ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 3:4 - ದೇವ್ನಿ ಖ್ಹಾಚಿ ವಚನ್

⁴ ಕದೇಬಿ ಕೊಯ್ನಿ. ಅದ್ಮಿಖ್ಹಾರು ಝೂ಼ಟು ರ‍್ಹಯುತೋಬಿ, ದೇವ್ ಎಕ್ಕಸ್ ಜ಼ಣೊ ಖ್ಹಾಚೊ಼. ಪವಿತ್ರ ದಪ್ತರ್‌ಮ ಅಮ್‍ ಲೀಖೈರುಸ್ಕಿ, “ತೂ ತಾರಿ ವಾತೇವ್‍ಮಾಸ್ ನೀತಿವಾಳೊಕರಿ ತೀರ್ಮಾನ್‌ ಹೋಣು. ಹೊಜ಼್ಜತ್‌ ಭಿಡಾನಿವಖ್ಹ್‌ತೆ ತೂ ಜೂತ್‌ನು” ಕರಿ ಲೀಖೈರ‍್ಹುಸ್.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 3:4 ပူးပေါင်းရင်းမြစ်များ

ಮತ್ತಾಯ 11:19

ಅದ್ಮಿನೊ ಛಿಯ್ಯೊ ಆಯೊ, ಯೋ ಖಾಣುಪಾಣಿ ಲ್ಯವಾಳೊ ಹುಯಿರ‍್ಹೊಥೊ. ಅದ್ಮಿಖ್ಹಾರು ಇನ, ‘ಆ ಅದ್ಮಿ ಖಾಣನು ಮರ್‌ತೇಲ್‌ ಅಜು಼ ಪೀಕುಡ್ಕ ಹುಯಿರ‍್ಹೋಸ್! ಶುಂಕ ಮಾಂಗವಾಳನೊ ಅಜು಼ ಪಾಪಿ ಖ್ಹಾರಾನೊ ದೋಸ್ತ್’ ಕರಿ ಬೋಲಾಸ್, ಕತೋಬಿ ದೇವ್ನಿ ಗ್ಯಾನ್ ಖ್ಹಾಚಿಸ್ ಕರಿ ಬೋಲಾನು ಇನ ಕಾಮ್‌ಥೀಸ್‌ ಮಾಲುಮ್‌ ಪಡಾಸ್‌” ಕರಿ ಬೋಲ್ಯೊ.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 20:16

“ಯೋ ಆಯಿನ್, ವಾರ್‌ನ ಲೀರಾಖ್ಯುಥೂತೆ, ಇವ್ಣುನ ಮಾರಿನಾಖಿನ್, ಇನ ದ್ರಾಕ್ಷಿನ ಬಾಗ್‌ನ ಬಿಜಾ಼ವ್ನ ದಿಶೆ” ಕರಿ ಬೋಲ್ಯೊ. ಅನ ಖ್ಹಮ್‌ಜಿನ್‌ ಅದ್ಮಿಖ್ಹಾರು, “ಅಮ್ ನಾಹೊಣು!” ಕರಿ ಬೋಲ್ಯು.

ಯೋಹಾನ 3:33

ಕತೋಬಿ ಕೋಣ್ ಇನಿ ಸಾಕ್ಷಿನ ಮಾನಿಲೇಸ್ಕಿ, ಯೋ ಅಮ್ ಕರಾಥಿ ದೇವ್ ಖ್ಹಾಚು಼ ಕರಿ ಸಾಬಿತ್ ಕರಸ್.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 11:1

ಇಮ್‍ಕತೊ, ದೇವ್ ಇನ ಅದ್ಮೆವ್‍ನ ಝಿಟ್ಕಾರ್‌ದಿದೊಕಿ ಶು? ಕರಿ ಮೇ ಬೋಲುಸ್. ಕದೇಬಿ ಕೊಯ್ನಿ, ಮೇ ಏಕ್‌ ಇಸ್ರಾಯೇಲ್‌ವಾಳೊ ಹುಯಿರ‍್ಹೋಸ್. ಅಬ್ರಹಾಮ್‌ನಿ ಖಾನ್‌ದಾನ್‌ವಾಳೊ, ಬೆನ್ಯಾಮೀನ್ನ ಖೂಮ್‍ವಾಳೋಬಿ ಹುಯಿರ‍್ಹೋಸ್.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 11:11

