. Ay e gfon ban nangus sa anya gintu tagsiginans Syeba. Ngay taw nangus gdarangin tua gugat anya laman Dius gfon sa anya nusnge wain.

Isayas 30:6

Katatuy Dius at foyungan sanya fag ngay mangilafang baliwa tagsis talun Negeb: Ngay taw Uda nalo sa sik talun maidap at dalan, ay e liun, ay e ngay ule ay dot kata tua nu glayug. Ay nafabuba at ngay fagmaramramanun sat ngay asnu ay kamelyu, laman famonun sa sik talun at ngay taw at yud mafagubuk anya nusdi alay.

Isayas 42:10

Alubadi sik bagu fag alubad sas Yawi! Fagayu am tagsis fagdaul daga, alubadi sik ngay famauseganan anya. Segi yangay anya, fagayu am tagsis sakayan lino, ay fagayu tagbanwan sa tangayayu fag ngay talun tagsis wabilug dagat.

Isayas 45:14

Yawi nalong sa sangay taw Israel te, “Namagtainan ban am ngay taw Igiptu, ay ngay taw Etiupya, ay ngay taw Saba fag gaban taw tangabat. Kanya ban fagayu umdasug sa emu gbuba at ngay ramraman ay at ngay gutluan, ay gtaban ban am anya fagayu, ay kanya ban fagayu nanmalub sa ay daga salubangan ay gfainfanyuan sa ayu te, ‘Anud, Dius gufud ayu, ay sas day anya we tibak Dius!’ ”

Isayas 61:6

Gfangayan ban ayu te, Yawi at ngay tagfon fanggalangun ay tam Dius at ngay fagsuguan. Gagbilug ban am tibak talun at ramraman, ay guseganan ban am.

Eremyas 6:20

We tungkul sa angku at fanggalangun fag ngay famaebebanglu dewa siginans talun Syeba, ay at mabebanglu fag langis siginan tangayayu fag talun. Kwa kaylat at fagirugun fag ngay fanggalangun. Ay kwa guseganan at ngay fanggalangun.

Esekyel 27:22

“ ‘Ngay taw Syeba ay ngay taw Raama nanamabangsi yangay sa emu, ay at famayad sa emu at masine fia fag famasuglat fakonun ay at mafanud fag ngay gang ay gintu.

Sefanias 3:10

Ku ngay taw at nasaruayan sas dife Liskung Etiupya namuba ban sa angku at ngay fanggalangun.

Sakaryas 14:16

Sanya ginan, at kinsawad ban fag ngay taw sas fagayu talun at nanamawayan Erusalem nangadasug sanya fag furuan laman nanseg Yawi ay nangasadi nangaful sabaliwa nu Kawat ngay Fayag.

Malakyas 1:11

Ngay taw ban tagsis fakamenitan anggan tagsis fakayabian gfauseganan angku. Ay nusnga nday ban kanya fagayu girug famaebebanglu ay gfon fanggalangun sa angku.

Mateu 2:11

Ay nu nasakbo wan sanya fag bale, ay nu nalag kafag sisian ay anggan at mina Maria, kanya fagayu namalub sasad salug ay gseg kafag sisian. Ay kanya nafaduksun at fagsuadan at ramraman, ay nafon sanya fag sisian sik ngay gintu ay ngay famaebebanglu ay anggan ngay lune.

Ruma 15:9

ay kanya ndasug yangay laman ban at yud Udyu fag ngay taw gseg tua Dius aroro sat fakafanyun. Kata at Rirukan te, “Gfauseganan au emu sis salubangan yud Udyu fag ngay taw, ay galubad au sa emu.”

Deuterunumyu 32:43

Ngay talun at ngay taw, fasfuani Dius at ngay taw, uroi fauseganani. Aroro Yawi namasud sat nafabul at ngay fagsuguan ay kanya gfasud sat ngay fawayan, ay gfasine at ngay talun, ay gfalyam at ngay taw at asalanan.

Filipus 2:17

Ay fagafanudun ay ay fagfaningun sa tam Fun kata sik fanggalangun sa anya. Ay ku taguk dewa umbusbus gasfuan ay fanggalangun, guseganan au, ay gfasfuan kban ayu guseganan.

1 Pedru 2:5

am takata yangay sik tagleleg fag ngay gang, Dius at fangawat laman umkawat sik fanfalad fag bale. Dius nafili ayu laman at ngay tagfon fanggalangun, ay gfon am sa anya fanfalad fag ngay fanggalangun, at maksvn nu maylat sa anya siginans Isus, Dius at nafili fag Fun.

1 Pedru 2:9

Dewa katanya, am sik nafili tuam fag ngay taw, ay tam Fun tuam at ngay tagfon fanggalangun, ay sik furuan at mafasamanan laman sas Dius. Dius nafili ayu laman gfoyung am at nafakamulun fag ngay madulo. Ay nauro yangay ayu siginan sad fagmadulumun laman glo am sat fagmayamagun at maksvn nu madulo.

Tagfangguna 6:5

Ay kafag ngay taw nu namawayan, gbuba wan at ngay bale ramit ay gtaban wan at ngay fagbaugun, at kayuan kayu sik ngay liung. Ay wa yangay e mafatap anggan at ngay kamelyu. Ay kanya fagayu nafauri ngay taw Israel at talun.

Tagfangguna 7:12

Ngay taw Midyan, taw Amalek, ay tiba yak kasugfunanan maful sis lod buksul sis fakamenitan baliwa, at kayuan kayu sliung. Ay at ngay kamelyu kayu slagnas sis tigyangan dagat.