Isayas 48:20 - Fanawbuid tagsibaliwas Fakayabian

²⁰ Loi wan siginans Babilunya! Ay fadungugi sas fagdaul daga ay maksvn fag fagusegananun te, Yawi nafalangfe tua at fagsuguan, at ngay taw Israel.

Isayas 48:20 ပူးပေါင်းရင်းမြစ်များ

2 Samwel 7:23

Ay wa yangay e gfasud am ngay taw Israel. Sas fagdaul daga kanya way lang fag ngay taw am nafalfas siginan nu gafagsuguanan, laman am ngay taw. Ay nafakamulun o at mabalyanan ay at maksvn nu madulo, ay siginan nu ggubuk o am ngay taw laman gaiyan tibak gaban taw, gina o gfalangfe anya fagayu siginans Igiptu.

Esra 2:1

Kayu tuy ngay taw Israel tagsiginans talun Uda, fun Nabukudunusur at nataban sas talun Babilunya. Ay kanya fagayu nalo wan sanya ginan fag talun, ay anfoli sas Erusalem ay sat ngay mesa furuan sas talun Uda.

Alubad. 126:1

Yawi gina gfafoli at ngay taw sas Siun siginan at fagatabananan, kata way sik taginfan.

Isayas 12:1

Ginanya ban fag menit, galubad am te, “Yawi, guseganan au sa emu, aroro ebi, dewa o ndotama angku, katsi duan ya. Ay gfasun tuo angku.

Isayas 12:4

Ginanya ban fag menit, nangalubad am te, “Fagayu am fauseganani Yawi! Segi anya! Foyungi sas fagayu taw at ngay nafakamulun.

Isayas 24:14

At kinsawad ban fag ngay taw gfanguroan guseganan. Ay tagbanwan sas fakayabian baliwa namoyung ban Yawi at fagmabalyananun.

Isayas 26:1

Ay ginanya ban fag ngay menit, e nangalubad tuy fag alubad sas talun Uda: Mogat wan tam furuan! Dius nu gfalangfe antam kata sik alad nu gsafung antam.

Isayas 42:10

Alubadi sik bagu fag alubad sas Yawi! Fagayu am tagsis fagdaul daga, alubadi sik ngay famauseganan anya. Segi yangay anya, fagayu am tagsis sakayan lino, ay fagayu tagbanwan sa tangayayu fag ngay talun tagsis wabilug dagat.

Isayas 43:1

Israel, katatuy Yawi, at nawat emu, at fagyalongun sa emu: “Dangay o kalimu aroro namalangfe au emu. Nauro au am ngayan, ay au wan am tagagbilug.

Isayas 44:22

Ay nafalyam kwan am ngay asalanan kata sik linyabu ay sik ayuyus nu kalyam. Afolii sa angku laman gfalangfe au emu.”

Isayas 48:6

Nadungug wam ebi ku ngay algan, ay nalag yangay am nu kafasludan fagayu, dewa katanya, wam gafanud te, au at nafafasludan. Siginan katsi, glong kwan takafasludan ban ku yud yay batang gfoyung sa ayu, ay fagyudun yay saful.

Isayas 49:13

Banwa, alubadi useganani. Fagdaul daga, useganani! Ngay buksul, alubadi. Aroro Yawi kesug ay gfasun ngay taw tagidapan.

Isayas 49:6

Kanya nalong te, “Ku fagsuguan, namafoli o ku nafasawad fag ngay taw Israel, ay saman wa kanya, ngayu yay ban ku fagnamakamulunun sa emu. Namakata kban emu sik salung sas fagayu talun at taw laman fagayu taw sas fagdaul daga umlangfe.”

Isayas 51:14

Wa glugo ya at ngay maubungan kalfas wan. Ay wa ban umbul sit fakaubungan, ay di ban kamin at fakonun.

Isayas 52:10

Yawi namalag at fagmabalyananun yud e malong sas fagayu talun at ngay taw, ay fagdaul daga lumag Dius nu gfalangfe.

Isayas 52:11

Duksuni wan siginans Babilunya ay lag am gted nusnge wain at masuya. Duksuni wan fagayu am tagbuba ngay fagagbilugun tagsis Yawi at bale, ay masinei tua.