ಇಮ್‍ಕತೊ ಉಟ್ನುನಾತೆ ಪರಕ್ಮ ಯೆಹೂದ್ಯರ್ ಠೋಕರ್‌ಲಾಗಿನ್ ಇವ್ಣೆ ರಡ್ಕಿಗುಕಿಶು? ಕಾಹೆ ಇಮ್‌ ಕಾಹೆ! ಶನಕತೊ ಇವ್ಣಿ ಗಲತ್‌ನಖ್ಹಾಜೆ ಯೆಹೂದ್ಯರ್‌ನ ಪೇಟ್ನ ಬಳಾಪೊ ಹುವಾನಖ್ಹಾಜೆ ರಕ್ಷಣೆ ಯೆಹೂದ್ಯರ್‌ಕಾಹೆತೆ ಅದ್ಮಿಪರ್ ಆಯು.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 3:31

ಇಮ್‍ಕತೊ, ಅಪ್ಣೆ ವಿಶ್ವಾಸ್‍ಥಿ ಧರ್ಮಶಾಸ್ತ್ರನ ಬಿಣ್‍ ಮತ್ಲಬ್‌ನು ಬಣೈನಾಖೆಸ್‍ಕಿಶು? ಕದೇಬಿ ಕೊಯ್ನಿ. ಅಪ್ಣೆ ಧರ್ಮಶಾಸ್ತ್ರನ ಖಲಿ ಪಾಡಿಧರಿಯೇಸ್.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 6:15

ಇಮ್‍ಕತೊ ಶಾತ್? ಅಪ್ಣೆ ಧರ್ಮಶಾಸ್ತ್ರನಿ ಅಧೀನ್‍ ನಾ ರ‍್ಹೇವ್ಣುತೆ ವಾರ್‌ಖ್ಹಾನಿ ಅಧೀನ್ ಹುಯಿರ‍್ಹಿಯೇಸ್‍ಕರಿ ಪಾಪ್ ಕರೇಜಾ಼ಯ್ಕಿ ಶು? ಕೊಯ್ನಿಕತೊ,

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 6:2

ಇಮ್‌ ಕದೇಬಿ ನಾ ಹೋಣು. ಅಪ್ಣೆ ಪಾಪ್ನ ಭಾಗ್ನ ಮರಿಗಯ, ಅಪ್ಣೆ ಬಿಜೂ಼ಬಿ ಪಾಪ್‌ಮ ಬಚಾ಼ನು ಕಿಮ್?

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 7:13

ಇಮ್‍ಕತೊ ಅಛ಼್ಛುಸ್ ಮನ ಮರಣ್‌ಲಾಯುಕಿಶು? ಇಮ್ ನಾರ‍್ಹಯುತೊ! ಪಾಪಸ್ ಯೊ ಕರ‍್ಯು ಅಛ಼್ಛಥೀಸ್ ಮನ ಉಪಯೋಗ್ ಕರೀನ್ ಪಾಪ್ನೆ ಮರಣ್ ಆವಾನಿತರ ಕರ‍್ಯು. ಅನೇಥಿ ಪಾಪ್ ಇನು ಖ್ಹಾಚು಼ ಸ್ವಭಾವ್‌ನ ವತಾಳ್ಯು ಇನಖ್ಹಾಜೆ ಹುಕುಮ್‌ಥಿ ಪಾಪ್ ಯೋ ಕೆತ್ರೆ ಕಠೋರ್‌ಕರಿ ಮಾಲುಮ್‌ ಪಡಾಸ್‌.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 7:7

