LUKE 17:2 - Navajo Bible

² Díí áłchínígi át'éego a'ohgo ádaa nitsídaakeesgo dashoodlánígíí ła'da bąąhági át'į́ ájiilaago, tsé daashjéé' hazéédéet'ą́ągo, tónteel biih hodi'yoolghango há yá'át'éeh doo nít'éé'.

LUKE 17:2 ပူးပေါင်းရင်းမြစ်များ

ISAIAH 40:11

Na'niłkaadii nahalingo bidibé ya'ałtso'; bigaan yee dibé yázhí áłah ánáyoodlííł, áádóó bijéíts'iin yíyółtą'go neiijaah, índa ádaałts'íísígíí bimá yił hazhó'ó yaa áhályą́.

ZECHARIAH 13:7

Diltłish nílíinii, t'áadoo íłhoshí, nídiidáahgo shina'niłkaadii bik'ijį' nílį́į le'. Diné shíighah sizíinii bik'ijį' nílį́į le', ní t'áá ałtsoní bee Bóhólníihii. Dibé da'níłts'ą́ą́góó taidoojah biniyé na'niłkaadii bił nizdííłhał. Áádóó dibé yázhí danilínígíí bik'ijį' nishłį́į doo.

MATTHEW 17:27

Ákondi doo ákǫ́ǫ́ át'éii doo yee nihaa nídadóot'įįłígíí biniyé be'ek'idgóó dínááh, áádóó áadi łóó' bee hahadleehí taah dííłdił, áko łóó' áłtsé háínílo'ígíí bizéé' ąą íinilaago béeso, shékel wolyéhígíí, bizéé' si'ą́ą doo; éí dah didíí'áałgo bee shá índa t'áá ni ádá ni'díílééł.

MATTHEW 18:10

Díí áłchínígi át'éego a'ohgo ádaat'éii ła' dajiinohłáa dooleełgi bits'ąą ádaa ádahołyą́, háálá ánihidishní, Éí diyingo nidaal'a'í baa ádahalyáanii yá'ąąshdi dahólǫ́, éí t'áá áłahjį' shiTaa' yá'ąąshdi hólóonii yił da'ahiníl'į́.

MATTHEW 18:14

T'áá ákót'éego nihiTaa' yá'ąąshdi hólóonii díí áłchínígi át'éego a'ohgo ádaat'éii doo ła' ádoodįįł da nízin.

MATTHEW 26:24

Diné Silį́į'ii t'áá bá bee ak'e'ashchínígíí bik'ehgo ábidi'doolnííł, nidi Diné Silį́į'ii ninázhdiní'ánígíí éí doo hojooba' ájíníi da! Éí dinéhígíí t'áadoo ho'dizhchį́į́jígo há yá'át'ééh nít'éé'.

MARK 9:42

T'áá háiida díí áłchínígi át'éego a'ohgo ádaa nitsídaakeesgo dashoodlánígíí ła'da bąąhági át'į́ ájiilaaígíí, t'áá hó tsé daashjéé' nitsaii hazéédéet'ą́ągo tónteel biih hodi'yoolghanjígo, há yá'át'éeh doo.

JOHN 21:15

Da'jííyą́ą'go Jesus, éí Sáíman Peter áyidííniid, Sáíman, John biye' nílíinii, da' díidíígíísh biláahgo ayóó'áshííní'ní? Áko, Aoo', Bóhólníihii; ayóó'ánósh'níigo nił bééhózin, bizhdííniid. Áádóó ánááhodoo'niid, Shidibé yázhí ba'íłtso'.

I CORINTHIANS 9:15

Nidi díí kót'éego bee shá haz'ánígíí doo ła' choiséł'įįd da, doo nidi shá ákódazhdoolííł biniyé bee ak'e'ashchį́į da. Háálá bee shaa hodzosdli'ígíí doo nahjį' nididoot'ááłgóó biniinaa dadeestsaałjígo nidi aláahgo shił t'áá áko.

I CORINTHIANS 9:22

Bi'oodlą' doo dabidziilígíí Christ yéego dayoodlą́ą doo biniyé bíni' bá ádahashłéehgo t'áá bígi át'éego doo shidziilgóó í'diishyaa. T'áá ałtsojį' t'áá ádzíłtso t'áá ha'át'éhígoda ła' Christ yisdádahodiyoonił biniyé t'áá hó ádajít'éhígi át'éego í'diishyaa.