Isayas 52:9

Am at kinrasras fag ngay afud Erusalem, asfuani alubadi useganani, aroro Yawi namasun wan at ngay taw ay namalangfe wan Erusalem.

Isayas 62:11

Dungugani! Yawi nafabuba sik foyungan sas fagdaul daga, glong te, “Longi sa sangay taw Israel te, at Tagfalangfe andasug wan, ay gbuba ngay famonun.”

Isayas 63:9

Nusnga setaw kafag ngay taw at nabaluan, kanya anbalu yangay, ay kanya nafalangfe tua anya fagayu siginan at tagbarita tagfasure at fagmasineun. Kanya kesug tua ay kafanyu anya fagayu, ay nafalangfe. Siginan ebi, kanya gulit tua anya fagayu kayu menit.

Eremyas 31:10

Ngay talun dungugani ku longan, ay fadungugi sa tangayayu fag ngay furuan: nafarapyagan au ngay taw Israel, dewa katanya, namaful kyay ban ay nangalaga kata sik tagalaga fagbaugun nu galaga at ngay tupa.

Eremyas 31:11

Gfalangfe kban Akub at ngay kasugfunanan siginan sa ngay taw tagtungud tua anya nu mabalyanan.

Eremyas 31:21

Fiungi tua ay turuki sa ay ngaba dalan laman ay fagaloan, ay amatangi tua ay dalan, aroro sanya yay ban ay dalan gina am kafoli. Ku ngay sisian fag ngay taw Israel ulii wan sa ay ngay furuan ayu daul.

Eremyas 50:2

“Fadungugi sa sangay talun foyungan at yud e masuksukan ay fabati sik ramit, famasaful te, talun Babilunya anrasras wan. Ay at ngay fagsegan at mapla anrufa wan anggan at fagsegan Bel ay Marduk anrufa yangay.

Eremyas 50:28

“Dungugani at nalagyu fag ngay taw siginans talun Babilunya nu gfansulit sas Erusalem nu setain Yawi nu gfaurianan talun Babilunya aroro sat nafakamulun sas Yawi at bale.

Eremyas 50:8

“Lagyui wan siginans talun Babilunya! Ubuni wan kanya fag talun! Gunai wa lagyui kata sik kambing nu gguna tibak kambing.

Eremyas 51:45

Ku nafili fag ngay taw, ayayui wan siginans Babilunya! Falangfei ay ngay leleg gina au yud yay nafadasug ku fandotaman sa anya fagayu.

Eremyas 51:48

Ay nu nfasludan ban takatanya, banwa ay fagdaul daga guro guseganan aroro talun Babilunya anrasras wan. Aroro ngay tagfawayan siginans fawalan fag alvngvdan nanrasras wan. Au, Yawi, taglong tuy.

Eremyas 51:6

Lagyui wan siginans Babilunya! Falangfei ay sadili! Wa masine nu kabul am aroro sa sangay taw Babilunya at ngay asalanan. Buknga wan laman namasud au talun Babilunya kata at ngay nafakamulun.

Sakaryas 10:8

Nanguro au ay namaful ku ngay taw Matuyan wan namalangfe au anya fagayu ay namayu au at ngay kasugfunanan kata ebi taguna.

Sakaryas 2:10

Yawi nalong te, “Fagayu am tagsis Siun, uroi useganani, aroro kadasug au ay namanwan gfagamutan ayu. Ay ginanya ban fag buknga ngayuk talun at namababaun ay at namauseganan angku. Ay kanya ban fagayu ku ngay taw yangay.” Nu nfasludan ban takatanya, sumaful am te, Yawi at Mabalyanan at nasugu angku stae sa ayu.

Deuterunumyu 30:4

Ay Dius Yawi dewa naiyan ayu sa tangayayu fag talun, kanya ban gdog yay gfaful ayu,

At Nafasure 18:20

Useganani am tagsis banwa aroro at kindasug sa anya. Useganani, am Dius at ngay taw, ay at ngay nasugu, ay at ngay taglong, aroro Dius nafaurianan wa anya aroro sat nafakamulun sa ayu at mauri.’ ”

At Nafasure 18:4

Ay arodi nadungug au sadi yak aringang siginans banwa nu glong te, “Ku ngay taw, ayayui sanya ginan fag furuan, laman diam kataip sat ngay asalanan, ay laman ban diam gafaurianan kata anya.