1 Uan 1:2 - Fanawbuid tagsibaliwas Fakayabian

² Tagfon leleg ansure, ay gfatuyan ami te, nalag ami fia anya. Gfoyung ami te, kanya gfon leleg at yud e fakatabuan, ay siginans fakasigadan gfaudgufudan gugat at Mama ay abandi ansure sa emi.

1 Uan 1:2 ပူးပေါင်းရင်းမြစ်များ

Uan 1:18

Kabavn we taw nalag Dius. Ay dewa katanya, at mafilian fag Baguama at nafatoglag Dius sas fagayu taw, kanya Dius yangay ay gbanwan sit Mama.

Uan 1:4

Kafag Longan leleg, ay kafag leleg kanya wan fagmayamagun sas fagayu taw.

Uan 10:28

Gfon au anya leleg at yud e fakatabuan, ay kanya ban kabavn di gafaurianan, ay nusnga sinu we maago anya siginan ku daluap.

Uan 14:6

Isus glong anya te, “Au wan dalan ay at matuyan ay leleg. We taw madasug sa ku Mama nu dakway ban tumaban.

Uan 15:27

Ay am yangay ban ku tagfatuyan sas fagayu taw, aroro siginan ngays fakasigadan gadgaloan watam gugat.”

Uan 16:28

Siginan au ku Mama ay andasug au ste swa daga, ay katsi glo kwan ste ginan ay kafoli kwan sa ku Mama.”

Uan 17:3

Katatuy sik taw nu e leleg at yud e fakatabuan: nu natoglag emu te, o wan at matuyan fag Dius, ay nu natoglag yangay angku am nasugu, Isus, am nafili fag Fun.

Uan 17:5

Nu katanya, Mama, fauseganani yangay angku sam day tigyangan kata gina ta magamut, gina yud ankawat fagdaul daga.

Uan 19:35

Ay nalag au at kinfasludan sas Isus, ay nafoyung au sa ayu. Ku ngay nalong matuyan ay nafoyung au sa ayu takatanya laman gafanud yangay am.

Uan 21:14

Kanya at fatulu ginan Isus nu gfalag anya sat ngay tagadal siginan nu nadog naleleg.

Uan 3:13

We naulul sas banwa nu bunway au, Taw at Baguama, at natustus siginans banwa.

Uan 7:29

Au, toglag ktua anya aroro siginan au anya, ay kanya wan at nasugu angku.”

Uan 8:38

Au, gfoyung au ku Mama at nafalag sa angku, ay am, gfakamulun am ay nadungug siginan ay mama.”

Fakamulun 1:22

gfasigad siginans Uan nu gfasurung sitsigon nu e gfabat Isus sas banwa. Ay kanya ban sik tagfatuyan yangay sabaliwas Isus nu gdog gleleg.”

Fakamulun 10:41

Isus nu kasure, sa way lang emi, Dius at ngay nafili, laman tagfatuyan ban sabaliwa anya. Ay nafasfuan ami anya gfangon ay ginum gina kanya nadog wan naleleg.

Fakamulun 2:32

Ay at foyungan we tiba nu bunway Isus, Dius at nafadog nafaleleg ay natuyan ami te, kanya nadog naleleg.

Fakamulun 3:15

Ay nafabul am tagagbilug tam leleg. Dewa katanya, Dius nafadog yay nafaleleg anya, ay mafatuyan ami sabaliwa anya.

Fakamulun 5:32

Gfatuyan ami te, matuyan em ngay nalag. Ay at Masine fag Falad, Dius at nafon sas fagayu tagfaning anya, gfatuyan yangay.”

Ruma 8:3

Dius nafakamulun Muisis at Faugali at fagyudun makatu, aroro kafag faugali anmomuy siginans asalanan at fagmabalyananun, ay wa nakatu gfalfas antam. Dius nasugu at Baguama kata sik taw tagasalanan, laman sik fanggalangun aroro sa tam asalanan, ay nu katanya, Dius nafatabu wan asalanan at fagmabalyananun. Ay at fagnafasteun swa daga laman gfoyung te, asalanan we fagmabalyananun ya.

Galasya 4:4

Dewa katanya, gina andasug at nafalganan fag menit, Dius nasugu at baguama ste swa daga. Kanya ansalug siginan sik mangena, ay gugali gfaning Muisis at Faugali.

1 Timuteu 3:16

Mayamag te, e nafasure at madulo sabaliwa tam fagafanudun: Kanya nsure, ay ansik taw fia. At Masine fag Falad nafatuyan sabaliwa anya, ay ngay tagbarita nalag anya. Sas fagayu talun e nafamoyung wan sabaliwa anya, ay ngayu tagafanud sa anya sas fagdaul daga, ay Dius nafabat anya sat fagmasineun.

2 Timuteu 1:10

Ay kafag fagmagalangun ansure gina tam tagfalangfe tam Fun Isus andasug. Kanya nababo fakabulun ay nafadasug at yud e fakatabuan fag leleg, ay nafayamag takatanya siginan at Masine fag Barita.

Titu 1:2

Tuy fag fagsafulun ay fag fagafanudun tagfon antam fagsegun te, e leleg ban tam at yud e fakatabuan. Kanya fag leleg Dius at nafatuyanan gina yay yud e fagdaul daga, ay kanya di kamuag.

1 Pedru 5:1

Maksvn nu glong au sa ayu tagfagtainan ngay tagafanud te, au sik fagtainan kyangay, at nalag tam Fun Isus at ngay naidapanan, ay e afud kyangay at fagmasineun takadasug yay ban.

1 Uan 1:1

Griruk ami sa ayu em nadungug sabaliwa Tagfon leleg fag Longan. Ay siginans fakasigadan kafag Longan sanya wan, ay nadungug ami fia, ay nalag ay nated anya.

1 Uan 2:25

Nu katanya, mul tua ban am at fatuyanan fag leleg at yud e fakatabuan.

1 Uan 3:5

Nasaful am te, Isus at fagindasugun, laman namalyam tam asalanan. Ay kanya di e asalanan.

1 Uan 3:8

Ay fagayu tagfataglayun gasalanan, kanya Satanas way at taw. Aroro siginans fakasigadan Satanas gfakamulun gugat asalanan. Ay Dius at Baguama at fagindasugun, laman namamin Satanas at fakamulun.

1 Uan 4:14

Nalag ami fia, ay gfatuyan ami te, Dius nasugu at Baguama, laman Tagfalangfe fagdaul daga at taw.

1 Uan 4:2

Katatuy ay fagsafulan te, Dius tua at Falad tagbanwan si sik taw: kafag taw nu gfoyung tua te, Isus andasug ste swa daga kata fia sik taw. Kanya at falad siginan fias Dius.

1 Uan 5:11

Katatuy Dius nu gfatuyan: Dius nafon sa antam leleg at yud e fakatabuan, ay kafag leleg siwa at Baguama.

1 Uan 5:13

Nariruk au takatanya, sa ayu fag ngay tagafanud sas Dius at Baguama, laman sumaful am fia te, e leleg tua ban am at yud e fakatabuan.

1 Uan 5:20

Ay nasaful yangay tam te, Dius at Baguama andasug ay nafon sa antam fagsafulun, laman sumaful tam at Matuyan. Ay katsi gbanwan tua tam sit Matuyan aroro gbanwan tua tam sit Baguama Isus tam Fun, aroro sia wan at matuyan fag Dius ay leleg at yud e fakatabuan.