1 Peteli 1:2 - Tesitamenti Umupwa 1965

² inza shʼuMulungu uTata atalisile nzila ukuvamanya, muvufinjile vwʼuMupepo avapeleye, ukuti musajile nukusansilwa amavanda ga Yesu Chilisiti: Uvwila vuve namwe nuvwihalo vuṿule mumwinyu.

ULufingwi uLupwa

² UTaata uMulungu ávhasavhuuye imwe kulandatana nu lukasamo lwakwe, havhili ávhazelufwizye kwi idala ilya Mupepo waakwe. Ávhomvile vhwevhulo, inga mumushindihaje uYeesu Chilisiti, we ávhazelufwizye na mavhanda gaakwe. UMulungu ayonjezye kuvhafwila uvhwila nu kuuvhapa uvhutehamu ku vhwinji.

1 Peteli 1:2 ပူးပေါင်းရင်းမြစ်များ

Matayi 24:22

Ingʼisiku lilyo lyasitagʼukudumulwa, pe nkandi numʼumuntu atakupona. Nkandi lilidumulwa isiku lilyo avasavulwa ukuti pe valipona.

Matayi 24:24

She pe valilolehaga avachilisiti avashifumbo navakuvwi vashifumbo, valipelaga namamfindango namayele aga kulingʼukuvapuṿwa nave vasavulwa.

Matayi 24:31

Pʼalitumʼavahavizya vakwe ava masajʼamapiti, ve valivunganiha avasavulwa vakwe, valifuma navo kunkungu zye zine, ukufuma kuluvazu lwoka lwa mukwembe ukuvalʼukufiha nakuluvazu ulwamwavo.

Maliko 13:20

UMulungu ingʼasitagʼukudumulʼamanda gugo, pe nkandi numʼumuntu atakupona. Nkandʼaligadumulʼamanda gugo uwene, avasavulwa vakwe vʼavasavuye ukuti vapone.

Maliko 13:22

She pe valiloleha avachilisiti avashifumbo navakuvwi avashifumbo, valipelʼamamfindango namayele aga kulingʼukuvatezya nave vasavulwa.

Maliko 13:27

Pʼalitumʼavahavizya vakwe ve valivunganihʼavasavulwa vakwe, valifuma navo kunkungu zye zine, vonti ukufuma kuluvazu lwoka lwa nsi ukuvalʼukupela kuluvazu lwa kwivingo.

uLuuka 18:7

UwenʼuMulungu lelo pʼatinjʼasitaje ukugoloshezyʼamalandu ga vasavulwa vakwe ve vakuvilishila kukwakwe nashamusanya nashavusiku, wʼakwolovela shisitamulaha kuli vuvo?

iMbombo izya Vhatumwa 15:18

ṾwʼakuyangʼuMwene wʼakuzimanyisya zinizi ukufuma he hali.

iMbombo izya Vhatumwa 2:23

we wuyo lwʼatumwa inza shʼuMulungu akasime nzila, havili inza shʼamanyinsinye ukufuma he hali, wʼimwe mwamuhomeleye pashihovenkanyo ninyove zya vantʼavasitankomelezyo, muhamumugoga,

iMbombo izya Vhatumwa 20:32

Shinishi lelo nkuvaviha munyove zya Mulungu namwizwi lya vwila vwakwe, uno wʼali namaha weka aga kuvapa poka navafinjile vontʼuvupwano vwinyu.

VaLoma 1:5

we wuyo tuposheleye mumwakwe Uvwila nuvwapositili uvwa kumulonchela ava kuzilandata izya lwitiho mwizina lyakwe munkolo zyonti,

VaLoma 1:7

kuli vonti avankundwa va Mulungu ava mu-Loma, avitwa avafinjile: Uvwila nuvwihalo vuvanje namwe vwe vukufuma kwa Mulungu uTata swenti na kwa Mwene uYesu Chilisiti.

VaLoma 11:2

UMulungu atavatazilʼavantu vakwe ndali, vʼavalulumiye hali. Ingavangʼimwe mutazimanyile zyʼukalata akuyanga pazya Eliya pala, inza shʼamulonjeleyʼuYisilayili kwa Mulungu, ahati:

VaLoma 11:28

PazyʼIvangeli ve valugʼavene, ukuti imwe mupone, nkandi pazya vusavulwa ve vankundwa she vafumile muvayise.

VaLoma 15:16

ukuti imbe ne muvomṿi wa Chilisiti Yesu kuvakunzi nukuva ne muvombezi muvwashiputo vwIvangeli lya Mulungu; ukuti avakunzi vavanje mputile ya kushela ye yizelufile mwa MupepʼuMufinjile.

VaLoma 16:19

Nkandi umushinzi winyu wukumusile mwonti. Zye nkuseshela nkanʼine. Ine nyene nkasime ukuti muzimanyinsanyaje nkani izya vwinza, havili ukuti muvanje mwe vadedevazu kuzya mbivi.

VaLoma 16:26

shinishi nyene pe zyinzilʼukuloleha apazelu muvakalata va vakuvwi inza shʼuMulungu wa shima alajizizye nzila ukuti zimanyishe, shʼatili mwʼavakunzi vonti vakonzelaje kuzya lwitiho;

VaLoma 8:13

Shenga mukulandata izya muvili wa mbivi pe mulifwa. Apene nyene ingʼimbombo zya muvili wa mbivi mukuzigoga nuMupepo, pe mulilandila.

