Filipi 4:1 - Tesitamenti Umupwa 1965

¹ Mwe mumwo lelo mwe vamwitu avankundwa vane, mwe mbasamṿile nkani, mwe luseshelo lwane nishipambwi shane, musimpaje vovulo mwa Mwene, mwe vankundwa.

ULufingwi uLupwa

¹ Ishi vhamwitu mwe mbakunzite nu kuvhasamba nkaani, imwe mwe mukumbiiha kuuti mbe nu luseshelo nu kuposheela ishipambwi. Vhankundwa mukwanzilwa kusimpa mwa Mwene uYeesu.

Filipi 4:1 ပူးပေါင်းရင်းမြစ်များ

Matayi 10:22

Vontʼavantu valivapatʼimwe she muli nizina lyanʼine. Nkandʼuno wʼakujimbilila nakuvusilo wʼalipona.

Yohani 8:31

PʼuYesu ahavavuzyaʼavaYuda ve vamwitisile ahati: Inga mukusyelemetela mumazwi gane, pe mukuva mwe vasundikwa vane nalyoli;

iMbombo izya Vhatumwa 11:23

Uwene lwʼafiha nukulolʼuvwila vwa Mwene ahaseshela, ahavajimṿwʼamaha aga kusimpa mulukasamo lwa mumoyo nukusyelemetela mwa Mwene,

iMbombo izya Vhatumwa 14:22

vahajimṿwʼamoyo ga vasundikwa amaha, vahavalambilizya ukusyelemetela mulwitiho nilya kuti tuhondeye ukwinjila mushinamwene sha Mulungu mwidala lya mayimbʼaminji.

iMbombo izya Vhatumwa 2:42

Ve vahumishizyʼinongwa zya vapositili nukuva poka nukumensulanyʼumukati nukuputa.

VaLoma 2:7

Venga vakwumishizyʼukuyikungula kumbombʼinyinza, ve vakuyanzila mumwo uvumwamu nulushindiho nuvusitakufwa, vʼalivapangʼuvulanzi vwa shima shima.

1 VaKolinti 15:58

Mwe mumwo lelo, mwe vamwitu vankundwa vane, muyisimfwaje, mutayugumbane, mulusyajʼukuvombʼimbombo ya Mwene shima, she mumanyile ukuti mutakuyikungula kuzya mupumpu lwe mukumuvombelʼuMwene.

1 VaKolinti 16:13

Simudamushe lelo, musimpe mulwitiho, mujimbaje ishanaṿuli, mugomaje namaha.

2 VaKolinti 1:14

inza she naswe mutumanyile hansi ukuti swe vakuyitimila mumwo imwe, inza she naswe tuliyitimila mulʼimwe pisiku lya Mwene witu uYesu.

VaGalati 5:1

ShʼuChilisiti atutavuzizye ukuti tuve swe vatavushe. Musimpaje lelo ukuti mutahakungwe havili mwikoli lya vuzya.

Filipi 1:27

Nkandi ulujendo lwinyu luvanje inza ṿwe zihondeye mwIvangeli lya Chilisiti, ukuti nashenga nkwinza nukuvenyʼimwe nashenga ndʼukutali niṿwaje izyinyu ukuti musimfile mumupepo woka, ukuti muli numwoyo woka lwe mukulwa pazya lwitiho lwʼIvangeli.

Filipi 1:8

ShʼuMulungu we wʼuhome wane, amanyile ṿwe nkuvasambilʼimwe mushikunzi she shili mumwoyo wa Chilisiti Yesu.

Filipi 2:16

lwe mukulyimihʼizwi lya vulanzi. Zye zizyo nkayitimile mumwo pisiku lya Chilisiti ukuti ntashimbiye shaha, havili ntayikunguye shaha.

Filipi 2:26

Shʼavasamṿile nkani imwe mwenti, ahasaganyaga, she mwiṿuye ukuti avinagʼuwene.

Kolosi 4:12

Akuvalamuhʼimwe nuEpafula wʼafumile kumwinyu, umunyamata wa Chilisiti Yesu, wʼakuvalwila shimʼimwe mumputo zyakwe, ukuti musi mpaje muvulunjisu, havili ukuti mukwilaje mulukasamo lwa Mulungu lwonti.

1 VaTesaloniki 3:13

Pe namoyo ginyu galigoma nukuva masitakulongwa muvufinjile kuminso ga Mulungu uTata swenti, lwʼuMwene witu uYesu akwinza poka navafinjile vakwe vonti.

2 VaTesaloniki 2:15

Pe lelo, mwe vamwitu, musimpaje, muzilemaje zye muposheleye zye tuvasambilizizyʼimwe namazwi namwa kalata witu.

2 Timoti 2:1

Iwe lelo we mwana wane, gomaga muvwila vwe vuli mwa Chilisiti Yesu.

VaHebuli 10:23

Twumishizyaje ukuhomeshezyʼulusuvilo lwitu shisitakuyugumbana, she mutungamu uwene wʼafinzile ulumfingwi lunulu kulʼiswe.

VaHebuli 3:14

She tuyipezilʼukuva swe valilani nuChilisiti inga tukwumishizya nkani uvwando vwa lutungamilo ukuvufishila uvulunjisu.

VaHebuli 4:14

Pe lelo she tuli nawo uwashiputʼumupiti, wʼapulunkinye zyonti izya kumwanya, uYesu uMwana wa Mulungu, pʼukwo lelo tulwumishizyajʼulwitiho lwe tukuluyanga.

2 Peteli 3:17

Imwe lelo, mwe vankundwa, she muzimanyile nzila pe mwandaje uvutezyi vwa vasitankomelezyo vutahavasompole nukuvilula mwe mwasimfile.