Isayas 51:1 - Fanawbuid tagsibaliwas Fakayabian

^1-2 Yawi nalong te, “Dungugani angku, fagayu am takakbang sa angku laman umlangfe am. Amatangi ay mangaguyang Abrayam ay Sara. Dadwa kata sik fungsu, ay am at naggatvngan. Amatangi ay mangaguyang Abrayam, ay anggan Sara at nafasalug ayu. Ebi gina au nafili Abrayam, kanya sesadi yay, ay dewa katanya nafayu au at ngay kasugfunanan.

Isayas 51:1 ပူးပေါင်းရင်းမြစ်များ

2 Krunika 15:2

Ay kanya nanangablang fun Asa, ay nalong anya te, “Fun Asa, dungugani, ay anggan am fag ngay taw Uda, ay ngay taw Benamin. Yawi si tua ayu nu gbanwan tuam si anya. Nu grvbvy tuam anya, lumag am anya. Ay nu natalyuyan wayam anya, kanya gaiyan yangay ayu.

2 Krunika 15:4

Ay gina kanya fagayu gidapan, nadarangin sas Yawi, Israel at Dius, ay kanya nagubuk tua anya fagayu.

Alubad. 24:6

Takatanya tua fag ngay taw at manangakbang ay at mananseg Akub at Dius.

Alubad. 94:15

Ay ginanya ban, ngay taginsaful, matuyan wan nu ginsaful, ay at matuyan ban fag ngay taw gfaning tua.

Fangatulun 15:9

Yawi kauri way nusnga sinu fag taw at fakamulun nu mauri way, dewa katanya, kesug tua nusnga sinu fag taw tagugatan gfakamulun at matuyan.

Fangatulun 21:21

Sik taw nu gbanwan tua gugat sat matuyan ay sat masine fag ngay ugali, ngaduge tua ban nu gleleg ay umke fagmanabayanun ay ngay taw gsuyu tua anya.

Isayas 45:19

Ku ngay nalong di e masuksuk. Kwa ro nalong sas Akub at ngay kasugfunanan te, ‘Rvbvyi angku,’ nu dway ro e fagsegun te, lumag ro angku. Au wan Yawi, ku ngay nalong matuyan. Glong au fagayu at masine.”

Isayas 48:1

Dungugani, am, Akub at ngay kasugfunanan, at ngayan yangay te, Israel, tagsiginans Uda at kasugfunanan. Maksvn nu gfatuyanan am sas Yawi at ngayan nu get am sas Israel at Dius. Dewa katanya, kamaningan wayam, aroro wa matuyan ay ngay ugali.

Isayas 48:12

Ku nafili fag ngay taw Israel, dungugani. Au wan Dius; au wan at fakasigadan ay at fakatabuan.

Isayas 51:4

Ku ngay taw, dungugani angku. Ku talun at ngay taw, dungugani angku. Namon au ayu ku ngay suguan, ay kanya umkata sik salung sas fagayu talun at taw.

Isayas 51:7

Dungugani angku, am tagsaful at matuyan ay tagfaning ku faugali! Lag am kalimu ngay taw tagfapla ay tagfalingun ayu.

Isayas 55:6

Akbangi sas Yawi ay darangini kaduge kanya munakbang si ayu, laman kanya ggubuk ayu.

Isayas 65:10

Namaramraman kban anya fagayu at nanangakbang angku. Ay gfon kban sa anya fagdaul Sarun ay datag Akur laman at fagnamafangonan at ngay fagbaugun.

Amus 5:6

Use at ngay kasugfunanan, akbangi sa angku, laman ban gleleg tuam. Ay wayam kakbang, namamin kban ayu kata sik afuy nu girug. Nu katanya, umkamin ban furuan Betel at ngay taw ay we mafaragang ya.

Sefanias 2:3

Ay am takamababaun ay tagfaning Yawi at suguan, akbangi sa anya. Fataglayuni nu gfakamulun am at masine ay nu kamababaun am. Bangaran ban Yawi gdiri tua ayu ginanya fag menit.

Mateu 5:6

Mauseganan ngay taw nu kaylat tua gfakamulun Dius at fakaylatun, aroro Dius ggubuk tua ban anya.

Mateu 6:33

Abat ngate am gafanawa, ugatani yakman te, setain Dius nu gfagtainan fia ayu, ay ugatani nu gfaning am at fakaylatun, ay Dius gfon ban sa ayu fagayu ay fagayudanun.

Ruma 10:3

Aroro wa nasaful te, setain Dius nu gtap sik taw kata nu yud e asalanan. Kanya fagayu nu gugatan sa way at sadili balyawvtan ay wa nafaning Dius at balyawvtan.

Ruma 14:19

Nu katanya, tam fagugatanun tagfae fagmanabayanun tua sas galay antam at sadi, ay tagfaksvn tam fagafanudun.

Filipus 3:13

Ku ngay faduksay, kwa gamatangan te, nabul kwan kanya fagayu. Ku fakamulun katsi gfalyam kwan at kinlangfe, ay gugatan au gyabulun tagsis fagunan.

1 Timuteu 6:11

Ay o, Dius at fagsuguan, masine nu gsaruy o takatanya fagayu. Ay kabavn rvbvyi fagmasineun, ay fagfaningun Dius, ay fagafanudun, ay fakesugun, ay fagagwantanun, ay fagmalukmeun.

2 Timuteu 2:22

Nu katanya, o, saruyi baguama at fakaylatun fag ugali at mauri. Ugatani ugalii at matuyan, ay e fagafanuduni, ay e fakesuguni, ay e fagmanabayanuni, gasfuan fagayu taw tagdarangin sa tam Fun at ke masine fag amatanganan.

Ebreu 12:14

Ugatani ugalii manabayan sis fagayu taw at daga salubangan, ay dangay e malong, aroro nusnga sinu fag taw wa ban lumag tam Fun nu e malong way.