ಇಮ್‍ಕತೊ ಅಪ್ಣೆಶಾತ್ ಬೋಲಿಯೆ ಪಾಪ್ ಧರ್ಮಶಾಸ್ತ್ರಸ್ ಹುಯಿರ‍್ಹೂಸ್ಕಿಶು? ಕದೇಬಿ ಕೊಯ್ನಿ. ಕತೋಬಿ ಧರ್ಮಶಾಸ್ತ್ರನ ಮ್ಹೇಲಿನ್ ಬಿಜ಼ ಖೆವೆಥೀಬಿ ಪಾಪ್‍ಕತೊ ಶಾತ್‌ಕರಿ ಮನ ಖ್ಹಮ್‍ಜಿಲ್ಯವಾನ ಹುಯುಹೋತ್ ಕೊಯ್ನಿ. “ಬಿಜೇಕ್ ಜ಼ಣಾನ ರಾಛ಼ನ ತುಮೆ ಆಖ್ಹ್‌ನಾಕರ‍್ನು.” ಕರಿ ಧರ್ಮಶಾಸ್ತ್ರ ಬೋಲ್ಯುತೆ ಇನಖ್ಹಾಜೇಸ್ ಯೋ ಮನ ಮಾಲುಮ್‌ಪಡ್ಯು.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 9:14

ಇಮ್‍ಕತೊ ಅಪ್ಣೆ ಶಾತ್ ಬೋಲಿಯೆ? ದೇವ್ ಠಗಾವಾಳೊಕೀ ಶು? ಕದೇಬಿ ಕೊಯ್ನಿ.

1 ಕೊರಿಂಥ 6:15

ತುಮಾರು ಶರೀರ್ ಕ್ರಿಸ್ತನು ಭಾಗ್‍ಖ್ಹಾರು ಹುಯಿರ‍್ಹುಸ್‌ಕರಿ ತುಮೂನ ಮಾಲುಮ್ ಕೊಯ್ನಿಕಿ ಶು? ಅಮ್‍ರ‍್ಹವಾಪರ್ ಕ್ರಿಸ್ತಾನ ಭಾಗ್‍ಖ್ಹಾರನ ಲೀನ್ ವ್ಯಬಿಚಾರಿಣಿನ ಭಾಗ್‍ನಿಜೋ಼ಡ್ಮ ಮಳಾವನು ಬರಬರ್‌ಕಿ ಶು? ಕದೇಬಿ ನಾ ಕರ‍್ನು.

2 ಕೊರಿಂಥ 1:18

ತುಮೆ ದೇವ್ನ ವಿಶ್ವಾಸ್ ಕರಾವಾಳ ರ‍್ಹಯಾತೊ, ಹಮೆ ತುಮುನ ಎಕ್ಕಸ್ ವಖ್ಹತ್‌ಮ “ಓಹೊ” ಬಿಜು಼ “ಕೊಯ್ನಿ” ಕರಿ ಬೋಲ್ಯ ಕೊಯ್ನಿಕರಿ ತುಮೆ ವಿಶ್ವಾಸ್ ಕರ್ಶು.

ಗಲಾತ್ಯ 2:17

ಕತೋಬಿ ಅಪ್ಣೆ ಯೇಸು ಕ್ರಿಸ್ತಥಿ ನೀತಿವಾಳ ಕರಿ ತೀರ್ಮಾನ್ ಹುವಾನಿ ಕೋಶಿಶ್ಮ ಅಪ್ಣೆ ಪಾಪಿಕರಿ ದೆಖಾಯತೊ ಕ್ರಿಸ್ತ ಪಾಪ್ನ ಮದತ್‌ಕರಾವಾಳೊ ಕಿಶು? ಕೆದೇಬಿ ಕೊಯ್ನಿ.

