Eremyas 24:6 - Fanawbuid tagsibaliwas Fakayabian

⁶ Gdiri kban anya fagayu laman umke fagmanabayanun ay gfafoli kban anya fagayu sat fagbanwanan. Namadog kban namaksvn anya fagayu ay kwa ban gfaurianan ya. Nantanum kban anya ay kwa ban gdog ya ggulad.

Eremyas 24:6 ပူးပေါင်းရင်းမြစ်များ

Fakasigadan 44:21

“Ay nalong yangay o sa emi te, ‘Tabanani ay arian laman lumag au anya.’

2 Krunika 16:9

Aroro Yawi gdama sas fagdaul daga laman gfabitsug ngay taw at matuyan sa anya. Wa matuyan am ngay nafakamulun. Nu katanya, siginan ban katsi namawayan way ban o gugat.”

Nemyas 5:19

Ay gdarangin au te, “Ku Dius, amatangi angku ay gubuki nu gfakamulun au laman stae fag ngay taw.”

Alubad. 34:15

Yawi gulit tua ngay taw at matuyan ay gdungug tua at ngay darangin.

Alubad. 44:2

Siginan am fagmabalyananun, naiyan o tibak gaban taw at yud gafanud sa emu siginan at furuan, ay nafaurianan o anya fagayu. Dewa katanya, nafabanwan tuo sanya em ngay mangaguyang, ay nafae ramraman tuo.

Isayas 14:1

At matuyan, Yawi ban kafanyu taw Israel ay gdog yangay nanfili at ngay taw, laman gdog yay namanwan sa ebi at talun, ay e ngay taw siginan tibak talun at magamut sanya.

Isayas 60:21

Ay am ngay taw ban umsik matuyan tua, ay kanya ban fagayu gagbilug at talun kabavn. Kanya fagayu nafakata au sik tanum ku natanum laman gfalag au ku fagmasineun.

Eremyas 1:10

Ay katsi gfili au emu laman namoyung o sa sangay talun at ngay taw ay sa sangay fagfagtainanan te, tiba ban si ayu umfaurianan ay umkamin ay umrasras ay e nangaiyan, ay tiba ban umlindug tua ay umkaksvn.”

Eremyas 12:15

Dewa katanya, gdog kyay ban kafanyu kanya fag ngay talun at ngay taw ay gfafoli sa anya at ngay daga.

Eremyas 16:15

Nu bunway, kata way ban tuy nu gfatuyanan: ‘Gfatuyanan au sas Yawi, tagleleg fag Dius at nafaduksun ngay taw Israel siginans fawalan fag alvngvdan fag talun, ay sa sangay talun nu inda nu gfasaruayan anya fagayu.’ Aroro namafoli kban anya fagayu sa ku nafon sat ngay mangaguyang fag talun.

Eremyas 21:10

Nafalganan kwan namadasug sik faurianan ste fag furuan, abat ngate, fagmasineun. Ay namagbilug kban anya sas Babilunya at fun, ay kanya nangirug. Au, Yawi, taglong tuy.’

Eremyas 23:3

Namaful kban ku ngay taw at sawad siginan sangay talun nu inda nu gfasaruayan au anya fagayu, ay namafoli kban sat sadili fagbanwanan ay kanya ban fagayu gdog yay nangayu.

Eremyas 29:10

Yawi glong te, “Nu nlangfe ban fituk safuluk banwa talun Babilunya nu gagbilug ayu, kafoli kban sa ayu ay namafasludan kban ku nafatuyanan te, namafoli au ayu sa ay fagbanwanan.

Eremyas 31:28

Ebi nafaurianan au, ay nafamin ay narasras ay naiyan anya fagayu, dewa katanya, namadog kyay ban namalindug ay namaksvn.

Eremyas 31:4

Gfadog kyay namalindug ayu kata sik baguina. Ay gdog yay ban am gfalelegan ay ngay afud bilug, laman guseganan am ay gfawang fagfadkalinganun.

Eremyas 32:37

namaful kban ku ngay taw siginans fagayu talun nu inda ku fagfasaruayanan anya fagayu. Ay nantaban kban anya fagayu stae fag furuan ay kanya ban fagayu gbanwan manabayan.

Eremyas 32:41

Kaylat au namakamulun sa anya fagayu at masine ay sas fagdaul ku amatanganan namabanwan au anya fagayu stie fag talun.”

Eremyas 33:7

Namauli kwan ngay taw Israel ay ngay taw Uda siginan at fagatabananan, ay namawat kyay ban gayvd at furuan daul kata ebi.

Eremyas 33:9

Ay nu nfasludan ban takatanya, furuan Erusalem ban gfauseganan angku. Ay fagayu ban talun sas fagdaul daga gtadtaruyan kalimu nu nadungug te, furuan Erusalem e fagmasineun wan, ay maramraman, ay e fagmanabayanun siginan angku.”

Eremyas 39:12

“Nantaban o Eremyas ay alagai fia anya. Ay foni fagayu at fagetun.”

Eremyas 42:10

‘Nu gbanwan tua ban am gugat ste fag talun, gfadog kyay ban gfalindug ayu ay kwa ban gfaurianan ya ayu. Gtanum kban ayu ay kwa ban ggulad ya. Aroro at matuyan, anbalu au sa ku nafadasug sa ayu fag faurianan.

Esekyel 36:24

“ ‘Namul kban ayu siginan tibak talun ay namafoli kban ayu sa ay talun.

Amus 9:14

Ay gfafoli kban ku ngay taw Israel sat talun siginan at fagatabananan. Ay kanya ban fagayu gdog yay nangawat at ngay furuan kinrasras wan ay gbanwan sanya. Ay kanya ban fagayu nananum wat ubas laman e fanginum tua fanlangu. Ay nananum yangay ban sat ngay fagtanuman laman ban at fakonun.

Deuterunumyu 11:12

Ay Dius Yawi galaga gugat ay gulit sanya fag daga kayu menit ay fagngabak banwa.

1 Pedru 3:12

Tam Fun at fagdamaun at matuyan tua fag ngay taw, ay kanya masakit nu gdungug at ngay darangin. Dewa katanya, fagayu tagfakamulun at mauri, at fawayan way.”