VaLoma 8:33

Pʼunanu wʼangavalonjelela zimʼavasavulwa va Mulungu? ShʼuMulungu wʼakuvatahʼuvugolosu.

1 VaKolinti 1:30

Nkandʼimwe muduvusile mumwakwe wuyo mwa Chilisiti Yesu, wʼuMulungu amupezile ukuva njele kulʼiswe nuvugolosu nuvufinjile nuvutavuzi,

1 VaKolinti 6:11

Namwe vamo she mwali vovulo. Nkandi shinishi mugezile, muzelufile, mugolosheye mwizina lya Mwene witu uYesu Chilisiti namwa Mupepo wa Mulungu witu.

2 VaKolinti 10:5

lwe tukuzimongolanya insivo niṿintu ṿwonti ṿwe ṿikwimilila mwidala lya vumanyinsanyi vwa kumumanyinsanyʼuMulungu mumwo. Zyonti insivo zya munsi tukuzifunga ukuti zikonzaje kwe kwa Chilisiti.

Kolosi 3:12

She mwe vasavulwa va Mulungu avafinjile avankundwa, ishi pe muzwalaje ulupepelezyo lwa muhati, nuvutonsu nuvwahayisye nuvutehamu nukujimbilila.

2 VaTesaloniki 2:13

Ilelo pe pakuti shima tuvagwilajʼulupi imwe kwa Mulungu, mwe vamwitu vankundwa va Mwene, shʼuMulungu avasavuyʼimwe he hali ukuti muvwagajʼuvupokwa muvufinjile vwʼakupelʼuMupepo namulwitiho lwa kuvwitihʼuvwanalyoli.

2 Timoti 2:10

Mwe mumwo lelo nkujimba muli zyonti she nkuvakumbuha avasavulwa, ukuti vope vafishe muvupokwa vwe vuli mwa Chilisiti Yesu poka nuvumwamu vwa shimashima.

uTiiti 1:1

UPavuli umunyamata wa Mulungu, umwapositili wa Yesu Chilisiti, ne wa kuluvombelʼulwitiho lwa vasavulwa va Mulungu muvumanyinsanyi vwa vwanalyoli vwe vukulandatana nuvunyilaMulungu,

VaHebuli 10:22

mwe mumwo tupalamile lelo swe va moyo ga vwanalyoli, swe lutuhozilʼulwitiho, swe vamoyo ge gasansilwe uvusansilwa vula vwe vukuzimanjizya inyenyezyʼimbivi, swe tugezile mumuvili naminzʼamazelu.

VaHebuli 11:28

Mulwitiho ahayananyʼuPasa nukusansilʼamavanda, ukuti umugogavahatote ula atahavapalamansye avene.

VaHebuli 12:24

nakwa Yesu umulamulanyi wa lwitinkano ulupwa, nakumavanda aga kusansilwa ge gakuyangʼinyinza ukulusya aga Hebeli.

VaHebuli 5:9

Ilelo lwʼalunjiha, pʼahava wa kuvapelelʼuvupokwa vonti venga vakumusajila wuyo,

1 Peteli 1:14

Inza shʼavana va lusajilo mutayiholanyaje nimpapilo zyinyu zye muhapapilaga lulwo muvusitavumanyinsanyi,

1 Peteli 1:19

nkandi nage ma vanda amagomu aga Chilisiti ge gali fwe ngau ga hagonzi ahasitaṿilema nahasitamazota.

1 Peteli 1:20

Uwene asavulilwe nzila lwʼinsʼino yishili ukwalwa, nkandʼahaloleha kumaha ga kumpelela pe pazyinyu.

1 Peteli 1:22

Ilelo she muzelufizyʼamoyo ginyu mulusajilo lwa vwanalyoli ukuti mukundanʼishikunzi ishisitamafuji isha vanamuntu, mwe mumwo lelo mukundane numwoyo wonti shisitakutozoha.

1 Peteli 2:9

Nkandʼimwe mwe luho ulusavulwa, mwe vwashiputo vwa shimwene, mwe vantʼavafinjile, mwe vantu va nsavo yakwe, ukuti mukumusyajʼimbombʼinyinza izyakwe wuyo, wʼavavilishiye ukuvafumwa mushisi ukuti mwinjile muvuzelu vwakwe uvwa kusukumila.

2 Peteli 1:2

Uvwila vuvanje namwe nuvwihalo vuṿulaje muvumanyinsanyi vwa kumumanyʼuMulungu nuYesu uMwene witu.

2 Yohani 1:1

Ne songo, nkukusimbila we mwantanda wa munyimṿwila umusavulwa navana vaho, vʼine mbakunzite muvwanalyoli, te nene neka ndali, nkandi vonti ve vavumanyile uvwanalyoli.

2 Yohani 1:13

Avana va muzuna waho umusavulwa vakukulamuha. Amen.

uYuuda 1:2

Ulupepelezyo nuvwihalo nishikunzi ṿivanje kumwinyu.