ಗಲಾತ್ಯ 2:21

ಮೇ ದೇವ್ನ ವಾರ್‌ಖ್ಹೊನ ಝಿಟ್ಕಾರುಕೊಯ್ನಿ. ಕತೋಬಿ ಧರ್ಮಶಾಸ್ತ್ರಥಿ ನೀತಿವಾಳ ಹುಯೆಜಾ಼ಯ್‌ ಕತೊ ಕ್ರಿಸ್ತನು ಮರಾನು, ಫಾಯಿದೊಸ್ ಕೊಯ್ನಿಕರಿ ಬೋಲೆಜಾ಼ಯ್.

ಗಲಾತ್ಯ 6:14

ಮನತೋಬಿ ಮಾರೊ ಪ್ರಭು ಯೇಸು ಕ್ರಿಸ್ತನಿ ಶಿಲ್‌ಬೇನಿ ಬಾರೇಮಸ್ ಪಣ್ಕಿ ಬಿಜು಼ ಖೆವಾಥೀಬಿ ಊಚು಼ ಹೋಣುಕೊಯ್ನಿ. ಇನೇಥಿ ಮೇ ಜಗತ್ನಖ್ಹಾಜೆ ಮರಿಗೊ; ಜಗತ್‌ ಮಾರಖ್ಹಾಜೆಬಿ ಶಿಲ್‌ಬೇಪರ್ ಮರಿಗಯುಥು.

1 ತಿಮೊ 3:16

ಅಪ್ಣ ದೇವ್‌ಮ ಭಕ್ತಿನು ಜಿವ್ಣನು ಖ್ಹಾಚಿ ಗಪ್ಲತ್ ಗುಮಾನಿಕೊಂತೆ ಘಣಿ ಮೋಟಿ ಹುಯಿರ‍್ಹೀಸ್, ಕ್ರಿಸ್ತನೆ ಅದ್ಮಿನಿ ರೂಪ್‌ಮ ಅಪ್ಣುನ ದೆಖಾಯೊ, ಯೋಸ್ ಪವಿತ್ರಾತ್ಮನ ವತಾಳ್ಯೊ, ಸೊರ್ಗಾನ ದೂತರ್‌ಥಿ ದೆಖೈಗು. ಅಲ್ಹಾವ್‌ಅದ್ಮಿವೋನಿ ಬೀಚ್ಮ ಯೊ ಬೋಲಿವತಾಳೈಗೊ, ಜಗತ್‌ ಇನಾಪರ್ ವಿಶ್ವಾಸ್ ಕರ‍್ಯು, ಅಜು಼ ಇನ ಮಹಿಮೆಥಿ ಸೊರ್ಗಾಮ ಪಡೈಗೊ.

ಪೌಲನೆ ತೀತನ ಲೀಖ್ಯೋತೆ ಚಿಟ್ಟಿ 1:2

ಆಹೈರುತೆ ಖ್ಹಾಚ ಜಿ಼ಂದ್‌ಗೀನ ಭರೋಖ್ಹಾಪರ್ ಆಧಾರ್ ಹುಯಿರ‍್ಹೂಸ್. ದೇವ್ ಕೆದೇಬಿ ಝೂ಼ಟಿ ಬೋಲಾಕೊಯ್ನಿ. ಯೋ ಜಿವ್ಣಾನಿ ಬಾರೇಮ ಅಪ್ಣುನ ದಿಶೆ ಕರಿ ಹಗಾಮ್ನ ಪಹಿಲೆಥೂಸ್ ವಾಗ್ದಾನ್‌ ಕರಿರಾಖ್ಯೋಸ್.

ಇಬ್ರಿ 6:18

ದೇವ್ನಿ ವಾಗ್ದಾನ್ ಅಜು಼ ಆಣ್. ಆ ಭೇಬಿ ಕೆದೆಕೆದೇಬಿ ರ‍್ಹವಾನಿ ಆಧಾರ್ ಖ್ಹಾರು. ಶನಕತೊ ಅನಿಬಾರೇಮ ದೇವ್ ಅಪ್ಣುನ ಠಗಾವವಾಳೋಸ್ ಕಾಹೆ. ಇನಖ್ಹಾಜೆ ಆಖ್ಹ್‌ರೊ ಲೀಲೆವ್ಣುಕರಿ ನಾಶಿ ಆಯಿನ್ ಅಪ್ಣ ಖ್ಹಾಮ್ಣೆ ಮ್ಹೆಲಿರಾಖ್ಯೋತೆ ಭರೋಖ್ಹಾನ ಧರಿರಾಖ್ಯತೆ ಅಪ್ಣುನ ಘಣು ಹುಮ್ಮಖ್ಹ್‌ ಮಳನಿತರಹುಯು.

1 ಯೋಹಾನ 5:10

ದೇವ್ನ ಛಿಯ್ಯಾಮ ವಿಶ್ವಾಸ್ ಕರಾವಾಳೊ ಆ ಸಾಕ್ಷಿನ ಇನಾಮ ಲೀರಾಖಸ್. ದೇವ್ನ ನಂಬಕೊಂತೆ ಯೋ ಇನ ಝು಼ಟೊಕರಿ ಬಣೈರಾಖ್ಯೊಸ್. ಕಿಮ್‌ಕತೊ ದೇವ್ ಇನ ಛಿಯ್ಯಾನಿ ಬಾರೇಮ ದಿದೋತೆ ಸಾಕ್ಷಿಮ ಇನೆ ವಿಶ್ವಾಸ್ ಕರ‍್ಯೊಕೊಯ್ನಿ.

1 ಯೋಹಾನ 5:20

ದೇವ್‌ನೊ ಛಿಯ್ಯೊ ಆ ಜಗತ್‌ಮ ಅಯಿನ್ ಅಪ್ಣೆ ಖ್ಹಾಚೊ಼ ಹುಯಿರೋಸ್ತೆ ದೇವ್ನ ಮಾಲುಮ್‌ ಕರಿಲ್ಯವಾನಿಘೊಣಿ ಅಪ್ಣುನ ಖ್ಹಯಾಲ್ ದೀರಾಖ್ಯೊಸ್‍ಕರಿ ಅಪ್ಣುನ ಮಾಲುಮ್‌ಛಾ಼. ಅಪ್ಣೆ ದೇವ್‌ನೊ ಛಿಯ್ಯೊ ಹುಯಿರೋತೆ ಕ್ರಿಸ್ತಮ ರ‍್ಹಾವಾನ ಖ್ಹಾಚ ದೇವ್‌ಮ ರ‍್ಹಾವವಾಳ ಹುಯಿರ‍್ಹಾಸ್. ಯೋ ಕ್ರಿಸ್ತಸ್ ಕದೇಬಿ ರ‍್ಹವಾನು ಹರ್‌ಹಮೇಶಾನೊ ಜಾನ್‌ಬಿ ಹುಯಿರ‍್ಹೊಸ್.

ಪ್ರಕಾಶಿತ್ 3:7

ಫಿಲಿಡೇಲ್ಫಿಯಾಮ ಛಾ಼ತೆ ಸಬೆನ ದೂತನ ಅಮ್‍ಲೀಕ್: ಪರಿಶುದ್ಧಬಿ, ಖ್ಹಾಚೊ಼ಹುಯಿರ‍್ಯವಾಳೊಬಿ, ದಾವೀದನು ಬೀಗಾನು ಕೀಲಿ ಲೀರಾಖವಾಳೋಬಿ, ಕಿನೇಥೀಬಿ ನಾ ಮೂಚ಼ನಹೋಣುತೆ ಇಮ್‌ ಕಾಡವಾಳೊ, ಖೆವಾಥೀಬಿ ಉಖ್ಡಾನ ನಾ ಹೋಣುತೆ ಇಮ್‌ ಮೂಚಾ಼ವಾಳೊ ಹುಯಿರೋತೆ ಶಾತ್‌ ಬೋಲಾಸ್‍ಕತೊ,